(1)

Le hAirteagal 4(1) de Threoir 2011/65/AE, ceanglaítear ar na Ballstáit a áirithiú nach mbeidh na substaintí guaiseacha a liostaítear in Iarscríbhinn II a ghabhann leis an Treoir sin i dtrealamh leictreach agus leictreonach a chuirtear ar an margadh. Níl feidhm ag an srian sin maidir le feidhmeanna díolmhaithe áirithe a liostaítear in Iarscríbhinn III a ghabhann leis an Treoir sin.

(2)

Liostaítear catagóirí an trealaimh leictrigh agus leictreonaigh a bhfuil feidhm ag Treoir 2011/65/AE ina leith in Iarscríbhinn I a ghabhann leis an Treoir sin.

(3)

Is substaint shrianta í luaidhe a liostaítear in Iarscríbhinn II a ghabhann le Treoir 2011/65/AE. Is é 0,1 % luaidhe de réir meáchain an t-uasluach tiúchana inghlactha in ábhair aonchineálacha.

(4)

Le Treoir Tharmligthe (AE) 2018/742 ón gCoimisiún (2) deonaíodh díolúine chun luaidhe a úsáid i sádair de chineál ardteochta leáite, mar a leagtar amach i bpointe 7(a) d’Iarscríbhinn III a ghabhann le Treoir 2011/65/AE. Níor tháinig aon athrú ar raon feidhme na díolúine ó tugadh isteach í. I gcás fhormhór na gcatagóirí trealaimh leictrigh agus leictreonaigh, bhí an díolúine le dul in éag an 21 Iúil 2021.

(5)

I mí Eanáir 2020 agus i mí Dheireadh Fómhair 2020, fuarthas trí iarraidh ar athnuachan ar an díolúine dá dtagraítear in aithris 4 laistigh den tréimhse ama le haghaidh athnuachan a leagtar síos in Airteagal 5(5) de Threoir 2011/65/AE. I gcomhréir le hAirteagal 5(5), an dara fomhír, de Threoir 2011/65/AE, leanfaidh an díolúine atá ann cheana de bheith bailí go dtí go ndéanfaidh an Coimisiún cinneadh maidir leis an iarratas ar athnuachan. Chun meastóireacht a dhéanamh ar na hiarratais a fuarthas, rinneadh staidéar measúnaithe teicniúil agus eolaíoch agus tugadh chun críche é in 2022 (3). Áiríodh comhairliúcháin le páirtithe leasmhara sa mheastóireacht freisin, i gcomhréir le hAirteagal 5(7) de Threoir 2011/65/AE.

(6)

Bhí an díolúine maidir le trealamh leictreach agus leictreonach i gcatagóir 8 ‘feistí leighis diagnóiseacha in vitro’, dá dtagraítear in Iarscríbhinn I a ghabhann le Treoir 2011/65/AE, le dul in éag an 21 Iúil 2023 agus bhí na díolúintí maidir le catagóirí 9 ‘ionstraimí faireacháin agus rialaithe tionsclaíocha’ agus 11 ‘trealamh leictreach agus leictreonach eile nach gcumhdaítear le haon cheann de na catagóirí’, dá dtagraítear in Iarscríbhinn I a ghabhann le Treoir 2011/65/AE, le dul in éag an 1 Iúil 2024. An 20 Eanáir 2023, cuireadh isteach dhá iarratas ar athnuachan le haghaidh chatagóir 9 agus chatagóir 11 laistigh den tréimhse le haghaidh athnuachan a leagtar síos in Airteagal 5(5) de Threoir 2011/65/AE. I gcomhréir le hAirteagal 5(5), an dara fomhír, de Threoir 2011/65/AE, leanfaidh an díolúine atá ann cheana de bheith bailí go dtí go ndéanfaidh an Coimisiún cinneadh maidir leis an iarratas ar athnuachan.. Chun meastóireacht a dhéanamh ar na hiarratais a fuarthas, rinneadh staidéar measúnaithe teicniúil agus eolaíoch agus tugadh chun críche é in 2024 (4). Áiríodh comhairliúcháin le páirtithe leasmhara sa mheastóireacht freisin, i gcomhréir le hAirteagal 5(7) de Threoir 2011/65/AE.

(7)

Thángthas ar an gconclúid sa mheastóireacht ar an athnuachan díolúine a iarradh go n-úsáidtear sádair de chineál ardteochta leáite ina bhfuil luaidhe i bhfeidhmeanna éagsúla trealaimh leictrigh agus leictreonaigh. Tá níos mó ná 85 % luaidhe de réir meáchain sna cineálacha sádair sin agus tá airíonna ríthábhachtacha acu amhail pointe leá ard, seoltacht leictreach, seoltacht theirmeach, insínteacht, friotaíocht creimeadh, nádúr ocsaídiúcháin iomchuí, agus infhliuchtacht.

(8)

Cé go bhfuil ionadaithe aonair agus roghanna malartacha ar fáil go páirteach, ní bheidh réitigh saor ó luaidhe ar fáil, nó ní bheidh siad ar fáil ach amháin le hiontaofacht neamhleor do gach feidhm ábhartha, sna 3 bliana amach romhainn.

(9)

Mar sin féin, úsáidtear go forleathan an díolúine a leagtar amach i bpointe 7(a) d’Iarscríbhinn III a ghabhann le Treoir 2011/65/AE agus uaireanta ní bhíonn aon ghá teicniúil léi. Chun úsáid mhíchuí na díolúine sin a íoslaghdú agus chun meastóireacht atá sainoiriúnaithe d’iarratais a chumasú, is iomchuí an díolúine a roinnt i bhfo-iontrálacha. Rinneadh measúnú teicniúil agus eolaíoch le roinnt babhtaí de chomhairliúcháin le páirtithe leasmhara inar díríodh ar fho-iontrálacha leordhóthanacha a fhorbairt.

(10)

Sainaithníodh sa mheasúnú teicniúil agus eolaíoch dá dtagraítear in aithris 9 seacht réimse feidhme lena gcumhdaítear raon feidhme na díolúine reatha a leagtar amach i bpointe 7(a) d’Iarscríbhinn III a ghabhann le Treoir 2011/65/AE, eadhon idirnaisc inmheánacha i dtrealamh leictreach agus leictreonach (‘TLL’), naisc chomhtháite dísle a cheanglaítear i gcomhpháirteanna TLL, naisc chomhtháite le haghaidh comhpháirteanna seachas dísle atá le suiteáil ar fho-chóimeálacha (siúntaí sádair den chéad leibhéal), ailt sádair den dara leibhéal chun comhpháirteanna a cheangal de chlár ciorcad priontáilte nó de fhrámaí luaidhe, ábhair séalaithe heirméiteacha, sádair de chineál ardteochta leáite i lampaí áirithe, trasduchtóirí fuaime. Déantar na réimsí feidhme sin a shonrú a thuilleadh le coinníollacha teicniúla.

(11)

Ós rud é go bhfuil dóthain ama tugtha chun rannchuidiú le forbairt fo-iontrálacha agus chun oiriúnú dóibh, agus ós rud é gur cheart leanúint de gach réimse ábhartha feidhme a chumhdaítear leis an díolúine is infheidhme faoi láthair a leagtar amach i bpointe 7(a) d’Iarscríbhinn III a ghabhann le Treoir 2011/65/AE a chumhdach leis an díolúine athnuaite, ní mheastar gur ualach riaracháin díréireach ar an tionscal é an deighilt i bhfo-iontrálacha. Chun aon saobhadh suntasach sa mhargadh san earnáil ábhartha a chosc, ba cheart tréimhse a sholáthar chun na réimsí feidhme atá in easnamh a shainaithint. Dá bhrí sin, ba cheart tréimhse bhailíochta ghearrthéarmach a dheonú chun deireadh a chur de réir a chéile leis an díolúine a leagtar amach i bpointe 7(a) d’Iarscríbhinn III a ghabhann le Treoir 2011/65/AE, i gcomhréir le hAirteagal 5(2), an chéad fhomhír, de Threoir 2011/65/AE.

(12)

I gcás na bhfo-iontrálacha, ba cheart tréimhse bhailíochta leordhóthanach a dheonú i bhfianaise chonclúidí an mheasúnaithe theicniúil dá dtagraítear in aithris 9 chun go mbeidh páirtithe leasmhara in ann faisnéis maidir leis na réimsí feidhme a fhorlíonadh. Ba cheart a chur san áireamh sna dátaí éaga an íostréimhse 18 mí roimh an dáta éaga, inar gá iarrataí ar athnuachan a chur isteach i gcomhréir le hAirteagal 5(5), an chéad fhomhír, de Threoir 2011/65/AE.

(13)

Mar gheall ar an athnuachan gearrthéarmach atá fágtha ar an díolúine a leagtar amach i bpointe 7(a) d’Iarscríbhinn III a ghabhann le Treoir 2011/65/AE, is iomchuí dáta éaga amháin a shocrú le haghaidh gach catagóire TLL a leagtar amach in Iarscríbhinn I a ghabhann le Treoir 2011/65/AE.

(14)

Le hathnuachan na díolúine a leagtar amach i bpointe 7(a) d’Iarscríbhinn III a ghabhann le Treoir 2011/65/AE agus tabhairt isteach a fo-iontrálacha, ní lagaítear an chosaint don chomhshaol agus don tsláinte a thugtar le Rialachán (CE) Uimh. 1907/2006 ó Pharlaimint na hEorpa agus ón gComhairle. (5)

(15)

Ba cheart, dá bhrí sin, Treoir 2011/65/AE a leasú dá réir sin,