(1)

Ar na cúiseanna a leagtar amach i gCinneadh (AE) 2024/2669 ón gComhairle (3), chuir an tAontas togra faoi bhráid Bhuanchoiste an Choinbhinsiúin maidir le Caomhnú Fhiadhúlra agus Ghnáthóga Nádúrtha na hEorpa (4) (Coinbhinsiún Bheirn) chun stádas cosanta speiceas an mhic tíre a athrú faoin gCoinbhinsiún sin. Ag an 44ú cruinniú a bhí ag an mBuanchoiste an 6 Nollaig 2024, d’fhormheas sé an togra ón Aontas chun an mac tíre (Canis lupus) a aistriú ó Fhoscríbhinn II (Speicis fána faoi dhianchosaint) a ghabhann le Coinbhinsiún Bheirn go Foscríbhinn III (Speicis fána faoi chosaint) a ghabhann leis an gCoinbhinsiún sin (cinneadh an Bhuanchoiste).

(2)

I gcomhréir le hAirteagal 17(3) de Choinbhinsiún Bheirn, tháinig an t-athrú ar stádas cosanta an mhic tíre i bhfeidhm an 7 Márta 2025.

(3)

Is príomhionstraim í Treoir 92/43/CEE ón gComhairle (5) chun an dúlra a chaomhnú san Aontas, go háirithe I bhfianaise oibleagáidí idirnáisiúnta an Aontais faoi Choinbhinsiún Bheirn. Chun an t-athrú ar stádas cosanta an mhic tíre faoi Choinbhinsiún Bheirn a bheith trasuite i gcreat dlíthiúil an Aontais, ba cheart cinneadh an Bhuanchoiste a léiriú i dTreoir 92/43/CEE.

(4)

Chun cinneadh an Bhuanchoiste a thrasuí, ba cheart an iontráil don mhac tíre a scriosadh ó Iarscríbhinn IV a ghabhann le Treoir 92/43/CEE agus a choigeartú in Iarscríbhinn V a ghabhann leis an Treoir sin, rud a chuirfeadh an mac tíre faoi réir na cosanta dá bhforáiltear in Airteagal 14 de Threoir 92/43/CEE.

(5)

Is é is aidhm do Threoir 92/43/CEE rannchuidiú le háirithiú na bithéagsúlachta trí ghnáthóga nádúrtha agus fána agus flóra fiáine a chaomhnú i gcríoch Eorpach na mBallstát a bhfuil feidhm ag an gConradh maidir léi.

(6)

Le Treoir 92/43/CEE, mar ionstraim i réimse an chomhshaoil, ceadaítear do na Ballstáit bearta cosanta níos déine a choinneáil ar bun nó a thabhairt isteach fad is atá siad ag luí leis na Conarthaí, mar a fhoráiltear in Airteagal 193 den Chonradh ar Fheidhmiú an Aontais Eorpaigh. Dá bhrí sin, chun críocha Threoir 92/43/CEE, tá sé de shaoirse i gcónaí ag na Ballstáit, d’ainneoin an leasaithe a thugtar isteach leis an Treoir seo, stádas cosanta an mhic tíre a choinneáil ar an leibhéal cosanta a thugtar do speicis fána faoi dhianchosaint.

(7)

Ós rud é nach féidir cuspóir na Treorach seo a ghnóthú ach ar leibhéal an Aontais, toisc go gceanglaítear leis gníomh dlí de chuid an Aontais atá ann cheana a leasú, féadfaidh an tAontas bearta a ghlacadh, i gcomhréir le prionsabal na coimhdeachta a leagtar amach in Airteagal 5 den Chonradh ar an Aontas Eorpach. I gcomhréir le prionsabal na comhréireachta a leagtar amach san Airteagal sin, ní théann an Treoir seo thar a bhfuil riachtanach chun an cuspóir sin a ghnóthú.

(8)

Dá bhrí sin, ba cheart Treoir 92/43/CEE a leasú dá réir sin,

(1)

in Iarscríbhinn IV, pointe (a), ‘Ainmhithe’, scriostar an iontráil don speiceas Canis lupus;

(2)

in Iarscríbhinn V, pointe (a), ‘Ainmhithe’, cuirtear an méid seo a leanas in ionad na hiontrála don speiceas Canis lupus:

‘Canis lupus’.