(1)

Sna Treoirlínte Polaitiúla (1) fógraíodh go raibh sé ar intinn ag an gCoimisiún nua catagóir nua de chuideachtaí meánchaipitlithe beaga a thabhairt isteach agus measúnú a dhéanamh ar an rialáil atá ann cheana, agus a bhfuil feidhm aici maidir le cuideachtaí móra, féachaint an bhfuil sí ina hualach rómhór, an bhfuil sí díréireach nó an gcuireann sí bac ar fhorbairt iomaíoch na gcuideachtaí móra. Sa Teachtaireacht uaidh dar teideal ‘Compás Iomaíochais don Aontas Eorpach’ (2), gheall an Coimisiún sainmhíniú nua ar chuideachtaí meánchaipitlithe beaga a mholadh chun rialáil chomhréireach atá in oiriúint do mhéid na gcuideachtaí a áirithiú. Trí chatagóir nua cuideachta den sórt sin a chruthú, ceann atá níos mó ná FBManna ach níos lú ná cuideachtaí móra, a chruthú, bainfidh na mílte cuideachtaí san Aontas tairbhe as bearta saincheaptha.

(2)

I dTeachtaireacht an Choimisiúin maidir le ‘Pacáiste Fóirithinte do FBManna’ (3), chuir an Coimisiún líon mór gníomhaíochtaí chun cinn lena gcumhdaítear ceithre phríomhréimse: rudaí a dhéanamh níos éasca d’fhiontair bheaga agus mheánmhéide (FBManna), feabhas a chur ar an rochtain atá acu ar mhaoiniú agus ar lucht saothair oilte, agus tacú leo ar feadh a saolré gnó. Agus é mar aidhm aige faoiseamh gearrthéarmach a sholáthar, borradh a chur faoin iomaíochas fadtéarmach agus faoin athléimneacht fhadtéarmach, agus timpeallacht ghnó atá cothrom agus fabhrach do FBManna a chur chun cinn, is é is cuspóir dó ligean do FBManna dul san iomaíocht agus fás. Dá bhrí sin, tá an Coimisiún tiomanta do riachtanais na gcuideachtaí a bhfuil na huasteorainneacha sa sainmhíniú ar FBManna a leagtar amach i Moladh 2003/361/CE ón gCoimisiún (4), ró-íseal dóibh de thoradh fáis, chomh maith le riachtanais an raoin níos leithne d’fhiontair mheánchaipitlithe bheaga, agus tá sé tiomanta do shainmhíniú comhchuibhithe a fhorbairt le haghaidh na bhfiontar sin.

(3)

Leis an ‘Study to map, measure and portray the EU mid-cap landscape’  (5) [Staidéar chun tírdhreach na bhfiontar meánchaipitlithe san Aontas a mhapáil, a thomhas agus a léiriú] léiríodh go bhfuil idirdhealú soiléir ann idir an deighleog ghnó arb í na fiontair mheánchaipitlithe í agus na FBManna, ach idir í agus earnáil na bhfiontar mór freisin. Cé go mbíonn fiontair mheánchaipitlithe níos láidre, cé gurb iondúil dóibh fás níos tapa, cé gur nuálaí iad agus cé gur fearr a dhéileálann siad leis an digitiú ná mar a dhéanann FBManna, bíonn dúshláin áirithe den chineál céanna rompu amhail an t-ualach riaracháin nó easpa fostaithe oilte. Ar an taobh eile, má chuirtear i gcomparáid le fiontair mhóra iad, feictear go mbíonn moill orthu i bpríomhréimsí feidhmíochta. Tá gá le sainmhíniú den sórt sin freisin chun feabhas a chur ar an gcomhsheasmhacht sna bearta beartais lena dtugtar aghaidh ar riachtanais shonracha na bhfiontar meánchaipitlithe beag. Is iomchuí, dá bhrí sin, sainmhíniú foirmiúil a fhorbairt ar fhiontair mheánchaipitlithe bheaga ar leibhéal an Aontais trína bhféadfaí an bealach a réiteach i gcomhair bearta beartais lena ndíreofar ar an deighleog shonrach ghnó sin de chuideachtaí.

(4)

Tá sainmhíniú ar fhiontair mheánchaipitlithe bheaga in úsáid cheana féin faoin Rialachán Ginearálta maidir le Blocdhíolúine (6) agus faoin Treoir maidir le Maoiniú Riosca (7), chun críche teipeanna margaidh sainaitheanta a bhféadfaí aghaidh a thabhairt orthu trí thacaíocht airgeadais phoiblí spriocdhírithe ó acmhainní náisiúnta. Is é is cuspóir don sainmhíniú ginearálta maidir le Fiontair Mheánchaipitlithe Bheaga, gan aithris a dhéanamh ar an sainmhíniú a úsáidtear sna rialacha maidir le Státchabhair per se, ach a bheith mar bhonn do thacaíocht bheartais spriocdhírithe a d’fhéadfadh cabhrú le cuideachtaí scálú a dhéanamh in earnálacha ábhartha agus tábhachtacha. Tá an sainmhíniú maidir le Fiontair Mheánchaipitlithe Bheaga sa Mholadh seo gan dochar do na tairseacha a mheastar a bheith iomchuí i gcomhthéacs na Státchabhrach.

(5)

I roinnt Ballstát, amhail an Fhrainc agus an Ghearmáin (8), táthar tar éis sainmhínithe a thabhairt isteach cheana féin ar chuideachtaí nach cuideachtaí beaga ná meánmhéide iad, ach nach fiontair mhóra iad ach oiread. Ag gníomhú de réir loighic mhargadh aonair an Aontais gan teorainneacha inmheánacha, chuideofaí le cothrom iomaíochta a áirithiú maidir leis an gcaoi a gcaitear le fiontair ar fud an Aontais ach sraith choiteann critéar a úsáid agus tagairt á déanamh do na fiontair mheánchaipitlithe bheaga.

(6)

Bíonn an-chuid idirghníomhaíochta idir bearta náisiúnta agus bearta an Aontais lena gcabhraítear le fiontair mheánchaipitlithe bheaga, mar shampla i dtaca le Cistí Struchtúracha nó le cúrsaí taighde. Is gá, dá bhrí sin, cásanna a sheachaint ina ndíríonn an tAontas a chuid gníomhaíochtaí ar chatagóir ar leith fiontar agus ina ndíríonn na Ballstáit a gcuid gníomhaíochtaí ar chatagóir eile. Is gá a mholadh freisin go mbainfeadh an Coimisiún, na Ballstáit, an Banc Eorpach Infheistíochta (BEI) agus an Ciste Eorpach Infheistíochta (CEI) úsáid as sainmhíniú coiteann chun feabhas a chur ar chomhleanúnachas agus ar éifeachtacht na mbeartas atá dírithe ar fhiontair mheánchaipitlithe bheaga. Is gá úsáid a bhaint as sainmhíniú coiteann freisin chun maolú a dhéanamh ar na rioscaí a d’fhéadfadh a bheith ann maidir le saobhadh iomaíochta.

(7)

Tá sainmhíniú ar fhiontair mheánchaipitlithe bheaga ar fáil cheana in Airteagal 2, pointe (103e) de Rialachán (AE) Uimh. 651/2014 ón gCoimisiún (9) agus sna Treoirlínte ón gCoimisiún maidir le Státchabhair chun infheistíochtaí um maoiniú riosca a chur chun cinn (10). Meastar go bhfuil sé tábhachtach cur leis an taithí agus saineolas a fuarthas agus tacaíocht don deighleog fiontar shonrach sin á príomhshruthú a thuilleadh. Mar sin féin, sa chomhthéacs eacnamaíoch atá ann faoi láthair, chun tacú níos fearr le huas-scálú fiontar agus chun líon níos mó cuideachtaí a chumhdach, ba cheart fiontair atá trí oiread níos mó ná FBManna a chumhdach leis an sainmhíniú (11).

(8)

Measadh go raibh údar cuí leis an mbéim ar fhiontair mheánchaipitlithe bheaga ó tharla gur sainaithníodh an ‘bhearna leachtachta’ mar theip mhargaidh i measúnú tionchair 2014 ar an Teachtaireacht ón gCoimisiún dar teideal ‘Treoirlínte maidir le státchabhair chun infheistíochtaí um maoiniú riosca a chur chun cinn’ (12), ar teip mhargaidh í lena ndéantar difear ní hamháin do FBManna le linn a gcéimeanna luatha síolchaipitil agus nuathionscanta ach le linn a gcéimeanna fairsingithe agus fáis ina dhiaidh sin freisin. Leis an tuarascáil, soiléiríodh go bhféadfadh sé a bheith amhlaidh i gcásanna áirithe go mbeadh fiontair mheánchaipitlithe bheaga ag tabhairt aghaidh ar an gcliseadh margaidh céanna agus a dhéanann FBManna sa mhéid go bhfuil siad fós ag céim an fháis.

(9)

Chun ligean d’fhiontair scálú amach gan stró as an deighleog FBM agus isteach i ndeighleog na bhfiontar meánchaipitlithe beag, tá sé tábhachtach go mbeidh na prionsabail chéanna ina mbunsraith do na sainmhínithe ar FBManna agus ar fhiontair mheánchaipitlithe bheaga araon, agus nach mbeidh aon fhorluí idir an dá shainmhíniú. Is gá a shuíomh cad is fiontair mheánchaipitlithe bheaga ann freisin chun comhsheasmhacht sna beartais éagsúla a áirithiú agus chun cuidiú leis an aistriú a dhéanamh níos rianúla le haghaidh cuideachtaí a fhásann as an sainmhíniú ar FBM.

(10)

I gcomhréir le hAirteagail 54, 101 agus 102 CFAE, meastar fiontar a bheith ina eintiteas ar bith, gan beann ar a fhoirm dhlíthiúil, atá i mbun gníomhaíochtaí eacnamaíocha, lena n-áirítear comhpháirtíochtaí nó comhlachais a bhíonn gníomhach go tráthrialta i ngníomhaíochtaí eacnamaíocha.

(11)

Meastar gurb é an critéar maidir le líon foirne (an ‘critéar maidir le líon foirne’) an critéar is tábhachtaí agus ba cheart é a urramú mar an príomhchritéar. Mar sin féin, is gá critéir airgeadais chomhlántacha a thabhairt isteach chun fiontair a eisiamh ón sainmhíniú, ar fiontair iad ag a bhfuil scála oibríochtaí airgeadais thar a bheith ard, arna dtomhas de réir a láimhdeachais, agus ag a bhfuil sócmhainní thar a bheith ard, arna dtomhas de réir a gclár comhardaithe. Ní bheadh sé inmhianaithe láimhdeachas a úsáid mar an t-aon chritéar airgeadais amháin ó tharla go mbíonn figiúirí láimhdeachais níos airde ag fiontair san earnáil trádála agus dáileacháin, mar thoradh ar chineál a ngníomhaíochtaí, ná mar a bhíonn ag fiontair sa tionscal déantúsaíochta. Dá bhrí sin, níor cheart an critéar láimhdeachais a chomhcheangal le hiomlán an chláir chomhardaithe, ar critéar é lena léirítear rachmas foriomlán gnó, agus níor cheart fiontar a eisiamh ón sainmhíniú ar fhiontair mheánchaipitlithe bheaga, ach amháin más airde ná na huasteorainneacha iad a láimhdeachas agus a chlár comhardaithe araon.

(12)

Is gá go mbeidh na huasteorainneacha airgeadais agus na huasteorainneacha foirne ina dteorainneacha uasta. Féadfaidh na Ballstáit, BEI agus CEI uasteorainneacha a shocrú is ísle ná uasteorainneacha an Aontais a leagtar amach i bpointe 2 den Iarscríbhinn, más mian leo a mbearta a dhíriú ar dheighleog shonrach na bhfiontar meánchaipitlithe beag. Ar mhaithe le simpliú riaracháin, féadfaidh na Ballstáit, BEI agus CEI an líon foirne a úsáid mar an t-aon chritéar amháin chun a mbeartais a chur chun feidhme, de réir mar is iomchuí, agus gan dochar do rialacha dlí an Aontais maidir le dlí na hiomaíochta agus Státchabhair.

(13)

Chun tuiscint níos fearr a fháil ar staid eacnamaíoch na bhfiontar meánchaipitlithe beag agus chun go mbainfí den chatagóir sin grúpaí fiontar a bhféadfadh a gcumhacht eacnamaíoch a bheith níos mó ná cumhacht eacnamaíoch na bhfíorfhiontar meánchaipitlithe beag, ba cheart idirdhealú a dhéanamh idir cineálacha éagsúla fiontar, ag brath ar cé acu atá nó nach bhfuil siad uathrialaitheach, ar cé acu atá nó nach bhfuil sealúchais acu nach bhfuil suíomh rialaithe i gceist leo (fiontair chomhpháirtíochta), nó ar cé acu atá nó nach bhfuil siad nasctha le fiontair eile. Maidir leis an teorainn a leagtar amach i Moladh 2003/361/CE, ina sonraítear sealúchas 25 % mar theorainn ar faoina bun a mheasfar fiontar a bheith uathrialaitheach, ba cheart í a choinneáil ar bun freisin don sainmhíniú ar fhiontair mheánchaipitlithe bheaga.

(14)

Chun éascaíocht a dhéanamh ar fhiontar a scálú as an deighleog FBM, ar mhaoiniú cothromais na bhfiontar meánchaipitlithe beag, agus ar an bhforbairt tuaithe agus áitiúil, ba cheart a mheas go bhfuil fiontair uathrialaitheach d’ainneoin sealúchais 25 % nó níos mó a bheith ag catagóirí áirithe infheisteoirí sna fiontair, ar infheisteoirí iad a bhfuil ról dearfach acu i maoiniú agus i gcruthú gnó. Ba cheart feidhm a bheith aige sin freisin maidir le hinfheistíochtaí ar fiú suas le EUR 5 000 000 iad a dhéanann ‘aingil ghnó’ (daoine aonair nó grúpaí daoine aonair atá gníomhach go tráthrialta i réimse na hinfheistíochta caipitil fiontair) mar gheall ar an taithí bainistíochta gnó, na scileanna agus na teagmhálacha a thugann siad don fhiontraí i gcomparáid le hinfheisteoirí caipitil fiontair eile. Lena n-infheistíocht chothromais comhlánaítear gníomhaíocht infheisteoirí caipitil fiontair freisin.

(15)

Chun go gcaomhnófaí cumas na bhfiontar nuálach chun cistiú a thiomsú ó chistí infheistíochta malartacha, amhail cistí caipitil fiontair nó cothromais phríobháidigh, chun a n-oibríochtaí nó a bhfás a mhaoiniú, níor cheart na heintitis sin a bheith cáilithe mar fhiontair nasctha chun an líon foirne agus na huasteorainneacha airgeadais a leagtar amach sa Mholadh seo a ríomh. Chun na cleachtais mhargaidh reatha a bhaineann le hinfheistíocht a dhéanamh i bhfiontair nuálacha trí chistí caipitil fiontair nó cistí cothromais phríobháidigh a chur san áireamh, i gcás ina gcoinníonn na fiontair agus an ciste infheistíochta malartach, agus a bhainisteoir, taifid chuntasaíochta ar leithligh agus i gcás ina bhfuil straitéis infheistíochta réamhshainithe ag an gciste infheistíochta malartach chun imeacht as an bhfiontar, lena n-áirítear trína luach a réadú tríd an bhfiontar a dhíol nó trí mhodhanna eile, is iomchuí a shonrú nár cheart eintitis den sórt sin a bheith cáilithe mar fhiontair nasctha.

(16)

Chun cúrsaí a shimpliú, ba cheart do na Ballstáit agus d’fhiontair úsáid a bhaint as na coinníollacha a leagtar amach in Airteagal 22 de Threoir 2013/34/AE ó Pharlaimint na hEorpa agus ón gComhairle (13) agus fiontair nasctha á sainiú acu, a mhéid atá na coinníollacha sin oiriúnach chun críocha an Mholta seo. Chun infheistíocht chothromais i bhfiontair mheánchaipitlithe bheaga a dhreasú, ba cheart a thoimhdiú nach bhfuil tionchar ceannasach ar an bhfiontar atá i gceist ó thaobh cineálacha áirithe infheisteoirí, i gcás nach bhfuil baint dhíreach ná indíreach acu le bainistiú an ghnó, i gcomhréir le forálacha faoi Airteagal 2(15) de Threoir 2013/34/AE.

(17)

Ba cheart, i gcás inarb ábhartha, go gcuirfí san áireamh freisin caidrimh idir fiontair a théann trí dhaoine nádúrtha, d’fhonn a áirithiú, maidir leis na buntáistí a fhabhraíonn d’fhiontair mheánchaipitlithe bheaga ó rialacha nó ó bhearta éagsúla, nach rachaidh siad chun tairbhe ach do na fiontair sin ag a bhfuil fíorghá leo. Chun íos-teorainn dhocht a chur leis an scrúdú a dhéantar ar na cásanna sin, ba cheart an scrúdú a dhéantar ar chaidrimh den sórt sin a theorannú don mhargadh ábhartha nó do mhargaí cóngaracha – agus tagairt á déanamh don Fhógra ón gCoimisiún maidir leis an sainmhíniú ar mhargadh ábhartha chun críocha dhlí iomaíochta an Chomhphobail (14).

(18)

Chun idirdhealuithe treallacha idir comhlachtaí poiblí éagsúla an Bhallstáit a sheachaint, agus i bhfianaise an ghá atá le deimhneacht dhlíthiúil, is gá a dheimhniú nach fiontar meánchaipitlithe beag é fiontar a bhfuil 25 % nó níos mó dá chaipiteal nó dá chearta vótála á rialú ag comhlacht poiblí.

(19)

Chun an t-ualach riaracháin ar fhiontair a laghdú, agus chun an láimhseáil riaracháin ar chásanna a bhfuil aicmiú mar fhiontar meánchaipitlithe beag ag teastáil ina leith a shimpliú agus a bhrostú, ba cheart a cheadú d’fhiontair dearbhuithe sollúnta a úsáid chun roinnt dá saintréithe a dheimhniú.

(20)

Is gá comhdhéanamh an lín foirne a ríomh go mion chun a mheas cé acu atá nó nach bhfuil fiontar ina fhiontar meánchaipitlithe beag. Chun forbairt na gairmoiliúna a chur chun cinn, is gá neamhaird a thabhairt ar na printísigh agus ar na mic léinn a bhfuil conradh gairmoiliúna acu agus an líon foirne á ríomh. Ar an gcaoi chéanna, níor cheart tréimhsí saoire máithreachais ná tréimhsí saoire tuismitheora a chomhaireamh agus an líon foirne á ríomh.

(21)

Maidir leis na cineálacha éagsúla fiontair, cibé acu fiontar uathrialaitheach, fiontar comhpháirtíochta nó fiontar nasctha iad, a shainmhínítear de réir a gcaidrimh le fiontair eile agus de réir a rannpháirtíochta i bhfiontair eile, comhfhreagraíonn siad do chéimeanna comhtháthaithe atá éagsúil go hoibiachtúil. Is iomchuí, dá bhrí sin, a mholadh nósanna imeachta ar leith a chur i bhfeidhm maidir le gach ceann de na cineálacha fiontair sin le linn ríomh a dhéanamh ar na cainníochtaí lena léirítear a ngníomhaíochtaí agus a neart eacnamaíoch.

(22)

Chun a áirithiú go gcoinneoidh an Coimisiún ar bun taifead ar úsáid an tsainmhínithe ar fhiontair mheánchaipitlithe bheaga dá bhforáiltear sa Mholadh seo nó taifead ar aon tagairt don sainmhíniú sin, ba cheart a iarraidh ar na Ballstáit, ar BEI agus ar CEI an Coimisiún a chur ar an eolas faoi úsáid nó tagairt den sórt sin.

(23)

Chun go dtáirgfeadh an Coimisiún staidreamh ina gcuirtear an sainmhíniú sin san áireamh, ba ghá faisnéis a bhailiú maidir le critéir mhéide bhreise (láimhdeachas, iomlán an chláir chomhardaithe). Chun suirbhéanna breise a sheachaint agus chun an t-ualach ar fhiontair a theorannú, ba cheart rochtain inbhuanaithe a thabhairt d’údaráis staidrimh náisiúnta ar fhoinsí riaracháin ábhartha sna Ballstáit,