(1)

An Comhaontú Trádála agus Comhair idir an tAontas Eorpach agus an Comhphobal Eorpach do Fhuinneamh Adamhach, de pháirt, agus Ríocht Aontaithe na Breataine Móire agus Thuaisceart Éireann, den pháirt eile (‘an Comhaontú Trádála agus Comhair’), thug an tAontas i gcrích é le Cinneadh (AE) 2021/689 ón gComhairle (1) agus tháinig sé i bhfeidhm an 1 Bealtaine 2021.

(2)

Le hIarscríbhinn 31 a ghabhann leis an gComhaontú Trádála agus Comhair, soláthraítear roinnt cásanna ina bhfuil an Coiste Speisialaithe um Iompar de Bhóthar, arna bhunú faoi Airteagal 8(1), pointe (o), den Chomhaontú sin (‘an Coiste Speisialaithe um Iompar de Bhóthar’), le cinneadh a dhéanamh maidir leis na módúlachtaí malartaithe faisnéise idir údaráis inniúla gach Páirtí i ndáil le hiompar earraí de bhóthar faoin gComhaontú Trádála agus Comhair.

(3)

Foráiltear le Roinn 2, Cuid A d’Iarscríbhinn 31 a ghabhann leis an gComhaontú Trádála agus Comhair do chóras malartaithe faisnéise maidir le tiománaithe a phostú in iompar de bhóthar, trí Chóras Faisnéise an Mhargaidh Inmheánaigh (IMI), ar córas de chuid an Aontais é. Is é an Coimisiún a bhainistíonn IMI, agus leagtar síos módúlachtaí teicniúla an mhalartaithe faisnéise sin i gCinneadh Uimh. 1/2022 ón gCoiste Speisialaithe um Iompar de Bhóthar (2). Íocadh ranníocaíocht na Ríochta Aontaithe le costais forbartha an mhodúil dearbhaithe postála iompar de bhóthar de chuid IMI in 2022, i gcomhréir le hAirteagal 5(2) de Chinneadh Uimh. 1/2022 ón gCoiste Speisialaithe um Iompar de Bhóthar.

(4)

Foráiltear le hAirteagal 14, Roinn 1, Cuid A d’Iarscríbhinn 31 a ghabhann leis an gComhaontú Trádála agus Comhair go bhfuil gach Páirtí le faisnéis a mhalartú, inter alia, maidir le sáruithe tromchúiseacha arna ndéanamh ag oibreoirí sa Pháirtí eile. Úsáidtear an Clár Eorpach de Ghnóthais Iompair de Bhóthar (ERRU), arna bhainistiú ag an gCoimisiún Eorpach, don mhalartú faisnéise sin agus tá na módúlachtaí de faoi réir seasamh ar leithligh ón Aontas a leagtar síos i gCinneadh (AE) 2025/2417 ón gComhairle (3) . Rannchuidigh an Ríocht Aontaithe le costais forbartha ERRU mar Bhallstát den Aontas.

(5)

Foráiltear le hAirteagal 714 den Chomhaontú Trádála agus Comhair go mbeidh rannpháirtíocht na Ríochta Aontaithe i gcláir agus i ngníomhaíochtaí an Aontais nó i gcodanna díobh faoi réir ranníocaíocht airgeadais bhliantúil freisin.

(6)

Cé go mbaineann módúlachtaí teicniúla an mhalartaithe faisnéise go sonrach le gach córas faisnéise agus, dá bhrí sin, go leagtar síos iad i gcinntí ar leith ón gCoiste Speisialaithe um Iompar de Bhóthar, is iomchuí, i bhfianaise na méideanna teoranta lena mbaineann agus na nósanna imeachta riaracháin is gá chun íocaíochtaí a phróiseáil, ranníocaíocht airgeadais bhliantúil aonair ón Ríocht Aontaithe a bhunú as a rannpháirtíocht i gcórais faisnéise iompair de bhóthar áirithe arna mbainistiú ag an gCoimisiún faoi chuimsiú an Chomhaontaithe Trádála agus Comhair.

(7)

Le Cinneadh Uimh. 1/2022 ón gCoiste Speisialaithe um Iompar de Bhóthar, déantar foráil maidir le rannchuidiú sonrach na Ríochta Aontaithe le IMI, is gá, dá bhrí sin, é a leasú.

(8)

Chun feidhmiú cuí Theideal I de Cheannteideal a Trí de Chuid a Dó den Chomhaontú Trádála agus Comhair a áirithiú, ba cheart don Choiste Speisialaithe um Iompar de Bhóthar, dá bhrí sin, an ranníocaíocht bhliantúil atá le híoc ag an Ríocht Aontaithe le córais faisnéise iompair de bhóthar áirithe arna mbainistiú ag an Aontas a bhunú.

(9)

Is iomchuí an seasamh atá le glacadh thar ceann an Aontais sa Choiste Speisialaithe um Iompar de Bhóthar a bhunú, ós rud é go mbeidh an gníomh atá beartaithe ina cheangal ar an Aontas.

(10)

Ba cheart seasamh an Aontais sa Choiste Speisialaithe um Iompar de Bhóthar a bheith bunaithe ar an dréachtchinneadh ón gCoiste sin atá i gceangal leis an gCinneadh seo,