(1)

Maidir leis na treoirlínte atá sa Socrú maidir leis na Creidmheasanna Onnmhairiúcháin arna dTacú go hOifigiúil (‘an Socrú’) a forbraíodh faoi chuimsiú na hEagraíochta um Chomhar agus Forbairt Eacnamaíochta (ECFE), rinneadh iad a thrasuí agus dá bhrí sin, rinneadh ceangailteach ó thaobh an dlí san Aontas iad de bhua Rialachán (AE) Uimh. 1233/2011 ó Pharlaimint na hEorpa agus ón gComhairle (1).

(2)

Leagtar síos in Airteagal 32 den Socrú na coinníollacha incháilitheachta tíre le haghaidh cabhair cheangailte. I gcomhréir le mír (a) den Airteagal sin, ní fhéadfar aon chabhair cheangailte a thabhairt do thíortha a bhfuil a n-ollioncam náisiúnta per capita os cionn na huasteorann le haghaidh tíortha íseal-mheánioncaim de réir shonraí an Bhainc Dhomhanda. Ní dhéantar tír a athaicmiú ach amháin sa chás nach bhfuil aon athrú tagtha ar a catagóir de réir an Bhainc Dhomhanda tar éis 2 bhliain i ndiaidh a chéile.

(3)

I gcomhréir le hAirteagal 35(e) den Socrú, féadfaidh Rannpháirtí sa Socrú, go heisceachtúil agus faoi réir Líne Choiteann a ghlacadh, cabhair cheangailte a thabhairt do thír nach mbeadh incháilithe murach sin de bhun Airteagal 32 den Socrú.

(4)

I mí Iúil 2025, d’aicmigh an Banc Domhanda an Úcráin mar thír ard-mheánioncaim den dara huair. Tugtar le tuiscint leis sin nach bhfuil an Úcráin incháilithe chun cabhair cheangailte a fháil a thuilleadh. Mar sin féin, i gcomhréir le tiomantas buanseasmhach an Aontais tacaíocht a thabhairt don Úcráin agus dá muintir a fhad is gá, is chun leas an Aontais é leanúint de bheith in ann cabhair cheangailte a thabhairt don Úcráin.

(5)

Tá na Rannpháirtithe sa Socrú (‘na Rannpháirtithe’) le cinneadh a dhéanamh, i nós imeachta i scríbhinn, maidir le togra an Aontais Eorpaigh le haghaidh Líne Choiteann i gcomhréir le Caibidil IV, Roinn 5 den Socrú chun incháilitheacht na hÚcráine le haghaidh cabhair cheangailte a leathnú.

(6)

I gcomhréir le hAirteagal 59(a) den Socrú, bíonn Línte Coiteanna bailí ar feadh tréimhse 2 bhliain. Féadfar síneadh a chur le Línte Coiteanna nach mbaineann le hidirbheart sonrach i gcomhréir leis na nósanna imeachta a leagtar síos in Airteagail 54 go 58 den Socrú. Ó tharla go bhféadfadh sé go mbeadh ar an Aontas leanúint de thacaíocht eisceachtúil a thabhairt don Úcráin ar feadh tréimhse níos faide ná 2 bhliain, is chun leas an Aontais é a bheith in ann teacht ar chomhaontú maidir le síneadh suas le 4 bliana ar a mhéad a chur leis an Líne Choiteann atá beartaithe.

(7)

Is iomchuí an seasamh atá le glacadh thar ceann an Aontais a mhéid a bhaineann leis an Líne Choiteann lena leathnaítear incháilitheacht na hÚcráine le haghaidh cabhair cheangailte chomh maith leis an síneadh breise a d’fhéadfaí a chur léi, a bhunú, ó tharla go mbeidh an Líne Choiteann atá beartaithe, nuair a thiocfar ar chomhaontú fúithi, ina ceangal ar an Aontas, agus beifear in ann tionchar suntasach a imirt ar a bhfuil i ndlí an Aontais léi de bhua Airteagal 1 de Rialachán (AE) Uimh. 1233/2011.

(8)

Dá bhrí sin, ba cheart gurb é seasamh an Aontais sa nós imeachta i scríbhinn ó na Rannpháirtithe tacú leis an togra bunaithe ar an dréacht-Líne Choiteann atá i gceangal leis an gCinneadh seo, agus tacú le síneadh a d’fhéadfaí a chur léi,