(1)

An 21 Aibreán 2021, de bhun Airteagal 4(2) de Chinneadh Uimh. 676/2002/CE, d’eisigh an Coimisiún sainordú do Chomhdháil Eorpach na Riarachán Poist agus Teileachumarsáide (‘CEPT’) chun athbhreithniú a dhéanamh, faoi mhí Iúil 2024, ar theorainn na n-astaíochtaí as banda faoi bhun 5 935 MHz is infheidhme maidir le gléasanna WAS/RLAN ar Leibhéal Cumhachta An-íseal (VLP) a úsáideann an banda 5 945 — 6 425 MHz, bunaithe, go háirithe, ar an staidéar ar theicnící maolaithe féideartha chun córais iompair chliste (CIC) le haghaidh iarnróid uirbeacha a chosaint, d’fhonn an teorainn a ísliú go dtí -37 dBm/MHz. Tá údar leis sin i ngeall ar an ngá le sábháilteacht iompair a áirithiú agus le gléasanna den sórt sin a bheith ann in éineacht le CIC, lena n-áirítear rialú traenacha bunaithe ar chumarsáid (CBTC), a bhaineann úsáid as speictream i gcodanna den bhanda minicíochta 5 905 — 5 935 MHz.

(2)

Le Cinneadh Cur Chun Feidhme (AE) 2021/1067 (2) ón gCoimisiún déantar comhchuibhiú ar an mbanda minicíochta 5 945 — 6 425 MHz le haghaidh córais rochtana gan sreang lena n-áirítear líonraí achair logánta raidió. I dTábla 2 den Iarscríbhinn a ghabhann leis an gCinneadh sin leagtar amach, i gcás gléasanna WAS/RLAN VLP, an teorainn le haghaidh dhlús na meánchumhachta coibhéisí uasta radaithe go hiseatrópach le haghaidh astaíochtaí as banda faoi bhun 5 935 MHz ag -45 dBm/MHz go dtí an 31 Nollaig 2025. Thairis sin, déantar foráil le Nóta 3 den Tábla sin go bhfuil cinneadh le déanamh faoin 31 Nollaig 2025 maidir le teorainn -37 dBm/MHz a chur in ionad na teorann sin.

(3)

Mar fhreagairt ar an sainordú dá dtagraítear in Aithris 1, an 20 Samhain 2024, chuir CEPT isteach Tuarascáil 087 maidir leis an athbhreithniú ar an teorainn ar astaíochtaí as banda faoi bhun 5 935 MHz is infheidhme maidir le gléasanna WAS/RLAN VLP. Ar cheann de na moltaí sa tuarascáil tá maolú na teorann sin go -37 dBm/MHz faoi choinníollacha teicniúla áirithe.

(4)

Gléasanna WAS/RLAN VLP atá ag baint úsáid as an mbanda minicíochta faoi bhun 6 105 Mhz, féadfaidh siad úsáid a bhaint as sásra Rialaithe Cumhachta Tarchuir.

(5)

Ba cheart Cinneadh Cur Chun Feidhme (AE) 2021/1067 a leasú mar, leis an tuarascáil, tá críoch curtha go héifeachtach ag CEPT leis an athbhreithniú ar na coinníollacha teicniúla le haghaidh gléasanna WAS/RLAN VLP maidir le teorainn -45 dBm/MHz ar dhlús na meánchumhachta coibhéisí uasta radaithe go hiseatrópach le haghaidh astaíochtaí as banda faoi bhun 5 935 MHz, de bhun an tsainordaithe dá dtagraítear in Aithris 1. Ar cheann de na hathruithe ar an Iarscríbhinn tá maolú na teorann sin go -37 dBm/MHz faoi choinníollacha teicniúla a thuairiscítear inti.

(6)

Toisc go mbaineann gléasanna WAS/RLAN faoi dhíon ar leibhéal íseal (‘LPI’) le haghaidh naisc leathanbhanda ar bord traenacha agus aerárthaí úsáid as córais aeróige dáilte de ghnáth chun cumhdach maith a sholáthar agus a scaipeadh go cothrom i gcarráiste na bpaisinéirí, moltar sa tuarascáil an creat rialála a thabhairt cothrom le dáta chun úsáid na gcóras aeróige dáilte sna cásanna úsáide sin a shoiléiriú.

(7)

Toisc go bhfuil an t-athbhreithniú sonrach de bhun an tsainordaithe dá dtagraítear in Aithris 1 curtha i gcrích anois, ba cheart gnáthchlásal athbhreithnithe a chur in ionad Airteagal 4.

(8)

Dá bhrí sin, ba cheart Cinneadh Cur Chun Feidhme (AE) 2021/1067 a leasú dá réir.

(9)

Tá na bearta dá bhforáiltear sa Chinneadh seo i gcomhréir leis an tuairim ón gCoiste um an Speictream Raidió,

(1)

Cuirtear an méid seo a leanas in ionad Airteagal 4:

(2)

Cuirtear an téacs a leagtar amach san Iarscríbhinn a ghabhann leis an gCinneadh seo in ionad na hIarscríbhinne.