(1)

Is galar víreasach tógálach é ionfhabhtú le plá na n-athchogantach beag a bhíonn ar ainmhithe den chineál gabhair agus den chineál caorach agus d’fhéadfadh tionchar tromchúiseach a bheith aige ar an daonra ainmhithe lena mbaineann agus ar bhrabúsacht na feirmeoireachta, rud a chuirfeadh isteach ar ghluaiseacht choinsíneachtaí na n-ainmhithe sin agus a dtáirgí laistigh den Aontas agus ar onnmhairí go tríú tíortha.

(2)

I gcás ráige d’ionfhabhtú le plá na n-athchogantach beag in ainmhithe den chineál gabhair nó den chineál caorach, tá riosca tromchúiseach ann go leathfadh an galar sin go bunaíochtaí eile ainmhithe den chineál gabhair nó den chineál caorach.

(3)

Le Rialachán Tarmligthe (AE) 2020/687 ón gCoimisiún (2) forlíontar na rialacha maidir le rialú na ngalar liostaithe dá dtagraítear in Airteagal 9(1), pointí (a), (b) agus (c) de Rialachán (AE) 2016/429, agus a shainmhínítear mar ghalair i gcatagóirí A, B agus C i Rialachán Cur Chun Feidhme (AE) 2018/1882 ón gCoimisiún (3). Go háirithe, déantar foráil in Airteagail 21 agus 22 de Rialachán Tarmligthe (AE) 2020/687 maidir le crios srianta a bhunú i gcás ráige de ghalar i gcatagóir A, lena n-áirítear ionfhabhtú le plá na n-athchogantach beag, agus maidir le bearta áirithe a bheidh le cur i bhfeidhm ann. Foráiltear in Airteagal 21(1) den Rialachán Tarmligthe sin gur cuid den chrios srianta crios cosanta, crios faireachais, agus, más gá, criosanna srianta breise timpeall na gcriosanna cosanta agus faireachais nó cóngarach dóibh.

(4)

Glacadh Cinneadh Cur Chun Feidhme (AE) 2024/3238 ón gCoimisiún (4) ar bhonn Rialachán (AE) 2016/429 agus leagtar síos ann bearta éigeandála áirithe a bhaineann le hionfhabhtú le plá na n-athchogantach beag sa Bhulgáir mar fhreagairt ar ráig a deimhníodh an 25 Samhain 2024 i mbardasacht Velingrad, i réigiún Pazardzhik. Go sonrach, déantar foráil le Cinneadh Cur Chun Feidhme (AE) 2024/3238 maidir leis na criosanna cosanta, na criosanna faireachais agus na criosanna srianta breise atá le bunú ag an mBallstát sin, i gcomhréir le Rialachán Tarmligthe (AE) 2020/687, go gcuimseoidh na criosanna sin ar a laghad na limistéir a liostaítear san Iarscríbhinn a ghabhann leis an gCinneadh Cur Chun Feidhme sin.

(5)

Ó bhí dáta glactha Chinneadh Cur Chun Feidhme (AE) 2024/3238 ann, thug an Bhulgáir fógra don Choimisiún faoi mhoilleanna tromchúiseacha ar chur i bhfeidhm na mbeart rialaithe galar is gá a chur i bhfeidhm i gcás dearbhú oifigiúil ar ráig galair i gcatagóir A in ainmhithe ar coimeád i mbunaíocht i gcomhréir le hAirteagal 12 de Rialachán Tarmligthe (AE) 2020/687, a mhéid a bhaineann leis an ráig a deimhníodh i mbardasacht Velingrad, i réigiún Pazardzhik.

(6)

Tá méid agus fad tréimhse na gcriosanna cosanta, na gcriosanna faireachais agus na gcriosanna srianta breise chomh maith leis na bearta atá le cur i bhfeidhm laistigh de na criosanna sin bunaithe ar na critéir a leagtar amach in Airteagal 64(1) de Rialachán (AE) 2016/429 agus ar na rialacha a leagtar síos i Rialachán Tarmligthe (AE) 2020/687. Ina theannta sin, cuirtear san áireamh an staid eipidéimeolaíoch maidir le hionfhabhtú le plá na n-athchogantach beag sna limistéir atá buailte chomh maith le staid eipidéimeolaíoch fhoriomlán an ionfhabhtaithe le plá na n-athchogantach beag sa Bhulgáir, chomh maith leis an leibhéal riosca maidir le leathadh breise an ghalair sin laistigh den Bhallstát sin agus san Aontas. Thairis sin, fad na mbeart a ndéantar foráil maidir leo leis an gcinneadh seo, tá sé cinnte i gcomhréir leis na caighdeáin idirnáisiúnta a leagtar amach sa Chód um Shláinte na nAinmhithe Talún de chuid na hEagraíochta Domhanda um Shláinte Ainmhithe (WOAH). I bhfianaise na staide eipidéimeolaíche atá ann faoi láthair, chun an riosca go leathfadh an galar laistigh den Bhulgáir agus chuig na Ballstáit eile araon a mhaolú go héifeachtach, tá sé ríthábhachtach fad tréimhse na mbeart rialaithe a liostaítear mar chriosanna cosanta, criosanna faireachais agus criosanna srianta breise le haghaidh na Bulgáire a choigeartú san Iarscríbhinn a ghabhann le Cinneadh Cur Chun Feidhme (AE) 2024/3238. Leis na coigeartuithe sin, tugtar aghaidh ar an riosca mór a bhaineann le cúrsaíocht leanúnach agus leathadh féideartha an ghalair lasmuigh de na limistéir atá buailte faoi láthair fad is nach mbeidh na bearta rialaithe galar curtha i gcrích.

(7)

Agus an staid eipidéimeolaíoch atá ann faoi láthair san Aontas á cur san áireamh a mhéid a bhaineann le hionfhabhtú le plá na n-athchogantach beag, ba cheart, dá bhrí sin, síneadh a chur leis an tréimhse ar lena linn is gá feidhm a bheith ag na bearta dá bhforáiltear le Cinneadh Cur Chun Feidhme (AE) 2024/3238 go dtí an 31 Bealtaine 2025.

(8)

Na bearta dá bhforáiltear sa Chinneadh seo, is bearta iad atá i gcomhréir leis an tuairim ón mBuanchoiste um Plandaí, Ainmhithe, Bia agus Beatha,

1.

In Airteagal 4, cuirtear ‘31 Bealtaine 2025’ in ionad an dáta ‘31 Márta 2025’;

2.

cuirtear an téacs a leagtar amach san Iarscríbhinn a ghabhann leis an gCinneadh seo in ionad na hIarscríbhinne.