(1)

Le Rialachán Cur Chun Feidhme (AE) 2021/637 (2) ón gCoimisiún, leagadh síos formáidí aonfhoirmeacha um nochtadh chun cur i bhfeidhm aonfhoirmeach Rialachán (AE) Uimh. 575/2013 a áirithiú. Le Rialachán (AE) 2024/1623 ó Pharlaimint na hEorpa agus ón gComhairle (3), leasaíodh Rialachán (AE) Uimh. 575/2013 chun caighdeáin idirnáisiúnta thríú Creat Rialála Idirnáisiúnta Choiste Basel um Maoirseacht ar Bhaincéireacht do bhainc (dá ngairtear ‘Basel III’) a ionchorprú sa rialachán sin. Tá caighdeáin maidir le nochtadh stuamachta sna caighdeáin idirnáisiúnta sin chun trédhearcacht agus comhsheasmhacht a fheabhsú i réimse na gceanglas stuamachta le haghaidh institiúidí creidmheasa. Is gá, dá bhrí sin, na rialacha maidir le formáidí aonfhoirmeacha um nochtadh a leasú chun na hathruithe sin a léiriú sna sonraíochtaí a bhaineann le hoibleagáidí maidir le nochtadh.

(2)

Sa nochtadh faisnéise a dhéanfaidh institiúidí maidir lena bpríomh-mhéadrachtaí rialála, ba cheart a áireamh nochtadh an chaipitil atá ar fáil d’institiúid, a sócmhainní ualaithe ó thaobh riosca, a giaráil, chomh maith leis na méadrachtaí leachtachta is ábhartha.

(3)

Ionas go mbeidh institiúidí in ann caillteanais a ionsú i gcás gnóthais leantaigh nó i gcás gnóthais éagtha, teastaíonn cistí dílse atá leordhóthanach ó thaobh cainníochta agus cáilíochta de, mar a cheanglaítear le hAirteagal 92 de Rialachán (AE) Uimh. 575/2013. Ba cheart d’institiúidí faisnéis a nochtadh maidir le comhdhéanamh, cainníocht agus cáilíocht a gcistí dílse, ionas go mbeidh páirtithe leasmhara in ann measúnú a dhéanamh ar acmhainneacht ionsúcháin caillteanais na mbanc.

(4)

An nochtadh maidir le comhlíonadh an cheanglais le haghaidh caipiteal maolánach frith-thimthriallach, ba cheart a léiriú ann gurb é is aidhm don chaipiteal maolánach frith-thimthriallach dá dtagraítear i gCaibidil 4 de Theideal VII de Threoir 2013/36/AE ó Pharlaimint na hEorpa agus ón gComhairle (4) a áirithiú go gcuirtear an timpeallacht mhacra-airgeadais ina n-oibríonn institiúidí creidmheasa san áireamh i gceanglais chaipitil na hearnála baincéireachta.

(5)

Tá sé ríthábhachtach go mbeadh rochtain ag an margadh ar fhaisnéis i dtaobh ar cheart institiúid a aicmiú mar institiúidí domhanda a bhfuil tábhacht shistéamach leo (G-SIIanna). Ar an gcúis sin, ba cheart d’institiúidí faisnéis a nochtadh maidir le cibé acu a chomhlíontar nó nach gcomhlíontar na táscairí tábhachtacha dá dtagraítear in Airteagal 131 de Threoir 2013/36/AE.

(6)

Ba cheart teimpléid aonfhoirmeacha a leagan síos chun a áirithiú go nochtfaidh institiúidí faisnéis maidir lena gcomhlíontacht le ceanglais leachtachta, lena n-áirítear an cóimheas cumhdaigh ar leachtacht agus an cóimheas glanchistiúcháin chobhsaí, ar bhealach aonfhoirmeach inchomparáide.

(7)

Is gá comhleanúnachas agus comhsheasmhacht a áirithiú idir na hoibleagáidí tuairiscithe a leagtar síos i Rialachán (AE) 575/2013 agus reachtaíocht eile an Aontais i réimse na rioscaí ESG, agus go háirithe Rialachán (AE) 2020/852 ó Pharlaimint na hEorpa agus ón gComhairle (5). Dá bhrí sin, ba cheart na critéir, na haicmithe agus na sainmhínithe a leagtar síos in Airteagail 2 agus 3 de Rialachán 2020/852 a chur san áireamh sna rialacha maidir le nochtadh rioscaí ESG. Ba cheart a chur san áireamh sna rialacha sin, go háirithe, na critéir chun gníomhaíochtaí eacnamaíocha atá inbhuanaithe ó thaobh an chomhshaoil de a shainaithint agus a aicmiú, mar a leagtar síos i Rialachán (AE) 2020/852 agus i Rialachán Tarmligthe (AE) 2020/1818 ón gCoimisiún (6). Ar an gcúis chéanna, agus faisnéis maidir le feidhmíocht fuinnimh a bpunann réadmhaoine á nochtadh acu, ba cheart d’institiúidí an fhaisnéis sin a sholáthar i bhfoirm an teastais feidhmíochta fuinnimh mar a shainmhínítear in Airteagal 2, pointe 12 de Threoir 2010/31/AE ó Pharlaimint na hEorpa agus ón gComhairle (7).

(8)

Ceanglaítear le hAirteagail 19a agus 29a de Threoir 2013/34/AE ó Pharlaimint na hEorpa agus ón gComhairle (8) ar ghnóthais mhóra áirithe ar eintitis leasa phoiblí iad, nó ar eintitis leasa phoiblí ar máthairghnóthais de chuid grúpa mór iad, faoi seach, faisnéis a chuimsiú ina dtuarascáil bhainistíochta nó ina dtuarascáil bhainistíochta chomhdhlúite maidir le tionchar a ngníomhaíochta ar chúrsaí comhshaoil, sóisialta agus fostaithe, an tionchar ar mheas ar chearta an duine, ar chúrsaí frith-éillithe agus cúrsaí breabaireachta. Níl feidhm ag an oibleagáid sin maidir le gnóthais eile, áfach. Mar thoradh air sin, ní cheanglaítear ar ghnóthais nach bhfuil faoi réir Airteagal 19a agus Airteagal 29a de Threoir 2013/34/AE faisnéis den sórt sin a nochtadh agus d'fhéadfadh sé nach mbeidh siad ábalta faisnéis den sórt sin a sholáthar d'institiúidí. Ní féidir, dá bhrí sin, a bheith ag súil leis go gcuirfidh na gnóthais sin atá ina gcontrapháirtithe in institiúidí an fhaisnéis agus na sonraí sin ar fáil ach ar bhonn deonach amháin.

(9)

Chun caighdeáin Basel III a chur chun feidhme, thug Rialachán (AE) 2024/1623 isteach in Airteagal 92(3) de Rialachán (AE) Uimh. 575/2013 teorainn níos ísle leis na ceanglais chaipitil rioscabhunaithe a ríomhtar trí úsáid a bhaint as samhlacha inmheánacha (‘bunleibhéal aschuir’) atá cothrom le céatadán de na ceanglais chaipitil a mbeadh feidhm acu dá n-úsáidfí cuir chuige chaighdeánaithe. Is iomchuí, dá bhrí sin, na hathruithe sna teimpléid ábhartha maidir le nochtadh a léiriú. Thairis sin, chun comparáid a sholáthar idir na cóimheasa caipitil rioscabhunaithe arna ríomh faoi na cineálacha cur chuige caighdeánaithe agus na cineálacha cur chuige arna samhaltú go hinmheánach ar leibhéal riosca agus ar aicmí neamhchosanta le haghaidh riosca creidmheasa, ba cheart dhá theimpléad nua maidir le nochtadh a thabhairt isteach.

(10)

Maidir le húsáid an chur chuige chaighdeánaithe (‘SA’) i gcás riosca creidmheasa, le Rialachán (AE) 2024/1623 tugadh isteach i gCaibidil 2 de Theideal II de Rialachán (AE) Uimh. 575/2013 láimhseáil ualaithe riosca níos gráinní maidir le neamhchosaintí éagsúla, lena n-áirítear neamhchosaintí ar institiúidí, neamhchosaintí ar chorparáidí, neamhchosaintí ar iasachtú speisialaithe, neamhchosaintí ar mhiondíol, neamhchosaintí arna n-urrú le réadmhaoin, neamhchosaintí ar fhofhiachas, neamhchosaintí ar chothromas agus neamhchosaintí ar mhainneachtain. Is gá na hathruithe sin a léiriú sna teimpléid nochta, agus uimhriú na rónna sna teimpléid nochta sin a ailíniú leis an gceann a úsáidtear i dteimpléid nochta CBMB chomhfhreagracha.

(11)

Le Rialachán (AE) 2024/1623, a tugadh isteach i gCaibidil 3 Teideal II de Rialachán (AE) Uimh. 575/2013, i ndáil le Cur Chuige na Rátálacha Inmheánacha (‘IRB’) a úsáid le haghaidh neamhchosaintí ar riosca creidmheasa, cuireadh teorainn leis na haicmí neamhchosanta ar féidir ardchur chuige IRB (A-IRB) a chur i bhfeidhm maidir leis chun ceanglais cistí dílse a ríomh le haghaidh riosca creidmheasa. Go sonrach, i gcás neamhchosaintíí ar institiúidí, ní féidir ach an bunchur chuige IRB (F-IRB) a úsáid anois, agus i gcás neamhchosaintí ar chothromas, ní cheadaítear ach an cur chuige caighdeánaithe a úsáid, ach amháin le linn idirthréimhse. Thairis sin, cruthaíodh aicmí neamhchosanta nua le haghaidh ‘Rialtais réigiúnacha nó údaráis áitiúla’ agus ‘Eintitis san earnáil phoiblí’ chun láimhseáil chomhsheasmhach na neamhchosanta sin a áirithiú agus chun inathraitheacht neamhbheartaithe sna ceanglais cistí dílse ghaolmhara a sheachaint. Ba cheart na leasuithe sin a léiriú sna teimpléid nochta maidir le cur chuige IRB a úsáid. Is gá freisin struchtúr éifeacht an teimpléid ar RWEAnna díorthach creidmheasa a úsáidtear mar theicnící maolaithe riosca creidmheasa (CRM) a ailíniú leis an uimhriú ró a úsáidtear i dteimpléad nochta comhfhreagrach CBMB.

(12)

Le Rialachán (AE) 2024/1623, tugadh isteach i dTeideal IV de Rialachán (AE) Uimh. 575/2013 creat nua chun na ceanglais cistí dílse le haghaidh riosca margaidh a ríomh, bunaithe ar bhun-athbhreithniú CBMB ar an leabhar trádála (FRTB). Bhí gá leis an leasú sin chun aghaidh a thabhairt ar na heasnaimh a sainaithníodh sa chreat ceanglas caipitil riosca margaidh atá ann faoi láthair le haghaidh suíomhanna leabhair trádála. I gcomhréir leis an gcreat nua, ní mór d’institiúidí cur chuige caighdeánaithe simplithe, cur chuige caighdeánaithe malartach nó cur chuige malartach na samhlacha inmheánacha a chur i bhfeidhm chun ceanglais cistí dílse le haghaidh riosca margaidh a ríomh. Ba cheart na leasuithe sin a léiriú sna teimpléid maidir le nochtadh trí thacar cuimsitheach táblaí agus teimpléad maidir le nochtaí a thabhairt isteach. Ba cheart an tacar nua táblaí agus teimpléad sin maidir le nochtadh a bheith éifeachtach nuair a thiocfaidh an creat rialála le haghaidh riosca margaidh atá bunaithe ar chaighdeáin BLT Basel i bhfeidhm san Aontas. Idir an dá linn, na ceanglais maidir le nochtadh atá i bhfeidhm faoi láthair, beidh feidhm acu i gcónaí. Chun tuiscint chuimsitheach a chur ar úsáid an chur chuige nua sin, ba cheart d’institiúidí a úsáideann cur chuige malartach na samhlacha inmheánacha, ar an gcéad dáta a chuirfear an creat nua nochta i bhfeidhm, an fhaisnéis chainníochtúil a nochtadh in éineacht leis an bhfaisnéis cháilíochtúil.

(13)

Ba cheart formáidí aonfhoirmeacha um nochtadh a leagan síos chun nochtadh aonfhoirmeach agus inchomparáide a áirithiú maidir le rioscaí maidir le coigeartú ar luacháil creidmheasa (‘CVA’). Is gá, dá bhrí sin, teimpléid agus táblaí nua maidir le nochtadh a thabhairt isteach ina bhfuil faisnéis chainníochtúil agus cháilíochtúil maidir le riosca CVA chuige sin. Ba cheart a chur san áireamh sna teimpléid sin go bhféadfaidh institiúidí atá faoi réir ceanglais cistí dílse le haghaidh CVA an cur chuige caighdeánaithe, bunúsach nó simplithe nó meascán de na cuir chuige sin a chur i bhfeidhm agus, sa riosca CVA, ba cheart riosca um raon difríochta creidmheasa chontrapháirtí institiúide agus riosca margaidh na punainne idirbheart arna trádáil ag an institiúid leis an gcontrapháirtí sin a chumhdach leis

(14)

Le Rialachán (AE) 2024/1623, tugadh isteach i gCaibidil 1 de Theideal III de Rialachán (AE) Uimh. 575/2013 cur chuige aonair nua nach bhfuil bunaithe ar shamhail chun na ceanglais cistí dílse le haghaidh riosca oibriúcháin a ríomh chun aghaidh a thabhairt ar an easpa íogaireachta i leith riosca agus ar inchomparáideacht na gcur chuige atá ann cheana. Tar éis lánrogha a áirítear i gcaighdeáin Basel III, tá íoscheanglais cistí dílse an Aontais bunaithe ar ríomh Chomhpháirt an Táscaire Gnó (BIC) agus air sin amháin, agus meastar stair na gcaillteanas chun críoch nochta amháin. Ba cheart na leasuithe sin a léiriú sna teimpléid maidir le nochtadh, inter alia trí theimpléid nua a leagan síos chun faisnéis a sholáthar maidir le caillteanais oibriúcháin bhliantúla a tabhaíodh le 10 mbliana anuas, táscaire gnó, comhpháirteanna agus fo-chomhpháirteanna a ríomh, agus na ceanglais cistí dílse ghaolmhara agus méideanna neamhchosanta ar riosca.

(15)

Forordaítear le hAirteagal 501d(2) de Rialachán (AE) Uimh. 575/2013 conas a ríomhfaidh institiúidí a gceanglais cistí dílse le haghaidh neamhchosaintí ar chriptea-shócmhainní go dtí dáta chur i bhfeidhm an ghnímh reachtaigh dá dtagraítear in Airteagal 501d(1) den Rialachán sin. Is gá, dá bhrí sin, a leagan síos conas a nochtfaidh institiúidí a neamhchosaintí ar chriptea-shócmhainní le linn na hidirthréimhse sin.

(16)

Le Rialachán (AE) 2024/1623 leasaíodh Airteagal 434a(1) de Rialachán (AE) Uimh. 575/2013 agus tugadh isteach ceanglas ar ÚBE réitigh TF a fhorbairt, lena n-áirítear treoracha, lena n-úsáid ag institiúidí le haghaidh nochtaí a cheanglaítear faoi Theidil II agus III den Rialachán sin. Dá réir sin, ba cheart a chur in iúl sna teimpléid maidir le nochtadh, ar bhealach soiléir leordhóthanach, na pointí sonraí agus an fhaisnéis nach mór d’institiúidí a nochtadh chun a áirithiú go bhfaighidh úsáideoirí rochtain ar fhaisnéis leordhóthanach chuimsitheach agus inchomparáide agus go ndéanfar comhsheasmhacht le caighdeáin idirnáisiúnta maidir le nochtaí a choinneáil ar bun. Chun go mbeidh ÚBE in ann réitigh iomchuí TF a fhorbairt, níor cheart na formáidí aonfhoirmeacha um nochtadh sin a bheith ceangailteach a mhéid a bhaineann lena struchtúr agus lena n-ionadaíocht. Ba cheart do ÚBE, go háirithe, bheith in ann imeacht ó léiriú grafach agus ó struchtúr táblach na dteimpléad maidir le nochtadh fad a áireofar na pointí sonraí agus an fhaisnéis uile is gá sa réiteach TF.

(17)

Chun tacar comhtháite cuimsitheach d’fhormáidí aonfhoirmeacha um nochtadh a sholáthar d’institiúidí agus chun nochtaí ardcháilíochta a áirithiú, agus an cur chuige faoi Airteagal 434a(1) athbhreithnithe de Rialachán (AE) Uimh. 575/2013 á léiriú san am céanna, is gá Rialachán Cur Chun Feidhme (AE) 2021/637 a aisghairm agus an Rialachán Cur Chun Feidhme sin a chur in ionad an Rialacháin Cur Chun Feidhme sin.

(18)

Chun nochtaí tráthúla agus cáilíochta ó institiúidí a áirithiú, ba cheart a ndóthain ama a thabhairt dóibh a gcórais inmheánacha a oiriúnú i bhfianaise na n-athruithe ar an gcreat nochta atá ann cheana a léirítear/a ionchorpraítear sa Rialachán seo.

(19)

Tá an Rialachán seo bunaithe ar na dréachtchaighdeáin theicniúla cur chun feidhme a chuir an tÚdarás Baincéireachta Eorpach faoi bhráid an Choimisiúin.

(20)

Rinne an tÚdarás Baincéireachta Eorpach comhairliúcháin phoiblí oscailte a reáchtáil maidir leis na dréachtchaighdeáin theicniúla cur chun feidhme ar a bhfuil an Rialachán seo bunaithe, rinne sé anailís ar na costais agus ar na tairbhí a d’fhéadfadh a bheith ag baint leo agus d’iarr sé comhairle ar an nGrúpa Geallsealbhóirí Baincéireachta arna bhunú i gcomhréir le hAirteagal 37 de Rialachán (AE) Uimh. 1093/2010 ó Pharlaimint na hEorpa agus ón gComhairle (9),

(a)

an fhaisnéis dá dtagraítear in Airteagal 444, pointí (a) go (e), agus an fhaisnéis dá dtagraítear in Airteagal 453, pointí (g), (h) agus (i), de Rialachán (AE) Uimh. 575/2013 mar a shonraítear i roinn 10 - ‘Riosca creidmheasa SA a nochtadh’ in Iarscríbhinn I;

(b)

an fhaisnéis maidir leis na luachanna neamhchosanta a asbhaintear as cistí dílse dá dtagraítear in Airteagal 444, pointe (e), de Rialachán (AE) Uimh. 575/2013 mar a shonraítear i roinn 4 - ‘Cistí dílse a nochtadh’ in Iarscríbhinn I.