(1)

Foráiltear le Rialachán (AE) 2016/429 nach mór do choinsíneachtaí d’ainmhithe, de tháirgí geirmeacha agus de tháirgí de bhunadh ainmhíoch a theacht ó thríú tír nó ó chríoch, nó ó chrios nó ó dheighleog de thríú tír nó de chríoch, a liostaítear i gcomhréir le hAirteagal 230(1) den Rialachán sin chun teacht isteach san Aontas.

(2)

Le Rialachán Tarmligthe (AE) 2020/692 ón gCoimisiún (2) leagtar síos na ceanglais sláinte ainmhithe nach mór do choinsíneachtaí de speicis agus catagóirí áirithe d’ainmhithe, de tháirgí geirmeacha agus de tháirgí de bhunadh ainmhíoch a chomhlíonadh chun teacht isteach san Aontas ó thríú tíortha nó ó chríocha nó ó chriosanna de thríú tír nó de chríoch, nó ó dheighleoga de thríú tír nó de chríoch i gcás ainmhithe uisceacha.

(3)

Le Rialachán Cur Chun Feidhme (AE) 2021/404 ón gCoimisiún (3) leagtar síos na liostaí de thríú tíortha, nó de chríocha nó criosanna de thríú tír nó de chríoch, óna gceadaítear na speicis agus na catagóirí ainmhithe, táirgí geirmeacha agus táirgí de bhunadh ainmhíoch a thagann faoi raon feidhme Rialachán Tarmligthe (AE) 2020/692 a theacht isteach san Aontas. Déantar na liostaí sin agus rialacha ginearálta áirithe maidir leis na liostaí sin a leagan amach in Iarscríbhinní I go XXII a ghabhann leis an Rialachán Cur Chun Feidhme sin. In Iarscríbhinn I a ghabhann le Rialachán Cur Chun Feidhme (AE) 2021/404, leagtar amach na rialacha ginearálta agus leagtar amach na liostaí in Iarscríbhinní II go XXII a ghabhann leis.

(4)

Tá fógra tugtha ag an Ríocht Aontaithe don Choimisiún faoi chásanna deimhnithe d’ionfhabhtuithe leis an víreas gormtheanga (VGT) i mbó-ainmhithe agus in ainmhithe den chineál caorach sa Bhreatain Mhór. Ina theannta sin, tá fógra tugtha ag an Macadóin Thuaidh don Choimisiún faoi chásanna deimhnithe de VGT in ainmhithe den chineál caorach agus den chineál gabhair ina críoch. Dá bhrí sin, ba cheart a cheangal ar an Ríocht Aontaithe agus ar an Macadóin Thuaidh ainmhithe bronntacha den speiceas buaibheach, den speiceas caorach agus den speiceas gabhair a thástáil i ndáil le seamhan, úicítí nó suthanna arna dtáirgeadh in vitro i leith VGT. Le hIarscríbhinní IX agus X a ghabhann le Rialachán Cur Chun Feidhme (AE) 2021/404, leagtar amach an liosta de thríú tíortha nó de chríocha, nó de chriosanna de thríú tír nó de chríoch, óna n-údaraítear coinsíneachtaí de tháirgí geirmeacha ó bhó-ainmhithe agus ó ainmhithe den chineál caorach agus ó ainmhithe den chineál gabhair faoi seach a theacht isteach san Aontas. De dheasca na gcásanna deimhnithe de VGT sa Bhreatain Mhór agus sa Mhacadóin Thuaidh, ba cheart an ráthaíocht sláinte ainmhithe ‘Tástáil-VGT’ a chur isteach sna hiontrálacha a bhaineann le criosanna GB-1 agus GB-2 sa Ríocht Aontaithe agus i gcrios MK-0 sa Mhacadóin Thuaidh i gcolún 6 den tábla i gCuid 1 d’Iarscríbhinn IX, agus san iontráil a bhaineann le crios GB-0 sa Ríocht Aontaithe i gcolún 6 den tábla i gCuid 1 d’Iarscríbhinn X a ghabhann le Rialachán Cur Chun Feidhme (AE) 2021/404. Dá bhrí sin, ba cheart Iarscríbhinní IX agus X a ghabhann le Rialachán Cur Chun Feidhme (AE) 2021/404 a leasú dá réir.

(5)

Le hIarscríbhinn XV a ghabhann le Rialachán Cur Chun Feidhme (AE) 2021/404, liostaítear na tríú tíortha nó críocha, nó criosanna de thríú tír nó de chríoch, óna n-údaraítear coinsíneachtaí de tháirgí feola ó chrúbacha, ó éanlaith chlóis agus ó éin ghéim a theacht isteach san Aontas. Sa tuairisc ar chrios ‘BR-2’ sa Bhrasaíl sa tábla a leagtar amach i gCuid 2 den Iarscríbhinn sin, i measc nithe eile, tagraítear do chriosanna ‘BR-3’ agus ‘BR-4’ sa Bhrasaíl sa tábla a leagtar amach i gCuid 2 d’Iarscríbhinn XIII a ghabhann leis an Rialachán Cur Chun Feidhme sin. Mar sin féin, tar éis an leasaithe ar Iarscríbhinn XIII a ghabhann le Rialachán Cur Chun Feidhme (AE) 2021/404, le Rialachán Cur Chun Feidhme (AE) 2024/1170 ón gCoimisiún (4), ní liostaítear na criosanna ‘BR-3’ agus ‘BR-4’ sa Bhrasaíl a thuilleadh sa tábla a leagtar amach i gCuid 2 d’Iarscríbhinn XIII a ghabhann le Rialachán Cur Chun Feidhme (AE) 2021/404. Dá bhrí sin, ba cheart an tuairisc ar chrios ‘BR-2’ sa Bhrasaíl i gCuid 2 d’Iarscríbhinn XV a ghabhann le Rialachán Cur Chun Feidhme (AE) 2021/404 a leasú dá réir.

(6)

Ina theannta sin, liostaítear críoch iomlán na Moldóive in Iarscríbhinn XV a ghabhann le Rialachán Cur Chun Feidhme (AE) 2021/404 mar thríú tír óna n-údaraítear coinsíneachtaí de tháirgí feola ó éanlaith chlóis a ndearnadh cóireáil maolúcháin riosca shonrach ‘D’ orthu, i gcomhréir le hIarscríbhinn XXVI a ghabhann le Rialachán Tarmligthe (AE) 2020/692, a theacht isteach san Aontas.

(7)

An 21 Meitheamh 2024, chuir an Mholdóiv iarraidh faoi bhráid an Choimisiúin chun a crios ‘MD-1’ a liostú in Iarscríbhinn XV a ghabhann le Rialachán Cur Chun Feidhme (AE) 2021/404 mar chrios údaraithe maidir le coinsíneachtaí de tháirgí feola ó éanlaith chlóis a theacht isteach san Aontas nach gceanglaítear cóireáil maolúcháin riosca shonrach a dhéanamh orthu i gcomhréir le hIarscríbhinn XXVI a ghabhann le Rialachán Tarmligthe (AE) 2020/692.

(8)

Rinne an Coimisiún meastóireacht ar an iarraidh ón Moldóiv agus tháinig sé ar an gconclúid, i bhfianaise stádas sláinte ainmhithe chrios ‘MD-1’ sa Mholdóiv maidir le galair liostaithe ábhartha agus na ráthaíochtaí a thug údarás inniúil na Moldóive maidir le comhlíonadh nó coibhéis na gceanglas sláinte ainmhithe is infheidhme san Aontas, go bhféadfaí an crios sin a liostú i dtaca le coinsíneachtaí de tháirgí feola ó éanlaith chlóis a bhfuil cóireáil neamhshonrach ‘A’ sannta dóibh i gcolún 10 den tábla i gCuid 1, Roinn A d’Iarscríbhinn XV a ghabhann le Rialachán Cur Chun Feidhme (AE) 2021/404 a theacht isteach san Aontas, rud a léiríonn nach gceanglaítear aon chóireáil maolúcháin riosca shonrach a dhéanamh ar na táirgí feola. Ba cheart Iarscríbhinn XV a ghabhann leis an Rialachán Cur Chun Feidhme sin a leasú dá réir sin,

(9)

Ina theannta sin, ní mór tagairtí áirithe in Iarscríbhinn I a ghabhann le Rialachán Cur Chun Feidhme (AE) 2021/404 a thabhairt cothrom le dáta. Ba cheart, dá bhrí sin, Iarscríbhinní I, IX, X agus XV a ghabhann le Rialachán Cur Chun Feidhme (AE) 2021/404 a leasú dá réir sin.

(10)

Thairis sin, i gCuid 1, Roinn A, d’Iarscríbhinn XXI a ghabhann le Rialachán Cur Chun Feidhme (AE) 2021/404 liostaítear na tríú tíortha nó críocha, nó criosanna nó deighleoga de thríú tír nó de chríoch óna n-údaraítear coinsíneachtaí ainmhithe uisceacha áirithe de speicis liostaithe agus táirgí de bhunadh ainmhíoch ó na speicis liostaithe sin a theacht isteach san Aontas. San iontráil a bhaineann leis na Stáit Aontaithe, sna rónna le haghaidh chriosanna ‘US-2’, ‘US-3’, ‘US-4’ agus ‘US-5’, i gcolún 6 den liosta sin, scriosadh go hearráideach an tagairt do dheimhniú sláinte ainmhithe caighdeánach ‘AQUA-ENTRY-ESTAB/RELEASE/OTHER’ le Rialachán Cur Chun Feidhme (AE) 2021/1727 ón gCoimisiún (5), nuair a leasaigh sé an Iarscríbhinn sin. Ba cheart an tagairt sin a chur isteach arís agus ba cheart, dá bhrí sin, Iarscríbhinn XXI a ghabhann le Rialachán Cur Chun Feidhme (AE) 2021/404 a cheartú dá réir.

(11)

Beidh feidhm ag Rialachán Cur Chun Feidhme (AE) 2021/1727 ón 1 Deireadh Fómhair 2021. Dá réir sin, an ceartúchán a dhéantar leis an Rialachán seo ar Iarscríbhinn XXI a ghabhann le Rialachán Cur Chun Feidhme (AE) 2021/404, ba cheart feidhm a bheith aige ón dáta sin freisin.

(12)

Tá na bearta dá bhforáiltear sa Rialachán seo i gcomhréir leis an tuairim ón mBuanchoiste um Plandaí, Ainmhithe, Bia agus Beatha,