(1)

De bhun Airteagal 61(1) de Rialachán (AE) 2019/881 (an Gníomh um Chibearshlándáil), is iad na húdaráis náisiúnta um dheimhniú cibearshlándála (ÚNDCanna) atá freagrach as fógra a thabhairt don Choimisiún faoi chomhlachtaí um measúnú comhréireachta arna gcreidiúnú agus, i gcás inarb infheidhme, arna n-údarú chun deimhnithe Eorpacha i ndáil le cibearshlándáil a eisiúint ar leibhéil áirithe dearbhúcháin, agus ba cheart dóibh an fógra a choinneáil cothrom le dáta. Thairis sin, de réir Airteagal 61(2) de Rialachán(AE) 2019/881, ceanglaítear ar an gCoimisiún liosta a fhoilsiú in Iris Oifigiúil an Aontais Eorpaigh de na comhlachtaí um measúnú comhréireachta ar tugadh fógra ina leith faoi scéim Eorpach um dheimhniú cibearshlándála bliain amháin tar éis don scéim teacht i bhfeidhm. Chun cur chuige comhchuibhithe a áirithiú maidir le fógraí agus chun an próiseas fógartha do ÚNDCanna a éascú, ba cheart na cúinsí, formáidí agus nósanna imeachta le haghaidh na bhfógraí a shonrú a thuilleadh sa Rialachán seo. Tá sé tábhachtach na gnéithe sin a shoiléiriú d’fhonn an chéad Scéim Eorpach um Dheimhniú Cibearshlándála bunaithe ar Chritéir Choiteanna (SEDC) a leagtar síos le Rialachán Cur Chun Feidhme (AE) 2024/482 ón gCoimisiún (2) a chur i bhfeidhm.

(2)

Sa Rialachán sin admhaítear na sineirgí atá ann idir Rialachán (AE) 2019/881 agus reachtaíocht ábhartha an Aontais um chomhchuibhiú, lena n-áirítear Rialachán (AE) 2024/2847 ó Pharlaimint na hEorpa agus ón gComhairle (an Gníomh um Chibear-Athléimneacht) (3). Tá sé beartaithe, dá bhrí sin, go dtabharfaidh na ÚNDCanna fógra don Choimisiún tríd an uirlis leictreonach um fhógra a thabhairt, arna forbairt agus arna bainistiú ag an gCoimisiún, dá dtagraítear i gCinneadh Uimh. 768/2008/CE ó Pharlaimint na hEorpa agus ón gComhairle (4). Gan dochar d’oibleagáid an Choimisiúin liosta na gcomhlachtaí um measúnú comhréireachta faoina dtugtar fógra a fhoilsiú in Iris Oifigiúil an Aontais Eorpaigh, ba cheart an liosta a chur ar fáil go poiblí freisin san uirlis leictreonach um fhógra a thabhairt arna forbairt agus arna bainistiú ag an gCoimisiún.

(3)

Ciallaíonn fógra a thabhairt faoi chomhlachtaí um measúnú comhréireachta creidiúnaithe agus, i gcás inarb infheidhme, údaraithe gur féidir muinín a bheith as na comhlachtaí sin chun gníomhaíochtaí measúnaithe agus deimhniúcháin a dhéanamh i gcomhréir le Rialachán (AE) 2019/881, rud a chuireann le clú foriomlán na scéimeanna Eorpacha um dheimhniú cibearshlándála. Is den ríthábhacht é dá bhrí sin a áirithiú go gcomhlíonfaidh na comhlachtaí um measúnú comhréireachta faoina tugadh fógra a gceanglais agus a n-oibleagáidí le himeacht ama. Ba cheart an liosta foilsithe de chomhlachtaí um measúnú comhréireachta faoina dtugtar fógra a bheith cruinn agus a choinneáil cothrom le dáta, rud a léiríonn go gcomhlíonann siad na ceanglais a leagtar síos i Rialachán(AE) 2019/881 agus, i gcás inarb infheidhme, na ceanglais shonracha nó bhreise faoi scéim Eorpach um dheimhniú cibearshlándála. Chun na críche sin, is gá go dtabharfadh na ÚNDCanna fógra don Choimisiún gan moill mhíchuí faoi aon athrú ar an bhfógra, i gcomhréir le hAirteagal 61(1) de Rialachán (AE) 2019/881.

(4)

Is iad na ÚNDCanna atá freagrach as a áirithiú go gcomhlíonfaidh na comhlachtaí um measúnú comhréireachta Rialachán (AE) 2019/881 agus scéimeanna Eorpacha um dheimhniú cibearshlándála agus sa chomhthéacs sin is iad a dhéanann cruinneas na bhfógraí a áirithiú. Bíonn na gníomhaíochtaí sin faoi réir athbhreithniú piaraí, agus ba cheart go gcuideodh a dtoradh le haon athrú is gá a dhéanamh chun a n-éifeachtacht a fheabhsú a chinneadh. Féadfaidh na ÚNDCanna a bhunú nach gcomhlíonann comhlacht um measúnú comhréireachta na ceanglais ábhartha a thuilleadh tar éis ábhair imní a cuireadh in iúl dóibh faoi chúinsí difriúla. I gcás inarb infheidhme, ba cheart go dtacódh torthaí na sásraí measúnaithe piaraí leis na ÚNDCanna maidir le faireachán a dhéanamh ar inniúlacht leanúnach na gcomhlachtaí um measúnú comhréireachta faoina dtugtar fógra. Chomh maith leis sin, féadfaidh ÚNDCanna eile, an Coimisiún nó páirtithe leasmhara ábhair imní a ardú leis an ÚNDC a thugann fógra maidir le hinniúlacht leanúnach comhlachtaí um measúnú comhréireachta faoina dtugtar fógra.

(5)

Agus cinneadh á dhéanamh fógra ó chomhlacht um measúnú comhréireachta a chur ar fionraí, a shrianadh nó a tharraingt siar, comhoibreoidh an ÚNDC a thugann fógra leis an gcomhlacht náisiúnta creidiúnaithe arna cheapadh de bhun Rialachán (CE) Uimh. 765/2008 ó Pharlaimint na hEorpa agus ón gComhairle (5). Tá sin i gcomhréir le Rialachán (AE) 2019/881 lena bhforáiltear gur cheart do ÚNDCanna cúnamh agus tacaíocht ghníomhach a thabhairt, agus comhoibriú go gníomhach, leis na comhlachtaí náisiúnta creidiúnaithe leis na gníomhaíochtaí faireacháin agus maoirseachta atá acu. Ba cheart an srian ar fhógra a bheith ag tagairt do chás ina laghdaítear raon feidhme an chreidiúnaithe, nó, i gcás inarb infheidhme, raon feidhme an údaraithe, agus raon feidhme an fhógra dá réir sin.

(6)

De bhun Airteagal 54(1), pointe (n) de Rialachán(AE) 2019/881, tá rialacha le bheith san áireamh i ngach scéim Eorpach um dheimhniú cibearshlándála, i gcás inarb infheidhme, a bhaineann le taifid a choinneáil ag comhlachtaí um measúnú comhréireachta;. Is gá, dá bhrí sin, sa chás go ndéanfar fógra a shrianadh, a chur ar fionraí nó a tharraingt siar, nó sa chás gur stad an comhlacht um measúnú comhréireachta faoina dtugtar fógra dá ghníomhaíocht, go n-áiritheoidh an ÚNDC a thugann fógra go ndéantar taifid an chomhlachta um measúnú comhréireachta sin a stóráil ar bhealach slán agus go gcoinneofar iad ar feadh na tréimhse is gá, mar a fhorordaítear faoi scéim Eorpach um dheimhniú cibearshlándála.

(7)

Tá na bearta dá bhforáiltear sa Rialachán seo i gcomhréir leis an tuairim ón gcoiste arna bhunú le hAirteagal 66 de Rialachán (AE) 2019/881,