(1)

Le Cinneadh (AE) 2022/591 ó Pharlaimint na hEorpa agus ón gComhairle (2), bunaíodh an 8ú Clár Gníomhaíochta Comhshaoil agus dearbhaíodh gur den ríthábhacht faireachán a dhéanamh, lena n-áirítear trí fhaisnéis iontaofa a sholáthar i ndáil le hathruithe sa chomhshaol, chun beartas éifeachtach a cheapadh, chun an beartas sin a chur chun feidhme le go mbainfear cuspóirí an Aontais amach, agus chun saoránaigh a chumhachtú. Ba cheart ionstraimí, amhail cuntais eacnamaíocha chomhshaoil, a fhorbairt d’fhonn feasacht ghinearálta a fheabhsú maidir le héifeachtaí na ngníomhaíochtaí socheacnamaíocha ar an gcomhshaol agus maidir leis an méid a chuireann an comhshaol leis an ngeilleagar agus le folláine an duine.

(2)

Foráiltear le Rialachán (AE) Uimh. 691/2011 ó Pharlaimint na hEorpa agus ón gComhairle (3) go bhfuil an Coimisiún chun tuairisciú do Pharlaimint na hEorpa agus don Chomhairle maidir le cur chun feidhme an Rialacháin sin agus, i gcás inarb iomchuí, torthaí na staidéar píolótach dá dtagraítear sa Rialachán sin a chur san áireamh chun a mholadh go dtabharfaí isteach modúil nua cuntas eacnamaíoch comhshaoil, amhail aistrithe a bhaineann leis an gcomhshaol (fóirdheontais), cuntais fhoraoiseacha agus cuntais seirbhísí éiceachórais.

(3)

Tá na modúil cuntas eacnamaíoch nua chun rannchuidiú go díreach le tosaíochtaí bheartas comhshaoil an Aontais mar a leagtar síos, inter alia, san 8ú Clár Gníomhaíochta Comhshaoil.

(4)

Ag an 43ú seisiún a bhí aige i mí na Feabhra 2012, ghlac Coimisiún Staidrimh na Náisiún Aontaithe Creat Lárnach Chóras na gCuntas Eacnamaíoch Comhshaoil (‘CCEC’) mar chaighdeán staidrimh idirnáisiúnta agus ghlac sé Cuntasaíocht Éiceachórais CCEC (‘CCEC-CE’), Caibidlí 1 go 7, ina dtugtar tuairisc ar an gcreat cuntasaíochta agus ar na cuntais fhisiceacha ag an 52ú seisiún a bhí aige i mí an Mhárta 2021. Tá na modúil nua a thugtar isteach leis an Rialachán seo ag teacht le Creat Lárnach CCEC agus le CCEC-CE. Ina theannta sin, tá Córas na gCuntas Comhshaoil-Eacnamaíoch d’Uisce (CCEC-Uisce) curtha chun feidhme ag CCEC, córas a thacaíonn le Creat Lárnach CCEC.

(5)

Ba cheart rochtain a bheith ag an Aontas ar fhaisnéis atá ábhartha, cuimsitheach agus iontaofa chun a chúraimí a chomhlíonadh faoi na Conarthaí agus faoin dlí idirnáisiúnta, go háirithe na cúraimí sin a bhaineann leis an gcomhshaol, leis an inbhuanaitheacht agus leis an athrú aeráide. Chun cinnteoireacht fhianaise-bhunaithe a dhéanamh, is gá staidreamh lena gcomhlíontar critéir ardcháilíochta, faoi mar a leagtar amach i Rialachán (CE) Uimh. 223/2009 ó Pharlaimint na hEorpa agus ón gComhairle (4). Ina theannta sin, is gá don Choimisiún (Eurostat) na sonraí a bhailítear a chur i láthair ar bhealach níos inrochtana agus níos sothuigthe, agus na sonraí sin a chur chun cinn go gníomhach ag an am céanna.

(6)

Chun cuspóir na haeráidneodrachta san Aontas faoi 2050 a bhaint amach, is den ríthábhacht é gníomhartha dlí agus próisis uile an Aontais a ailíniú le cuspóirí fadtéarmacha comhshaoil agus aeráide an Aontais arna mbunú faoin gComhaontú Glas don Eoraip, faoi Rialachán (AE) 2021/1119 ó Pharlaimint na hEorpa agus ón gComhairle (5) agus faoin bpacáiste ‘Oiriúnach do 55’. Éilíonn roinnt gníomhartha dlí de chuid an Aontais cheana féin go ndéanfaí dlúthfhaireachán ar threochtaí agus, ar an gcaoi sin, go mbeadh sonraí breise agus sonraí níos beaichte ar fáil. I ndáil leis sin, tá sé ríthábhachtach sonraí ábhartha agus mionsonraithe a bhailiú ó na Ballstáit maidir lena n-infheistíochtaí comhshaoil chun a áirithiú go mbeidh an tAontas ar an gconair cheart chun cuspóirí an Chomhaontaithe Ghlais don Eoraip a bhaint amach. Ar na cúiseanna sin go léir, tá córas na gcuntas Eorpach eacnamaíoch comhshaoil le forbairt ina uirlis chuimsitheach lena soláthrófar sonraí suntasacha breise chun faireachán a dhéanamh ar chur chun feidhme dhlí comhshaoil an Aontais agus ar cheapadh beartas comhshaoil.

(7)

Iarrtar san 8ú Clár Ginearálta Gníomhaíochta Comhshaoil go mbunófaí gan mhoill creat ceangailteach de chuid an Aontais chun faireachán agus tuairisciú a dhéanamh ar dhul chun cinn na mBallstát i dtreo deireadh a chur de réir a chéile le fóirdheontais do bhreoslaí iontaise, bunaithe ar mhodheolaíocht chomhaontaithe, agus spriocdháta a shocrú ar leibhéal an Aontais agus ar an leibhéal náisiúnta, réigiúnach agus áitiúil maidir le deireadh a chur de réir a chéile leis na fóirdheontais sin i gcomhréir leis an uaillmhian an téamh domhanda a theorannú go 1,5 C, sprioc fhadtéarmach teochta Chomhaontú Pháras, arna ghlacadh faoi Chreat-Choinbhinsiún na Náisiún Aontaithe ar an Athrú Aeráide. I ndáil leis sin, ba cheart don Choimisiún aird ar leith a thabhairt ar an ábhar sin ina chlár le haghaidh staidéir phíolótacha agus staidéir indéantachta, agus measúnú a dhéanamh ar cháilíocht na sonraí atá ar fáil maidir le fóirdheontais fuinnimh, lena n-áirítear fóirdheontais le haghaidh breoslaí iontaise. Ba cheart don Choimisiún, i gcás inarb iomchuí, togra reachtach a chur faoi bhráid Pharlaimint na hEorpa agus na Comhairle d’fhonn modúl maidir le fóirdheontais fuinnimh, lena n-áirítear fóirdheontais le haghaidh breoslaí iontaise, a thabhairt isteach sna cuntais Eorpacha eacnamaíocha chomhshaoil.

(8)

Is acmhainn ríthábhachtach é an t-uisce, mar sin is gá bainistiú inbhuanaithe na hacmhainne sin a áirithiú agus an gaol atá aici le gníomhaíocht eacnamaíoch a thuiscint. Ba cheart don Choimisiún, dá bhrí sin, measúnú a dhéanamh ar cháilíocht na sonraí atá ar fáil maidir le huisce agus, i gcás inarb iomchuí, togra reachtach a chur faoi bhráid Pharlaimint na hEorpa agus na Comhairle d’fhonn modúl maidir le huisce a thabhairt isteach sna cuntais Eorpacha eacnamaíocha chomhshaoil.

(9)

Is cuid fhíorthábhachtach den fhreagairt dhomhanda fhadtréimhseach ar an athrú aeráide é an t-oiriúnú. Is gá aghaidh a thabhairt ar na rioscaí don tsláinte a bhaineann leis an aeráid agus atá ag éirí níos líonmhaire, lena n-áirítear tonnta teasa, dóiteáin fhiáine agus tuilte a tharlaíonn níos minice agus atá níos déine, bagairtí don tsábháilteacht agus don tslándáil uisce agus bia, agus teacht chun cinn agus leathadh galar tógálach. D’fhéadfadh na héifeachtaí díobhálacha a bheidh ag an athrú aeráide a bheith níos mó ná acmhainneachtaí oiriúnaitheachta na mBallstát. Dá bhrí sin, ba cheart do na Ballstáit agus don Aontas feabhas a chur ar a n-acmhainneacht oiriúnaitheachta, an athléimneacht a neartú agus leochaileacht i leith an athraithe aeráide a laghdú, dá bhforáiltear in Airteagal 7 de Chomhaontú Pháras, agus na comhthairbhí a bhaineann le beartais agus gníomhartha dlí eile a uasmhéadú. Ceanglaítear le Rialachán (AE) 2021/1119 go nglacfaidh na Ballstáit straitéisí agus pleananna náisiúnta cuimsitheacha oiriúnaitheachta a bheidh bunaithe ar anailísí téagartha ar an athrú aeráide agus ar leochaileacht, ar mheasúnuithe agus táscairí ar dhul chun cinn, agus iad faoi threoir na fianaise eolaíche is fearr agus is déanaí dá bhfuil ar fáil. Ós rud é gur gá faireachán a dhéanamh ar an dul chun cinn i dtreo oiriúnú don athrú aeráide, ba cheart don Choimisiún measúnú a dhéanamh ar cháilíocht na sonraí atá ar fáil maidir le hoiriúnú don athrú aeráide. Bunaithe ar na torthaí a gheofar, ba cheart don Choimisiún, i gcás inarb iomchuí, togra reachtach a chur faoi bhráid Pharlaimint na hEorpa agus na Comhairle d’fhonn modúl maidir le hoiriúnú don athrú aeráide a thabhairt isteach sna cuntais Eorpacha eacnamaíocha chomhshaoil.

(10)

Tá cailliúint na bithéagsúlachta, mar aon leis an athrú aeráide, ar cheann de na príomhleochaileachtaí atá os comhair na ngeilleagar, agus an chailliúint sin á méadú ag an athrú aeráide. Is den ríthábhacht í an bhithéagsúlacht don tslándáil bia, d'fholláine an duine agus d’athléimneacht fhoriomlán na sochaithe agus na ngeilleagar. Ba cheart do na Ballstáit agus don Aontas, dá bhrí sin, feabhas a chur ar a bhfreagairt ar ghéarchéim na bithéagsúlachta i gcomhréir lena ngealltanais idirnáisiúnta faoi Chreat Bithéagsúlachta Domhanda Kunming-Montreal arna ghlacadh ag an 15ú cruinniú a bhí ag Comhdháil na bPáirtithe i gCoinbhinsiún na Náisiún Aontaithe maidir leis an mBithéagsúlacht.

(11)

Is é is aidhm do chuntais éiceachórais, mar mhodh chun sonraí a chur ar fáil maidir le fairsinge agus riocht na sócmhainní éiceachórais agus na seirbhísí a sholáthraíonn siad don tsochaí agus don gheilleagar, an dúlra a luacháil chun gur fearr is féidir na costais a bhaineann leis an dúlra a chur san áireamh. Ba cheart é a bheith mar aidhm le luachanna airgeadaíochta a bhunú infheictheacht ar chostas na neamhghníomhaíochta a ardú agus tacú leis an Aontas a chuspóirí comhshaoil a bhaint amach. Chun ullmhú go leordhóthanach do thabhairt isteach ceanglas tuairiscithe maidir le luachanna airgeadaíochta na seirbhísí éiceachórais, ba cheart staidéir phíolótacha agus staidéir indéantachta a dhéanamh roimh ré, agus na caighdeáin idirnáisiúnta ábhartha á gcur san áireamh. Ba cheart é a bheith d’aidhm ag na staidéir sin imscrúdú a dhéanamh, inter alia, ar na luachanna airgeadaíochta atá le tuairisciú, ar an gcaidreamh idir na luachanna sin agus na hathruithe ar sholáthar agus ar úsáid seirbhísí éiceachórais atá ann cheana, ar na bealaí a bhféadfaí úsáid a bhaint sa bheartas as torthaí na modhanna meastacháin éagsúla, ar na coinníollacha faoina bhfuil na meastacháin oiriúnach lena gcomhiomlánú le chéile agus le comhiomláin chuntasaíochta náisiúnta eile, agus ar an bhformáid is oiriúnaí do na táblaí le haghaidh tuairisciú. D’fhonn na héifeachtaí atá beartaithe a bhaint amach go hiomlán, ba cheart don Choimisiún measúnú a dhéanamh ar fhéidearthachtaí modheolaíochta agus ar a indéanta atá sé luach airgeadaíochta na seirbhísí éiceachórais a thomhas, agus aird á tabhairt ar CCEC-CE. Bunaithe ar na torthaí a gheofar, ba cheart an Coimisiún a bheith in ann togra reachtach a chur faoi bhráid Pharlaimint na hEorpa agus na Comhairle lena leasaítear Rialachán (AE) Uimh. 691/ 2011 chun na cuntais éiceachórais airgeadaíochta a áireamh.

(12)

I gConclúidí an 6 Samhain 2020 uaithi, mhol an Chomhairle go bhfreagródh an córas staidrimh Eorpach ar na héilimh faisnéise atá ag eascairt as an gComhaontú Glas don Eoraip, lena n-áirítear a mhéid a bhaineann le hathbhreithniú agus méadú ar an gclár um chuntais Eorpacha eacnamaíocha chomhshaoil.

(13)

In 2019, d’fhoilsigh Cúirt Iniúchóirí na hEorpa tuarascáil speisialta Uimh. 16/2019 dar teideal ‘Cuntais Eorpacha Eacnamaíocha Chomhshaoil: is féidir an tairbhe do lucht ceaptha beartas a fheabhsú’. Léirítear sa tuarascáil sin go bhfuil gá le sonraí níos iomláine faoi fhoraoisí agus éiceachórais agus gur gá cuntais fhoraoiseacha a chur chun feidhme ina n-iomláine.

(14)

Ba cheart don Choimisiún (Eurostat) agus na húdaráis staidrimh náisiúnta agus údaráis náisiúnta eile atá freagrach as cuntais eacnamaíocha chomhshaoil a tháirgeadh a ndícheall a dhéanamh síneadh leanúnach a chur le cumhdach na sonraí staidrimh agus cáilíocht na sonraí sin a fheabhsú, ar sonraí iad lena dtacaítear chun faireachán agus meastóireacht a dhéanamh ar dhul chun cinn an Aontais agus gníomhartha reachtacha á gcur chun feidhme arna nglacadh faoin bpacáiste ‘Oiriúnach do 55’ agus i gcomhréir leis an gComhaontú Glas don Eoraip, le Rialachán (AE) 2021/1119, leis an tSaoráid Athléimneachta agus Téarnaimh arna bhunú le Rialachán (AE) 2021/241 ó Pharlaimint na hEorpa agus ón gComhairle (6) agus gníomhartha ábhartha dlí eile agus i gcomhréir freisin le gealltanais idirnáisiúnta an Aontais, agus caighdeáin eile idirnáisiúnta staidrimh arna bhforbairt ag na Náisiúin Aontaithe agus ag comhlachtaí eile á gcur san áireamh.

(15)

Tá sonraí agus staidreamh ardcháilíochta á gcur ar fáil ag cuntais Eorpacha eacnamaíocha chomhshaoil ó bhí 2011 ann, chun tacú le ceapadh beartais fianaise-bhunaithe i réimsí an Chomhaontaithe Ghlais don Eoraip agus i mbeartais eile de chuid an Aontais. Tá sé ríthábhachtach go ndéanfaí na sonraí agus an staidreamh sin a fhoilsiú agus a chur i láthair ar bhealach intuigthe agus inrochtana do gach úsáideoir. Ba cheart don Choimisiún (Eurostat) tairseach sonraí staidrimh a fhorbairt agus a chothabháil, lena dtabharfaí achoimre shothuigthe ar na príomhtháscairí ó chuntais eacnamaíocha chomhshaoil. Ba cheart rochtain ar an tairseach sonraí sin a bheith poiblí agus saor in aisce. Ba cheart é a bheith d'aidhm leis an tairseach sonraí staidrimh feabhas a chur ar scaipeadh na gcuntas Eorpach eacnamaíoch comhshaoil agus feabhas a chur ar an gcumarsáid ina leith. Níor cheart ach oiread dó cur isteach ar na sásraí rialachais a bunaíodh chun tuairisciú agus faireachán a dhéanamh ar an dul chun cinn i dtreo chuspóirí agus spriocanna tionscnamh sonrach de chuid an Aontais, e.g. an 8ú Clár Gníomhaíochta Comhshaoil.

(16)

Chun solúbthacht a áirithiú agus chun an t-ualach riaracháin ar fhreagróirí, ar institiúidí staidrimh náisiúnta agus ar údaráis náisiúnta eile a laghdú, ba cheart cead a bheith ag na Ballstáit foinsí ábhartha, modheolaíochtaí, agus cuir chuige nuálacha eile a úsáid, amhail Faire na Cruinne (Seirbhísí Copernicus). Ba cheart do na Ballstáit an Coimisiún a chur ar an eolas agus mionsonraí a sholáthar maidir le cáilíocht na gcur chuige sin.

(17)

Ba cheart na Ballstáit a bheith in ann tacaíocht airgeadais a fháil le haghaidh nuachóiriú agus feabhsú cháilíocht agus thráthúlacht an staidrimh comhshaoil agus le haghaidh cur chun feidhme staidéir phíolótacha agus staidéir indéantachta ó Chlár an Mhargaidh Aonair arna bhunú le Rialachán (AE) 2021/690 ó Pharlaimint na hEorpa agus ón gComhairle (7). I gcomhthéacs creataí airgeadais ilbhliantúla amach anseo, ba cheart tacaíocht airgeadais a sholáthar i gcomhréir le rialacha an chláir staidrimh Eorpaigh is infheidhme dá dtagraítear i Rialachán (CE) Uimh. 223/2009.

(18)

Ós rud é go bhfuil 27 mBallstát san Aontas, is iomchuí tagairt a dhéanamh do ‘AE-27’.

(19)

Is gá liosta na gcuntas Eorpach eacnamaíoch comhshaoil a d’fhéadfadh a bheith ann amach anseo agus atá liostaithe in Rialachán (AE) Uimh. 691/2011 a thabhairt cothrom le dáta chun é a ailíniú le tosaíochtaí beartais reatha an Aontais.

(20)

Cuireadh Córas Eorpach na gCuntas 2010 (CEC 2010) a bunaíodh le Rialachán (AE) Uimh. 549/2013 ó Pharlaimint na hEorpa agus ón gComhairle in ionad Chóras Eorpach na gCuntas 1995 (CEC 95) (8).

(21)

Tá creat tagartha na gcaighdeán, na sainmhínithe, na n-aicmithe agus na rialacha cuntasaíochta coiteanna chun cuntais na mBallstát a tharraingt suas i gcomhair cheanglais staidrimh an Aontais le fáil in CEC 2010.

(22)

Ba cheart don Choimisiún, i ndlúthchomhar leis na Ballstáit, lámhleabhar modheolaíochta a fhoilsiú ina mbeadh treoir fhorlíontach maidir le tiomsú na gcuntas eacnamaíoch comhshaoil arna mbunú sna modúil éagsúla a thugtar isteach leis an Rialachán seo. Ba cheart treoirlínte a áireamh sa lámhleabhar chun saintréithe an chuntais fhoraoisigh a ríomh, amhail incrimint bhliantúil ghlan an adhmaid ó stoc na gcrann beo nó ríomh na seirbhísí soláthair éiceachóras, amhail an rannchuidiú leis an rialáil aeráide dhomhanda ó laghdú thiúchan an gháis ceaptha teasa. Ba cheart an lámhleabhar a fhoilsiú tar éis theacht i bhfeidhm an Rialacháin seo.

(23)

Tá maolú ar an athrú aeráide, lena n-áirítear infheistíochtaí gaolmhara, fíor-riachtanach chun cuspóir na haeráidneodrachta a bhaint amach san Aontas faoi 2050. Ba cheart don Choimisiún (Eurostat) tosú ar shonraí agus staidreamh a sholáthar go rialta arna dtiomsú ó na sonraí ábhartha atá ar fáil ó mhodúil na gcuntas eacnamaíoch comhshaoil agus, i gcás inarb iomchuí, ó fhoinsí eile sonraí. Ba cheart na sonraí sin a mhiondealú de réir na mBallstát agus ba cheart gach earnáil den gheilleagar atá ábhartha i dtaobh maolú ar an athrú aeráide a chumhdach.

(24)

Chun forbairtí comhshaoil, eacnamaíocha agus teicniúla a chur san áireamh i gcás inar gá, ba cheart an chumhacht chun gníomhartha a ghlacadh i gcomhréir le hAirteagal 290 den Chonradh ar Fheidhmiú an Aontais Eorpaigh a tharmligean chuig an gCoimisiún chun Rialachán (AE) Uimh. 691/2011 a fhorlíonadh trí threoir mhodheolaíoch a sholáthar, agus chun Iarscríbhinní I go IX a ghabhann leis an Rialachán sin a mhodhnú maidir le liosta na saintréithe a mbeidh sonraí le tiomsú agus le tarchur ina leith, go háirithe Iarscríbhinn V, Roinn 3, chun na saintréithe maidir le hinfheistíochtaí eile ar mhaolú ar an athrú aeráide a áireamh. Ba cheart don Choimisiún a áirithiú nach gcuirfidh a ghníomhartha tarmligthe ualach suntasach breise ar na Ballstáit ná ar na freagróirí. Tá sé tábhachtach, go háirithe, go rachadh an Coimisiún i mbun comhairliúcháin iomchuí le linn a chuid oibre ullmhúcháin, lena n-áirítear ar leibhéal na saineolaithe, agus go ndéanfaí na comhairliúcháin sin i gcomhréir leis na prionsabail a leagtar síos i gComhaontú Idirinstitiúideach an 13 Aibreán 2016 maidir le Reachtóireacht Níos Fearr (9). Go sonrach, chun rannpháirtíocht chomhionann in ullmhú na ngníomhartha tarmligthe a áirithiú, faigheann Parlaimint na hEorpa agus an Chomhairle na doiciméid uile ag an am céanna leis na saineolaithe sna Ballstáit, agus bíonn rochtain chórasach ag a gcuid saineolaithe ar chruinnithe ghrúpaí saineolaithe an Choimisiúin a bhíonn ag déileáil le hullmhú na ngníomhartha tarmligthe.

(25)

Ba cheart cumhachtaí cur chun feidhme a thabhairt don Choimisiún chun gníomhartha cur chun feidhme a ghlacadh lena ndeonaítear, laistigh de thréimhse shonraithe ama, maoluithe do na Ballstáit a mhéid a bheidh gá le hoiriúnuithe móra ar a gcórais staidrimh náisiúnta. Ba cheart na cumhachtaí sin a fheidhmiú i gcomhréir le Rialachán (AE) Uimh. 182/2011 ó Pharlaimint na hEorpa agus ón gComhairle (10).

(26)

Ós rud é nach féidir leis na Ballstáit cuspóir an Rialacháin seo, eadhon modúil nua cuntas eacnamaíoch comhshaoil a thabhairt isteach sa chreat dlíthiúil do staidreamh Eorpach maidir le Cuntais Eorpacha Eacnamaíocha Chomhshaoil, a ghnóthú go leordhóthanach agus, de bharr na comhsheasmhachta agus na hinchomparáideachta, gur fearr is féidir é a ghnóthú ar leibhéal an Aontais, féadfaidh an tAontas bearta a ghlacadh, i gcomhréir le prionsabal na coimhdeachta faoi mar a leagtar amach in Airteagal 5 den Chonradh ar an Aontas Eorpach. I gcomhréir le prionsabal na comhréireachta a leagtar amach san Airteagal sin, ní théann an Rialachán seo thar a bhfuil riachtanach chun an cuspóir sin a ghnóthú.

(27)

Chuathas i gcomhairle leis an gCoiste um an gCóras Staidrimh Eorpach.

(28)

Ba cheart, dá bhrí sin, Rialachán (AE) Uimh. 691/2011 a leasú,

(1)

cuirtear an méid seo a leanas in ionad Airteagal 1:

(*1)  Rialachán (AE) Uimh. 549/2013 ó Pharlaimint na hEorpa agus ón gComhairle an 21 Bealtaine 2013 maidir leis an gcóras Eorpach cuntas náisiúnta agus réigiúnach san Aontas Eorpach (IO L 174, 26.6.2013, lch. 1).’;"

(2)

in Airteagal 2, cuirtear na pointí seo a leanas leis:

;

(3)

leasaítear Airteagal 3 mar a leanas:

(4)

leasaítear Airteagal 4 mar a leanas:

(5)

in Airteagal 5, leasaítear mír 2 mar a leanas:

(6)

cuirtear an méid seo a leanas in ionad Airteagal 8:

(7)

cuirtear an t-airteagal seo a leanas isteach:

(*2)  Rialachán (AE) 2021/690 ó Pharlaimint na hEorpa agus ón gComhairle an 28 Aibreán 2021 lena mbunaítear Clár don mhargadh inmheánach, d’iomaíochas fiontar, lena n-áirítear fiontair bheaga agus mheánmhéide, do réimse na bplandaí, na n-ainmhithe, an bhia agus na beatha, agus don staidreamh Eorpach (Clár an Mhargaidh Aonair) agus lena n-aisghairtear Rialacháin (AE) Uimh. 99/2013, (AE) Uimh. 1287/2013, (AE) Uimh. 254/2014 agus (AE) Uimh. 652/2014 (IO L 153, 3.5.2021, lch. 1).’."

(8)

cuirtear an méid seo a leanas in ionad Airteagal 9:

(9)

cuirtear an tAirteagal seo a leanas isteach:

(10)

leasaítear Airteagal 10 mar a leanas:

(11)

in Iarscríbhinn IV, Roinn 3, an chéad mhír, scriostar an t-ochtú fleasc;

(12)

cuirtear ‘AE-27’ agus ‘CEC 2010’ in ionad gach tagairt do ‘AE-28’ agus do ‘CEC 95’ faoi seach tríd síos sa téacs agus sna hIarscríbhinní;

(13)

cuirtear Iarscríbhinní VII, VIII agus IX leis i gcomhréir leis an Iarscríbhinn a ghabhann leis an Rialachán seo.