(1)

Le hIarscríbhinn II a ghabhann le Rialachán (CE) Uimh. 1333/2008 leagtar síos liosta Aontais de bhreiseáin bhia atá formheasta le húsáid i mbia agus coinníollacha a n-úsáide.

(2)

Le Rialachán (AE) Uimh. 231/2012 ón gCoimisiún (3) leagtar síos sonraíochtaí le haghaidh breiseáin bhia a liostaítear in Iarscríbhinní II agus III a ghabhann le Rialachán (CE) Uimh. 1333/2008.

(3)

Féadfar liostaí an Aontais de bhreiseáin bhia agus na sonraíochtaí a thabhairt cothrom le dáta i gcomhréir leis an nós imeachta comhchoiteann dá dtagraítear in Airteagal 3(1) de Rialachán (CE) Uimh. 1331/2008, ar thionscnamh an Choimisiúin nó tar éis iarratas a fháil.

(4)

Is substaintí atá údaraithe i gcomhréir le hIarscríbhinní II agus III a ghabhann le Rialachán (CE) Uimh. 1333/2008 iad aigéad sorbach (E 200), sorbáit photaisiam (E 202) agus galláit phróipile (E 310).

(5)

An 30 Meitheamh 2015 d’eisigh an tÚdarás Eorpach um Shábháilteacht Bia (‘an tÚdarás) tuairim eolaíoch maidir leis an athmheastóireacht ar aigéad sorbach (E 200), sorbáit photaisiam (E 202) agus sorbáit chailciam (E 203) mar bhreiseáin bhia (4). I gcás an ghrúpa aigéad sorbach (E 200) agus sorbáit photaisiam (E 202), bhunaigh an tÚdarás luach sealadach le haghaidh na hiontógála laethúla inghlactha (ADI) 3 mg/kg de mheáchan coirp in aghaidh an lae. Ina theannta sin, mhol an tÚdarás staidéar aon ghlúine sínte a dhéanamh maidir le tocsaineacht atáirgthe chun an ADI sealadach a athmheas, athbhreithniú a dhéanamh ar na huasteorainneacha le haghaidh dúile tocsaineacha sna sonraíochtaí maidir le haigéad sorbach (E 200) agus sorbáit photaisiam (E 202) a leagtar amach i Rialachán (AE) Uimh. 231/2012 agus uasteorainneacha le haghaidh miotail trasdultacha défhiúsacha a áireamh sna sonraíochtaí má úsáidtear iad sin i bpróiseas monaraíochta na mbreiseán bia sin.

(6)

An 10 Meitheamh 2016 sheol an Coimisiún glao poiblí ar shonraí maidir leis na breiseáin bhia aigéad sorbach (E 200) agus sorbáit photaisiam (E 202), chun aghaidh a thabhairt ar na moltaí a rinne an tÚdarás. Sholáthair oibreoirí gnó bia sonraí maidir le tocsaineacht atáirgthe na mbreiseán bia sin, na dúile tocsaineacha atá iontu mar eisíontais agus úsáid miotal trasdultach défhiúsach mar chatalaíocha ina monarú.

(7)

An 1 Márta 2019 d’eisigh an tÚdarás tuairim eolaíoch maidir leis an obair leantach ar an athmheastóireacht ar aigéad sorbach (E 200) agus sorbáit photaisiam (E 202) mar bhreiseáin bhia (5). Ar bhonn sonraí nua maidir leis an tocsaineacht atáirgthe, d’athraigh an tÚdarás an ADI sealadach go dtí ADI grúpa nua 11 mg d’aigéad sorbach/de mheáchan coirp in aghaidh an lae le haghaidh aigéad sorbach (E 200) agus a shalann potaisiam (E 202). Bhí na meastacháin nochta i bhfad faoin ADI grúpa nua i gcás gach grúpa daonra, ag an meánleibhéal agus an uasleibhéal araon.

(8)

Agus an athmheastóireacht ón Údarás agus na sonraí a chuir na hoibreoirí gnó isteach á gcur san áireamh, is iomchuí na sonraíochtaí le haghaidh aigéad sorbach (E 200) agus sorbáit photaisiam (E 202) a leasú. Go sonrach, ba cheart na huasteorainneacha atá ann faoi láthair le haghaidh dúile tocsaineacha a laghdú agus ba cheart uasteorainn le haghaidh since a bhunú, agus an leibhéal is féidir a bhaint amach faoi láthair trí dhea-chleachtais mhonaraíochta a chur i bhfeidhm á chur san áireamh. Thairis sin, is iomchuí an tuairisc ar shorbáit photaisiam (E 202) a leasú ionas go ndéantar tagairt ní hamháin dá foirm phúdrach ach dá foirm ghráinneach freisin, ós rud é go dtáirgtear an fhoirm phúdrach as an bhfoirm ghráinneach trí mheilt agus gurb ionann íonacht don dá fhoirm, an fhoirm phúdrach agus an fhoirm ghráinneach. Is iomchuí freisin roinnt oiriúnuithe a dhéanamh a mhéid a bhaineann leis an tuairisc ar aigéad sorbach (E 200) agus sorbáit photaisiam (E 202).

(9)

An 25 Iúil 2022 cuireadh isteach iarratas ar údarú maidir le húsáid aigéid shorbaigh (E 200) agus sorbáite potaisiam (E 202) mar leasaithigh i milseoga geilitín uiscebhunaithe atá blaistithe le torthaí. Chuir an Coimisiún an t-iarratas ar fáil do na Ballstáit ina dhiaidh sin de bhun Airteagal 4 de Rialachán (CE) Uimh. 1331/2008.

(10)

Tá milseoga geilitín uiscebhunaithe atá blaistithe le torthaí soghabhálach i leith trochlú micribhitheolaíoch mar gheall ar a n-ardghníomhaíocht uisce (aw 0,96-0,98). Nuair a úsáidtear aigéad sorbach (E 200) agus sorbáit photaisiam (E 202) idir an gnáthleibhéal agus an t-uasleibhéal úsáide atá beartaithe, 700 agus 1 000 mg/kg faoi seach, is féidir milseoga geilitín uiscebhunaithe atá blaistithe le torthaí a chosaint ar throchlú ó mhicrea-orgánaigh agus a seilfré a fhadú. Níl roghanna eile amhail teicneolaíochtaí líonta teo nó teicneolaíochtaí líonta aiseiptigh infheidhmithe ó thaobh na heacnamaíochta ná go teicneolaíoch toisc go n-athraítear saintréithe milseog geilitín uiscebhunaithe atá blaistithe le torthaí leo agus nach bhfuil siad inacmhainne, go háirithe i gcás fiontair bheaga agus meánmhéide.

(11)

De bhun Airteagal 3(2) de Rialachán (CE) Uimh. 1331/2008, ní mór don Choimisiún tuairim an Údaráis a lorg chun liosta an Aontais de bhreiseáin bia a leagtar amach in Iarscríbhinn II a ghabhann le Rialachán (CE) Uimh. 1333/2008 a thabhairt cothrom le dáta, ach amháin i gcás nach dócha go mbeidh tionchar ag an tabhairt cothrom le dáta atá i gceist ar shláinte an duine. Ós rud é go bhfuil aigéad sorbach (E 200) agus sorbáit photaisiam (E 202) údaraithe lena n-úsáid i réimse mór bianna, lena n-áirítear i milseoga éagsúla i gcatagóir bhia 16 ‘Milseoga gan táirgí a chumhdaítear faoi chatagóirí 1, 3 agus 4 a áireamh’ i gCuid E d’Iarscríbhinn II a ghabhann le Rialachán (CE) Uimh. 1333/2008, ní mheastar go mbeidh tionchar mór ag an úsáid leathnaithe atá beartaithe i milseoga geilitín uiscebhunaithe atá blaistithe le torthaí ar an nochtadh foriomlán, nochtadh a fhanfaidh faoin ADI dá bhrí sin. Tacaítear leis sin leis an meastachán a sholáthair an t-iarratasóir agus a rinneadh tríd an tSamhail um Iontógáil Breiseáin Bia (6) a d’fhorbair an tÚdarás. Dá bhrí sin, ní mheastar go mbeidh tionchar mór ag úsáid leathnaithe aigéid shorbaigh (E 200) agus sorbáite potaisiam (E 202) i milseoga geilitín uiscebhunaithe atá blaistithe le torthaí ar shláinte an duine agus dá bhrí sin ní gá tuairim ón Údarás a iarraidh.

(12)

An 24 Aibreán 2014 d’eisigh an tÚdarás tuairim eolaíoch maidir leis an athmheastóireacht ar ghalláit phróipile (E 310) mar bhreiseán bia (7). Thug an tÚdarás dá aire go bhféadfaí seachtháirgí clóirínithe a bheith mar thoradh ar úsáid aigéid hidreaclóraigh i monarú galláite próipile agus nach raibh faisnéis maidir le haithint nó cainníochtú seachtháirgí a d’fhéadfadh a bheith ann ar fáil don Údarás, in ainneoin go n-áirítear teorainn maidir le comhdhúile orgánacha clóirínithe sna sonraíochtaí.

(13)

An 30 Bealtaine 2017 sheol an Coimisiún glao poiblí ar shonraí maidir leis an mbreiseán bia galláit phróipile (E 310) agus d’iarr sé sonraí maidir le céannacht agus leibhéil na gcomhdhúl orgánach clóirínithe sa bhreiseán bia sin agus sonraí maidir leis na dúile tocsaineacha (arsanaic, luaidhe agus mearcair) a bhíonn ann mar eisíontais.

(14)

Sholáthair oibreoirí gnó sonraí maidir le dúile tocsaineacha a bhíonn i ngalláit phróipile (E 310) mar eisíontais agus shoiléirigh siad nach n-úsáidtear aigéad hidreaclórach mar chatalaíoch i bpróiseas monaraíochta na galláite próipile mar bhreiseán bia.

(15)

I bhfianaise na tuairime ón Údarás agus na faisnéise a sholáthair oibreoirí gnó, ba cheart sainmhíniú ar an mbreiseán bia galláit phróipile (E 310) a áireamh sna sonraíochtaí chun srian a chur le húsáid catalaíoch i modh monaraíochta an bhreiseáin bia. Thairis sin, ba cheart na huasteorainneacha atá ann faoi láthair le haghaidh dúile tocsaineacha a laghdú chun a áirithiú nach mbeidh an breiseán bia ina mhórfhoinse nochta ó thaobh na ndúl tocsaineach sin i mbia de, agus an leibhéal is féidir a bhaint amach faoi láthair trí dhea-chleachtais mhonaraíochta a chur i bhfeidhm á chur san áireamh.

(16)

Dá bhrí sin, ba cheart Rialacháin (CE) Uimh. 1333/2008 agus (AE) Uimh. 231/2012 a leasú dá réir.

(17)

Ós rud é nár shainaithin an tÚdarás ábhar imní láithreach ó thaobh na sláinte de a bhaineann le láithreacht dúl tocsaineach agus catalaíoch, agus chun deis a thabhairt do na hoibreoirí gnó bia, lena n-áirítear fiontair bheaga agus mheánmhéide, iad féin a oiriúnú do na sonraíochtaí níos déine nua a leagtar síos sa Rialachán seo, ba cheart cur i bhfeidhm na sonraíochtaí nua maidir le híonacht le haghaidh na mbreiseán bia aigéad sorbach (E 200), sorbáit photaisiam (E 202) agus galláit phróipile (E 310) agus an sainmhíniú ar ghalláit phróipile (E 310) a chur ar athlá agus ba cheart idirthréimhse a sholáthar i gcás breiseáin bhia a chuirtear ar an margadh roimh an dáta cur i bhfeidhm.

(18)

Ar na cúiseanna céanna, is iomchuí idirthréimhse a sholáthar i gcás bianna ina bhfuil aigéad sorbach (E 200), sorbáit photaisiam (E 202) nó galláit phróipile (E 310) a cuireadh ar an margadh go dleathach roimh an dáta cur i bhfeidhm.

(19)

Tá na bearta dá bhforáiltear sa Rialachán seo i gcomhréir leis an tuairim ón mBuanchoiste um Plandaí, Ainmhithe, Bia agus Beatha,