1.   San iarratas lena n-iarrtar ar údaráis chustaim gníomhaíocht a dhéanamh i ndáil le hearraí a bhfuil amhras fúthu go sáraíonn siad ceart maoine intleachtúla (iarratas), agus sna hiarrataí ar leasú nó ar shíneadh, beidh an fhaisnéis a shonraítear sna foirmeacha a leagtar amach in Iarscríbhinní I agus II.

2.   Déanfaidh iarratasóirí nó a n-ionadaithe an t-iarratas agus iarrataí ar leasú nó ar shíneadh a líonadh isteach agus na nótaí maidir le líonadh isteach a leagtar amach in Iarscríbhinn III á gcur san áireamh.

3.   I gcomhréir le hAirteagal 5(6) de Rialachán (AE) Uimh. 608/2013, déanfaidh iarratasóirí nó a n-ionadaithe an t-iarratas agus iarrataí ar leasú nó ar shíneadh a chur isteach go leictreonach chuig an roinn inniúil chustaim tríd an Tairseach Forfheidhmiúcháin um Maoin Intleachtúil (‘IPEP’) le haghaidh COPIS nó trí thairseach náisiúnta trádálaithe i gcás ina bhfuil tairseach den sórt sin i bhfeidhm sa Bhallstát ina gcuirtear an t-iarratas isteach.

4.   Sna Ballstáit ina bhfuil IPEP le haghaidh COPIS agus tairseach náisiúnta trádálaithe ar fáil, tá an rogha ag iarratasóirí nó ag a n-ionadaithe idir an dá thairseach trádálaithe. Má chuireann siad an t-iarratas isteach trí thairseach náisiúnta trádálaithe, cuirfear na hiarrataí ar leasú nó ar shíneadh a bhaineann leis an iarratas sin isteach tríd an tairseach náisiúnta chéanna. Má chuireann siad an t-iarratas isteach trí IPEP le haghaidh COPIS, cuirfear na hiarrataí gaolmhara ar leasú nó ar shíneadh isteach trí IPEP le haghaidh COPIS.

1.   Déanfaidh an Coimisiún, Oifig Maoine Intleachtúla an Aontais Eorpaigh (EUIPO) agus údaráis chustaim na mBallstát fógra a thabhairt dá chéile i gcás nach mbeidh COPIS, IPEP le haghaidh COPIS ná na tairseacha náisiúnta trádálaithe ar fáil i ngeall ar chliseadh sealadach.

2.   I gcás cliseadh sealadach ar COPIS nó ar cheann de na tairseacha trádálaithe a luaitear i mír 1, a mhairfidh 24 uair an chloig ar a laghad, féadfar na foirmeacha a leagtar amach in Iarscríbhinní I agus II a líonadh isteach go hinléite ar pháipéar agus féadfar iad a chur isteach ar bhealaí eile seachas teicnící leictreonacha próiseála sonraí.

3.   Beidh an glacadh le foirmeacha páipéarbhunaithe faoi réir fhormheas na n-údarás inniúil custaim.

4.   Déanfaidh iarratasóirí nó a n-ionadaithe na foirmeacha a leagtar amach in Iarscríbhinní I agus II a líonadh isteach ar pháipéar i gcomhréir leis na nótaí maidir le líonadh isteach a leagtar amach in Iarscríbhinn III.

5.   Déanfaidh na hiarratasóirí nó a n-ionadaithe na foirmeacha a líonadh isteach ar pháipéar le dúch agus i mbloclitreacha.

6.   Sna foirmeacha a líonfar isteach ar pháipéar, ní scriosfar aon ní, ní scríobhfar thar fhocail eile agus ní dhéanfar aon athrú eile, agus beidh dhá chóip díobh.

7.   Maidir leis an bhfaisnéis atá sna hiarratais agus na hiarrataí ar leasú nó ar shíneadh, arna gcur isteach i gcomhréir le mír 2, cuirfidh na hiarratasóirí nó a n-ionadaithe an fhaisnéis sin ar fáil sa tairseach trádálaithe iomchuí laistigh de 7 lá oibre ón uair a bheidh na córais leictreonacha faoi seach ar fáil arís.’.