(1)

An 18 Márta 2021 fuair an Coimisiún iarratas ó Multifolia Sas ar fhormheas millíní triomaithe Onobrychis viciifolia (goirm choiligh) mar shubstaint bhunúsach lena húsáid i gcosaint plandaí mar néimeataicíd ar fhíniúnacha.

(2)

Tar éis na seiceálacha inghlacthachta, bhí an fhaisnéis a cheanglaítear faoi Airteagal 23(3), an dara fomhír, de Rialachán (CE) Uimh. 1107/2009 ag gabháil leis an iarratas, mar a fuarthas é i mí an Mhárta 2021.

(3)

D’iarr an Coimisiún cúnamh eolaíoch ar an Údarás Eorpach um Shábháilteacht Bia (‘an tÚdarás’) de bhun Airteagal 23(4) de Rialachán (CE) Uimh. 1107/2009. An 9 Nollaig 2022 chuir an tÚdarás tuarascáil theicniúil ar fáil don Choimisiún maidir le millíní triomaithe Onobrychis viciifolia (goirm choiligh) (2).

(4)

Chuir an Coimisiún an tuarascáil athbhreithniúcháin (3) agus dréacht den Rialachán seo faoi bhráid an Bhuanchoiste um Plandaí, Ainmhithe, Bia agus Beatha an 21 Márta 2024 agus an 23 Bealtaine 2024, faoi seach.

(5)

Léirítear san fhaisnéis arna cur ar fáil ag an iarrthóir go bhfuil millíní triomaithe Onobrychis viciifolia (goirm choiligh) ar an margadh faoi láthair mar bheatha ainmhithe agus mar leasachán. Thairis sin, ní úsáidtear millíní triomaithe Onobrychis viciifolia (goirm choiligh) chun críoch cosanta plandaí go príomha ach is féidir leo a bheith úsáideach maidir le cosaint plandaí. Ar bhonn na faisnéise a soláthraíodh san iarratas agus sa Tuarascáil Theicniúil ón Údarás, is féidir teacht ar an gconclúid nach substaint ar údar imní í millíní triomaithe Onobrychis viciifolia (goirm choiligh). Níl inniúlacht bhunúsach aici bheith ina cúis le héifeachtaí suaiteora inchrínigh, éifeachtaí néarthocsaineacha nó éifeachtaí imdhíon-thocsaineacha, agus níl sé ar an margadh mar tháirge cosanta plandaí. Dá réir sin, comhlíonann millíní triomaithe Onobrychis viciifolia (goirm choiligh) na coinníollacha a leagtar amach in Airteagal 23(1) de Rialachán (CE) Uimh. 1107/2009.

(6)

Ní raibh aon mheastóireacht ábhartha ar fáil a bhí déanta i gcomhréir le reachtaíocht eile de chuid an Chomhphobail.

(7)

Tar éis scrúdú a dhéanamh ar an iarratas agus ar na doiciméid ghaolmhara uile, d’fhéadfadh coinne a bheith leis go gcomhlíonann millíní triomaithe Onobrychis viciifolia (goirm choiligh), go ginearálta, na ceanglais a leagtar síos in Airteagal 23 de Rialachán (CE) Uimh. 1107/2009, go háirithe maidir leis na húsáidí a scrúdaíodh agus a mionsonraíodh i dtuarascáil athbhreithniúcháin an Choimisiúin. Dá bhrí sin, is iomchuí millíní triomaithe Onobrychis viciifolia (goirm choiligh) a fhormheas mar shubstaint bhunúsach.

(8)

D’iarr an Coimisiún ar an iarratasóir a bharúlacha féin a chur isteach i leith thuarascáil theicniúil an Údaráis agus i leith dhréacht-tuarascáil athbhreithnithe an Choimisiúin. Chuir an t-iarratasóir a bharúlacha isteach, agus rinneadh scrúdú cúramach orthu.

(9)

I gcomhréir le hAirteagal 13(2) de Rialachán (CE) Uimh. 1107/2009 i gcomhar le hAirteagal 6 de agus i bhfianaise an eolais eolaíoch reatha agus an eolais theicniúil reatha, is gá, áfach, coinníollacha áirithe le haghaidh an fhormheasa a chur san áireamh.

(10)

I gcomhréir le hAirteagal 13(4) de Rialachán (CE) Uimh. 1107/2009, ba cheart an Iarscríbhinn a ghabhann le Rialachán Cur Chun Feidhme (AE) Uimh. 540/2011 (4) ón gCoimisiún a leasú dá réir.

(11)

Tá na bearta dá bhforáiltear sa Rialachán seo i gcomhréir leis an tuairim ón mBuanchoiste um Plandaí, Ainmhithe, Bia agus Beatha,