(1)

Le Rialachán (CE) Uimh. 1831/2003 foráiltear maidir le húdarú breiseán lena n-úsáid i gcothú ainmhithe agus maidir leis na forais agus na nósanna imeachta chun údarú den sórt sin a dheonú.

(2)

I gcomhréir le hAirteagal 7 de Rialachán (CE) Uimh. 1831/2003, cuireadh isteach iarratas maidir le coimpléasc iarainn(II) – béitín a údarú. Bhí na sonraí agus na doiciméid a cheanglaítear faoi Airteagal 7(3) de Rialachán (CE) Uimh. 1831/2003 ag gabháil leis an iarratas sin.

(3)

Baineann an t-iarratas le coimpléasc iarainn(II) – béitín a údarú mar bhreiseán beathaithe le haghaidh gach speicis ainmhíoch agus iarradh ann go n-aicmeofaí an breiseán sin sa chatagóir ‘breiseáin chothaitheacha’ agus san fheidhmghrúpa ‘comhdhúile de riandúile’.

(4)

Tháinig an tÚdarás Eorpach um Shábháilteacht Bia (‘an tÚdarás’) ar an gconclúid sa tuairim uaidh an 5 Meán Fómhair 2023 (2), go bhfuil coimpléasc iarainn(II) – béitín sábháilte do thomhaltóirí agus don chomhshaol, faoi na coinníollacha úsáide atá beartaithe, ar choinníoll nach sárófar na huasleibhéil údaraithe le haghaidh chion iomlán an iarainn i mbeatha. Tháinig an tÚdarás ar an gconclúid freisin go bhfuil coimpléasc iarainn(II) – béitín sábháilte do shicíní lena ramhrú. Is féidir an chonclúid sin a eachtarshuí chuig gach speiceas agus catagóir ainmhíoch ar choinníoll nach sáraítear na huasleibhéil údaraithe san Aontas le haghaidh iarann iomlán i mbeatha. Tháinig an tÚdarás ar an gconclúid go meastar gur íogróir craicinn agus riospráide é coimpléasc iarainn(II) – béitín, de bharr láithreacht nicile. Is greannaitheoir súl é, ach ní greannaitheoir craicinn é. Tháinig an tÚdarás ar an gconclúid go bhfuil an tsubstaint éifeachtúil mar fhoinse iarainn i ngach speiceas agus catagóir ainmhíoch. Níor mheas an tÚdarás go raibh gá le ceanglais shonracha maidir le faireachán iarmhargaidh. D’fhíoraigh sé freisin an tuarascáil ar an modh anailíse ar an mbreiseán beathaithe i mbeatha arna cur isteach ag an tSaotharlann Tagartha a bunaíodh le Rialachán (CE) Uimh. 1831/2003.

(5)

I bhfianaise an mhéid thuas, measann an Coimisiún go gcomhlíonann coimpléasc iarainn(II)-béitín na coinníollacha dá bhforáiltear in Airteagal 5 de Rialachán (CE) Uimh. 1831/2003. Dá réir sin, ba cheart úsáid na substainte sin a údarú. Tháinig an Coimisiún ar an gconclúid freisin gur cheart an breiseán a ionchorprú i mbeatha trí réamh-mheascáin, ar chúiseanna sábháilteachta. Ina theannta sin, measann an Coimisiún gur cheart bearta cosanta iomchuí a dhéanamh chun éifeachtaí díobhálacha ar shláinte úsáideoirí an bhreiseáin a chosc.

(6)

Tá na bearta dá bhforáiltear sa Rialachán seo i gcomhréir leis an tuairim ón mBuanchoiste um Plandaí, Ainmhithe, Bia agus Beatha,