(1)

Tagraíonn ‘oibreáin feabhsaithe bia’ do bhreiseáin bhia, einsímí bia agus blastáin bhia, oibreáin ar substaintí iad a chuirtear le bia d’aon ghnó chun críche teicneolaíche nó orgánaileiptí. Tá úsáid oibreán feabhsaithe bia faoi réir nós imeachta údaraithe comhchoiteann de chuid an Aontais, mar a leagtar síos i Rialachán (CE) Uimh. 1331/2008 ó Pharlaimint na hEorpa agus ón gComhairle (2).

(2)

De bhun Rialachán (AE) 2017/625, tá rialuithe oifigiúla le déanamh chun comhlíonadh na rialacha a fhíorú i réimse an bhia agus na sábháilteachta bia.

(3)

I Moladh (AE) 2023/965 ón gCoimisiún (3) tá ceanglais maidir le faireachán a dhéanamh ar iontógáil breiseán bia agus blastán bia, ceanglais a údaraítear i gcomhréir le Rialacháin (CE) Uimh. 1333/2008 (4) agus (CE) Uimh. 1334/2008 (5) ó Pharlaimint na hEorpa agus ón gComhairle, is é sin maidir le bailiú sonraí a bhaineann le láithreacht agus tarlú breiseán bia agus blastán bia i mbia.

(4)

De bhun Airteagal 92 de Rialachán (AE) 2017/625, tá saotharlann tagartha de chuid an Aontais Eorpaigh le bunú i gcás ina bhfuil gá aitheanta le cleachtais aonfhoirmeacha a chur chun cinn maidir le forbairt nó úsáid na modhanna anailíse, tástála nó diagnóise a úsáideann na saotharlanna oifigiúla atá ainmnithe i gcomhréir le hAirteagal 37(1) den Rialachán sin. Is amhlaidh sin i gcás ina mbraitheann éifeachtacht na rialuithe oifigiúla ar cháilíocht, aonfhoirmeacht agus iontaofacht na modhanna agus na dtorthaí sin.

(5)

Tá gá le saotharlann tagartha a bhunú i réimse na n-oibreán feabhsaithe bia chun bheith in ann rialuithe oifigiúla a dhéanamh go héifeachtach laistigh den Aontas. Tá gá le saotharlann tagartha a bhunú go háirithe chun leibhéal áirithe comhchuibhithe a áirithiú a mhéid a bhaineann le critéir shamplála agus modhanna anailíse a úsáidtear chun sonraí a bhaineann le breiseáin bhia agus blastáin bhia a bhailiú, agus chun tacaíocht a sholáthar do shaotharlanna oifigiúla i réimse na n-einsímí bia.

(6)

Dá bhrí sin, ba cheart saotharlann tagartha de chuid an Aontais Eorpaigh um oibreáin feabhsaithe bia a bhunú leis an Rialachán seo,