(1)

Le hAirteagal 12(1) de Rialachán (AE) 2019/6 leagtar amach an fhaisnéis atá le bheith ar lipéadú na n-aonad beag neasphacáistíochta le haghaidh táirgí íocshláinte tréidliachta. Tá an fhaisnéis sin teoranta chun a áirithiú gur féidir an fhaisnéis riachtanach uile a chur ar an lipéad ar bhealach inléite.

(2)

I gcomhréir le hAirteagal 17(3) de Rialachán (AE) 2019/6, tá rialacha aonfhoirmeacha le glacadh maidir le méid na n-aonad beag neasphacáistíochta. Ba cheart do na rialacha aonfhoirmeacha sin rannchuidiú leis an ualach riaracháin ar shealbhóirí údaruithe a laghdú, le feidhmiú an mhargaidh inmheánaigh a fheabhsú agus le hinfhaighteacht táirgí íocshláinte tréidliachta a mhéadú san Aontas.

(3)

I gcomhréir leis an treoir atá ann cheana ó Mheitheal na Gníomhaireachta Leigheasra Eorpaí um Athbhreithniú Cáilíochta ar Dhoiciméid, ba cheart a mheas gur aonad beag neasphacáistíochta é gach aon chineál pacáistíochta atá i dteagmháil dhíreach leis an táirge íocshláinte tréidliachta agus a bhfuil toirt ainmniúil suas le 50 ml ann agus an toirt sin san áireamh.

(4)

De bhun Airteagal 7(2) de Rialachán (AE) 2019/6, féadfar táirgí íocshláinte tréidliachta a lipéadú i roinnt teangacha. D’fhéadfadh aonaid phacáistíochta áirithe a bhfuil toirt ainmniúil níos mó ná 50 ml acu a bheith róbheag fós nó d’fhéadfadh cruth nó cumraíocht a bheith orthu a fhágann nach féidir an fhaisnéis lipéadaithe uile a leagtar amach in Airteagal 10(1) de Rialachán (AE) 2019/6 a chur san áireamh i bhfoirm inléite i roinnt teangacha náisiúnta. Sna cásanna sin, ba cheart foráil a dhéanamh maidir le maolú ar an tairseach 50 ml. Chun a áirithiú go gcuirfear an t-úsáideoir ar an eolas mar is ceart maidir le hairíonna an táirge, níor cheart feidhm a bheith ag an maolú sin ach amháin maidir le táirgí íocshláinte tréidliachta atá faoi réir oideas tréidliachta.

(5)

Táirgí íocshláinte tréidliachta a údaraítear roimh dháta chur i bhfeidhm an Rialacháin seo nó atá faoi réir iarratas atá ar bun ar údarú margaíochta ar dháta chur i bhfeidhm an Rialacháin seo, d’fhéadfadh sé nach gcomhlíonfaidís riachtanais an Rialacháin seo. Dá bhrí sin, chun infhaighteacht leanúnach na dtáirgí sin a áirithiú, ní mór foráil a dhéanamh maidir le hidirthréimhse ar lena linn ba cheart cead a thabhairt na táirgí sin a chur ar an margadh, fiú mura gcomhlíonann an fhaisnéis ar a lipéadú a mhéid a bhaineann le haonaid neasphacáistíochta an Rialachán seo.

(6)

Iarratasóirí a bhfuil sé beartaithe acu iarratas a chur isteach ar údarú margaíochta nó ar athrú údaraithe margaíochta, bheadh am leordhóthanach de dhíth orthu chun a n-iarratais a choigeartú chun iad a chur i gcomhréir leis na forálacha a shocraítear sa Rialachán seo. Dá bhrí sin, ba cheart feidhm a bheith ag an Rialachán seo 30 lá tar éis dháta a theacht i bhfeidhm.

(7)

Tá na bearta dá bhforáiltear sa Rialachán seo i gcomhréir leis an tuairim ón mBuanchoiste um Tháirgí Íocshláinte Tréidliachta,