(1)

Uirlis thábhachtach is ea iniúchtaí neamhspleácha chun maoirseacht a dhéanamh ar chomhlíontacht soláthraithe ardán an-mhór ar líne agus inneall cuardaigh an-mhór ar líne lena n–oibleagáidí faoi Rialachán (AE) 2022/2065. Cé go ndéantar foráil maidir le huirlisí cuntasachta eile sa Rialachán sin, ní hamháin trí ghrinnscrúdú poiblí breisithe ar thuarascálacha trédhearcachta agus ceanglais nochta sonraí eile, tá ról speisialta ag eagraíochtaí iniúchóireachta neamhspleácha chun measúnú a dhéanamh ar chomhlíontacht soláthraithe den sórt sin leis an Rialachán sin go luath sa phróiseas. Is féidir le conclúidí agus torthaí na n–iniúchtaí neamhspleácha sin agus a moltaí a bheith fiúntach don mhaoirseacht rialála. An tráth céanna, tá iniúchtaí neamhspleácha ar cheann de roinnt foinsí faisnéise agus anailíse is féidir le rialtóirí a úsáid ina ról maoirseachta agus forfheidhmithe.

(2)

Chun a áirithiú go ndéantar iniúchtaí neamhspleácha ar bhealach éifeachtach, éifeachtúil, tráthúil agus inchomparáide ó dháta chur i bhfeidhm Rialachán (AE) 2022/2065, mar a shainítear in Airteagail 92 agus 93 de sin, ba cheart don Choimisiún rialacha a leagan síos maidir le feidhmíocht iniúchtaí, go háirithe a mhéid a bhaineann leis na hoibleagáidí dlíthiúla do na soláthraithe a ndéantar iniúchadh orthu agus na céimeanna nós imeachta chun a áirithiú go gcomhlíonann na heagraíochtaí a dhéanann iniúchtaí coinníollacha maidir le neamhspleáchas, gan coinbhleacht leasa, saineolas agus eitic ghairmiúil a leagtar síos in Airteagal 37(3) de Rialachán (AE) 2022/2065.

(3)

Chun feidhmiú iomchuí iniúchtaí a éascú le hardleibhéal saineolais, agus chun teacht roimh iarmhairtí nach raibh beartaithe sa mhargadh le haghaidh seirbhísí iniúchóireachta, ba cheart a shoiléiriú go bhféadfaidh roinnt iniúchóirí dul i mbun iniúchtaí arna ndéanamh i gcomhréir le hAirteagal 37 de Rialachán (AE) 2022/2065. I gcás inar gá, mar gheall mar shampla ar an ngá a d’fhéadfadh a bheith le saineolas sonrach chun oibleagáidí nó gealltanais áirithe a iniúchadh, amhail iad sin a bhaineann le dearadh agus feidhmiú córas algartamacha, tuiscint ar na rioscaí maidir le cearta bunúsacha, nó scaipeadh inneachair neamhdhleathaigh, féadfaidh an soláthraí a ndéantar iniúchadh air eagraíochtaí iniúchóireachta difriúla, nó cuibhreannas eagraíochtaí, a fháil ar conradh chun an t–iniúchadh a dhéanamh. Féadfaidh eagraíochtaí iniúchóireachta an saineolas is gá a fháil ar fochonradh freisin, ar choinníoll go gcomhlíonann an eagraíocht iniúchóireachta agus na fochonraitheoirí araon na coinníollacha is gá maidir le neamhspleáchas, gan coinbhleacht leasa, oibiachtúlacht chruthaithe agus eitic ghairmiúil, agus go gcomhlíonann siad i gcomhpháirt coinníollacha maidir le saineolas teicniúil. Sna cásanna sin, ba cheart don soláthraí a ndéantar iniúchadh air a áirithiú go fóill go ndéantar iniúchadh ar a laghad uair amháin in aghaidh na bliana ar a chomhlíontacht leis na hoibleagáidí agus na gealltanais uile dá dtagraítear in Airteagal 37(1) de Rialachán (AE) 2022/2065.

(4)

Ba cheart d’eagraíochtaí iniúchóireachta na tuairimí iniúchóireachta dá dtagraítear in Airteagal 37(4), pointe (g), de Rialachán (AE) 2022/2065 a dhearbhú le leibhéal réasúnta dearbhaithe. Chun teacht ar leibhéal réasúnta dearbhaithe, ba cheart ardleibhéal muiníne, ach ní dearbhleibhéal muiníne a bheith ag an eagraíocht iniúchóireachta nárbh ann d’aon mhíráiteas, amhail mainneachtainí, mífhaisnéis, ná earráidí, nár braitheadh san iniúchadh. Chun an leibhéal dearbhaithe sin a áirithiú, ba cheart don eagraíocht iniúchóireachta, i measc rudaí eile, fianaise leordhóthanach a fháil agus modheolaíochtaí iniúchóireachta iomchuí a úsáid ina measúnú.

(5)

De bhun Airteagal 37(1) de Rialachán (AE) 2022/2065, ba cheart iniúchtaí neamhspleácha a dhéanamh go bliantúil ar a laghad, i gcomhréir leis an timthriall bliantúil de mheasúnuithe riosca dá dtagraítear in Airteagal 34 den Rialachán sin. Ach, d’fhéadfadh gá a bheith le hiniúchtaí níos minice i gcásanna áirithe. Leis an seicheamhú iniúchtaí, ba cheart leanúnachas maoirseachta a áirithiú maidir le comhlíontacht na soláthraithe a ndéantar iniúchadh orthu le Rialachán (AE) 2022/2065 agus na cóid iompair agus na prótacail ghéarchéime ábhartha. An tréimhse ina ndéantar comhlíontacht leis na hoibleagáidí agus na gealltanais iniúchta a mheasúnú le hiniúchadh ar leith, ba cheart don soláthraí a ndéantar iniúchadh air a áirithiú go gcomhlánaíonn an tréimhse sin an tréimhse a cumhdaíodh leis an iniúchadh roimhe sin ar chomhlíontacht an tsoláthraí leis na hoibleagáidí agus na gealltanais chéanna, sin agus gurb é an t–am is déanaí a thosódh an tréimhse sin an t–am a chríochnaigh an tréimhse a cumhdaíodh san iniúchadh roimhe sin. Ós rud é go n–áirítear i gconclúid iniúchta an measúnú arna dhéanamh ag an eagraíocht iniúchóireachta agus bunú tuarascála iniúchóireachta araon, ba cheart do sholáthraithe a ndéantar iniúchadh orthu a áirithiú gur féidir iniúchtaí a thabhairt i gcrích uair sa bhliain ar a laghad mar gheall ar fhad an iniúchta agus go gcuirtear na tuarascálacha iniúchóireachta faoi bhráid an Choimisiúin agus an Chomhordaitheora Seirbhísí Digiteacha ina dhiaidh sin gan moill mhíchuí, de bhun Airteagal 42(4) de Rialachán (AE) 2022/2065.

(6)

Cé nár cheart do sholáthraithe a ndéantar iniúchadh orthu, in aon chás, cur isteach ar fheidhmíocht an iniúchta agus a chonclúidí, ba cheart dóibh a n–oibleagáidí a chomhlíonadh faoi Airteagal 37 de Rialachán (AE) 2022/2065 lena n–áirítear trí théarmaí conarthacha a chomhaontú leis an eagraíocht iniúchóireachta agus a fhíorú, roimh eagraíocht iniúchóireachta a roghnú, go gcomhlíonann an eagraíocht sin na coinníollacha a leagtar síos in Airteagal 37(3) de Rialachán (AE) 2022/2065.

(7)

Ba cheart don soláthraí a ndéantar iniúchadh air, mar shampla, measúnú a dhéanamh ar chonarthaí a chuir sé i gcrích roimhe seo leis an eagraíocht iniúchóireachta nó ar chonarthaí a cuireadh i gcrích idir an eagraíocht iniúchóireachta agus daoine dlítheanacha atá ceangailte leis an soláthraí a ndéantar iniúchadh air. Ba cheart don soláthraí a ndéantar iniúchadh air clásail a áireamh i gconarthaí le heagraíochtaí iniúchóireachta chun urramú na gcoinníollacha a leagtar síos in Airteagal 37(3) de Rialachán (AE) 2022/2065 a ráthú. I gcás ina bhfuil roinnt eintiteas i gceist leis an eagraíocht iniúchóireachta, ba cheart don soláthraí a ndéantar iniúchadh air a dheimhniú go gcomhlíonann na heintitis sin uile na coinníollacha sin, lena n–áirítear, i gcás inarb infheidhme, aon fhochonraitheoir a fhostaíonn an eagraíocht iniúchóireachta chun tacú le feidhmíocht an iniúchta ar aon bhealach. Cé gur cheart do gach eintiteas a dhéanann an t–iniúchadh na ceanglais neamhspleáchais agus na ceanglais maidir le gan coinbhleacht leasa a bheith acu a chomhlíonadh go haonarach, ba cheart do na heintitis sin i gcomhpháirt na ceanglais a bhaineann le hinniúlacht, saineolas, nó acmhainní teicniúla a chomhlíonadh, agus dá bhrí sin ceadú d’eintitis dhifriúla páirteanna difriúla den iniúchadh a dhéanamh agus rannchuidiú leis na cumais, an inniúlacht agus an saineolas is gá chun an t–iniúchadh a dhéanamh. Ba cheart a shonrú sa tuarascáil iniúchóireachta an fhreagracht atá ar gach ceann de na heintitis sin as na páirteanna faoi seach den iniúchadh.

(8)

De bhun Airteagal 37(3), pointe (a)(i) de Rialachán (AE) 2022/2065, ba cheart don soláthraí a ndéantar iniúchadh air aird ar leith a thabhairt ionas go soláthróidh an eagraíocht iniúchóireachta seirbhísí neamh-iniúchóireachta don soláthraí a ndéantar iniúchadh air i gcás ina bhfuiltear ag fíorú cé acu a chomhlíonann nó nach gcomhlíonann eagraíocht iniúchóireachta na ceanglais neamhspleáchais agus na ceanglais maidir le gan coinbhleacht leasa a bheith ann. Ba cheart don soláthraí a ndéantar iniúchadh air, mar shampla, measúnú a dhéanamh ar cé acu a cuireadh nó nár cuireadh seirbhísí ar fáil, amhail iad sin atá nasctha le haon chóras, bogearra nó próiseas atá bainteach le hábhair atá ábhartha don oibleagáid nó don ghealltanas iniúchta, amhail seirbhísí comhairleoireachta le haghaidh measúnuithe ar fheidhmíocht, rialachas agus bogearraí, seirbhísí oiliúna, forbairt nó coinneáil ar bun córas, nó modhnú inneachair a chur ar fochonradh. Áirítear ar sheirbhísí den sórt sin freisin seirbhísí arna gcur ar fáil don soláthraí a ndéantar iniúchadh air ina gcuimsítear comhairliúchán maidir le rialuithe inmheánacha, nó iad a fhorbairt, nó measúnú a dhéanamh, chun críocha inmheánacha, ar chomhlíontacht an tsoláthraí a ndéantar iniúchadh air le Rialachán (AE) 2022/2065 nó le cóid iompair agus prótacail ghéarchéime, lena n–áirítear i gcás ina bhfuil sé sin teoranta do thástálacha poncúla, amhail tástálacha tríú páirtí maidir le feidhmíocht na gcóras modhnóireachta inneachair. Níor cheart a eisiamh leis sin eagraíochtaí iniúchóireachta a rinne iniúchtaí airgeadais reachtúla.

(9)

Mar gheall ar chastacht agus cineál áirithe iniúchtaí comhlíontachta le haghaidh Rialachán (AE) 2022/2065, tá saineolas ábhair na heagraíochta iniúchóireachta ríthábhachtach chun iniúchtaí a dhéanamh le leibhéal réasúnta dearbhaithe agus chun an breithiúnas gairmiúil agus an sceipteachas a thabhairt a chuireann ar a cumas don eagraíocht sin fios a bheith aici, mar shampla, cén fhaisnéis a theastaíonn uaithi chun na nósanna imeachta iniúchta a dhéanamh nó chun dúshlán a thabhairt d’fhaisnéis bhréagnaitheach. Dá bhrí sin, ba cheart don soláthraí a ndéantar iniúchadh air a fhíorú cé acu a sholáthraíonn nó nach soláthraíonn an eagraíocht iniúchóireachta saineolas den sórt sin, lena n–áirítear i réimse na bainistíochta riosca, a mhéid a bhaineann le rioscaí iniúchóireachta agus ábhar Rialachán (AE) 2022/2065 araon agus, go háirithe, na rioscaí sochaíocha córasacha dá dtagraítear in Airteagal 34 den Rialachán sin. Ina theannta sin, ba cheart don soláthraí a ndéantar iniúchadh air inniúlacht agus cumais theicniúla na heagraíochta iniúchóireachta a fhíorú i bhfianaise na seirbhíse sonraí a ndéantar iniúchadh uirthi, lena n–áirítear a saineolas ar an ábhar, mar shampla a mhéid a bhaineann le feidhmiú agus éifeachtaí córas algartamach, amhail córais moltaí agus córais shochtheicneolaíocha eile arna gcoinneáil ar bun ag an soláthraí. Ba cheart don eagraíocht iniúchóireachta a bheith in ann an saineolas agus na cumais is gá a chur ar fochonradh nó a fháil ar shlí eile, agus ba cheart don soláthraí a ndéantar iniúchadh air a fhíorú agus a áirithiú go bhfuil an eagraíocht iniúchóireachta in ann an saineolas agus na cumais sin a fháil in am le haghaidh fheidhmíocht an iniúchta.

(10)

Trína fhíorú go gcomhlíonann eagraíochtaí iniúchóireachta na coinníollacha a leagtar síos in Airteagal 37(3) de Rialachán (AE) 2022/2065, ba cheart don soláthraí a ndéantar iniúchadh air measúnú a dhéanamh ar fhianaise ábhartha, lena n–áirítear, de réir mar is iomchuí, deimhnithe, dearbhuithe agus tuarascálacha iniúchóireachta arna n–eisiúint ag an eagraíocht iniúchóireachta. D’fhéadfaí an saineolas iomchuí a chruthú, mar shampla, trí eispéiris phraiticiúla i measúnú agus bainistiú rioscaí, agus trí ghníomhaíocht acadúil, foilseacháin eolaíocha, agus taithí le hiniúchtaí ábhartha. Ba cheart an doiciméadacht tacaíochta ábhartha uile a bheith sna tuarascálacha iniúchóireachta a dhearbhaíonn go gcomhlíonann an eagraíocht iniúchóireachta na coinníollacha is gá.

(11)

De bhun Airteagal 37(2) de Rialachán (AE) 2022/2065, ní mór don soláthraí a ndéantar iniúchadh air gach comhar agus cúnamh is gá a sholáthar don eagraíocht iniúchóireachta chun an t–iniúchadh a dhéanamh ar bhealach éifeachtach, éifeachtúil, agus tráthúil, chomh maith le staonadh ó chur isteach ar aon bhealach ar chinntí neamhspleácha na heagraíochta iniúchóireachta. Mar shampla, níor cheart don soláthraí a ndéantar iniúchadh air aon treoraíocht a fhorchur ná a thabhairt, ná tionchar a imirt ar shlí eile ar an eagraíocht iniúchóireachta trí aon chineál teorann nó dreasachta conarthaí nó teorainn nó dreasacht eile le linn dóibh nósanna imeachta iniúchta, modheolaíochtaí, bailiú agus próiseáil faisnéise agus fianaise iniúchóireachta, anailís, tástálacha, tuairim iniúchóireachta nó saothrú conclúidí iniúchóireachta a roghnú agus a fhorghníomhú.

(12)

Chun an comhar agus an cúnamh is gá a ráthú le linn an iniúchta, ba cheart don soláthraí a ndéantar iniúchadh air a áirithiú go bhfuil rochtain ag an eagraíocht iniúchóireachta ar an bhfaisnéis uile is gá le haghaidh fheidhmíocht an iniúchta. Ba cheart don soláthraí a ndéantar iniúchadh air, a luaithe agus is féidir agus in aon chás sula dtosaíonn an eagraíocht iniúchóireachta ag feidhmiú nósanna imeachta iniúchta, na doiciméid agus na mínithe uile is gá a sheoladh. Mar shampla, de bhun Airteagal 41(3), pointí (d) agus (e), de Rialachán (AE) 2022/2065, is é feidhm chomhlíonta an tsoláthraí a ndéantar iniúchadh air faireachán a dhéanamh ar chomhlíontacht le gach oibleagáid agus gealltanas iniúchta, rud ar cheart saothrú rialuithe inmheánacha a bheith mar thoradh air. Dá bhrí sin, ba cheart rochtain a thabhairt don eagraíocht iniúchóireachta ar an bhfaisnéis uile a bhaineann le rialuithe den sórt sin, agus ar aon fhaisnéis eile ina leagtar amach straitéis an tsoláthraí a ndéantar iniúchadh air chun comhlíontacht a áirithiú. Go háirithe, ba cheart don soláthraí a ndéantar iniúchadh air na tagarmharcanna a bhfuil sé ag brath orthu a chur ar fáil don eagraíocht iniúchóireachta chun comhlíontacht le Rialachán (AE) 2022/2065 a áirithiú ionas gur féidir leis an eagraíocht iniúchóireachta na critéir iniúchóireachta a bhunú ar an bhfaisnéis sin. Ina theannta sin, ba cheart rochtain a thabhairt don eagraíocht iniúchóireachta ar aon anailís a d’fhéadfadh a bheith déanta ag an soláthraí a ndéantar iniúchadh air maidir le rioscaí bunúsacha agus rioscaí rialaithe. Ba cheart don soláthraí sin faisnéis a chur ar fáil don eagraíocht iniúchóireachta lena n–éascaítear tuiscint ar an tseirbhís a ndéantar iniúchadh uirthi, ar a rialachas, ar inniúlacht na bhfoirne agus na struchtúr cinnteoireachta faoi seach, lena n–áirítear a feidhm chomhlíonta, chomh maith le cuir i láthair ar a córais teicneolaíochta faisnéise (TF), a struchtúir sonraí agus taifead, agus an t–idirghníomhú idir córais algartamacha éagsúla atá ábhartha don iniúchadh.

(13)

Ba cheart don eagraíocht iniúchóireachta a bheith in ann aon fhaisnéis eile is gá a iarraidh tráth ar bith i bhfeidhmíocht an iniúchta. Ba cheart rochtain ar an bhfaisnéis sin a dheonú gan moill mhíchuí ar bhealach nach gcuireann bac ar aon bhealach ar fheidhmíocht an iniúchta. Ba cheart a áireamh leis sin rochtain ar shonraí, lena n–áirítear sonraí pearsanta, a bhailítear ó fhoinsí éagsúla, amhail doiciméid, córais algartamacha, bunachair sonraí nó agallaimh, de réir mar is iomchuí. Ba cheart don soláthraí a ndéantar iniúchadh air freisin rochtain a dheonú don eagraíocht iniúchóireachta ar nósanna imeachta agus próisis, córais TF, amhail córais algartamacha agus faisnéise, lena n–áirítear timpeallachtaí tástála. Chun ligean don eagraíocht iniúchóireachta iniúchadh fiúntach a dhéanamh ar chórais den sórt sin, ba cheart don soláthraí a ndéantar iniúchadh air na hacmhainní uile is gá a chur ar fáil le cuidiú leis an eagraíocht sin rochtain a fháil agus measúnú a dhéanamh ar na córais, amhail trí phearsanra inniúil an tsoláthraí a chur ar fáil chun ceisteanna a fhreagairt nó chun timpeallachtaí tástála a fheidhmiú agus mínithe a sholáthar maidir lena bhfeidhmiú, nó aon rochtain eile is gá ar phearsanra agus ar áitreabh, amhail foirgnimh, a éascú. D’fhéadfadh rochtain ar nósanna imeachta agus ar phróisis rochtain ar thuairiscí nó ar dhoiciméid a bhaineann le próiseas cinnteoireachta inmheánach an tsoláthraí a ndéantar iniúchadh air a thabhairt le fios, mar shampla. D’fhéadfadh gníomhaíochtaí coimhdeacha eile ón soláthraí a ndéantar iniúchadh air a bheith de dhíth freisin chun rochtain a fháil ar fhaisnéis ábhartha ionas go mbeidh siad in ann a n–oibleagáid maidir le comhar agus cúnamh a chomhlíonadh. Mar shampla, d’fhéadfadh saoráidí slána arna soláthar ag an soláthraí a ndéantar iniúchadh air a bheith de dhíth chun agallaimh a dhéanamh le pearsanra. I gcás inar gá sin chun an t–iniúchadh a dhéanamh, ba cheart do sholáthraithe a ndéantar iniúchadh orthu an oibleagáid maidir le comhar agus cúnamh i leith eagraíocht iniúchóireachta a chomhlíonadh, i measc nithe eile, trí rochtain a éascú ar shonraí ábhartha a bhaineann lena n–oibríochtaí atá i seilbh a gconraitheoirí tríú páirtí. D’fhéadfadh sé sin a bheith amhlaidh, mar shampla, a mhéid a bhaineann le torthaí gníomhaíochtaí modhnóireachta inneachair, ábhair oiliúna nó treoraíocht a úsáideann conraitheoirí tríú páirtí a dhéanann ábhar a mhodhnú, nó díoltóirí agus soláthraithe seirbhíse le haghaidh réitigh TF, lena n–áirítear, mar shampla, algartaim agus feidhmchláir a úsáidtear i gcórais moltaí nó i gcórais fógraíochta a úsáideann an soláthraí a ndéantar iniúchadh air.

(14)

Chun trédhearcacht fhiúntach a éascú ar thorthaí an iniúchta agus chun foráil a dhéanamh maidir le formáid chuimsitheach agus inchomparáide tuarascálacha iniúchóireachta, dá dtagraítear in Airteagal 37(4) de Rialachán (AE) 2022/2065 agus tuarascálacha ar chur chun feidhme na hiniúchóireachta dá dtagraítear in Airteagal 37(6) den Rialachán sin, ba cheart teimpléid a bhunú sa Rialachán seo le haghaidh na dtuarascálacha sin agus roinnt iarscríbhinní a éileamh le haghaidh gach ceann de na tuarascálacha. Cé go n–éilítear tuairisciú cuimsitheach leis na teimpléid a leagtar síos sa Rialachán seo, níor cheart dóibh difear a dhéanamh do na ceanglais maidir le foilsiú tuarascálacha dá ndéantar foráil in Airteagal 42(4) agus (5) de Rialachán (AE) 2022/2065.

(15)

Chun a áirithiú go bhfaigheann an eagraíocht iniúchóireachta an cúnamh uile is gá ón soláthraí a ndéantar iniúchadh air, gan cur isteach ar fheidhmíocht an iniúchta, agus go gcomhlíonann an eagraíocht iniúchóireachta na coinníollacha uile le haghaidh ullmhú an iniúchta agus go seachadann sí an tuarascáil iniúchóireachta in am trátha agus leis an gcáilíocht is gá chun leibhéal réasúnta dearbhaithe a bhaint amach, ba cheart a shonrú i rialacha áirithe na nósanna imeachta chun an t–iniúchadh a ullmhú. Ba cheart dualgais agus freagrachtaí an tsoláthraí a ndéantar iniúchadh air agus na heagraíochta iniúchóireachta, lena n–áirítear gach fochonraitheoir nó eagraíocht chomhpháirtíochta agus an fhoireann atá freagrach as an iniúchadh a dhéanamh, a leagan amach i gcomhaontú scríofa, lena n–áirítear trí théarmaí conarthacha. Ba cheart a shonrú sa chomhaontú scríofa freisin na hoibleagáidí agus na gealltanais iniúchta, an leithdháileadh acmhainní, agus rialacha na hidirghníomhaíochta agus na bpointí teagmhála idir an eagraíocht iniúchóireachta agus an soláthraí a ndéantar iniúchadh air. Ba cheart gach doiciméad tacaíochta agus conradh a chur i gceangal leis an tuarascáil iniúchóireachta, lena n–áirítear i gcás ina mbíonn na doiciméid i bhfoirm litir ghealltanais iniúchóireachta nó téarmaí conarthacha eile.

(16)

Chun forbhreathnú cuimsitheach a sholáthar agus cuntasacht na soláthraithe a ndéantar iniúchadh orthu a éascú, ba cheart a áireamh sa tuarascáil iniúchóireachta conclúid mheasúnú na heagraíochta iniúchóireachta maidir le comhlíontacht an tsoláthraí a ndéantar iniúchadh air le gach oibleagáid nó gealltanas iniúchta. Ba cheart gach conclúid ón iniúchadh a bheith bunaithe ar leibhéal réasúnta dearbhaithe agus ba cheart í a bheith ‘dearfach’, ‘dearfach le barúlacha’ nó ‘diúltach’, chun bunús iomchuí a chur leis an tuairim iniúchóireachta. Conclúidí atá ‘dearfach le barúlacha’, níor cheart baint a bheith acu leis an measúnú ar chomhlíontacht féin. D’fhéadfadh barúlacha den sórt sin tagairt a dhéanamh, mar shampla, d’fhaisnéis arna cur i dtoll a chéile ag an soláthraí ar iarraidh ón eagraíocht iniúchóireachta, nó d’fheabhsuithe ar an gcoinneáil ar bun nó ar rialuithe arna gcur i bhfeidhm ag an soláthraí a ndéantar iniúchadh air, nó d’fhéadfaí pleananna maolaithe breise agus feabhsuithe breise atá beartaithe ag an soláthraí a dhéanamh a thabhairt faoi deara sna barúlacha sin. In aon chás, i gcás ina measann an eagraíocht iniúchóireachta go gcomhlíonann an soláthraí a ndéantar iniúchadh air oibleagáid nó gealltanas iniúchta de réir na dtagarmharcanna arna dtuairisciú ag an soláthraí a ndéantar iniúchadh air, ach ina measann sí gur gá tuairimí maidir leis na tagarmharcanna sin a chur san áireamh, ba cheart conclúid an iniúchta a bheith ‘dearfach le barúlacha’, ós rud é go bhféadfadh na barúlacha sin an soláthraí a chur ar an eolas ar bhealach úsáideach faoi dheiseanna le haghaidh athruithe a d’fhéadfaí a dhéanamh ar na tagarmharcanna, bunaithe ar eolas agus ar shaineolas na heagraíochta iniúchóireachta, chomh maith le faisnéis ó fhoinsí seachtracha. Mar shampla, d’fhéadfadh na barúlacha a bheith bunaithe ar threoraíocht ón gCoimisiún, lena n–áirítear trí threoirlínte ón gCoimisiún dá dtagraítear in Airteagal 35(3) de Rialachán (AE) 2022/2065, agus aon treoirlíne ábhartha eile arna heisiúint ag an gCoimisiún maidir le cur i bhfeidhm an Rialacháin sin, tuarascálacha ón mBord Eorpach um Sheirbhísí Digiteacha dá dtagraítear in Airteagal 35(2) den Rialachán sin, gníomhaíochtaí forfheidhmithe, cinntí arna ndéanamh ag an gCoimisiún de bhun an Rialacháin sin, an cásdlí ábhartha, go háirithe ó Chúirt Bhreithiúnais an Aontais Eorpaigh, comhairliúcháin phoiblí, nó foinsí údarásacha ábhartha.

(17)

Chun grinnscrúdú poiblí agus maoirseacht rialála a chumasú, i gcás ina bhfuil conclúid iniúchóireachta ‘diúltach’ ach nach bhfuil feidhm aici ach ar feadh tréimhse teoranta agus go measann an eagraíocht iniúchóireachta gur chomhlíon an soláthraí a ndéantar iniúchadh air an oibleagáid nó an gealltanas an chuid eile den tréimhse iniúchta, ba cheart é sin a léiriú sa tuarascáil iniúchóireachta maidir le gach oibleagáid nó gealltanas lena mbaineann. Ba cheart a áireamh sa tuarascáil barúlacha na heagraíochta iniúchóireachta maidir le haon fhaisnéis a chuireann an soláthraí a ndéantar iniúchadh air ar fáil dóibh a mhéid a bhaineann le pleananna maolaithe atá i bhfeidhm nó atá beartaithe chun neamhchomhlíontacht a réiteach.

(18)

I bhfianaise chineál difriúil na n–oibleagáidí dlíthiúla a leagtar síos i gCaibidil III de Rialachán (AE) 2022/2065 agus na ngealltanas deonach arna ndéanamh faoi chóid iompair agus prótacail ghéarchéime de bhun Airteagail 45, 46 agus 48 den Rialachán sin, ba cheart don eagraíocht iniúchóireachta tuairimí iniúchóireachta a eisiúint maidir le comhlíontacht leis an gCaibidil sin agus le gach cód agus prótacal.

(19)

Chun iniúchadh a dhéanamh le leibhéal réasúnta dearbhaithe agus chun na nósanna imeachta iniúchta iomchuí a dhearadh de réir modheolaíochtaí lena n–íoslaghdaítear an riosca iniúchóireachta chuig leibhéal íseal, ba cheart meastachán de na rioscaí iniúchóireachta, is é sin an riosca go gcuireann an eagraíocht iniúchóireachta tuairim nó conclúid iniúchóireachta mhíchuí in iúl mar phríomhchuid den mhodheolaíocht chun an t–iniúchadh a dhéanamh. Dá bhrí sin, ba cheart don eagraíocht iniúchóireachta measúnú a dhéanamh ar an riosca iniúchóireachta ag tús an iniúchta ar fad, sula ndeartar an mhodheolaíocht bheacht agus sula ndéantar nósanna imeachta iniúchta. Tá gá leis an anailís riosca iniúchóireachta chun ligean don eagraíocht iniúchóireachta na modheolaíochtaí beachta a roghnú don iniúchadh agus lena chinneadh cé chomh cuimsitheach agus is gá do na nósanna imeachta iniúchta a bheith chun leibhéal réasúnta dearbhaithe a bhaint amach don tuairim iniúchóireachta. Ba cheart don eagraíocht iniúchóireachta an anailís riosca iniúchóireachta a dhéanamh don mheasúnú ar chomhlíontacht le gach oibleagáid nó gealltanas iniúchta, agus na rioscaí bunúsacha, rioscaí rialaithe agus rioscaí braite á gcur san áireamh.

(20)

Chun meastóireacht cheart a dhéanamh ar na rioscaí iniúchóireachta, ba cheart a chur san áireamh san anailís riosca iniúchóireachta cineál na seirbhíse a ndéantar iniúchadh uirthi, go háirithe a próifíl riosca, agus raon feidhme agus castacht an iniúchta. Mar shampla, is dócha go mbeidh rioscaí bunúsacha difriúla ag ardáin ar líne a cheadaíonn conclúidí cianchonarthaí idir tomhaltóirí ná mar a bheidh ag ardáin comhroinnte físeán nó innill chuardaigh. Ina theannta sin, ba cheart an comhthéacs sochaíoch agus eacnamaíoch ina gcuirtear an tseirbhís a ndéantar iniúchadh uirthi ar fáil a chur san áireamh, mar shampla a mhéid a bhaineann le grúpaí úsáideoirí tipiciúla amhail mionaoisigh, nó iompraíocht mhinic amhail minicíocht ard d’úsáid bhréagach agus iompraíochtaí comhordaithe i bhfeachtais bhréagaisnéise. Ba cheart a áireamh freisin leis an gcomhthéacs sochaíoch agus eacnamaíoch atá le cur san áireamh dóchúlacht agus, go neamhspleách, déine na risíochta ar staideanna géarchéime agus teagmhais gan choinne, dá dtagraítear i Rialachán (AE) 2022/2065.

(21)

Chun a áirithiú go léiríonn an anailís riosca iniúchóireachta éabhlóid na rioscaí a bhfuil an tseirbhís faoina réir, ba cheart an anailís riosca iniúchóireachta a bheith bunaithe freisin ar fhaisnéis ó iniúchtaí roimhe sin a raibh an soláthraí a ndéantar iniúchadh air faoina réir, i gcás inarb infheidhme, agus forbairt ar fhaisnéis ó fhoinsí amhail tuarascálacha iniúchóireachta soláthraithe eile a bhfuil próifíl riosca chomhchosúil acu. Chun a áirithiú go bhfuil fianaise úrscothach i gcomhthéacsanna cosúil leo sin ina bhfeidhmíonn an soláthraí a ndéantar iniúchadh air agus foinsí údarásacha ag a bhfuil ábharthacht dhíreach maidir le cur i bhfeidhm Rialachán (AE) 2022/2065 mar bhunús iomlán leis an anailís riosca iniúchóireachta, ba cheart a bheith ag brath san anailís freisin ar fhaisnéis ó thuarascálacha a eisíonn an Bord Eorpach um Sheirbhísí Digiteacha nó ar threoirlínte ón gCoimisiún, i gcás inarb infheidhme. D’fhéadfaí a áireamh le faisnéis eile freisin faisnéis ó thuarascálacha iniúchóireachta arna foilsiú de bhun Airteagal 42(4) de Rialachán (AE) 2022/2065 ag soláthraithe eile ardán an-mhór ar líne nó inneall cuardaigh an-mhór ar líne.

(22)

Ba cheart don eagraíocht iniúchóireachta, gan tionchar ón soláthraí a ndéantar iniúchadh air, na modheolaíochtaí iniúchóireachta a úsáidtear chun measúnú a dhéanamh ar chomhlíontacht leis na hoibleagáidí agus gealltanais iniúchta a tharraingt suas. Ba cheart na critéir iniúchóireachta a bheith bunaithe ar an bhfaisnéis arna cur isteach ag an soláthraí a ndéantar iniúchadh air a mhéid a bhaineann le tagarmharcanna a úsáideann an soláthraí a ndéantar iniúchadh air chun faireachán a dhéanamh ar chomhlíontacht. Féadfar a chur san áireamh sa mhodheolaíocht freisin faisnéis eile arna cur ar fáil ag an soláthraí a ndéantar iniúchadh air, amhail an anailís ar rioscaí bunúsacha, i gcás ina bhfuil anailís den sórt sin déanta ag an soláthraí a ndéantar iniúchadh air, mar shampla trí bhearta arna bhforbairt ag an oifigeach um chomhlíontacht nó ag an gcomhlacht bainistíochta i gcomhréir le hAirteagal 41 de Rialachán (AE) 2022/2065 nó bearta eile atá leabaithe i bhfeidhmiú na seirbhíse le haghaidh measúnuithe riosca córasacha dá dtagraítear in Airteagal 34 den Rialachán sin.

(23)

Chun a áirithiú go bhfuil na modheolaíochtaí iniúchóireachta uile iomchuí chun leibhéal réasúnta dearbhaithe a bhaint amach do na tuairimí iniúchóireachta, ba cheart aghaidh a thabhairt ar shainiúlachtaí na hoibleagáide nó an ghealltanais iniúchta sa rogha modheolaíochta le haghaidh nósanna imeachta iniúchta agus ba cheart é a chur in oiriúint, mar shampla, do chineál na hoibleagáide iniúchta mar oibleagáid díchill, nó oibleagáid torthaí nach mór don soláthraí a bhaint amach chun a bheith comhlíontach. Mar shampla, trí nósanna imeachta iniúchta chun measúnú a dhéanamh ar chomhlíontacht le tuairisciú trédhearcachta de bhun Airteagal 15 de Rialachán (AE) 2022/2065, d’fhéadfaí a cheadú don eagraíocht iniúchóireachta teacht ar chonclúid maidir le cé acu a foilsíodh nó nár foilsíodh na tuarascálacha laistigh de na moilleanna agus formáidí arna n–iarraidh sa Rialachán sin, chomh maith le cé acu a bhí siad críochnúil nó nach raibh agus cé acu a bhí na sonraí a tuairiscíodh cruinn, ionadaíoch agus miondealaithe go hiomchuí nó nach raibh, mar shampla, in aghaidh na catagóire d’ábhar neamhdhleathach atá curtha i ngníomh.

(24)

Ba cheart don rogha modheolaíochta a bheith ag brath freisin ar cé acu a theastaíonn nó nach dteastaíonn léirmhínithe comhthéacsúla ón eagraíocht iniúchóireachta don mheasúnú comhlíontachta. Ba cheart an rogha modheolaíochtaí a chur in oiriúint freisin do na rioscaí bunúsacha atá nasctha leis na gníomhaíochtaí a dhéantar chun an tseirbhís a sholáthar agus an comhthéacs ina soláthraítear an tseirbhís, mar shampla, cé acu a bhaineann nó nach mbaineann an tseirbhís le díol earraí a d’fhéadfadh a bheith neamhdhleathach nó cé acu mionaoisigh nó daoine eile a úsáideann an tseirbhís go príomha. Mar shampla, trí na modheolaíochtaí chun measúnú a dhéanamh ar chomhlíontacht le hoibleagáidí chun bearta iomchuí agus comhréireacha a chur i bhfeidhm chun ardleibhéal príobháideachais, sábháilteachta, agus slándála mionaoiseach a áirithiú de bhun Airteagal 28(1) de Rialachán (AE) 2022/2065, ba cheart a cheadú don eagraíocht iniúchóireachta tuiscint leordhóthanach a bheith acu ar an gcaoi a n–úsáideann mionaoisigh an tseirbhís a ndéantar iniúchadh uirthi agus na rioscaí a d’fhéadfadh a bheith ann maidir lena bpríobháideachas, sábháilteacht agus slándáil, chomh maith le céard is beart iomchuí agus comhréireach ann i gcomhthéacs sonrach na seirbhíse a ndéantar iniúchadh uirthi agus a úsáid ag mionaoisigh. Chuige sin, ba cheart d’eagraíochtaí iniúchóireachta an measúnú a mhiondealú ina chéimeanna iomchuí. Ba cheart dóibh measúnú a dhéanamh ar na rioscaí iniúchóireachta de réir phróifíl riosca an tsoláthraí a ndéantar iniúchadh air, go háirithe cé acu atá nó nach bhfuil sé ar fáil do mhionaoisigh nó cé acu atá nó nach bhfuil sé á úsáid acu den chuid is mó. Ba cheart dóibh a mheas, mar shampla, cé acu atá nó nach bhfuil uirlisí dearbhaithe aoise curtha i bhfeidhm ag an soláthraí, cé acu atá nó nach bhfuil siad éifeachtach agus conas a dhéanann an soláthraí a ndéantar iniúchadh air measúnú agus faireachán ar a n–éifeachtacht. Ba cheart dóibh a mheas cé acu atá nó nach bhfuil bearta iomchuí curtha i bhfeidhm ag an soláthraí a ndéantar iniúchadh air chun úsáid sáraíochta a bhaintear as a sheirbhís a bhrath agus chun pátrúin iompraíochta a bhrath lena bhféachtar le díobháil a dhéanamh do mhionaoisigh nó ar dócha go ndéanfaidh siad díobháil do mhionaoisigh.

(25)

Ba cheart roghnú na modheolaíochtaí a chur in oiriúint do na rioscaí rialaithe atá nasctha leis na bearta comhlíontachta atá i bhfeidhm ag an soláthraí a ndéantar iniúchadh air, chomh maith leis na rioscaí braite, is é sin an riosca gan míráitis a bhrath san fhaisnéis a chuireann an soláthraí ar fáil don eagraíocht iniúchóireachta. Mar shampla, i gcás ina bhféadfadh iniúchadh ar chóras algartamach bunaithe ar phearsanú le haghaidh faighteoirí aonair na seirbhíse a ndéantar iniúchadh uirthi agus nuashonruithe athfhillteacha na gcóras algartamach a bheith i gceist le hoibleagáid iniúchta, amhail na hoibleagáidí nochta le haghaidh córas moltaí de bhun Airteagal 27 de Rialachán (AE) 2022/2065, ba cheart a cheadú don eagraíocht iniúchóireachta leis an rogha modheolaíochta tástálacha iomchuí a dhearadh chun rioscaí braite a íoslaghdú. Ar an gcuma chéanna, i gcás ina bhféachann an eagraíocht iniúchóireachta lena mheas cé acu a maolaíodh nó nár maolaíodh na rioscaí ábhartha uile i ndearadh, i bhfeidhmiú agus in úsáid feidhmchlár bunaithe ar shamhlacha teanga mórscála, amhail feidhmiúlachtaí comhrá nó córais moltaí arna gcur in úsáid ag an soláthraí a ndéantar iniúchadh air, ba cheart don eagraíocht iniúchóireachta measúnú a dhéanamh ar dtús ar oiriúnacht na rialuithe arna gcur i bhfeidhm ag an soláthraí. Ba cheart stóinseacht na rialuithe inmheánacha sin a bheith mar bhunús leis an rogha tástálacha. Go háirithe, ach gan a bheith teoranta do na cásanna ina bhfuil na rialuithe inmheánacha lag, neamhiomlán nó éiginntitheach chun measúnú a dhéanamh ar cé acu a chomhlíontar nó nach gcomhlíontar na rialacha nuair a chuirtear daonra faighteoirí na seirbhíse a ndéantar iniúchadh uirthi san áireamh, ba cheart brath sna nósanna imeachta iniúchta ar mheascán modheolaíochtaí. Mar shampla, d’fhéadfaí a áireamh le modheolaíochtaí nósanna imeachta anailíseacha substainteacha, amhail anailís ar na hidirghníomhaíochtaí idir gach córas algartamach atá páirteach sna córais moltaí agus rialacha agus próisis chinnteoireachta lena mbaineann chun príomhpharaiméadair na gcóras moltaí sin, barúlacha na dtaifead agus na logaí digiteach a shuí. Ba cheart tástálacha ar an gcóras amhail tástálacha i dtimpeallachtaí ionsamhlaithe a áireamh leis na modheolaíochtaí freisin.

(26)

Chun a áirithiú go bhfuil an mhodheolaíocht ábhartha agus oiriúnaithe do thorthaí nua le linn fheidhmíocht an iniúchta, ba cheart roghnú na modheolaíochtaí a bheith á threorú ag breithiúnas gairmiúil na heagraíochta iniúchóireachta agus ba cheart iad a choigeartú chun aghaidh a thabhairt ar na torthaí nua sin, go háirithe i gcás ina bhfuil amhras réasúnta ar an eagraíocht iniúchóireachta i ndáil leis an bhfaisnéis a chuir an soláthraí a ndéantar iniúchadh air isteach. Ba cheart sceipteachas gairmiúil na heagraíochta iniúchóireachta a bhunú ar a saineolas, chomh maith le foinsí eile faisnéise a bhfuil ábharthacht ar leith léi i ndáil le cur i bhfeidhm Rialachán (AE) 2022/2065 amhail tuarascálacha ón mBord Eorpach um Sheirbhísí Digiteacha, treoraíocht ón gCoimisiún, tuarascálacha iniúchóireachta arna n–eisiúint ó chóid iompair nó ó phrótacail ghéarchéime dá dtagraítear in Airteagail 45, 46 agus 48 den Rialachán sin nó faisnéis a thagann chun cinn le linn fheidhmíocht an iniúchta, lena n–áirítear nuair a bhaineann siad le teagmhais, go háirithe staideanna géarchéime, óna dteastaíonn gníomhaíochtaí breise ón soláthraí a ndéantar iniúchadh air chun comhlíontacht a áirithiú le hoibleagáidí nó gealltanais iniúchta áirithe.

(27)

Chun a áirithiú go mbailítear fianaise iniúchta leordhóthanach le linn an iniúchta, ba cheart d’eagraíochtaí iniúchóireachta measúnú a dhéanamh ar rialuithe inmheánacha an tsoláthraí a ndéantar iniúchadh air agus nósanna imeachta iniúchta substainteacha a dhéanamh chun measúnú a dhéanamh ar chomhlíontacht an tsoláthraí a ndéantar iniúchadh air. I gcásanna áirithe, ba cheart don eagraíocht iniúchóireachta tástálacha a dhéanamh freisin.

(28)

De bharr a chasta agus atá na córais algartamacha a úsáideann soláthraithe ardán ar líne agus a ról tábhachtach i gcomhlíonadh roinnt oibleagáidí a leagtar amach i Rialachán (AE) 2022/2065, ba cheart aird ar leith a thabhairt ar na roghanna ó thaobh na modheolaíochta is gá agus is iomchuí chun iniúchadh a dhéanamh ar chórais algartamacha. Is amhlaidh atá i gcás ina bhfuil córais algartamacha mar chuid de na rialuithe arna gcur i bhfeidhm ag an soláthraí a ndéantar iniúchadh air, agus nuair is ionann iad féin agus ábhar na n–oibleagáidí nó na ngealltanas iniúchta, amhail maidir le córais moltaí, mar shampla de bhun Airteagail 27, 34, 35, agus 38 de Rialachán (AE) 2022/2065, nó córais fógraíochta, mar shampla de bhun Airteagail 26, 28, 34, 35, agus 39 den Rialachán sin, córais modhnóireachta inneachair, mar shampla de bhun Airteagail 14, 15, 34, agus 35 den Rialachán sin, nó aon chóras algartamach eile a chuireann leis na rioscaí dá dtagraítear in Airteagal 34 den Rialachán sin.

(29)

Ba cheart meascán nósanna imeachta anailíseacha substainteacha a úsáid freisin, lena n–áirítear, de réir mar is iomchuí, bunaithe ar bhreithnithe ar phróisis agus gníomhaíochtaí an tsoláthraí a ndéantar iniúchadh air agus córais algartamacha a dhearadh, a fhorbairt, a oibriú, a thástáil agus a fhaire, nó breithnithe ar thaifid agus logaí digiteacha arna dtáirgeadh ag na córais. Ba cheart na modheolaíochtaí a chur in oiriúint do shaintréithe na gcóras algartamach, lena n–áirítear a rialachas, an idirghníomhaíocht idir córais algartamacha dhifriúla chomh maith leis na córais bainistíochta sonraí lena mbaineann, agus do na teicneolaíochtaí atá mar bhunús leis na córais algartamacha sin, amhail samhlacha giniúna nó aicmitheoirí, algartaim roghnaithe nó chuardaigh eile.

(30)

Ina theannta sin, ba cheart a áireamh le modheolaíochtaí iniúchóireachta le haghaidh córas algartamach tástálacha, mar shampla, chun faisnéis a bhailiú nach bhfuil doiciméadaithe roimhe seo ag an soláthraí a ndéantar iniúchadh air, nó chun torthaí táscairí beachtais, tástálacha i mboscaí gainimh nó i dtimpeallachtaí ionsamhlaithe, nó tástálacha i gcórais táirgthe a atáirgeadh agus a mheasúnú go neamhspleách, lena n–áirítear trí chamchóipeáil sonraí nó tástáil sáraíochta.

(31)

De bharr gur coinníoll riachtanach é ardcháilíocht na fianaise iniúchóireachta le haghaidh eagraíocht iniúchóireachta chun tuairim iniúchóireachta a fhoirmiú le leibhéal réasúnta dearbhaithe, ba cheart an fhaisnéis a chinneann eagraíocht iniúchóireachta a úsáid mar fhianaise iniúchóireachta a bheith iomchuí agus leordhóthanach chun rioscaí iniúchóireachta a laghdú. Anuas air sin, ba cheart an fhianaise iniúchóireachta a bheith iontaofa de réir bhreithiúnas gairmiúil agus sceipteachas na heagraíochta iniúchóireachta agus, i gcás inarb iomchuí, i bhfianaise foinsí malartacha faisnéise. Ba cheart measúnú criticiúil ar fhianaise iniúchóireachta agus míráitis fhéideartha a áireamh sa bhreithiúnas gairmiúil agus sceipteachas. Ba cheart feidhm a bheith ag na caighdeáin cháilíochta sin maidir le gach fianaise iniúchóireachta gan beann ar cé acu a chuir nó nár chuir an soláthraí a ndéantar iniúchadh air ar fáil í nó ar bailíodh í ó fhoinsí eile.

(32)

Ba cheart don eagraíocht iniúchóireachta raon foinsí faisnéise a bhreithniú agus d’fhéadfaí a áireamh orthu, mar shampla, agallaimh le pearsanra nó conraitheoirí an tsoláthraí a ndéantar iniúchadh air, lena n–áirítear oifigigh um chomhlíontacht, innealtóirí, eolaithe sonraí, ailtirí bogearraí, nó comhaltaí d’fhoirne iniúchóireachta inmheánacha. D’fhéadfaí a áireamh orthu freisin doiciméadacht theicniúil maidir le dearadh, cur chun feidhme, tástáil agus faireachán ar chóras ábhartha, lena n–áirítear cáilíocht sonraí agus rialachas agus ar nuashonruithe agus leaganacha an chórais, agus doiciméid eile maidir le próisis rialachais agus chinnteoireachta an tsoláthraí a ndéantar iniúchadh air, lena n–áirítear i bhfianaise tosaíochtaí, acmhainní, leithdháiltí cúraimí agus freagrachtaí, nó saineolas an phearsanra ábhartha.

(33)

Chun éifeachtúlacht agus comhréireacht i bhfeidhmíocht an iniúchta a áirithiú, ba cheart a cheadú don eagraíocht iniúchóireachta sonraí agus faisnéis a shampláil, le haird chuí ar theacht ar shampla ionadaíoch, chun cur ar a cumas don eagraíocht iniúchóireachta teacht ar thuairim iniúchóireachta le leibhéal réasúnta dearbhaithe. Chun trédhearcacht agus in-atáirgtheacht na nósanna imeachta iniúchta a áirithiú, ba cheart don eagraíocht iniúchóireachta údar a sholáthar leis na roghanna maidir le méid na samplaí agus modh na samplála sa tuarascáil iniúchóireachta. Mar shampla, ba cheart méid an tsampla agus an mhodheolaíocht a roghnú ag cur san áireamh cad atá éifeachtach chun an cuspóir maidir le hiniúchadh a dhéanamh ar an oibleagáid nó gealltanas iniúchta sonrach a chomhlíonadh, agus go laghdófar a mhéid agus is féidir an riosca go bhfuil an chonclúid maidir le hiniúchadh a dhéanamh ar an sampla sonrach difriúil leis an méid a bheadh sa chonclúid dá gcuirfí an nós imeachta iniúchta i bhfeidhm ar an líon foriomlán fianaise. Ba cheart méid agus modheolaíocht an tsampla a roghnú agus raon feidhme foriomlán an iniúchta á chur san áireamh, chomh maith le hathruithe inmheánacha nó seachtracha ar an tseirbhís a ndéantar iniúchadh uirthi le linn an ama sin. Ba cheart iad a chur in oiriúint freisin do shaintréithe na gcóras algartamach lena n–áirítear a mhéid a bhaineann le pearsanú trí phróifíliú. Mar chuid den bhreithniú sin ba cheart don eagraíocht iniúchóireachta, mar shampla, sampla iomchuí a fháil ó chohóirt nó codanna difriúla a d’fhéadfadh eascairt as teicnící pearsantaithe, nó an lamháil earráide a shainaithint agus údar a thabhairt maidir leis an gcúis ar leibhéal inghlactha atá ann.

(34)

Mar gheall ar úrnuacht forálacha áirithe de Rialachán (AE) 2022/2065, is gá prionsabail mhodheolaíochta a leagan amach, lena n–áirítear ceisteanna iniúchóireachta agus treoirlínte breise maidir le modheolaíochtaí iniúchóireachta a roghnú agus fianaise iniúchóireachta don mheasúnú comhlíontachta leis na forálacha sin, is é sin chun measúnú a dhéanamh ar chomhlíontacht le hAirteagail 34, 35 agus 36 de Rialachán (AE) 2022/2065 maidir le feidhmíocht na measúnuithe riosca agus glacadh beart um maolú riosca ag soláthraithe a ndéantar iniúchadh orthu agus maidir le cur i bhfeidhm oibleagáidí i ndáil le freagairt géarchéime.

(35)

De bharr gur cheart d’eagraíochtaí iniúchóireachta measúnú a dhéanamh ar chomhlíontacht an tsoláthraí a ndéantar iniúchadh air le hAirteagal 37 de Rialachán (AE) 2022/2065, ba cheart sonraíochtaí breise a sholáthar freisin maidir leis an iniúchadh beacht i ndáil lenar cheart comhlíontacht a mheasúnú, go háirithe chun aon choinbhleacht leasa a sheachaint don eagraíocht iniúchóireachta.

(36)

I bhfianaise chineál deonach na gcód iompair agus na bprótacal géarchéime, is gá rialacha sonracha a sholáthar maidir le hiniúchadh a dhéanamh ar chomhlíontacht le hAirteagail 45, 46 agus 48 de Rialachán (AE) 2022/2065, go háirithe chun a áirithiú go ndiúscraíonn eagraíochtaí iniúchóireachta an fhaisnéis uile is gá chun iniúchtaí a dhéanamh atá sonrach do na gealltanais faoi gach cód iompair agus prótacal géarchéime,