(1)

Le hIarscríbhinn II a ghabhann le Rialachán (CE) Uimh. 1333/2008 leagtar síos liosta Aontais de bhreiseáin bhia atá formheasta le húsáid i mbia agus coinníollacha a n-úsáide.

(2)

Le Rialachán (AE) Uimh. 231/2012 ón gCoimisiún (3) leagtar síos sonraíochtaí le haghaidh breiseáin bhia, lena n-áirítear dathanna agus milseoirí a liostaítear in Iarscríbhinní II agus III a ghabhann le Rialachán (CE) Uimh. 1333/2008.

(3)

Féadfar liostaí an Aontais in Iarscríbhinní II agus III a ghabhann le Rialachán (CE) Uimh. 1333/2008 a thabhairt cothrom le dáta i gcomhréir leis an nós imeachta comhchoiteann dá dtagraítear in Airteagal 3(1) de Rialachán (CE) Uimh. 1331/2008, ar thionscnamh an Choimisiúin nó tar éis iarratas a fháil.

(4)

An 24 Meitheamh 2015 cuireadh isteach iarratas ar údarú maidir le húsáid déchiotráite trímhaignéisiam ainhidriúla mar chobhsaitheoir agus mar oibreán frithstolptha i bhforbhianna i bhfoirm sholadach agus i bhfoirm choganta agus cuireadh ar fáil do na Ballstáit é.

(5)

Tá déchiotráit trímhaignéisiam ainhidriúil ceaptha lena húsáid i bhforbhianna i bhfoirm sholadach agus i bhfoirm choganta chun méideanna beaga d’uisce iarmharach a cheangal le linn na próiseála agus laistigh den phacáistíocht.

(6)

Rinne an tÚdarás Eorpach um Shábháilteacht Bia (‘an tÚdarás’) meastóireacht ar shábháilteacht déchiotráite trímhaignéisiam ainhidriúla (4) nuair a úsáidtear í mar bhreiseán i bhforbhianna i bhfoirm sholadach agus i bhfoirm choganta agus tháinig sé ar an gconclúid nach bhfuil aon ábhar imní ó thaobh na sábháilteachta de i gceist lena húsáid i bhforbhianna soladacha ar an ngnáthleibhéal úsáide atá beartaithe de 50 000 mg/kg, cé go mbeadh an úsáid ar an uasleibhéal úsáide atá beartaithe de 120 000 mg/kg, arb é sin an meastachán noctha cothúcháin ar mhaignéisiam atá mar thoradh air, os cionn an uasleibhéil iontógála (‘UI’) is inghlactha de 250 mg/lá le haghaidh maignéisiam forlíontach arna leagan síos ag an gCoiste Eolaíoch um Bia ar bhonn na héifeachta purgóidí éadroime atá aige, rud atá inchúlaithe go héasca agus ar féidir leis an gcorp dul i dtaithí uirthi go héasca laistigh de roinnt laethanta. Ar choinníoll go raibh meastacháin noctha cothúcháin ar mhaignéisiam ó úsáid an bhreiseáin bia déchiotráit trímhaignéisiam ainhidriúil san fhorbhia faoi bhun an UI, mheas an tÚdarás nach mbeadh aon ábhar imní ó thaobh na sábháilteachta de i gceist le gnáthleibhéil úsáide beartaithe déchiotráite trímhaignéisiam ainhidriúla mar chobhsaitheoir agus mar oibreán frithstolptha i bhforbhianna.

(7)

Tar éis na tuairime ón Údarás, d’ísligh an t-iarratasóir na huasleibhéil úsáide a iarradh go 100 000 mg/kg ionas nach mbeadh an teagmháil a bhíonn ag daoine fásta agus daoine scothaosta le maignéisiam mar thoradh air ar an leibhéal ard faoi na treoracha úsáide a sholáthair an monaróir le haghaidh ghnáthúsáid an fhorbhia os cionn an UI a údaraíodh mar chothaitheach i bhforbhianna.

(8)

Is iomchuí, dá bhrí sin, úsáid déchiotráite trímhaignéisiam ainhidriúla a údarú mar chobhsaitheoir agus mar oibreán frithstolptha i bhforbhianna soladacha, agus E 345(i) a shannadh mar E-uimhir don bhreiseán sin.

(9)

Ba cheart na sonraíochtaí le haghaidh déchiotráit trímhaignéisiam (E 345(i)) a áireamh in Rialachán (AE) Uimh. 231/2012 toisc go n-áirítear é i liosta an Aontais de bhreiseáin bhia a leagtar síos in Iarscríbhinn II a ghabhann le Rialachán (CE) Uimh. 1333/2008 den chéad uair.

(10)

Dá bhrí sin, ba cheart Rialacháin (CE) Uimh. 1333/2008 agus (AE) Uimh. 231/2012 a leasú dá réir.

(11)

Tá na bearta dá bhforáiltear sa Rialachán seo i gcomhréir leis an tuairim ón mBuanchoiste um Plandaí, Ainmhithe, Bia agus Beatha,