(1)

Le hAirteagal 6 de Rialachán (AE) Uimh. 1380/2013 ó Pharlaimint na hEorpa agus ón gComhairle (1), ceanglaítear go nglactar bearta caomhnaithe agus aird á tabhairt ar an gcomhairle eolaíoch, theicniúil agus eacnamaíoch a bhíonn ar fáil, lena n-áirítear, i gcás inarb ábhartha, tuarascálacha arna dtarraingt suas ag an gCoiste Eolaíoch, Teicniúil agus Eacnamaíoch um Iascach (STECF) chomh maith le haon chomhairle a fhaightear ó chomhairlí comhairleacha.

(2)

Tá an Chomhairle le bearta a ghlacadh maidir le deiseanna iascaireachta a shocrú agus a chionroinnt, lena n-áirítear coinníollacha áirithe atá nasctha go feidhmiúil leis na deiseanna iascaireachta sin, de réir mar is iomchuí. Foráiltear le hAirteagal 16(4) de Rialachán (AE) Uimh. 1380/2013 go bhfuil deiseanna iascaireachta le glacadh i gcomhréir le cuspóirí an Chomhbheartais Iascaigh (CBI) a leagtar amach in Airteagal 2(2) den Rialachán sin. Foráiltear le hAirteagal 16(1) de Rialachán (AE) Uimh. 1380/2013 go bhfuil deiseanna iascaireachta le cionroinnt ar na Ballstáit ar dhóigh lena n-áirithítear cobhsaíocht choibhneasta gníomhaíochtaí iascaireachta gach Ballstáit le haghaidh gach stoic éisc nó iascaigh.

(3)

Dá bhrí sin, i gcomhréir le Rialachán (AE) Uimh. 1380/2013, ba cheart gabhálacha iomlána incheadaithe (TACanna) a shocrú ar bhonn na comhairle eolaíche dá bhfuil ar fáil agus gnéithe bitheolaíocha agus socheacnamaíocha á gcur san áireamh agus cóir chothrom idir earnálacha iascaireachta á háirithiú san am céanna, chomh maith leis na tuairimí a cuireadh in iúl le linn comhairliúchán le páirtithe leasmhara.

(4)

Le Rialachán (AE) 2019/1022 ó Pharlaimint na hEorpa agus ón gComhairle (2) bunaíodh plean ilbhliantúil do na hiascaigh a shaothraíonn stoic ghrinnill sa Mheánmhuir Thiar. Is é is aidhm don phlean sin a áirithiú go ndéanfar an uastáirgeacht inbhuanaithe (MSY) a bhaint amach agus a choinneáil ar bun maidir le spriocstoc, rud a áirithíonn go ndéantar le saothrú acmhainní bitheolaíocha na mara pobail na speiceas atá á saothrú a athbhunú agus a choinneáil ar bun os cionn leibhéil atá in ann an uastáirgeacht inbhuanaithe a tháirgeadh.

(5)

I gcomhréir le hAirteagal 4(1) de Rialachán (AE) 2019/1022, tá deiseanna iascaireachta le haghaidh stoic a liostaítear in Airteagal 1 den Rialachán sin le socrú chun go mbainfear amach uastáirgeacht inbhuanaithe (MSY) maidir le básmhaireacht iascaireachta ar bhonn forchéimnitheach incriminteach faoi 2020 más féidir, agus faoin 1 Eanáir 2025 ar a dhéanaí. Tá deiseanna iascaireachta le sloinneadh mar uasiarracht iascaireachta incheadaithe le haghaidh trálaer agus báid spiléireachta agus ba cheart iad a shocrú i gcomhréir leis an gcóras iarrachta iascaireachta a leagtar síos in Airteagal 7 de Rialachán (AE) 2019/1022, agus ba cheart iad a shloinneadh chomh maith le huasteorainneacha gabhála don séacla gorm agus dearg (Aristeus antennatus) agus don séacla mór dearg (Aristaeomorpha foliacea) in uiscí doimhne i gcomhréir le comhairle eolaíoch agus le hAirteagal 7(3), pointe (b), den Rialachán sin.

(6)

Ba é an chomhairle a thug STECF gur gá breis gníomhaíochta a dhéanamh agus go bhfuil gá le laghdú suntasach i ráta básmhaireachta iascaireachta le haghaidh trálaer chun spriocanna uastáirgeachta inbhuanaithe a bhaint amach in 2025 i gcás stoic éisc go léir na Meánmhara Thiar. Bunaithe ar an gcomhairle sin, ba cheart uasiarracht iascaireachta incheadaithe le haghaidh trálaeir sa Mheánmhuir Thiar a laghdú 9.5 % le haghaidh 2024 i gcomparáid leis an mbunlíne idir 2015 agus 2017, méid a bheidh le baint den uasiarracht iascaireachta incheadaithe a socraíodh le haghaidh 2023 le Rialachán (AE) 2023/195 ón gComhairle (3).

(7)

In 2023, mhol STECF go raibh tionchar ag báid spiléireachta ar sceitheoirí ós rud é go rannchuidíonn siad 7 % de thabhairt i dtír na gcolmóirí sa Choimisiún Ginearálta Iascaigh don Mheánmhuir (CGIM) i bhfolimistéir gheografacha (‘FLGanna’) 1, 2, 5, 6 agus 7, agus go rannchuidíonn siad le 13 % de na gabhálacha iomlána a thugtar i dtír in FLG 10 agus 6 % in FLGanna 8, 9, 10 agus 11. Ina theannta sin, in 2023, mhol STECF go raibh bithmhais stoic sceite colmóirí in FLGanna 1, 5, 6 agus 7 agus in FLGanna 8, 9, 10 agus 11 fós faoi bhun na teorann caomhantais (BLIM), de réir bhrí Airteagal 2(10), de Rialachán (AE) 2019/1022, agus go laghdófar 89 % ar a laghad a dhéanamh ar ghabhálacha in FLGanna 1, 5, 6 agus 7 agus 40 % in FLGanna 8, 9, 10 agus 11 chun FMSY a bhaint amach in 2024. Dá bhrí sin. is iomchuí, le haghaidh 2024, uasiarracht iascaireachta incheadaithe le haghaidh báid spiléireachta a choinneáil ar na leibhéil chéanna arna socrú le haghaidh 2023 le Rialachán (AE) 2023/195, ar bhonn Airteagal 7(5) de Rialachán (AE) 2019/1022.

(8)

In 2023, mhol STECF go bhfuil básmhaireacht iascaireachta an tséacla ghoirm agus dhearg in FLGanna 1, 2, 5, 6 agus 7 fós i bhfad ó leibhéil inbhuanaithe agus go bhfuil gá, dá bhrí sin, le tuilleadh bearta bainistíochta. Go háirithe, mhol STECF gur cheart, chun FMSY a bhaint amach faoi 2024, na gabhálacha a laghdú 58 % ar an meán, agus go sonrach 56 % in FLGanna 1 agus 2, 59 % in FLG 5 agus 61 % in FLGanna 6 agus 7. I gcomhréir le hAirteagal 7(3)(b) de Rialachán (AE) 2019/1022, is iomchuí, dá bhrí sin, an córas iarrachta iascaireachta a chomhlánú le huasteorainneacha gabhála. Ba cheart na huasteorainneacha gabhála le haghaidh an tséacla ghoirm agus dheirg in FLGanna 1-2-5-6-7 a laghdú 5 % i gcomparáid le deiseanna iascaireachta a socraíodh le haghaidh 2023 le Rialachán (AE) 2023/195.

(9)

In 2023, chuir STECF in iúl go bhfuil gá le bearta bainistíochta breise don séacla gorm agus dearg in FLGanna 8, 9, 10 agus 11 agus moltar an ghabháil iomlán a laghdú 39 %. Is iomchuí, dá bhrí sin, an córas iarrachta iascaireachta a chomhlánú le huasteorainneacha gabhála. Ba cheart na huasteorainneacha gabhála le haghaidh an tséacla ghoirm agus dheirg in FLGanna 8-9-10-11 a laghdú 3 % i gcomparáid leis na deiseanna iascaireachta a socraíodh le haghaidh 2023 le Rialachán (AE) 2023/195.

(10)

In 2023, chuir STECF in iúl go bhfuil gá le bearta bainistíochta breise don séacla dearg in FLGanna 8, 9, 10 agus 11 agus moltar an ghabháil iomlán a laghdú 31 %. Is iomchuí, dá bhrí sin, an córas iarrachta iascaireachta a chomhlánú le huasteorainneacha gabhála. Ba cheart na huasteorainneacha gabhála le haghaidh an tséacla dheirg in FLGanna 8-9-10-11 a laghdú 3 % i gcomparáid le deiseanna iascaireachta a socraíodh le haghaidh 2023 le Rialachán (AE) 2023/195.

(11)

Ag an 43ú cruinniú bliantúil a bhí ag CGIM in 2019, ghlac sé Moladh CGIM/43/2019/5 maidir le plean bainistíochta ilbhliantúil i dtaca le hiascaigh ghrinnill inbhuanaithe i Muir Aidriad (folimistéir gheografacha CGIM 17 agus 18), moladh lenar tugadh isteach, ó 2020 go 2026, córas iarrachta iascaireachta agus uasteorainn acmhainneachta cabhlaigh maidir le stoic ghrinnill áirithe. Ba cheart na bearta sin a bhaineann le 2024 a chur chun feidhme i ndlí an Aontais.

(12)

Ag an 46ú cruinniú bliantúil a bhí ag CGIM in 2023, ghlac sé Moladh CGIM/46/2023/6 maidir le córas iarrachta iascaireachta a chur chun feidhme le haghaidh príomhstoic ghrinnill i Muir Aidriad in 2024 (FLGanna 17 agus 18), ag eascairt as Moladh CGIM/43/2019/5. Le Moladh CGIM/46/2023/6 déantar foráil maidir le laghdú 4 % ar an gcóras iarrachta iascaireachta i gcás soithí tráil dobharchú agus maidir le tar-rolladh leibhéil iarrachta 2023 le haghaidh soithí tráil bhíoma. Chun na bearta sin a chur chun feidhme i ndlí an Aontais, ba cheart, dá bhrí sin, 4 % a asbhaint den uasiarracht iascaireachta incheadaithe le haghaidh soithí tráil dobharchú a shocraítear le haghaidh 2023 le Rialachán (AE) 2023/195 agus ba cheart an uasiarracht iascaireachta incheadaithe le haghaidh soithí tráil bhíoma a choinneáil ar leibhéil 2023.

(13)

Ag an 44ú cruinniú bliantúil a bhí ag CGIM in 2021, ghlac sé Moladh CGIM/44/2021/20 maidir le plean bainistíochta ilbhliantúil i dtaca le saothrú inbhuanaithe stoc peiligeach beag i Muir Aidriad (folimistéir gheografacha CGIM 17 agus 18), moladh lenar tugadh isteach, ó 2022 go 2029 uasleibhéal gabhálacha agus uasteorainn ghaolmhar acmhainneachta cabhlaigh le haghaidh soithí peas-saighne agus trálaeir pheiligeacha a dhíríonn ar pheiligigh bheaga, lena ngabhann maolú maidir le cabhlaigh náisiúnta ina bhfuil níos lú ná 10 soitheach, idir shoithí peas-saighne nó thrálaeir pheiligeacha, a bhíonn ag iascaireacht go gníomhach le haghaidh peiligigh bheaga. Ba cheart na bearta sin a bhaineann le 2024 a chur chun feidhme i ndlí an Aontais.

(14)

Ag an 46ú cruinniú bliantúil a bhí ag CGIM in 2023, ghlac sé Moladh CGIM/46/2023/5 maidir le síneadh a chur le córas iascaireachta idirthréimhseach agus teorainn ghabhála le haghaidh speicis peiligeach beag a chur ar bun i Muir Aidriad in 2024 (FLGanna 17 agus 18), ag eascairt as Moladh CGIM/44/2021/20. Le Moladh CGIM/46/2023/5 déantar foráil maidir le laghdú ar na gabhálacha i gcás peiligeach beag, 5 % i gás sairdíní agus 9 % i gcás ainseabhaithe, i gcomparáid le leibhéil 2023. Chun na bearta sin a chur chun feidhme i ndlí an Aontais, ba cheart 5 % i gcás sairdíní agus 9 % i gcás ainseabhaithe a asbhaint ón uasleibhéal gabhálacha arna shocrú le haghaidh 2023 le Rialachán (AE) 2023/195.

(15)

Agus saintréithe chabhlach na Slóivéine agus an tionchar beag atá aige ar stoic pheiligeacha bheaga agus stoic ghrinnill, agus i gcomhréir le mír 33 de Mholadh CGIM/44/2021/20 agus le mír 13 de Mholadh CGIM/43/2019/5, is iomchuí na patrúin iascaireachta atá ann cheana a chaomhnú agus rochtain chabhlach na Slóivéine a áirithiú ar íosmhéid speiceas peiligeach beag agus leithdháileadh íosta iarrachta le haghaidh stoic ghrinnill.

(16)

Ag an 46ú cruinniú bliantúil a bhí ag CGIM in 2023, ghlac sé Moladh CGIM/46/2023/16 maidir le plean bainistíochta fadtéarmach don eascann Eorpach. Sa Mholadh sin coinnítear, le haghaidh 2024, na bearta idirthréimhseacha atá ann cheana, an tréimhse choiscthe 6 mhí agus an toirmeasc ar iascaireacht áineasa. Thairis sin, foráiltear leis an Moladh sin go gcuirfidh na Páirtithe Conarthacha bearta breise chun feidhme chun básmhaireacht iascaireachta eascann gloine a laghdú 30 % ar a laghad in 2024 i gcomparáid leis an tréimhse thagartha 2019-2021. Tá feidhm le bheith ag na bearta sin maidir le huiscí muirí uile na Meánmhara, fionnuiscí agus uiscí goirte, mar shampla inbhir, murlaigh chósta agus uiscí trasdultacha, i gcomhréir leis an Moladh sin. Ba cheart na bearta sin a chur chun feidhme i ndlí an Aontais.

(17)

Ag an 46ú cruinniú bliantúil a bhí ag CGIM in 2023, ghlac sé Moladh CGIM/46/2023/13 maidir le plean bainistíochta i dtaca le saothrú inbhuanaithe an choiréalaigh dheirg (Corallium rubrum) sa Mheánmhuir (folimistéir gheografacha 1 go 27), moladh lenar cuireadh síneadh bliana le forálacha Mholadh CGIM/43/2019/4 lenar tugadh isteach stop sealadach le hiarracht iascaireachta arna sloinneadh mar líon uasta údaruithe iascaireachta, agus teorainneacha saothraithe maidir leis an gcoiréalach dearg. Ba cheart na bearta sin a chur chun feidhme i ndlí an Aontais.

(18)

Ag an 46ú cruinniú bliantúil a bhí ag CGIM in 2023, ghlac sé Moladh CGIM/46/2023/14 maidir le plean bainistíochta ilbhliantúil i dtaca le saothrú inbhuanaithe an doráid choitinn (Coryphaena hippurus) sa Mheánmhuir (folimistéir gheografacha 1 go 27). Leis an Moladh sin, tugadh isteach, i gcomhréir le cur chuige an réamhchúraim agus don idirthréimhse 2024 go 2026, uasteorainn acmhainneachta cabhlaigh, acmhainn feiste comhthiomsaithe éisc (FADanna) in aghaidh an tsoithigh a reo, teorainn ghabhála agus tréimhse choiscthe shealadach. Maidir le hiascaigh áineasa, foráiltear freisin le Moladh CGIM/46/2023/14 go bhfuil le cloí le teorainn ghabhála laethúil chomh maith le tréimhse thoirmisc le haghaidh iascaigh thráchtála. Ba cheart na bearta sin a chur chun feidhme i ndlí an Aontais don idirthréimhse 2024 go 2026. Tá na bearta sin gan dochar do na bearta bainistíochta a mholfaidh an Coiste Comhairleach Eolaíoch laistigh de CGIM don phlean bainistíochta fadtéarmach don tréimhse 2027-2031.

(19)

Ag an 45ú cruinniú bliantúil a bhí ag CGIM in 2022, ghlac sé Moladh CGIM/45/2022/4 maidir le plean bainistíochta ilbhliantúil i dtaca le saothrú inbhuanaithe stoc grinnill i gCaolas na Sicile (folimistéir gheografacha 12 go 16), lena n-aisghairtear Moltaí CGIM/44/2021/12 agus CGIM/42/2018/5. Le Moladh CGIM/45/2022/4, tugadh isteach córas iarrachta do cholmóirí (Merluccius merluccius) agus teorainneacha gabhála le haghaidh rós-séaclaí domhainmhara (Parapenaeus longirostris) chomh maith le reo acmhainneachta iascaireachta. Le haghaidh 2024, déantar foráil sa Mholadh sin maidir le laghdú 3 % ar na teorainneacha gabhála le haghaidh rós-séaclaí domhainmhara. Chun na bearta sin a chur chun feidhme i ndlí an Aontais, ba cheart 3 % a bhaint de na huasteorainneacha gabhála incheadaithe le haghaidh rós-séaclaí domhainmhara a leagtar síos le haghaidh 2023 le Rialachán (AE) 2023/195.

(20)

Ag an 45ú cruinniú bliantúil a bhí ag CGIM in 2022, ghlac sé Moladh CGIM/45/2022/5 maidir le plean bainistíochta ilbhliantúil i dtaca le saothrú inbhuanaithe stoc séaclaí móra dearga agus séaclaí gorma agus dearga i gCaolas na Sicile (folimistéir gheografacha 12 go 16), lena n-aisghairtear Moltaí CGIM/44/2021/7 agus CGIM/43/2019/6. Le Moladh CGIM/45/2022/5, tugadh isteach teorainn ghabhála agus reo acmhainneachta iascaireachta. Le haghaidh 2024, déantar foráil sa Mholadh sin maidir le laghdú 3 % de na teorainneacha gabhála le haghaidh séaclaí móra dearga agus séaclaí gorma agus dearga. Chun na bearta sin a chur chun feidhme i ndlí an Aontais, ba cheart 3 % a bhaint de na huasteorainneacha gabhála incheadaithe maidir leis an séacla mór dearg agus an séacla gorm agus dearg a leagtar síos le haghaidh 2023 le Rialachán (AE) 2023/195.

(21)

Ag an 45ú cruinniú bliantúil a bhí ag CGIM in 2022, ghlac sé Moladh CGIM/45/2022/6 maidir le plean bainistíochta ilbhliantúil i dtaca le saothrú inbhuanaithe stoc séaclaí móra dearga agus séaclaí gorma agus dearga sa Mhuir Iónach (folimistéir gheografacha 19 go 21), lena n-aisghairtear Moltaí CGIM/44/2021/8 agus CGIM/42/2018/4. Le Moladh CGIM/45/2022/6, tugadh isteach teorainn ghabhála agus reo acmhainneachta iascaireachta. Le haghaidh 2024, déantar foráil sa Mholadh sin maidir le laghdú 3 % ar na teorainneacha gabhála le haghaidh séaclaí móra dearga agus séaclaí gorma agus dearga. Chun na bearta sin a chur chun feidhme i ndlí an Aontais, ba cheart 3 % a bhaint de na huasteorainneacha gabhála incheadaithe maidir leis an séacla mór dearg agus an séacla gorm agus dearg a leagtar síos le haghaidh 2023 le Rialachán (AE) 2023/195.

(22)

Ag an 45ú cruinniú bliantúil a bhí ag CGIM in 2022, ghlac sé Moladh CGIM/45/2022/7 maidir le plean bainistíochta ilbhliantúil i dtaca le saothrú inbhuanaithe stoc séaclaí móra dearga agus séaclaí gorma agus dearga i Muir na Leiveainte (folimistéir gheografacha 24 go 27), lena n-aisghairtear Moltaí CGIM/44/2021/8 agus CGIM/42/2018/4. Le Moladh CGIM/45/2022/7, tugadh isteach teorainn ghabhála agus reo acmhainneachta iascaireachta. Le haghaidh 2024, déantar foráil sa Mholadh sin maidir le laghdú 3 % de na teorainneacha gabhála maidir leis an séacla mór dearg agus an séacla gorm agus dearg. Chun na bearta sin a chur chun feidhme i ndlí an Aontais, ba cheart 3 % a bhaint de na huasteorainneacha gabhála incheadaithe maidir leis an séacla mór dearg agus an séacla gorm agus dearg a leagtar síos le haghaidh 2023 le Rialachán (AE) 2023/195.

(23)

Ag an 45ú cruinniú bliantúil a bhí ag CGIM in 2022, ghlac sé Moladh CGIM/45/2022/3 maidir le plean bainistíochta ilbhliantúil i dtaca le saothrú inbhuanaithe deargán (Pagellus bogaraveo) i Muir Alboran (folimistéir gheografacha 1 go 3), lena n-aisghairtear Moltaí CGIM/44/2021/4, CGIM/43/2019/2 agus CGIM/41/2017/2. Le Moladh CGIM/45/2022/3, tugadh isteach uasleibhéil gabhálacha le haghaidh 2023, 2024 agus 2025, líon uasta bád spiléireachta agus línte láimhe údaraithe agus bearta nua le haghaidh iascaigh áineasa. Chun na bearta sin a chur chun feidhme i ndlí an Aontais, ba cheart 7 % a bhaint de na huasteorainneacha gabhála incheadaithe a leagtar síos le haghaidh deargán le haghaidh 2023 le Rialachán (AE) 2023/195.

(24)

Ag an 43ú cruinniú bliantúil a bhí ag CGIM in 2019, ghlac sé Moladh CGIM/43/2019/3 lena leasaítear Moladh CGIM/41/2017/4 maidir le plean bainistíochta ilbhliantúil le haghaidh iascaigh turbard (Scophthalmus maximus) sa Mhuir Dhubh (folimistéar geografach CGIM 29). Tugadh isteach le Moladh CGIM/43/2019/3, ó 2020 go 2024, TAC réigiúnach uasdátaithe agus scéim cionroinnte cuótaí maidir leis an turbard chomh maith le bearta caomhnaithe, go háirithe tréimhse choiscthe 2 mhí agus teorainn 180 lá sa bhliain leis an líon laethanta iascaireachta. I gcomhréir leis an Moladh CGIM/43/2019/3, tá na bearta caomhnaithe breise sin nasctha go feidhmiúil leis na deiseanna iascaireachta, toisc, mura bhfuil na bearta sin i bhfeidhm, níor mhór an leibhéal TAC maidir leis an turbard a laghdú chun athbhunú na stoc a áirithiú. Ba cheart, dá bhrí sin, na bearta sin a chur chun feidhme i ndlí an Aontais.

(25)

Ag an 46ú cruinniú bliantúil a bhí aige in 2023, ghlac CGIM Moladh CGIM/46/2023/7 maidir le plean bainistíochta ilbhliantúil i dtaca le hiascaigh turbard sa Mhuir Dhubh (folimistéar CGIM 29), lena leasaítear Moladh CGIM/43/2019/3. Coinníodh an TAC atá ann cheana sa Mholadh sin go dtí an 31 Nollaig 2024. Ba cheart na bearta sin a chur chun feidhme i ndlí an Aontais.

(26)

Ag an 46ú cruinniú bliantúil a bhí ag CGIM in 2023, d’fhormheas sé tabhairt anonn cuóta turbard an Aontais nár úsáideadh le linn na bliana 2022, i bhfianaise na staide eisceachtúla a cruthaíodh de bharr an chomhthéacs réigiúnaigh sa Mhuir Dhubh. Ba cheart an beart sin a chur chun feidhme i ndlí an Aontais. Ba cheart dáileadh na ndeiseanna iascaireachta a eascróidh ón tearcúsáid a dhéanamh ar bhonn na ranníocaíochta ar leith de chuid gach Ballstáit i leith na tearcúsáide, gan an eochair dháilte a bhunaítear le Rialachán (AE) 2023/195 maidir le leithdháileadh bliantúil TACanna a mhodhnú.

(27)

Bunaithe ar an gcomhairle eolaíoch a chuir Meitheal CGIM maidir leis an Muir Dhubh ar fáil, ba cheart an leibhéal básmhaireachta iascaireachta salán (Sprattus sprattus) atá ann faoi láthair a choinneáil ar bun chun inbhuanaitheacht na stoc salán sa Mhuir Dhubh a áirithiú. Is iomchuí, mar sin, leanúint de chuóta uathrialach a shocrú maidir leis na stoic sin.

(28)

Tá úsáid na ndeiseanna iascaireachta atá ar fáil do shoithí iascaireachta de chuid an Aontais a leagtar amach sa Rialachán seo faoi réir Rialachán (CE) Uimh. 1224/2009 ón gComhairle (4), agus go háirithe Airteagail 33 agus 34 de, maidir le gabhálacha agus iarracht iascaireachta a thaifeadadh agus maidir le fógra a thabhairt faoi shonraí i ndáil le hídiú deiseanna iascaireachta. Is gá, dá bhrí sin, na cóid atá le húsáid ag na Ballstáit a shonrú agus sonraí á gcur chuig an gCoimisiún maidir le stoic éisc a thabhairt i dtír atá faoi réir an Rialacháin seo.

(29)

Chun úsáid trealaimh roghnaíoch a chur chun cinn agus chun limistéir choiscthe éifeachtúla a bhunú chun ógánaigh agus sceithirí a chosaint, le Rialachán (AE) 2022/110 (5) bunaíodh sásra cúitimh i ndáil leis an gcóras iarrachta le haghaidh trál. Ós rud é go leanann STECF de bheith ag moladh in 2024 go ndéanfaí tuilleadh feabhais ar roghnaíocht an trealaimh iascaireachta agus ar limistéir choiscthe éifeachtúla chun éisc óga agus sceithirí a chosaint, is iomchuí 4.5 % de na laethanta iascaireachta a leithdháileadh. Má chomhlíonann soitheach dhá choinníoll, féadfaidh Ballstát comhroinnt bhreise na laethanta iascaireachta a mhéadú go 5 %. Má chomhlíonann soitheach trí choinníoll ar a laghad, féadfaidh Ballstát comhroinnt bhreise na laethanta iascaireachta a mhéadú go 6 %.

(30)

Le Rialachán (CE) Uimh. 847/96 ón gComhairle (6), déantar forail maidir le coinníollacha breise maidir le TACanna a bhainistiú ó bhliain go bliain, lena n-áirítear, faoi Airteagail 3 agus 4 de, forálacha solúbthachta le haghaidh TACanna réamhchúraim agus anailíseacha. Faoi Airteagal 2 den Rialachán sin, bíonn sé le cinneadh ag an gComhairle, agus TACanna á mbunú aici, cé na stoic nach mbeidh faoi réir Airteagail 3 agus 4 den Rialachán sin, go háirithe ar bhonn stádas bitheolaíoch na stoc. Dá bhrí sin, chun solúbthacht iomarcach a sheachaint a bhainfeadh an bonn de phrionsabal shaothrú céillí freagrach bheo-acmhainní bitheolaíocha na mara, a chuirfeadh bac ar chuspóirí CBI a bhaint amach agus a chuirfeadh meath ar stádas bitheolaíoch na stoc, ba cheart a chur in iúl go ríshoiléir nach mbeidh feidhm ag Airteagal 3(2) agus (3) agus Airteagal 4 de Rialachán (CE) Uimh. 847/96 maidir le TACanna anailíseacha ach amháin i gcás nach mbaintear leas as an tsolúbthacht ó bhliain go bliain dá bhforáiltear in Airteagal 15(9) de Rialachán (AE) Uimh. 1380/2013.

(31)

Ionas nach gcuirfí isteach ar ghníomhaíochtaí iascaireachta agus chun slí bheatha iascairí an Aontais a áirithiú, ba cheart feidhm a bheith ag an Rialachán seo ón 1 Eanáir 2024 ar aghaidh. Ar chúiseanna práinne, ba cheart an Rialachán seo a theacht i bhfeidhm ar an lá tar éis lá a fhoilsithe,