(1)

Tá ról lárnach ag ceanglais tuairiscithe maidir le faireachán cuí ar ghníomhartha dlí an Aontais agus forfheidhmiú ceart ghníomhartha dlí an Aontais a áirithiú. Tá sé tábhachtach, áfach, ceanglais den sórt sin a chuíchóiriú chun a áirithiú go gcomhlíonfaidh siad an cuspóir dár beartaíodh iad agus chun an t-ualach riaracháin a theorannú.

(2)

I dteachtaireacht ón gCoimisiún an 16 Márta 2023 dar teideal ‘Iomaíochas fadtéarmach an Aontais: níos faide ar aghaidh ná 2030’, thug an Coimisiún gealltanas ceanglais tuairiscithe a réasúnú agus a shimpliú, agus é ina aidhm ar deireadh ualaí den sórt sin a laghdú 25 %, gan an bonn a bhaint de na cuspóirí beartais gaolmhara.

(3)

I dTreoracha 1999/2/CE (3), 2000/14/CE (4), 2011/24/AE (5) agus 2014/53/AE (6) ó Pharlaimint na hEorpa agus ón gComhairle, tá roinnt ceanglais tuairiscithe i réimsí an bhia agus na gcomhábhar bia, an torainn lasmuigh, chearta na n-othar, agus an trealaimh raidió.

(4)

De bhun Airteagal 7(3) de Threoir 1999/2/CE, tá na Ballstáit le tuairisciú don Choimisiún gach bliain torthaí na seiceálacha a dhéanann siad sna saoráidí ionradaíochta ianúcháin agus torthaí na seiceálacha a dhéantar ag céim na margaíochta táirgí. In Airteagal 7(4) den Treoir sin, foráiltear go bhfuil an Coimisiún le tuarascáil a fhoilsiú in Iris Oifigiúil an Aontais Eorpaigh bunaithe ar an bhfaisnéis arna soláthar ag na Ballstáit gach bliain. Foráiltear le hAirteagal 113 de Rialachán (AE) 2017/625 ó Pharlaimint na hEorpa agus ón gComhairle (7) go bhfuil gach Ballstát le tuarascáil a chur faoi bhráid an Choimisiúin, faoin 31 Lúnasa gach bliain, tuarascáil ina leagtar amach toradh na rialuithe oifigiúla a rinneadh an bhliain roimhe sin faoina phlean rialaithe náisiúnta ilbhliantúil. Tá na pleananna rialaithe náisiúnta ilbhliantúil le raon feidhme Threoir 1999/2/CE, i measc nithe eile, a chumhdach. Chomh maith leis sin, foráiltear le hAirteagal 114 de Rialachán (AE) 2017/625 go bhfuil an Coimisiún le tuarascáil bhliantúil ar fheidhmiú rialuithe oifigiúla sna Ballstáit a chur ar fáil don phobal gach bliain, agus na tuarascálacha bliantúla arna dtíolacadh ag na Ballstáit i gcomhréir le hAirteagal 113 den Rialachán sin á gcur san áireamh. Ós rud é go n-áirithítear cheana féin leis na hoibleagáidí tuairiscithe bliantúla a leagtar síos in Airteagail 113 agus 114 de Rialachán (AE) 2017/625 forfheidhmiú ghníomhartha dlí an Aontais maidir le bianna ionradaithe agus comhábhair bhia ionradaithe agus faireachán ar ghníomhartha dlí den sórt sin, ba cheart an oibleagáid tuairiscithe bhliantúil chomhchosúil a leagtar síos faoi láthair i dTreoir 1999/2/CE a scriosadh chun an t-ualach riaracháin ar údaráis inniúla agus ar an gCoimisiún a laghdú.

(5)

De bhun Airteagal 16 de Threoir 2000/14/CE, tá monaróirí, nó a n-ionadaithe údaraithe, le cóip den dearbhú comhréireachta CE maidir le trealamh lena úsáid lasmuigh a thagann faoi raon feidhme na Treorach sin a sheoladh chuig údaráis fhreagracha na mBallstát agus chuig an gCoimisiún. Tá an Coimisiún leis na sonraí a bhailiú agus le faisnéis ábhartha a fhoilsiú ar bhonn tréimhsiúil. Is féidir le tomhaltóirí teacht ar an bhfaisnéis ábhartha maidir le hastaíochtaí torainn trealaimh a chumhdaítear le Treoir 2000/14/CE go díreach ar an trealamh, toisc go bhforáiltear le hAirteagal 4(1) den Treoir sin, inter alia, maidir le léiriú ar an leibhéal cumhachta fuaime dearbhaithe ar an trealamh. Dá bhrí sin, is iomarcach iad na hoibleagáidí ar na Ballstáit agus ar an gCoimisiún a leagtar síos in Airteagal 16 de Threoir 2000/14/CE doiciméadacht a sholáthar, sonraí a bhailiú agus faisnéis a fhoilsiú, agus ba cheart iad a scriosadh ar mhaithe le réasúntacht agus chun teorainn a chur leis an ualach riaracháin ar chuideachtaí agus ar údaráis.

(6)

De bhun Airteagal 20(1), pointe (a), de Threoir 2000/14/CE, tá an Coimisiún le hathbhreithniú ar na sonraí torainn arna mbailiú i gcomhréir le hAirteagal 16 den Treoir sin a chur faoi bhráid Pharlaimint na hEorpa agus na Comhairle. Ós rud é nach mbaileofar sonraí torainn den sórt sin a thuilleadh, ba cheart an oibleagáid sin a scriosadh freisin.

(7)

De bhun Airteagal 20(1) de Threoir 2011/24/AE, tá an Coimisiún le tuarascáil a chur faoi bhráid Pharlaimint na hEorpa agus faoi bhráid na Comhairle gach 3 bliana maidir le feidhmiú na Treorach sin. Braitheann an tuarascáil sin go mór ar an gcúnamh agus ar an bhfaisnéis sholáthraíonn na húdaráis inniúla náisiúnta. Foráiltear le hAirteagal 14(1) de Chinneadh Cur Chun Feidhme 2014/287/AE ón gCoimisiún (8) go bhfuil meastóireacht le déanamh ar na Líonraí Tagartha Eorpacha a bunaíodh faoi Threoir 2011/24/AE gach 5 bliana. Chun na ceanglais tuairiscithe agus meastóireachta a ailíniú agus chun an t-ualach riaracháin a laghdú don Choimisiún agus do na Ballstáit a n-iarrtar orthu faisnéis a sholáthar maidir le cur chun feidhme Threoir 2011/24/AE, ba cheart minicíocht an tuairiscithe ón gCoimisiún a athrú go dtí gach 5 bliana. Ós rud é gur foilsíodh an tuarascáil is déanaí ar fheidhmiú Threoir 2011/24/AE in 2022, ba cheart an chéad tuarascáil eile a fhoilsiú in 2027.

(8)

De bhun Airteagal 47(1) de Threoir 2014/53/AE, tá na Ballstáit le tuarascálacha rialta ar chur i bhfeidhm na Treorach sin a chur faoi bhráid an Choimisiúin gach 2 bhliain ar a laghad. Tá minicíocht an tuairiscithe éigeantaigh sin níos airde ná mar is gá. Ar mhaithe le réasúntacht agus chun teorainn a chur leis an ualach riaracháin ar na Ballstáit, ba cheart minicíocht an tuairiscithe éigeantaigh ó na Ballstáit a athrú go dtí gach 5 bliana, ionas go gcomhfhreagróidh sé don oibleagáid atá ar an gCoimisiúin faoi Airteagal 47(2) den Treoir sin tuairisciú do Pharlaimint na hEorpa agus don Chomhairle maidir le feidhmiú na Treorach sin. Soláthrófar le minicíocht den sórt sin don Choimisiún fós an fhaisnéis is gá don mheasúnú atá le déanamh aige agus gníomhartha tarmligthe á nglacadh aige de bhun Airteagal 5(2) de Threoir 2014/53/AE, lena sonraítear na catagóirí trealaimh raidió a mbaineann an ceanglas clárúcháin leo, agus beidh an Coimisiún ábalta an fhaisnéis ó thuarascálacha na mBallstát a úsáid ar bhealach níos éifeachtúla.

(9)

Ós rud é nach féidir leis na Ballstáit cuspóirí na Treorach seo, eadhon na ceanglais tuairiscithe a leagtar síos i dTreoir 2007/2/CE a chuíchóiriú, a ghnóthú go leordhóthanach agus, de bharr a fairsinge agus a héifeachtaí, gur fearr is féidir iad a ghnóthú ar leibhéal an Aontais, féadfaidh an tAontas bearta a ghlacadh, i gcomhréir le prionsabal na coimhdeachta a leagtar amach in Airteagal 5 den Chonradh ar an Aontas Eorpach. I gcomhréir le prionsabal na comhréireachta a leagtar amach san Airteagal sin, ní théann an Treoir seo thar a bhfuil riachtanach chun na cuspóirí sin a ghnóthú.

(10)

Ba cheart, dá bhrí sin, Treoracha 1999/2/CE, 2000/14/CE, 2011/24/AE agus 2014/53/AE a leasú dá réir,

(1)

scriostar Airteagal 16;

(2)

in Airteagal 20(1), scriostar pointe (a).