(1)

Áiríodh fluairíd sulfairile in Iarscríbhinn I a ghabhann le Treoir 98/8/CE ó Pharlaimint na hEorpa agus ón gComhairle (2) mar shubstaint ghníomhach lena húsáid i dtáirgí bithicídeacha de chineálacha táirgí 8 agus 18. Dá bhrí sin, de bhun Airteagal 86 de Rialachán (AE) Uimh. 528/2012, measadh í a bheith formheasta go dtí an 31 Nollaig 2018 lena húsáid i dtáirgí bithicídeacha de chineál táirge 8 agus go dtí an 30 Meitheamh 2021 lena húsáid i dtáirgí bithicídeacha de chineál táirge 18 faoin Rialachán sin, faoi réir na gceanglas a leagtar amach in Iarscríbhinn I a ghabhann le Treoir 98/8/CE.

(2)

An 28 Meitheamh 2017 cuireadh isteach iarratais i gcomhréir le hAirteagal 13(1) de Rialachán (AE) Uimh. 528/2012 chun an formheas maidir le fluairíd sulfairile a athnuachan lena húsáid i dtáirgí bithicídeacha de chineálacha táirgí 8 agus 18 (‘na hiarratais’). Is é údarás inniúil na Sualainne (‘an t-údarás inniúil meastóireachta’) a rinne meastóireacht ar na hiarratais.

(3)

An 14 Feabhra 2018, chuir an t-údarás inniúil meastóireachta an Coimisiún ar an eolas gur chinn sé, de bhun Airteagal 14(1) de Rialachán (AE) Uimh. 528/2012, gur ghá meastóireacht iomlán a dhéanamh ar na hiarratais. I gcomhréir le hAirteagal 14(2) den Rialachán sin, i gcás ina gcinnfidh an t-údarás inniúil meastóireachta go bhfuil gá le meastóireacht iomlán ar iarratas, déanfar an mheastóireacht i gcomhréir le hAirteagal 8(1), (2) agus (3), den Rialachán sin.

(4)

De bhun Chinneadh Cur Chun Feidhme (AE) 2018/1479 ón gCoimisiún (3), cuireadh ar atráth go dtí an 30 Meitheamh 2021 dáta éaga an fhormheasa maidir le fluairíd sulfairile lena húsáid i dtáirgí bithicídeacha de chineál táirge 8 chun go mbeidh go leor ama ann chun scrúdú a dhéanamh ar an iarratas. Le Cinneadh Cur Chun Feidhme (AE) 2021/713 ón gCoimisiún (4) cuireadh ar atráth arís dáta éaga an fhormheasa maidir le fluairíd sulfairile lena húsáid i dtáirgí bithicídeacha de chineálacha táirge 8 agus 18 go dtí an 18 Nollaig 2023 agus an 31 Nollaig 2023 faoi seach. Le Cinneadh Cur Chun Feidhme (AE) 2023/2101 ón gCoimisiún (5), cuireadh an dul in éag sin ar atráth arís go dtí an 31 Nollaig 2024.

(5)

An 12 Nollaig 2022 chuir an t-údarás inniúil meastóireachta moltaí faoi bhráid na Gníomhaireachta Eorpaí Ceimiceán (‘an Ghníomhaireacht’) i ndáil leis an bhformheas maidir le fluairíd sulfairile a athnuachan.

(6)

An 13 Meán Fómhair 2023, i gcomhréir le hAirteagal 14(3) de Rialachán (AE) Uimh. 528/2012, ghlac an Ghníomhaireacht na tuairimí (6) , (7) a rinne a Coiste um Tháirgí Bithicídeacha a fhoirmliú, ag féachaint do chonclúidí an údaráis inniúil meastóireachta.

(7)

Sna tuairimí uaithi, tháinig an Ghníomhaireacht ar an gconclúid nár leor an fhaisnéis a soláthraíodh sna hiarratais chun a mheasúnú an gcomhlíonann fluairíd sulfairile na critéir a leagtar amach in Airteagal 5(1), pointe (c), de Rialachán (AE) Uimh. 528/2012, a mhéid a bhaineann le tocsaineacht maidir le síolrú, agus Airteagal 5(1), pointe (d), den Rialachán sin, a mhéid a bhaineann le hairíonna suaiteora inchríneach a d’fhéadfadh a bheith ina gcúis le héifeachtaí díobhálacha ar dhaoine. Thairis sin, níor leor an fhaisnéis a soláthraíodh sna hiarratais chun a mheasúnú an gcomhlíonann fluairíd sulfairile an coinníoll lena meas mar shubstaint atá le hionadú, coinníoll a leagtar amach in Airteagal 10(1), pointe (e), de Rialachán (AE) Uimh. 528/2012 a mhéid a bhaineann le hairíonna suaiteora inchríneach a d’fhéadfadh a bheith ina gcúis le héifeachtaí díobhálacha ar orgánaigh nach spriocorgánaigh iad.

(8)

De bhun Airteagal 8(2) agus Airteagal 6(2), an dara fomhír, de Rialachán (AE) Uimh. 528/2012, d’iarr an t-údarás inniúil meastóireachta ar an iarratasóir sonraí leordhóthanacha a sholáthar chun gur féidir a chinneadh an gcomhlíonann fluairíd sulfairile na critéir dá dtagraítear in Airteagal 5(1), pointí (c) agus (d), de Rialachán (AE) Uimh. 528/2012. Níor chuir an t-iarratasóir an fhaisnéis ná na sonraí is gá isteach, áfach, laistigh den tréimhse a leag an t-údarás inniúil meastóireachta síos. Dá bhrí sin, níor comhlíonadh Airteagal 6(2), an dara fomhír, de Rialachán (AE) Uimh. 528/2012, rud a fhágann nach féidir a chinneadh an gcomhlíonann fluairíd sulfairile na critéir dá dtagraítear in Airteagal 5(1), pointí (c) agus (d), den Rialachán sin, agus anuas air sin, ní féidir a chinneadh an bhféadfadh fluairíd sulfairile na coinníollacha a leagtar amach in Airteagal 5 den Rialachán sin a chomhlíonadh.

(9)

Ós rud é nár chuir an t-iarratasóir isteach an fhaisnéis agus na sonraí is gá a d’iarr an t-údarás inniúil meastóireachta laistigh den tréimhse a leagadh síos de bhun Airteagal 5(1), pointe (d), de Rialachán (AE) Uimh. 528/2012, a mhéid a bhaineann le hairíonna suaiteora inchríneach a d’fhéadfadh a bheith ina gcúis le héifeachtaí díobhálacha ar dhaoine, ní dhearna an t-údarás inniúil meastóireachta iarraidh bhreise ar na sonraí is gá chun a mheasúnú an gcomhlíonann fluairíd sulfairile an coinníoll lena meas mar shubstaint atá le hionadú a leagtar amach in Airteagal 10(1), pointe (e), den Rialachán sin a mhéid a bhaineann le hairíonna suaiteora inchríneach a d’fhéadfadh a bheith ina gcúis le héifeachtaí díobhálacha in orgánaigh nach spriocorgánaigh iad.

(10)

Thairis sin, mar gheall ar an bhfaisnéis atá in easnamh, ní féidir meastóireacht a dhéanamh ar na rioscaí do shláinte an duine agus don chomhshaol araon i gcás na dtáirgí bithicídeacha ionadaíocha ina bhfuil fluairíd sulfairile lena húsáid i dtáirgí bithicídeacha de chineálacha táirge 8 agus 18 chun a chinneadh an gcomhlíonann fluairíd sulfairile fós na coinníollacha maidir le formheas a leagtar síos in Airteagal 4(1) de Rialachán (AE) Uimh. 528/2012. Dá bhrí sin, níor léiríodh i ndeireadh na dála go bhféadfadh coinne a bheith leis nach mbeadh éifeachtaí do-ghlactha ag na táirgí bithicídeacha ionadaíocha ina bhfuil fluairíd sulfairile lena húsáid i dtáirgí bithicídeacha de chineálacha táirge 8 agus 18, nó de thoradh a n-iarmhar, nach mbeadh éifeachtaí do-ghlactha acu ar shláinte an duine ná ar an gcomhshaol, agus dá bhrí sin go bhféadfadh coinne a bheith leis go gcomhlíonfadh siad na critéir a leagtar amach in Airteagal 19(1), pointí (b)(iii) agus (b)(iv), de Rialachán (AE) Uimh. 528/2012.

(11)

Dá réir sin, i bhfianaise na dtuairimí ón nGníomhaireacht, agus á chur san áireamh nár sholáthair an t-iarratasóir an fhaisnéis agus na sonraí is gá a leag an t-údarás inniúil meastóireachta síos chun a mheasúnú an gcomhlíonann fluairíd sulfairile na critéir dá dtagraítear in Airteagal 5(1), pointí (c) agus (d), de Rialachán (AE) Uimh. 528/2012 agus ina dhiaidh sin chun a mheasúnú an bhféadfadh fluairíd sulfairile na coinníollacha a leagtar amach in Airteagal 5 den Rialachán sin a chomhlíonadh, agus ós rud é nár léiríodh go gcomhlíontar fós na critéir a leagtar síos in Airteagal 19(1), pointí (b)(iii) agus (b)(iv), de Rialachán (AE) Uimh. 528/2012, ní féidir a chinneadh an gcomhlíontar na coinníollacha a leagtar síos in Airteagal 4(1) den Rialachán sin fós. Dá bhrí sin, níor comhlíonadh an coinníoll maidir le hathnuachan an fhormheasa i leith substaint ghníomhach a leagtar amach in Airteagal 12(1) de Rialachán (AE) Uimh. 528/2012.

(12)

Dá bhrí sin, is iomchuí gan athnuachan a dhéanamh ar an bhformheas maidir le fluairíd sulfairile lena húsáid i dtáirgí bithicídeacha de chineálacha táirgí 8 agus 18.

(13)

Tá na bearta dá bhforáiltear sa Chinneadh seo i gcomhréir leis an tuairim ón mBuanchoiste um Tháirgí Bithicídeacha,