(1)

Is galar víreasach tógálach ionfhabhtú le plá na n-athchogantach beag a bhíonn ar ainmhithe den chineál caorach nó den chineál gabhair agus d’fhéadfadh tionchar tromchúiseach a bheith aige ar an daonra ainmhithe lena mbaineann agus ar bhrabúsacht na feirmeoireachta, rud a chuirfeadh isteach ar ghluaiseacht choinsíneachtaí na n-ainmhithe sin agus a dtáirgí laistigh den Aontas agus ar onnmhairí go tríú tíortha.

(2)

I gcás ráige d’ionfhabhtú le plá na n-athchogantach beag in ainmhithe den chineál caorach nó den chineál gabhair, tá riosca suntasach ann go leathfadh an galar sin go bunaíochtaí eile ainmhithe den chineál caorach nó den chineál gabhair.

(3)

Le Rialachán Tarmligthe (AE) 2020/687 ón gCoimisiún (2) forlíontar na rialacha maidir le rialú na ngalar liostaithe dá dtagraítear in Airteagal 9(1), pointí (a), (b) agus (c) de Rialachán (AE) 2016/429, agus a shainmhínítear mar ghalair i gcatagóirí A, B agus C i Rialachán Cur Chun Feidhme (AE) 2018/1882 ón gCoimisiún (3). Go háirithe, déantar foráil in Airteagail 21 agus 22 de Rialachán Tarmligthe (AE) 2020/687 maidir le crios srianta a bhunú i gcás ráige de ghalar i gcatagóir A, lena n-áirítear ionfhabhtú le plá na n-athchogantach beag, agus maidir le bearta áirithe a bheidh le cur i bhfeidhm ann. Ina theannta sin, foráiltear le hAirteagal 21(1) den Rialachán Tarmligthe sin go gcuimseoidh an crios srianta crios cosanta, crios faireachais, agus, más gá, criosanna srianta breise timpeall na gcriosanna cosanta agus faireachais nó cóngarach dóibh.

(4)

Chuir an Ghréig an Coimisiún ar an eolas faoin staid reatha ina críoch a mhéid a bhaineann le hionfhabhtú le plá na n-athchogantach beag, tar éis ráig den ghalar sin i measc ainmhithe den chineál gabhair nó den chineál caorach in aonad bardasach Kalambaka, bardas Meteora, in aonad réigiúnach Trikala, réigiún Thessaly, ráig a deimhníodh an 11 Iúil 2024 agus, i gcomhréir le Rialachán Tarmligthe (AE) 2020/687, bhunaigh sí crios srianta, ina bhfuil criosanna cosanta agus faireachais, i gcás ina bhfuil na bearta rialaithe galar a leagtar síos i Rialachán Tarmligthe (AE) 2020/687 i bhfeidhm. Ina dhiaidh sin, chuir an Ghréig an Coimisiún ar an eolas maidir le dhá ráig bhreise d’ionfhabhtú le plá na n-athchogantach beag, ráigeanna a deimhníodh an 16 Iúil 2024, taobh istigh den chrios cosanta a bhunaigh an Ballstát sin cheana timpeall ar an ráig roimhe sin.

(5)

Chun leathadh an ghalair a rialú, chun aon suaitheadh nach bhfuil gá leis ar thrádáil laistigh den Aontas a chosc agus chun bacainní gan údar ar thrádáil ag tríú tíortha a sheachaint, is gá an crios srianta i dtaca le hionfhabhtú le plá na n-athchogantach beag, ar crios é ina bhfuil na criosanna cosanta agus faireachais, mar aon le crios srianta breise, a shainaithint go tapa ar leibhéal an Aontais sa Ghréig.

(6)

Ba cheart méid na gcriosanna agus fad tréimhse na mbeart atá le cur i bhfeidhm sa chrios cosanta, sa chrios faireachais agus sa chrios srianta a bheith bunaithe ar na critéir a leagtar amach in Airteagal 64(1) de Rialachán (AE) 2016/429 agus ar na rialacha a leagtar síos i Rialachán Tarmligthe (AE) 2020/687, lena n-áirítear an staid eipidéimeolaíoch a mhéid a bhaineann le hionfhabhtú le plá na n-athchogantach beag sna limistéir a raibh difear déanta dóibh de bharr an ghalair sin agus staid eipidéimeolaíoch foriomlán an ionfhabhtaithe sin le hionfhabhtú le plá na n-athchogantach beag sa Bhallstát lena mbaineann mar aon leis an leibhéal riosca maidir le leathadh breise an ghalair. Ba cheart caighdeáin idirnáisiúnta an Chód um Shláinte na nAinmhithe Talún ón an Eagraíocht Dhomhanda um Shláinte Ainmhithe a chur san áireamh freisin agus fad na mbeart á chinneadh. Sa staid atá ann faoi láthair, ní féidir ardriosca leata breise a chur as an áireamh, go háirithe ós rud é go raibh an galar i láthair sa limistéar ar feadh tréimhse ama sula ndearnadh é a dhiagnóisiú de réir na faisnéise a chuir an t-údarás inniúil ar fáil.

(7)

Dá réir sin, ba cheart na limistéir a shainaithnítear mar chriosanna cosanta, faireachais agus srianta breise sa Ghréig a leagan amach san Iarscríbhinn a ghabhann leis an gCinneadh seo agus ba cheart fad an réigiúnithe sin a shocrú.

(8)

De bharr dhéine agus phráinn na staide agus chun leathadh an ghalair a theorannú láithreach tar éis na chéad tarlú sin den ghalar sa Bhallstát sin, is gá a áirithiú nach dtarlóidh gluaiseachtaí ainmhithe ón gcrios cosanta, faireachais agus srianta breise go cinn scríbe lasmuigh d’imlíne seachtrach an chreasa shrianta bhreise, agus go ndéanfar maoluithe a d’fhéadfadh a bheith ann ón toirmeasc ainmhithe a bhogadh a eisiamh mar a fhoráiltear i Rialachán Tarmligthe (AE) 2020/687, ar feadh tréimhse áirithe ama, chun leathadh fad-achair an ghalair sin a chosc.

(9)

I bhfianaise phráinn na staide eipidéimeolaíche san Aontas a mhéid a bhaineann le hionfhabhtú le plá na n-athchogantach beag agus an ghá cosc a chur ar leathadh an ghalair sin ó na bunaíochtaí a bhfuil difear déanta dóibh sa Ghréig go codanna eile den Bhallstáit sin agus go Ballstáit eile, ba cheart feidhm a bheith ag na bearta a leagtar síos sa Chinneadh Cur Chun Feidhme seo a luaithe is féidir.

(10)

Dá réir sin, go dtí go bhfaighfear tuairim ón mBuanchoiste um Plandaí, Ainmhithe, Bia agus Beatha, ba cheart na criosanna cosanta, faireachais agus srianta breise sa Ghréig a bhunú láithreach agus a liostú san Iarscríbhinn a ghabhann leis an gCinneadh seo, agus ba cheart fad an chriosúcháin sin a shocrú agus gluaiseachtaí ainmhithe a shrianú.

(11)

Tá an Cinneadh seo le hathbhreithniú ag an gcéad chruinniú eile den Bhuanchoiste um Plandaí, Ainmhithe, Bia agus Beatha,

(a)

go mbunóidh údarás inniúil an Bhallstáit sin láithreach crios srianta, ina mbeidh criosanna cosanta agus faireachais mar aon le crios srianta breise, i gcomhréir le hAirteagal 21 de Rialachán Tarmligthe (AE) 2020/687 agus faoi na coinníollacha a leagtar síos san Airteagal sin;

(b)

go gcuimseoidh na criosanna cosanta, faireachais agus srianta breise dá dtagraítear i bpointe (a) ar a laghad na limistéir a liostaítear san Iarscríbhinn a ghabhann leis an gCinneadh Cur Chun Feidhme seo;

(c)

maidir leis na bearta is gá a chur i bhfeidhm sna criosanna cosanta, faireachais agus srianta breise, cuirfear i bhfeidhm iad ar a laghad go dtí na dátaí a liostaítear san Iarscríbhinn a ghabhann leis an gCinneadh seo.