(1)

An 23 Bealtaine 2022, thug an Chomhairle údarú don Choimisiún tús a chur le caibidlíocht ar choinbhinsiún maidir leis na héifeachtaí idirnáisiúnta a bhaineann le díol breithiúnach long. Tugadh an chaibidlíocht sin i gcrích go rathúil nuair a ghlac Comhthionól Ginearálta na Náisiún Aontaithe téacs Choinbhinsiún na Náisiún Aontaithe maidir leis na hÉifeachtaí Idirnáisiúnta a ghabhann le Díolacháin Bhreithiúnacha Long (‘an Coinbhinsiún’) i Nua-Eabhrac an 7 Nollaig 2022.

(2)

Leis an gCoinbhinsiún neartaítear an creat dlíthiúil idirnáisiúnta atá ann cheana maidir le loingseoireacht agus cuireann sé le forbairt na gcaidreamh eacnamaíoch idirnáisiúnta comhchuí ar bhealach úsáideach. Is inmhianaithe, dá bhrí sin, an Coinbhinsiún a chur i bhfeidhm a luaithe is féidir.

(3)

Forbraíonn an tAontas comhar breithiúnach sna hábhair shibhialta a bhfuil impleachtaí trasteorann acu bunaithe ar phrionsabal an aitheantais fhrithpháirtigh do bhreithiúnais agus do chinntí i gcásanna seachbhreithiúnacha. Sa chomhthéacs sin, ghlac reachtóir an Aontais, i measc Rialacháin eile, Rialacháin (AE) Uimh. 1215/2012 (1) agus (AE) 2020/1784 (2) ó Pharlaimint na hEorpa agus ón gComhairle. Dá bhrí sin, tá inniúlacht eisiach ag an Aontas ar na hábhair a chumhdaítear leis na Rialacháin sin, agus ní thagann na hábhair eile a chumhdaítear leis an Choinbhinsiún faoin inniúlacht sin.

(4)

Le hAirteagal 18(1) den Choinbhinsiún, foráiltear maidir le hEagraíochtaí Réigiúnacha um Chomhtháthú Eacnamaíochta a bhfuil inniúlacht acu ar ábhair áirithe atá faoi rialú an Choinbhinsiúin maidir le díol breithiúnach long, go bhféadfaidh siad an Coinbhinsiún sin a shíniú, a ghlacadh, a fhormheas nó aontú leis.

(5)

Le hAirteagal 18(2) den Choinbhinsiún, foráiltear go ndéanfaidh Eagraíocht Réigiúnach um Chomhtháthú Eacnamaíochta dearbhú ina sonrófar na hábhair atá faoi rialú an Choinbhinsiúin sin a bhfuil inniúlacht ina leith aistrithe ag a chuid Ballstát chuig an eagraíocht sin. Foráiltear le hAirteagal 20(1) den Choinbhinsiún go ndéanfar an dearbhú sin tráth an tsínithe, an daingnithe, an ghlactha, an fhormheasa nó an aontachais. Dá bhrí sin, ba cheart don Aontas an dearbhú sin a dhéanamh tráth shíniú an Choinbhinsiúin.

(6)

Ba cheart an Coinbhinsiún a shíniú thar ceann an Aontais, faoi réir a thabhairt i gcrích ar dháta níos déanaí, agus an Dearbhú atá i gceangal a fhaomhadh.

(7)

I gcomhréir le hAirteagail 1 agus 2 de Phrótacal Uimh. 21 maidir le seasamh na Ríochta Aontaithe agus na hÉireann i dtaca leis an limistéar saoirse, slándála agus ceartais, atá i gceangal leis an gConradh ar an Aontas Eorpach agus leis an gConradh ar Fheidhmiú an Aontais Eorpaigh, agus gan dochar d’Airteagal 4 den Phrótacal sin, níl Éire rannpháirteach i nglacadh an Chinnidh seo agus níl sí faoi cheangal aige ná faoi réir a chur i bhfeidhm.

(8)

I gcomhréir le hAirteagail 1 agus 2 de Phrótacal Uimh. 22 maidir le seasamh na Danmhairge, atá i gceangal leis an gConradh ar an Aontas Eorpach agus leis an gConradh ar Fheidhmiú an Aontais Eorpaigh, níl an Danmhairg rannpháirteach i nglacadh an Chinnidh seo agus níl sí faoi cheangal aige ná faoi réir a chur i bhfeidhm.