(1)

De bhun Airteagal 15 de Threoir 2009/125/CE, tá an Coimisiún le ceanglais éicidhearthóireachta a leagan síos le haghaidh táirgí a bhaineann le fuinneamh, a bhfuil méid suntasach díolachán agus trádála san Aontas i gceist leo agus a bhfuil tionchar suntasach acu ar an gcomhshaol agus a bhfuil acmhainn shuntasach acu feabhas a chur ar a ndearadh ó thaobh an tionchar atá acu ar an gcomhshaol, gan costais iomarcacha a bheith i gceist leis.

(2)

Le Plean Oibre Éicidhearthóireachta 2016–2019 (2) a dhréachtaigh an Coimisiún i gcomhréir le hAirteagal 16(1) de Threoir 2009/125/CE, leagtar amach na tosaíochtaí oibre faoin gcreat éicidhearthóireachta agus lipéadaithe fuinnimh le haghaidh na mblianta 2016 go 2019. Sainaithnítear sa phlean oibre na grúpaí táirgí a bhaineann le fuinneamh mar thosaíochtaí le haghaidh staidéir ullmhúcháin agus, más gá, le haghaidh glacadh beart cur chun feidhme. Áirítear leis sin triomadóirí rothlaim tí. Ina theannta sin, tá triomadóirí rothlaim tí sna trí phríomhghrúpa a cuireadh in áirithe le haghaidh athbhreithnithe roimh dheireadh 2025 i bplean oibre éicidhearthóireachta agus lipéadaithe fuinnimh 2022–2024 (3).

(3)

Meastar go bhfuil acmhainn ag bearta atá beartaithe i bPlean Oibre Éicidhearthóireachta agus Lipéadaithe Fuinnimh 2022–2024 ar choigilteas fuinnimh deiridh iomlán bliantúil de bhreis ar 170 TWh a bhaint amach in 2030, arb ionann é agus astaíochtaí gás ceaptha teasa a laghdú thart ar 24 mhilliún tonna in aghaidh na bliana in 2030. D’fhéadfaí coigilteas leictreachais 0,6 TWh in aghaidh na bliana a bhaint amach i gcás triomadóirí rothlaim tí faoi 2030, agus 1,7 TWh in aghaidh na bliana faoi 2040.

(4)

Le Rialachán (AE) Uimh. 932/2012 ón gCoimisiún (4), bunaíodh ceanglais éicidhearthóireachta le haghaidh triomadóirí rothlaim tí.

(5)

Ceanglaítear le hAirteagal 7 de Rialachán (AE) Uimh. 932/2012 ar an gCoimisiún athbhreithniú a dhéanamh ar an Rialachán sin i bhfianaise na bhforbairtí teicneolaíochta. Rinne an Coimisiún an t-athbhreithniú agus rinne sé anailís ar na gnéithe teicniúla, comhshaoil agus eacnamaíocha de thriomadóirí rothlaim tí chomh maith le hiompraíocht iarbhír úsáideoirí. Rinneadh an t-athbhreithniú i ndlúthchomhar le geallsealbhóirí agus páirtithe leasmhara ón Aontas agus ó thríú tíortha. Cuireadh torthaí an athbhreithnithe ar fáil go poiblí agus cuireadh iad faoi bhráid an Fhóraim Comhairliúcháin arna bhunú i gcomhréir le hAirteagal 18 de Threoir 2009/125/CE.

(6)

Is iad na gnéithe comhshaoil a bhaineann le triomadóirí rothlaim tí, a shainítear mar ghnéithe suntasacha chun críocha an Rialacháin seo, tomhaltas fuinnimh le linn na céime úsáide, giniúint dramhaíola ag deireadh a ré, astaíochtaí chuig aer sa chéim táirgeachta de thoradh amhábhair a eastóscadh agus a phróiseáil, agus sa chéim úsáide mar gheall ar ídiú leictreachais.

(7)

San Aontas, measadh gurbh é 10,5 TWh in aghaidh na bliana tomhaltas fuinnimh bliantúil triomadóirí rothlaim tí faoi réir Rialachán (AE) Uimh. 932/2012 in 2020. I gcás ‘gnó mar is gnách’, tá coinne leis go dtiocfaidh laghdú ar an tomhaltas sin go 9 TWh in aghaidh na bliana in 2030. D’fhéadfadh an laghdú sin tarlú níos tapúla má dhéantar na ceanglais éicidhearthóireachta atá ann cheana a thabhairt cothrom le dáta chun triomadóirí rothlaim tí a bhfuil feidhmíocht éifeachtúlachta fuinnimh íseal acu a bhaint den mhargadh.

(8)

I bplean gníomhaíochta an Aontais maidir leis an ngeilleagar ciorclach (5) agus i bPlean Oibre Éicidhearthóireachta agus Lipéadaithe Fuinnimh 2022–2024, leagtar béim ar a thábhachtaí atá sé úsáid a bhaint as an gcreat éicidhearthóireachta chun tacú leis an aistriú i dtreo geilleagar atá níos ciorclaí agus níos éifeachtúla ó thaobh acmhainne de. Meastar gur tháinig laghdú ó 14 bliana go dtí timpeall 12 bhliain ar ré feidhme triomadóirí rothlaim tí le blianta beaga anuas, agus gur dócha go leanfaidh an treocht sin ar aghaidh in éagmais dreasachtaí chun triomadóirí rothlaim tí a chothabháil agus a dheisiú i gceart. Dá bhrí sin, ba cheart ceanglais iomchuí a leagan síos leis an Rialachán seo lena rannchuideofar le cuspóirí an gheilleagair chiorclaigh, go háirithe infhaighteacht páirteanna spártha a dhéanamh éigeantach agus feabhas a chur ar cháilíocht na faisnéise maidir le féinchothabháil ag an úsáideoir deiridh.

(9)

Léirítear san athbhreithniú dá dtagraítear in Aithris (5) go bhfuil éifeachtúlachtaí comhdhlúthúcháin os cionn 80 % i gceist le tromlach mór na dtriomadóirí rothlaim ar an margadh. Ba cheart an íostairseach le haghaidh na héifeachtúlachta comhdhlúthúcháin a ardú ó 70 % go 80 %.

(10)

Tá na buntréithe céanna i dtriomadóirí rothlaim tí ina bhfuil níos mó ná druma amháin agus atá i dtriomadóirí rothlaim tí agus ba cheart, dá bhrí sin, iad a áireamh i raon feidhme an Rialacháin seo.

(11)

Déantar triomadóirí rothlaim tí ionsuite a shuiteáil i gcaibinéid nó a chlúdach le painéil a choinníonn an teas a tháirgtear taobh istigh den triomadóir rothlaim, nuair a dhéantar iad a thástáil le haghaidh comhréireachta, rud as a n-eascraíonn éifeachtachtaí fuinnimh níos airde agus a rannchuidíonn le comhlíontacht le ceanglais éicidhearthóireachta. Ba cheart an sainmhíniú ar thriomadóirí rothlaim tí ionsuite a fheabhsú chun idirdhealú a dhéanamh idir iad agus triomadóirí rothlaim tí eile nach ndéantar ach iad a chur faoi phainéal ach nach bhfuil clúdaithe ag painéil, agus dá bhrí sin nach féidir a thástáil mar thriomadóirí rothlaim tí ionsuite.

(12)

Triomadóirí rothlaim tí a chumhachtaítear le ceallraí agus ar féidir iad a cheangal den phríomhlíonra freisin trí thiontaire AC/DC a cheannaítear ar leithligh, tá an dóchúlacht ann go n-úsáidfear iad i suíomhanna soghluaiste, amhail veaineanna campála, ach gan bheith teoranta dóibh. Dá bhrí sin, ba cheart iad a eisiamh ó raon feidhme an Rialacháin seo.

(13)

Ba cheart tairseacha sonracha maidir le modhanna ísealchumhachta na dtriomadóirí rothlaim tí a leagan síos. Níor cheart feidhm a bheith ag ceanglais Rialachán (AE) 2023/826 ón gCoimisiún (6) maidir le táirgí a chumhdaítear faoi raon feidhme an Rialacháin seo. Ba cheart, dá bhrí sin, Rialachán (AE) Uimh. 2023/826 a leasú dá réir.

(14)

Ba cheart an amlíne don cheanglas nua maidir le hídiú cumhachta uasta sa mhód ‘as’ le haghaidh triomadóirí rothlaim tí a ailíniú leis an amlíne a leagtar amach le haghaidh ídiú cumhachta sa mhód ‘as’ faoi Rialachán (AE) 2023/826.

(15)

Ba cheart na paraiméadair tháirge ábhartha a thomhas trí úsáid a bhaint as modhanna iontaofa, cruinne agus in-atáirgthe. Ba cheart a chur san áireamh sna modhanna sin modhanna tomhais úrscothacha lena n-áirítear, i gcás ina mbeidh fáil orthu, caighdeáin chomhchuibhithe arna nglacadh ag na heagraíochtaí caighdeánaithe Eorpacha a liostaítear in Iarscríbhinn I a ghabhann le Rialachán (AE) Uimh. 1025/2012 (7) ó Pharlaimint na hEorpa agus ón gComhairle.

(16)

I gcomhréir le hAirteagal 8(2) de Threoir 2009/125/CE, ba cheart na nósanna imeachta is infheidhme um measúnú comhréireachta a shonrú sa Rialachán seo.

(17)

D’fhonn seiceálacha maidir le comhlíonadh a éascú, ba cheart do mhonaróirí, d’allmhaireoirí nó d’ionadaithe údaraithe faisnéis a sholáthar sa doiciméadacht theicniúil dá dtagraítear in Iarscríbhinní IV agus V a ghabhann le Treoir 2009/125/CE a mhéid a bhaineann an fhaisnéis sin leis na ceanglais a leagtar síos sa Rialachán seo.

(18)

I gcás ina bhfuil na paraiméadair sa doiciméadacht theicniúil a shonraítear leis an Rialachán seo comhionann leis na paraiméadair ar an mbileog faisnéise faoin táirge a shonraítear le Rialachán Tarmligthe (AE) 2023/2534 (8) ón gCoimisiún, ba cheart do mhonaróirí, d’allmhaireoirí nó d’ionadaithe údaraithe na sonraí comhfhreagracha a iontráil sa bhunachar sonraí táirgí i gcomhréir le Rialachán (AE) 2017/1369 ó Pharlaimint na hEorpa agus ón gComhairle (9) agus níor cheart gá a bheith ann dóibh iad a sholáthar a thuilleadh d’údaráis um fhaireachas margaidh mar chuid den doiciméadacht theicniúil.

(19)

Chun tomhaltóirí a chosaint, níor cheart táirgí a cheadú ar an margadh a athraíonn a bhfeidhmíocht go huathoibríoch faoi choinníollacha tástála i dtéarmaí na bparaiméadar dearbhaithe. Ar an mbealach céanna, níor cheart dochar a dhéanamh don fheidhmíocht de bharr nuashonruithe bogearraí ar an táirge i dtéarmaí na bparaiméadar dearbhaithe.

(20)

Ba cheart foráil a dhéanamh leis an nós imeachta fíorúcháin chun críoch faireachais margaidh maidir le cásanna nach dtabharfaidh tástálacha a dhéantar ar thriomadóirí rothlaim tí torthaí atá bailí chun comparáid a dhéanamh leis na luachanna arna ndearbhú ag an monaróir.

(21)

I gcomhréir le Cuid 3, pointe (2), d’Iarscríbhinn I a ghabhann le Treoir 2009/125/CE, ba cheart tagarmharcanna táscacha le haghaidh na dteicneolaíochtaí is fearr atá ar fáil a shainaithint chun faisnéis maidir le feidhmíocht chomhshaoil saolré táirgí atá faoi réir an Rialacháin seo a chur ar fáil go forleathan agus chun go mbeadh sí inrochtana go héasca.

(22)

D’fhéadfadh sceitheadh féideartha an chuisneáin atá i dtriomadóirí rothlaim teaschaidéil cur le téamh domhanda. Ba cheart an cineál cuisneáin a úsáidtear a bheith ar taispeáint ar an triomadóir rothlaim tí in áit infheicthe chun láimhseáil iomchuí an chuisneáin a éascú nuair a bhíonn an fearas á dheisiú, á athchúrsáil nó á chaitheamh i dtraipisí.

(23)

Le Rialachán Tarmligthe (AE) 2023/807 (10) bunaítear fachtóir fuinnimh príomhúil le haghaidh leictreachais de 1,9 (comhéifeacht tiontúcháin) atá le cur i bhfeidhm nuair a dhéantar coigilteas fuinnimh a ríomh i dtéarmaí fuinnimh phríomhúil bunaithe ar thomhaltas fuinnimh deiridh. Ba cheart an fachtóir fuinnimh príomhúil sin a chur i bhfeidhm nuair a dhéantar comparáid idir an tomhaltas fuinnimh le haghaidh triomadóirí rothlaim leictreacha agus gásadhainte.

(24)

Ba cheart athbhreithniú á dhéanamh ar an Rialachán sin chun measúnú a dhéanamh ar a oiriúnaí agus a éifeachtaí atá a fhorálacha chun a spriocanna a bhaint amach. Ba cheart gur leor uainiú an athbhreithnithe chun go bhféadfar na forálacha uile a chur chun feidhme agus chun go mbeidh éifeacht acu ar an margadh.

(25)

Chun an t-aistriú ó Rialachán (AE) Uimh. 932/2012 chuig an Rialachán seo a éascú, ba cheart úsáid an téarma nua ‘éicea’ a cheadú ó theacht i bhfeidhm an Rialacháin seo. Ina theannta sin, an tráth céanna, ba cheart a cheadú do mhonaróirí ceanglais an Rialacháin seo a chomhlíonadh 4 mhí roimh dháta a chur i bhfeidhm.

(26)

Chun a áirithiú gur féidir triomadóirí rothlaim tí a dheisiú go héifeachtach, ba cheart praghas páirteanna spártha a bheith réasúnta agus níor cheart deisiú a dhíspreagadh leo. Chun trédhearcacht a chruthú agus chun socrú praghsanna réasúnta a dhreasú, ba cheart an praghas táscach réamhchánach ar pháirteanna spártha arna soláthar de bhun an Rialacháin seo a bheith so-aimsithe ar shuíomh gréasáin saor-rochtana.

(27)

Tá na bearta dá bhforáiltear sa Rialachán seo i gcomhréir leis an tuairim ón gCoiste a leagadh amach le hAirteagal 19 de Threoir 2009/125/CE.

(28)

Ba cheart Rialachán (AE) Uimh. 932/2012 a aisghairm le héifeacht ón 30 Meitheamh 2025

(1)

ciallaíonn ‘triomadóir rothlaim tí’ fearas ina ndéantar teicstílí a thriomú trína rothlú i ndroma rothlach trína gcuirtear aer téite agus a dhearbhaíonn an monaróir ina leith sa dearbhú comhréireachta go gcomhlíonann sé Treoir 2014/35/AE ó Pharlaimint na hEorpa agus ón gComhairle (12) nó Treoir 2014/53/AE ó Pharlaimint na hEorpa agus ón gComhairle (13);

(2)

ciallaíonn ‘príomhlíonra’ an soláthar leictreachais ón eangach de 230 (± 10 %) volta srutha ailtéarnaigh ar 50 Hz;

(3)

ciallaíonn ‘triomadóir rothlaim gásadhainte’ triomadóir rothlaim tí a úsáideann gás chun an t-aer taobh istigh a théamh;

(4)

ciallaíonn ‘triomadóir rothlaim tí ionsuite’ triomadóir rothlaim tí a dheartar, a thástáiltear agus a mhargaítear go heisiach chun na saintréithe seo a leanas uile a chomhlíonadh:

(5)

ciallaíonn ‘meaisín niteoir-triomadóir tí’ fearas mar a shainmhínítear in Airteagal 2(4) de Rialachán (AE) 2019/2023 ón gCoimisiún (14);

(6)

ciallaíonn ‘castarraingteoir tí’ fearas ina mbaintear uisce as na teicstílí trí ghníomhaíocht lártheifeach i ndruma rothlach agus a dhraenáiltear trí chaidéal uathoibríoch nó trí dhomhantarraingt agus atá deartha le húsáid go príomha chun críoch neamhghairmiúil agus ar a dtugtar freisin sa réimse tráchtála ‘castriomadóir’;

(7)

ciallaíonn ‘triomadóir rothlaim tí ina bhfuil níos mó ná druma amháin’ triomadóir rothlaim tí atá feistithe le níos mó ná druma amháin, bídís i gcásálacha ar leith nó sa chásáil chéanna;

(8)

ciallaíonn ‘múnla coibhéiseach’ múnla a bhfuil na saintréithe teicniúla céanna ann atá ábhartha maidir leis an bhfaisnéis theicniúil atá le soláthar, ach arb é an monaróir, an t-allmhaireoir nó an t-ionadaí údaraithe céanna a chuireann é ar an margadh nó i mbun seirbhíse agus a chuireann múnla eile ag a bhfuil aitheantóir múnla difriúil;

(9)

ciallaíonn ‘clár’ sraith oibríochtaí a réamhshainítear agus a ndearbhaíonn an monaróir, an t-allmhaireoir nó an t-ionadaí údaraithe go bhfuil siad oiriúnach chun cineálacha áirithe teicstíle a thriomú;

(10)

ciallaíonn ‘aitheantóir múnla’ an cód a bhíonn alfa-uimhriúil de ghnáth agus lena ndéantar múnla sonrach de tháirge a dhealú ó mhúnlaí eile a bhfuil an trádmharc céanna acu nó an t-ainm monaróra, allmhaireora nó ionadaí údaraithe chéanna orthu;

(11)

ciallaíonn ‘luachanna fógartha’ na luachanna a sholáthair an monaróir, an t-allmhaireoir nó an t-ionadaí údaraithe le haghaidh na bparaiméadar teicniúil atá luaite, ríofa nó tomhaiste i gcomhréir le hAirteagal 4, le haghaidh fíorú comhlíontachta ag údaráis na mBallstát;

(12)

ciallaíonn ‘bunachar sonraí táirgí’ bunachar sonraí mar a shainmhínítear in Airteagal 2, pointe (25), de Rialachán (AE) 2017/1369;

(13)

ciallaíonn ‘toilleadh ainmniúil’ an uasmhais ina cileagraim, arna sonrú ag an monaróir, ag an allmhaireoir nó ag an ionadaí údaraithe, ag eatraimh 0,5 kg, de theicstílí tirime de chineál ar leith, ar féidir cóireáil a dhéanamh orthu i dtimthriall triomúcháin amháin de thriomadóir rothlaim tí ar an gclár roghnaithe, nuair a luchtaítear i gcomhréir le treoracha an mhonaróra é;

(14)

ciallaíonn ‘éiceachlár’ clár atá in ann níochán cadáis a thriomú ó chion taise tosaigh de chuid an lóid de 60 % síos go dtí cion taise deiridh de chuid an lóid de 0 %;

(15)

ciallaíonn ‘cion taise tosaigh’ an méid taise atá sa lód ag tús an timthrialla triomúcháin;

(16)

ciallaíonn ‘cion taise deiridh’ an méid taise atá sa lód ag deireadh an timthrialla triomúcháin;

(17)

ciallaíonn ‘timthriall triomúcháin’ próiseas iomlán triomúcháin, mar a shainmhínítear é sa chlár a éilítear, arb é atá ann sraith oibríochtaí éagsúla lena n-áirítear téamh agus rothlú.

(a)

an poitéinseal feabhsúcháin maidir le feidhmíocht fuinnimh agus chomhshaoil na dtriomadóirí rothlaim tí;

(b)

forbairtí in iompar tomhaltóirí agus an fhéidearthacht a bhaineann le sásra aiseolais éigeantach maidir le luchtú an fhearais, tomhaltas fuinnimh agus fad an chláir roghnaithe;

(c)

éifeachtacht na gceanglas atá ann cheana maidir le héifeachtúlacht acmhainne;

(d)

a oiriúnaí is atá sé ceanglais bhreise maidir le héifeachtúlacht acmhainní a leagan síos le haghaidh táirgí i gcomhréir le cuspóirí an gheilleagair chiorclaigh, lena n-áirítear infhaighteacht páirteanna spártha breise agus faisnéis maidir le hamhábhair chriticiúla agus ábhair eile atá ábhartha maidir leis an gcomhshaol;

(e)

a oiriúnaí atá sé ceanglais éicidhearthóireachta a shocrú maidir le triomadóirí caibinéid;

(f)

a oiriúnaí atá sé ceanglais a shocrú chun scaipeadh na micreaphlaisteach a laghdú.