(1)

Le Treoir 2003/87/CE, ceanglaítear ar oibreoirí áirithe pleananna aeráidneodrachta a bhunú. Tá pleananna aeráidneodrachta le dréachtú chun leithdháileadh saor in aisce coinníollach a fháil ó oibreoirí suiteálacha a bhfuil a leibhéil astaíochtaí gás ceaptha teasa níos airde ná an 80ú peircintíl de leibhéil astaíochtaí le haghaidh na dtagarmharcanna táirge ábhartha. Déanfaidh oibreoirí téimh ceantair pleananna aeráidneodrachta a dhréachtú freisin agus iad ag cur isteach ar leithdháileadh saor in aisce breise roghnach do shuiteálacha téimh ceantair i mBallstáit áirithe.

(2)

I gcomhréir le hAirteagal 10a(1), an cúigiú fomhír, de Threoir 2003/87/CE, tá pleananna aeráidneodrachta le dréachtú ar leibhéal na suiteála agus tá na heilimintí a shonraítear in Airteagal 10b(4) den Treoir sin le bheith iontu. Ar bhonn roghnach, ba cheart an fhéidearthacht a bheith ann tuilleadh sonraí agus bearta sonracha a sholáthar ar leibhéal na foshuiteála, chun astaíochtaí gás ceaptha teasa a laghdú go mór d’fhonn rannchuidiú le haeráidneodracht. Maidir le suiteálacha téimh ceantair sna Ballstáit dá dtagraítear in Airteagal 10b(4), an dara fomhír, de Threoir 2003/87/CE, tá na pleananna aeráidneodrachta le dréachtú ar leibhéal na cuideachta nó ar leibhéal na suiteála i gcomhréir le hAirteagal 10b(4), an tríú fomhír, den Treoir sin.

(3)

De bhun Threoir 2003/87/CE, tá an Coimisiún le gníomhartha cur chun feidhme a ghlacadh chun ábhar agus formáid íosta na bpleananna aeráidneodrachta a shonrú agus sineirgí á lorg ag an am céanna le pleananna comhchosúla dá bhforáiltear i ndlí an Aontais. I bhfianaise sineirgí a ghiniúint agus an t-ualach riaracháin ar oibreoirí eacnamaíocha a laghdú, eilimintí a áirítear i bpleananna faoi ghníomhartha dlí eile de chuid an Aontais, go háirithe na cinn dá dtagraítear i dTreoir 2010/75/AE ó Pharlaimint na hEorpa agus ón gComhairle (2), ba cheart iad a chur san áireamh agus na pleananna aeráidneodrachta á ndréachtú.

(4)

I gcomhthéacs na bpleananna aeráidneodrachta, tuigfear aeráidneodracht mar a shainmhínítear in Airteagal 2 de Rialachán (AE) 2021/1119 ó Pharlaimint na hEorpa agus ón gComhairle (3).

(5)

Chun comhleanúnachas reachtaíocht an Aontais a áirithiú, ba cheart na garspriocanna agus na spriocanna a shainiú i gcomhréir le Rialachán (AE) 2021/241 (4) agus Rialachán (AE) 2023/955 (5) ó Pharlaimint na hEorpa agus ón gComhairle. Chun aghaidh a thabhairt ar na gnéithe ábhartha uile de ghníomhaíochtaí na n-oibreoirí i dtreo na haeráidneodrachta agus chun trédhearcacht agus inchomparáideacht a áirithiú, ní mór idirdhealú a dhéanamh sna pleananna aeráidneodrachta idir an faireachán ar an dul chun cinn i dtreo gnóthachtálacha cáilíochtúla (‘garspriocanna’) agus an faireachán ar an dul chun cinn i dtreo gnóthachtálacha cainníochtúla maidir le laghdú astaíochtaí (‘spriocanna’). Chun comhsheasmhacht leis an gcóras trádála astaíochtaí atá ann cheana a áirithiú, ba cheart garspriocanna agus spriocanna a shloinneadh agus a thuairisciú i gcomhréir leis na rialacha a leagtar amach i Rialachán Cur Chun Feidhme (AE) 2018/2066 ón gCoimisiún (6) agus i Rialachán Tarmligthe (AE) 2019/331 ón gCoimisiún (7).

(6)

Chun a bheith comhsheasmhach le Rialachán Tarmligthe (AE) 2019/331, ba cheart spriocanna a shainiú a bhaineann go sonrach leis na leibhéil gníomhaíochta le haghaidh foshuiteálacha le tagarmharc táirge nó le haghaidh foshuiteálacha cúltaca a shloinneadh mar thonaí de choibhéis CO2 in aghaidh an aonaid ábhartha táirgthe. Ba cheart spriocanna i gcoibhneas leis na luachanna tagarmhairc i gcomhréir le Rialachán Cur Chun Feidhme (AE) 2021/447 ón gCoimisiún (8) a shloinneadh mar chéatadán an laghdaithe. Anuas air sin, chun níos mó solúbthachta a cheadú agus chun infhíoraitheacht bhaint amach na spriocanna a mhéadú, ba cheart an fhéidearthacht a bheith ann na spriocanna a shloinneadh i ndearbhthéarmaí freisin.

(7)

Chun an t-ualach riaracháin ar oibreoirí a laghdú agus sonraí á mbailiú acu le haghaidh na bpleananna aeráidneodrachta, ba cheart na pleananna a chomhtháthú sna nósanna imeachta atá ann cheana le haghaidh leithdháileadh saor in aisce a bhunaítear le Rialachán Tarmligthe (AE) 2019/331. Dá bhrí sin, ba cheart an tréimhse thagartha d’astaíochtaí stairiúla a bheith comhsheasmhach leis an tréimhse bhonnlíne ábhartha mar a shainítear in Airteagal 2(14) den Rialachán sin agus ba cheart raon feidhme na n-astaíochtaí a bheith comhsheasmhach le teorainneacha córais na bhfoshuiteálacha ábhartha de bhun an Rialacháin sin. Ba cheart raon feidhme na n-astaíochtaí atá le tuairisciú a bheith comhsheasmhach le raon feidhme na n-astaíochtaí sa chead astaíochtaí gás ceaptha teasa atá ag an tsuiteáil lena mbaineann agus leis na ceanglais maidir le faireachán agus tuairisciú a dhéanamh ar astaíochtaí a leagtar síos i Rialachán Cur Chun Feidhme (AE) 2018/2066.

(8)

Tá na bearta dá bhforáiltear sa Rialachán seo i gcomhréir leis an tuairim ón gCoiste um Athrú Aeráide,

(1)

ciallaíonn ‘cuideachta téimh ceantair’ cuideachta a oibríonn suiteálacha a n-aicmítear a bpríomhghníomhaíochtaí eacnamaíocha de réir chóid NACE dá dtagraítear i Rialachán (CE) Uimh. 1893/2006 ó Pharlaimint na hEorpa agus ón gComhairle (9) mar sholáthar gaile agus aerchóiriúcháin, nó mar tháirgeadh leictreachais in éineacht le honnmhairiú téimh ceantair;

(2)

ciallaíonn ‘garspriocanna’ táscairí cáilíochtúla maidir leis an dul chun cinn i dtreo beart nó infheistíocht a bhaint amach chun cuspóir aeráidneodrachta a bhaint amach faoi 2050 mar a thuairiscítear in Airteagal 2 de Rialachán (AE) 2021/1119 ar leibhéal na suiteála nó, go roghnach, ar leibhéal na cuideachta le haghaidh oibreoirí téimh ceantair, de bhun Airteagal 10a(1), an cúigiú fomhír agus Airteagal 10b(4), an tríú fomhír de Threoir 2003/87/CE, gan úsáid creidmheasanna fritháirimh carbóin a chur san áireamh;

(3)

ciallaíonn ‘spriocanna’ táscairí cainníochtúla maidir leis an dul chun cinn i dtreo beart nó infheistíocht a bhaint amach chun aeráidneodracht a bhaint amach faoi 2050 mar a thuairiscítear in Airteagal 2 de Rialachán (AE) 2021/1119 ar leibhéal na suiteála nó, go roghnach, ar leibhéal na cuideachta le haghaidh oibreoirí téimh ceantair, de bhun Airteagal 10a(1), an cúigiú fomhír agus Airteagal 10b(4), an tríú fomhír de Threoir 2003/87/CE, gan úsáid creidmheasanna fritháirimh carbóin a chur san áireamh;

(4)

ciallaíonn ‘spriocanna agus garspriocanna idirmheánacha’ spriocanna agus garspriocanna a shocraítear don 31 Nollaig 2025 agus don 31 Nollaig gach 5 bliana ina dhiaidh sin.