This document is an excerpt from the EUR-Lex website
Document 32023R2060
Commission Implementing Regulation (EU) 2023/2060 of 26 September 2023 laying down rules for the application of Regulation (EU) 2023/1231 of the European Parliament and of the Council as regards the listing of the flag States of fishing vessels catching fishery products that may enter into Northern Ireland from other parts of the United Kingdom and be placed on the market in Northern Ireland as retail goods (Text with EEA relevance)
Rialachán Cur Chun Feidhme (AE) 2023/2060 ón gCoimisiún an 26 Meán Fómhair 2023 lena leagtar síos rialacha maidir le cur i bhfeidhm Rialachán (AE) 2023/1231 ó Pharlaimint na hEorpa agus ón gComhairle a mhéid a bhaineann le Stáit bhrataí soithí iascaireachta a liostú, ar soithí iascaireachta iad a ghabhann táirgí iascaigh a fhéadfaidh teacht isteach i dTuaisceart Éireann ó chodanna eile den Ríocht Aontaithe agus a fheadfar a chur ar an margadh i dTuaisceart Éireann mar earraí miondíola (Téacs atá ábhartha maidir le LEE)
Rialachán Cur Chun Feidhme (AE) 2023/2060 ón gCoimisiún an 26 Meán Fómhair 2023 lena leagtar síos rialacha maidir le cur i bhfeidhm Rialachán (AE) 2023/1231 ó Pharlaimint na hEorpa agus ón gComhairle a mhéid a bhaineann le Stáit bhrataí soithí iascaireachta a liostú, ar soithí iascaireachta iad a ghabhann táirgí iascaigh a fhéadfaidh teacht isteach i dTuaisceart Éireann ó chodanna eile den Ríocht Aontaithe agus a fheadfar a chur ar an margadh i dTuaisceart Éireann mar earraí miondíola (Téacs atá ábhartha maidir le LEE)
C/2023/6511
IO L 238, 27.9.2023, p. 108–113
(BG, ES, CS, DA, DE, ET, EL, EN, FR, GA, HR, IT, LV, LT, HU, MT, NL, PL, PT, RO, SK, SL, FI, SV)
In force
27.9.2023 |
GA |
Iris Oifigiúil an Aontais Eorpaigh |
L 238/108 |
RIALACHÁN CUR CHUN FEIDHME (AE) 2023/2060 ÓN gCOIMISIÚN
an 26 Meán Fómhair 2023
lena leagtar síos rialacha maidir le cur i bhfeidhm Rialachán (AE) 2023/1231 ó Pharlaimint na hEorpa agus ón gComhairle a mhéid a bhaineann le Stáit bhrataí soithí iascaireachta a liostú, ar soithí iascaireachta iad a ghabhann táirgí iascaigh a fhéadfaidh teacht isteach i dTuaisceart Éireann ó chodanna eile den Ríocht Aontaithe agus a fheadfar a chur ar an margadh i dTuaisceart Éireann mar earraí miondíola
(Téacs atá ábhartha maidir le LEE)
TÁ AN COIMISIÚN EORPACH,
Ag féachaint don Chonradh ar Fheidhmiú an Aontais Eorpaigh,
Ag féachaint do Rialachán (AE) 2023/1231 ó Pharlaimint na hEorpa agus ón gComhairle an 14 Meitheamh 2023 maidir le rialacha sonracha a bhaineann le teacht isteach i dTuaisceart Éireann ó chodanna eile den Ríocht Aontaithe coinsíneachtaí áirithe earraí miondíola, plandaí le haghaidh plandú, prátaí síl, innealra agus feithiclí áirithe a oibrítear chun críocha talmhaíochta nó foraoiseachta, chomh maith le gluaiseachtaí neamhthráchtála peataí áirithe isteach i dTuaisceart Éireann (1), agus go háirithe Airteagail 9(4), pointe (b), de,
De bharr an mhéid seo a leanas:
(1) |
Le Rialachán (AE) 2023/1231 leagtar síos rialacha sonracha a bhaineann le, inter alia, teacht isteach i dTuaisceart Éireann ó chodanna eile den Ríocht Aontaithe coinsíneachtaí earraí miondíola áirithe, lena gcur ar an margadh i dTuaisceart Éireann don tomhaltóir deiridh. |
(2) |
Go háirithe, le hAirteagal 9 de Rialachán (AE) 2023/1231 leagtar síos rialacha sonracha maidir le coinsíneachtaí earraí miondíola de thionscnamh na coda eile den domhan. Le hAirteagal 9(2), pointe (b) den Rialachán sin, foráiltear maidir le táirgí iascaigh a ghabhann soitheach iascaireachta a bhfuil bratach tríú tír cé is moite den Ríocht Aontaithe ar foluain aige (‘an Stát brataí’), agus a allmhairítear isteach i gcodanna den Ríocht Aontaithe cé is moite de Thuaisceart Éireann, nach bhféadfaidh siad teacht isteach i dTuaisceart Éireann ó chodanna eile den Ríocht Aontaithe mar earraí miondíola, agus nach bhféadfar iad a chur ar an margadh i dTuaisceart Éireann i gcomhréir le hAirteagal 4 den Rialachán sin ach amháin má liostaítear Stát brataí an tsoithigh iascaireachta lena mbaineann i ngníomh cur chun feidhme arna ghlacadh i gcomhréir le le hAirteagal 9(4) den Rialachán sin. |
(3) |
Ina theannta sin, le hAirteagal 9(2), pointe (a) de Rialachán (AE) 2023/1231 foráiltear maidir le táirgí iascaigh a ghabhann soitheach de chuid an Stáit brataí, agus a allmhairítear isteach i gcodanna den Ríocht Aontaithe cé is moite de Thuaisceart Éireann, nach bhféadfaidh siad dul isteach i dTuaisceart Éireann ó chodanna eile den Ríocht Aontaithe mar earraí miondíola, agus nach bhféadfar iad a chur ar an margadh i dTuaisceart Éireann i gcomhréir le hAirteagal 4 den Rialachán sin, ach amháin má déanann an Ríocht Aontaithe fianaise i scríbhinn a sholáthar go bhfuil feidhm ag coinníollacha allmhairiúcháin, rialuithe oifigiúla agus ceanglais fíorúcháin faoina dlí náisiúnta, agus áirithítear leis sin nach n-allmhairítear isteach sa Ríocht Aontaithe táirgí a fhaightear ón iascaireacht neamhdhleathach, neamhthuairiscithe agus neamhrialáilte (‘iascaireacht NNN’) mar a shainmhínítear in Airteagal 2 de Rialachán (CE) Uimh. 1005/2008 ón gComhairle (2) agus i ngníomhartha de chuid an Aontais de bhun Rialachán (CE) Uimh. 1005/2008, agus go bhfuil na coinníollacha allmhairiúcháin, na rialuithe oifigiúla agus na ceanglais fíorúcháin sin á gcur chun feidhme go héifeachtach sa Ríocht Aontaithe(‘an fhianaise i scríbhinn’). |
(4) |
Le Rialachán (CE) Uimh. 1005/2008 bunaítear córas de chuid an Aontais chun iascaireacht NNN a chosc, a dhíspreagadh agus a dhíothú, agus le hAirteagal 12(1) de, toirmeasctar táirgí iascaigh a fhaightear ó iascaireacht NNN a allmhairiú isteach san Aontas. Ina theannta sin, le hAirteagal 20 den Rialachán leagtar síos rialacha maidir le fógra á thabhairt don Choimisiún ag Stáit bhrataí tríú tír chun críoch deimhnithe gabhála arna mbailíochtú ag na Stáit bhrataí sin a ghlacadh chun a áirithiú, inter alia, go ndéanann coinsíneachtaí táirgí iascaigh a thagann isteach san Aontas ó thríú tíortha an toirmeasc sin a chomhlíonadh. |
(5) |
Le Cinneadh Cur Chun Feidhme 2014/170/AE ón gComhairle (3) bunaítear liosta de thríú tíortha neamh-chomhoibríocha sa chomhrac in aghaidh iascaireacht NNN de bhun Rialachán (CE) Uimh. 1005/2008. |
(6) |
Foráiltear le hAirteagal 9(4), pointe (b) de Rialachán (AE) 2023/1231, i gcás ina bhfaigheann an Coimisiún an fhianaise i scríbhinn, go bhféadfaidh sé gníomh cur chun feidhme a ghlacadh ina liostófar Stáit bhrataí na soitheach iascaireachta a ghabhann táirgí iascaigh a fhéadfaidh teacht isteach i dTuaisceart Éireann mar earraí miondíola ó chodanna eile den Ríocht Aontaithe agus a fhéadfar a chur ar an margadh i dTuaisceart Éireann. |
(7) |
Le litir dar dáta an 4 Meán Fómhair 2023, déanann an Ríocht Aontaithe an fhianaise i scríbhinn a sholáthar go bhfuil feidhm ag coinníollacha allmhairiúcháin, rialuithe oifigiúla agus ceanglais fíorúcháin faoi dhlí náisiúnta na Ríochta Aontaithe agus go bhfuil coinníollacha allmhairiúcháin, rialuithe oifigiúla agus ceanglais fíorúcháin á gcur chun feidhme go héifeachtach ag an Ríocht Aontaithe. |
(8) |
Ós rud é gur sholáthair an Ríocht Aontaithe an fhianaise i scríbhinn is gá a cheanglaítear le hAirteagal 9(2), pointe (a), de Rialachán (AE) 2023/1231, is iomchuí liosta a bhunú de Stáit bhrataí soithí iascaireachta a ghabhann táirgí iascaigh a fhéadfaidh teacht isteach i dTuaisceart Éireann ó chodanna eile den Ríocht Aontaithe agus a fhéadfar chur ar an margadh i dTuaisceart Éireann mar earraí miondíola, tar éis dóibh a bheith allmhairithe isteach i gcodanna eile den Ríocht Aontaithe. Ba cheart a chur san áireamh sa liosta sin an ceanglas maidir le fógra a thabhairt a leagtar síos in Airteagal 20 de Rialachán (CE) Uimh. 1005/2008, agus liosta na dtríú tíortha neamh-chomhoibríocha a bunaíodh le Cinneadh Cur Chun Feidhme 2014/170/AE. |
(9) |
Ar mhaithe le deimhneacht dhlíthiúil agus chun cur isteach míchuí ar thrádáil a sheachaint, ba cheart éifeacht a bheith ag an Rialachán seo mar ábhar práinne. |
(10) |
Beidh feidhm ag an oibleagáid earraí miondíola a mharcáil i gcomhréir le hIarscríbhinn IV a ghabhann le Rialachán (AE) 2023/1231 ón 1 Deireadh Fómhair 2023. Dá bhrí sin, ba cheart feidhm a bheith ag an Rialachán seo ón 1 Deireadh Fómhair 2023 chun comhsheasmhacht agus deimhneacht dhlíthiúil a áirithiú agus chun cur isteach míchuí ar thrádáil a sheachaint. |
(11) |
Tá na bearta dá bhforáiltear sa Rialachán seo i gcomhréir leis an tuairim ón gCoiste um Iascach agus Dobharshaothrú, |
TAR ÉIS AN RIALACHÁN SEO A GHLACADH:
Airteagal 1
Ábhar agus raon feidhme
Leis an Rialachán seo bunaítear liosta na tríú tíortha, cé is moite den Ríocht Aontaithe, ar Stáit bhrataí soithí iascaireachta iad a ghabhann táirgí iascaigh a fhéadfaidh teacht isteach i dTuaisceart Éireann ó chodanna eile den Ríocht Aontaithe agus a fhéadfar a chur ar an margadh i dTuaisceart Éireann mar earraí miondíola i gcomhréir le hAirteagal 4 de Rialachán (AE) 2023/1231, tar éis dóibh a bheith allmhairithe isteach i gcodanna eile den Ríocht Aontaithe (‘liosta na Stát brataí’).
Airteagal 2
Liosta na Stát brataí
Leagtar amach liosta na Stát brataí san Iarscríbhinn.
Airteagal 3
Teacht i bhfeidhm agus cur i bhfeidhm
Tiocfaidh an Rialachán seo i bhfeidhm lá a fhoilsithe in Iris Oifigiúil an Aontais Eorpaigh.
Beidh feidhm ag an Rialachán seo ón 1 Deireadh Fómhair 2023.
Beidh an Rialachán seo ina cheangal go huile agus go hiomlán agus beidh sé infheidhme go díreach i ngach Ballstát.
Arna dhéanamh sa Bhruiséil, an 26 Meán Fómhair 2023.
Thar ceann an Choimisiúin
An tUachtarán
Ursula VON DER LEYEN
(1) IO L 165, 29.6.2023, lch. 103.
(2) Rialachán (CE) Uimh. 1005/2008 ón gComhairle an 29 Meán Fómhair 2008 lena mbunaítear córas Comhphobail chun iascaireacht neamhdhleathach, neamhthuairiscithe agus neamhrialáilte a chosc, a dhíspreagadh agus a dhíothú, lena leasaítear Rialachán (CEE) Uimh. 2847/93, Rialachán (CE) Uimh. 1936/2001 agus Rialachán (CE) Uimh. 601/2004 agus lena n-aisghairtear Rialachán (CE) Uimh. 1093/94 agus Rialachán (CE) Uimh. 1447/1999 (IO L 286, 29.10.2008, lch. 1).
(3) Cinneadh Cur Chun Feidhme 2014/170/AE ón gComhairle an 24 Márta 2014 lena mbunaítear liosta tríú tíortha neamh-chomhoibríocha sa chomhrac in aghaidh iascaireacht NNN de bhun Rialachán (CE) Uimh. 1005/2008 lena mbunaítear córas Comhphobail chun iascaireacht neamhdhleathach, neamhthuairiscithe agus neamhrialáilte a chosc, a dhíspreagadh agus a dhíothú (IO L 91, 27.3.2014, lch. 43).
IARSCRÍBHINN
AN ALBÁIN |
AN AILGÉIR |
ANGÓLA |
ANTIGUA AGUS BARBÚDA |
AN AIRGINTÍN |
AN ASTRÁIL |
NA BAHÁMAÍ |
AN BHANGLAIDÉIS |
AN BHEILÍS |
BEININ |
AN BHRASAÍL |
CEANADA |
CABO VERDE |
AN tSILE |
AN tSÍN |
AN CHOLÓIM |
CÓSTA RÍCE |
AN CÓSTA EABHAIR |
CÚBA |
CÚRASÓ |
EACUADÓR |
AN ÉIGIPT |
AN tSALVADÓIR |
AN EIRITRÉ |
OILEÁIN FHÁCLAINNE |
OILEÁIN FHARÓ |
FIDSÍ |
POLAINÉIS NA FRAINCE |
CRÍOCHA AN DEISCIRT AGUS AN ANTARTAIGH DE CHUID NA FRAINCE |
AN GHABÚIN |
GÁNA |
AN GHRAONLAINN |
GREANÁDA |
GUATAMALA |
AN GHUINE |
AN GHUÁIN |
AN ÍOSLAINN |
AN INDIA |
AN INDINÉIS |
IAMÁICE |
AN tSEAPÁIN |
AN CHÉINIA |
CIREABAITÍ |
MADAGASCAR |
AN MHALAEISIA |
OILEÁIN MHAILDÍVE |
AN MHÁRATÁIN |
OILEÁN MHUIRÍS |
MEICSICEO |
MONTAINÉAGRÓ |
MARACÓ |
MÓSAIMBÍC |
MAENMAR/BURMA |
AN NAMAIB |
AN NUA-CHALADÓIN |
AN NUA-SHÉALAINN |
NICEARAGUA |
AN NIGÉIR |
AN IORUA |
ÓMAN |
AN PHACASTÁIN |
PANAMA |
NUA-GHUINE PHAPUA |
PEIRIÚ |
NA hOILEÁIN FHILIPÍNEACHA |
AN RÚIS |
SAN HÉILIN |
SAN PIERRE AGUS MIQUELON |
AN tSEINEAGÁIL |
NA SÉISÉIL |
OILEÁIN SHOLAIMH |
AN AFRAIC THEAS |
AN CHÓIRÉ THEAS |
SRÍ LANCA |
SURANAM |
AN TÉAVÁIN |
AN TANSÁIN |
AN TÉALAINN |
AN GHAIMBIA |
TRISTAN DA CUNHA |
AN TÚINÉIS |
AN TUIRC |
AN ÚCRÁIN |
AONTAS NA nÉIMÍRÍOCHTAÍ ARABACHA |
STÁIT AONTAITHE MHEIRICEÁ |
URAGUA |
VEINISÉALA |
VÍTNEAM |
VAILÍS AGUS FUTÚNA |
ÉIMIN |