(1)

De bhun Rialachán (CE) Uimh. 1924/2006, tá toirmeasc ar mhaímh shláinte a dhéantar i leith bianna ach amháin má tá siad údaraithe ag an gCoimisiún i gcomhréir leis an Rialachán sin agus más rud é go n-áirítear iad i liosta an Aontais de mhaímh shláinte cheadaithe.

(2)

Foráiltear le Rialachán (CE) Uimh. 1924/2006 freisin go bhféadfaidh oibreoirí gnólachtaí bia iarratais ar údarú i leith maímh shláinte a chur faoi bhráid údarás inniúil náisiúnta de chuid Ballstáit. Cuirfidh an t-údarás inniúil náisiúnta iarratais bhailí chuig an Údarás Eorpach um Shábháilteacht Bia (‘an tÚdarás’).

(3)

Tar éis don Údarás iarratas a fháil, cuirfidh sé na Ballstáit eile agus an Coimisiún ar an eolas gan mhoill, agus tabharfaidh sé tuairim ar an maíomh sláinte lena mbaineann.

(4)

Déanfaidh an Coimisiún cinneadh i dtaca le húdarú a thabhairt don mhaíomh sláinte agus an tuairim ón Údarás á cur san áireamh aige.

(5)

Tar éis iarratas a fháil ó Nestlé S.A., iarratas a cuireadh isteach de bhun Airteagal 13(5) de Rialachán (CE) Uimh. 1924/2006, bhí de cheangal ar an Údarás tuairim a thabhairt faoin mbunús eolaíoch atá le maíomh sláinte maidir le béite-ghlúcain a fhaightear ó choirce agus/nó eorna i ngránaigh bhricfeasta réamhullmhaithe a mhonaraítear trí chócaireacht i mbrú-chócaire agus maidir le laghdú ar an ardú ar ghlúcós fola tar éis a n-ithe (Ceist Uimh. EFSA-Q-2020-000447). Is mar a leanas a bhí an fhoclaíocht sa mhaíomh a mhol an t-iarratasóir: ‘Rannchuidíonn béite-ghlúcain ó choirce agus/nó eorna i ngránach bricfeasta réamhullmhaithe a ithe le laghdú ar an ardú ar ghlúcós fola tar éis an bhéile sin’.

(6)

An 8 Aibreán 2021, fuair an Coimisiún agus na Ballstáit an tuairim eolaíoch (2) ón Údarás maidir leis an maíomh sin, tuairim inar thángthas ar an gconclúid, ar bhonn na sonraí a tíolacadh, go bhfuil éifeacht béite-ghlúcan maidir le freagairtí glúcós fola iarbhéile a laghdú seanbhunaithe. Mar sin féin, níor leor an fhianaise a soláthraíodh chun éifeacht a bhunú ar fhreagairtí glicéime iarbhéile a laghdú ag dáileoga 1.3 g béite-ghlúcan in aghaidh 25 g de charbaihiodráit a bhí ar fáil agus a ionchorpraítear i ngránaigh bhricfeasta réamhullmhaithe a mhonaraítear trí chócaireacht i mbrú-chócaire (i.e. baisc-chócaireacht nó easbhrú), mar a d’iarr an t-iarratasóir. Dá réir sin, ós rud é nach gcomhlíonann an maíomh sin ceanglais Rialachán (CE) Uimh. 1924/2006 lena áireamh i liosta an Aontais de mhaímh shláinte cheadaithe, níor cheart é a údarú.

(7)

Tar éis iarratas a fháil ó Pharmactive Biotech Products, S.L., iarratas a cuireadh isteach de bhun Airteagal 13(5) de Rialachán (CE) Uimh. 1924/2006, bhí de cheangal ar an Údarás tuairim a thabhairt faoin mbunús eolaíoch atá le maíomh sláinte maidir le Affron® agus le rannchuidiú le giúmar sláintiúil a choimeád (Ceist Uimh. EFSA-Q-2020-00617). Is mar a leanas a bhí an fhoclaíocht sa mhaíomh a mhol an t-iarratasóir: ‘Rannchuidíonn Affron® le giúmar sláintiúil a choimeád trí ghnéithe diúltacha a bhaineann le mothúcháin dúlagair agus imní a laghdú’.

(8)

An 6 Iúil 2021, fuair an Coimisiún agus na Ballstáit an tuairim eolaíoch (3) ón Údarás maidir leis an maíomh sin, tuairim inar thángthas ar an gconclúid, ar bhonn na sonraí a tíolacadh, nár leor an fhianaise a soláthraíodh chun ceangal cúise agus éifeachta a bhunú idir tomhailt Affron® agus méadú ar ghiúmar dearfach. Dá réir sin, ós rud é nach gcomhlíonann an maíomh sin ceanglais Rialachán (CE) Uimh. 1924/2006 lena áireamh i liosta an Aontais de mhaímh shláinte cheadaithe, níor cheart é a údarú.

(9)

Tar éis iarratas a fháil ó Praline i Cokolada j.d.o.o., iarratas a cuireadh isteach de bhun Airteagal 13(5) de Rialachán (CE) Uimh. 1924/2006, bhí de cheangal ar an Údarás tuairim a thabhairt faoin mbunús eolaíoch atá le maíomh sláinte maidir le heastóscán síl fíonchaoire MegaNatural®-BP agus le brú fola normálta a choimeád (Ceist Uimh. EFSA-Q-2020-00718). Is mar a leanas a bhí an fhoclaíocht sa mhaíomh a mhol an t-iarratasóir: ‘Cabhraíonn MegaNatural®-BP le brú fola sláintiúil a choimeád’.

(10)

An 9 Lúnasa 2021, fuair an Coimisiún agus na Ballstáit an tuairim eolaíoch (4) ón Údarás maidir leis an maíomh sin, tuairim inar thángthas ar an gconclúid, ar bhonn na sonraí a tíolacadh, nár leor an fhianaise a soláthraíodh chun ceangal cúise agus éifeachta a bhunú idir tomhailt MegaNatural®-BP, eastóscán síl fíonchaoire atá caighdeánaithe le haghaidh feanól iomlán, aigéad gálach agus suim méid caitecíne agus eipeacaitecíne, agus brú fola normálta a choimeád. Dá réir sin, ós rud é nach gcomhlíonann an maíomh sláinte sin ceanglais Rialachán (CE) Uimh. 1924/2006 lena áireamh i liosta an Aontais de mhaímh shláinte cheadaithe, níor cheart é a údarú.

(11)

Tar éis iarratas a fháil ó Sensus B.V. (Royal Cosun), iarratas a cuireadh isteach de bhun Airteagal 13(5) de Rialachán (CE) Uimh. 1924/2006, bhí de cheangal ar an Údarás tuairim a thabhairt faoin mbunús eolaíoch atá le maíomh sláinte maidir le Frutalose® agus le dífhaecú normálta a choimeád (Ceist Uimh. EFSA-Q-2020-00631). Is mar a leanas a bhí an fhoclaíocht sa mhaíomh a mhol an t-iarratasóir: ‘Rannchuidíonn olagafhruchtós siocaire Frutalose® le feidhmíocht rialta na stéige trí mhinicíocht faecais a mhéadú’. Sholáthair an t-iarratasóir trí fhoclaíocht mhalartacha don mhaíomh freisin.

(12)

An 12 Lúnasa 2021, fuair an Coimisiún agus na Ballstáit an tuairim eolaíoch (5) ón Údarás maidir leis an maíomh sin, tuairim inar thángthas ar an gconclúid, ar bhonn na sonraí a tíolacadh, nár leor an fhianaise a soláthraíodh chun ceangal cúise agus éifeachta a bhunú idir tomhailt Frutalose® agus dífhaecú normálta a choimeád faoi na coinníollacha úsáide atá beartaithe. Dá réir sin, ós rud é nach gcomhlíonann an maíomh sláinte sin ceanglais Rialachán (CE) Uimh. 1924/2006 lena áireamh i liosta an Aontais de mhaímh shláinte cheadaithe, níor cheart é a údarú.

(13)

Na barúlacha ó Nestlé S.A. maidir leis an tuairim ón Údarás maidir leis an maíomh sláinte a bhaineann le béite-ghlucáin a fhaightear ó choirce agus/nó eorna i ngránaigh bhricfeasta réamhullmhaithe trí chócaireacht i mbrú-chócaire agus leis an laghdú ar ghlúcós fola tar éis a n-ithe (Ceist Uimh. EFSA-Q-2020-000447), a fuair an Coimisiún de bhun Airteagal 16(6) de Rialachán (CE) Uimh. 1924/2006, rinneadh iad a mheas nuair a glacadh an Rialachán seo.

(14)

Tá na bearta dá bhforáiltear sa Rialachán seo i gcomhréir leis an tuairim ón mBuanchoiste um Plandaí, Ainmhithe, Bia agus Beatha,