(1)

Leagtar amach in Airteagal 9(1) de Rialachán (CE) Uimh. 1238/95 ón gCoimisiún (2) leibhéal na táille is iníoctha leis an Oifig Chomhphobail um Chineálacha Plandaí (‘an Oifig’), le haghaidh gach bliana den fhad a mhaireann ceart Comhphobail maidir le cineálacha plandaí dá bhforáiltear in Airteagal 113(2), pointe (d), de Rialachán (CE) Uimh. 2100/94.

(2)

Chun an boilsciú féideartha ar na línte buiséid go léir a léiriú agus chun leanúint ag méadú an chúlchiste shaoir go dtí an t-íosleibhéal lena bhféadfaí oibriú na hoifige a áirithiú, ba cheart an táille bhliantúil a íocann sealbhóir cirt Comhphobail maidir le cineálacha plandaí a ardú go dtí EUR 380.

(3)

Tá castacht na gcásanna achomhairc ag ardú agus ní chumhdaítear na fíorchostais leis an táille achomhairc reatha a leagtar síos in Airteagal 11 de Rialachán (CE) Uimh. 1238/95. Dá bhrí sin, ba cheart an táille achomhairc sin a ardú go dtí EUR 2 100.

(4)

Is léir ón taithí a fuarthas gur gá na costais riaracháin a chumhdach a bhaineann le dearbhú an chirt Chomhphobail maidir le cineálacha plandaí a bheith ar neamhní go hiomlán, dá dtagraítear in Airteagal 20 de Rialachán (CE) Uimh. 2100/94, agus an táille riaracháin a bhaineann le hagóid i scríbhinn i gcoinne ceart Comhphobail maidir le cineálacha plandaí a dheonú, dá dtagraítear in Airteagal 59 den Rialachán sin.

(5)

Leagtar amach in Iarscríbhinn I a ghabhann le Rialachán (CE) Uimh. 1238/95 leibhéal na dtáillí chun scrúdú teicniúil a shocrú agus a dhéanamh ar chineál is ábhar d’iarratas ar cheart Comhphobail maidir le cineálacha plandaí, táillí is iníoctha leis an Oifig.

(6)

Ar bhonn suirbhé ar chostais na n-oifigí Scrúduithe a dhéanann an Oifig, ba cheart na táillí a ghearrann an Oifig a thabhairt cothrom le dáta, agus an ráta boilscithe á chur san áireamh.. Ba cheart ola ráibe a áireamh sa ghrúpa de speicis talmhaíochta eile agus sútha talún sa ghrúpa de speicis torthaí eile toisc go bhfuil leibhéal na dtáillí sna grúpaí sin níos oiriúnaí do na speicis sin. Dá bhrí sin, ba cheart na táillí a leagtar amach in Iarscríbhinn I a ghabhann le Rialachán (CE) Uimh. 1238/95 a mhodhnú le haghaidh na ngrúpaí costas uile lena mbaineann.

(7)

De réir Airteagal 83 de Rialachán (CE) Uimh. 2100/94 gearrfaidh an Oifig táillí as a gníomhartha oifigiúla dá bhforáiltear faoin Rialachán. Dá bhrí sin, ba cheart táillí a leagan síos le haghaidh dhearbhú an chirt Chomhphobail maidir le cineálacha plandaí a bheith ar neamhní go hiomlán agus le haghaidh agóid i scríbhinn i gcoinne ceart Comhphobail maidir le cineálacha plandaí a dheonú chun costais na ngníomhaíochtaí méadaithe sin a chumhdach.

(8)

Dá bhrí sin, ba cheart Rialachán (CE) Uimh. 1238/95 a leasú dá réir sin.

(9)

Ba cheart feidhm a bheith ag an Rialachán seo ón 1 Iúil 2023 chun am leordhóthanach a thabhairt don Oifig agus do na páirtithe leasmhara a oiriúnú do na leasuithe sin.

(10)

Tá na bearta dá bhforáiltear sa Rialachán seo i gcomhréir le tuairim an Bhuanchoiste um Chearta Comhphobail maidir le Cineálacha Plandaí,