(1)

Le hAirteagal 20(1) de Rialachán (CE) Uimh. 1/2005 cuirtear de cheangal ar údaráis inniúla na mBallstát cigireacht a dhéanamh ar shoithí beostoic sula ndéanfar aon ainmhithe clóis a luchtú. Go háirithe, ní mór do na húdaráis inniúla a fhíorú go bhfuil soithí tógtha agus feistithe le haghaidh líon agus chineál na n-ainmhithe atá le hiompar agus go bhfuil an trealamh dá dtagraítear i gCaibidil IV d’Iarscríbhinn I a ghabhann leis an Rialachán sin fós in ord maith oibre.

(2)

Faoi láthair, déanann údaráis inniúla na mBallstát na deimhniúcháin maidir le formheas feithiclí beostoic a thaifeadadh ina mbunachair sonraí leictreonacha féin, bunachair nach bhfuil rochtain ag údaráis inniúla na mBallstát eile orthu. Cé nach féidir seiceáil dhoiciméadach a chur in ionad na cigireachta fisicí ar an soitheach féin, is féidir le scrúdú, mar chuid de rialú oifigiúil, ar na sonraí deimhniúcháin a choimeádtar i ndeimhniú um fhormheas an tsoithigh, roinnt faisnéise a sholáthar maidir leis an soitheach a bheith ag comhlíonadh cheanglais Chaibidil IV, Roinn 1, d’Iarscríbhinn I a ghabhann le Rialachán (CE) Uimh. 1/2005. Dá bhrí sin, má dhéantar na deimhnithe um fhormheas mar aon le haon sonraí deimhniúcháin a stóráil agus a uaslódáil i mbunachar sonraí leictreonach comhchoiteann, ba cheart do na húdaráis inniúla a bheith in ann rochtain a fháil ar an bhfaisnéis sin chun an t-ualach riaracháin a laghdú agus chun a gcuid oibre a éascú agus rialú oifigiúil á dhéanamh acu.

(3)

Sna mionsonraithe deimhniúcháin a thaifeadann údaráis inniúla na mBallstát sa bhunachar sonraí aonair, ba cheart dáta éaga na ndeimhnithe, faisnéis maidir leis an achar dromchla uasta atá ar fáil do na hainmhithe, agus na cineálacha ainmhithe is féidir leis na soithí a iompar a bheith ann. Leis sin, ba cheart do na húdaráis inniúla a dhéanann rialuithe oifigiúla a bheith in ann a mheas an bhfuil an formheas bailí tráth an rialaithe agus an bhfuil an soitheach oiriúnach chun na hainmhithe atá i gceist a iompar.

(4)

Le Rialachán (AE) 2017/625 ó Pharlaimint na hEorpa agus ón gComhairle (2), comhtháthaítear i gcreat reachtach aonair na rialacha is infheidhme maidir le rialuithe oifigiúla ar ainmhithe chun comhlíonadh reachtaíocht an Aontais maidir leis an slabhra agraibhia a fhíorú.

(5)

Faoi Airteagal 13(1) de Rialachán (AE) 2017/625 cuirtear de cheangal ar údaráis inniúla taifid a tharraingt suas, ar pháipéar nó i bhfoirm leictreonach, i gcás gach rialaithe oifigiúil a dhéantar. Liostaítear ann freisin an fhaisnéis atá le cur san áireamh sna taifid sin. Dá bhrí sin, maidir leis na cigireachtaí a cheanglaítear faoi Airteagal 20(1) de Rialachán (CE) Uimh. 1/2005 roimh eachainmhithe clóis agus ainmhithe clóis de speiceas buaibheach, caorach, gabhair nó mucach a luchtú ar shoithí beostoic, ba cheart iad sin a thaifeadadh.

(6)

Faoi Airteagal 9(1) de Rialachán (AE) 2017/625, cuirtear de cheangal ar údaráis inniúla rialuithe oifigiúla a dhéanamh, ag cur san áireamh, i measc nithe eile, stair na n-oibreoirí a mhéid a bhaineann le torthaí rialuithe oifigiúla agus é a bheith ag comhlíonadh rialacha an Aontais, lena n-áirítear Rialachán (CE) Uimh. 1/2005. Níl rochtain ag údaráis inniúla ar thoradh rialuithe oifigiúla a dhéanann údaráis inniúla na mBallstát eile. Tá gá leis na taifid sin, áfach, chun cinntí feasacha a dhéanamh agus cigireachtaí á ndéanamh chun críocha Airteagal 20(1) de Rialachán (CE) Uimh. 1/2005. Dá bhrí sin, chun Airteagal 20(1) de Rialachán (CE) Uimh. 1/2005 a chur chun feidhme go cuí, is gá bunachar sonraí leictreonach comhchoiteann a bhunú, ar bunachar sonraí é ina mbaileofar agus ina gcomhroinnfear sonraí dheimhnithe um fhormheas na soithí beostoic agus an toradh a bhí ar a stair chigireachta. Leis sin, ba cheart do na húdaráis inniúla a bheith in ann rochtain thapa a fháil ar an bhfaisnéis sin, an t-ualach riaracháin a laghdú agus a gcuid oibre a éascú agus rialú oifigiúil á dhéanamh acu.

(7)

De bhun Threoir 2009/16/CE ó Pharlaimint na hEorpa agus ón gComhairle (3), tá na Ballstáit uile a bhfuil calafoirt mhuirí acu chun cigireachtaí maidir le rialú Stáit ar chalafoirt a dhéanamh ar longa a thugann cuairt ar a gcalafoirt. Tá torthaí na gcigireachtaí maidir le rialú Stáit ar chalafoirt oibiachtúil agus infhíoraithe agus d’fhéadfaidís a bheith ábhartha do na cigireachtaí a cheanglaítear le hAirteagal 20(1) de Rialachán (CE) Uimh. 1/2005, amhail easnaimh a braitheadh a bhaineann le huiscedhíonacht, aeráil, snámhacht, nó trealamh comhraic dóiteáin. Dá bhrí sin, is gá torthaí ábhartha na gcigireachtaí maidir le rialú Stáit ar chalafoirt atá ar fáil go poiblí a áireamh sa bhunachar sonraí leictreonach comhchoiteann.

(8)

Tá sraith iniúchtaí déanta ag an gCoimisiún ar chórais rialaithe na mBallstát chun leas ainmhithe a chosaint le linn a n-iompair ar muir chuig tríú tíortha ar shoithí beostoic. Tar éis laigí a bhrath i gcórais rialuithe oifigiúla na mBallstát maidir le húdarú iompróirí farraige de thoradh na n-iniúchtaí sin, ba cheart do na húdaráis inniúla a áirithiú go ndéanfar na pleananna teagmhasacha arna gcur isteach ag iompróirí de bhun Airteagal 11(1), pointe (b)(iv), de Rialachán (CE) Uimh. 1/2005 a oiriúnú chun na príomhéigeandálaí a d’fhéadfadh a bheith rompu le linn an turais lena mbaineann a láimhseáil.

(9)

Chun am leordhóthanach a bheith aige chun measúnú a dhéanamh ar an bhfaisnéis atá sna doiciméid a fuarthas ó iarratasóir ar dheimhniú um fhormheas dá bhforáiltear in Airteagal 19(1) de Rialachán (CE) Uimh. 1/2005, chun ullmhú do chigireacht fhisiceach chríochnúil ar shoitheach beostoic agus chun a sheiceáil an gcomhlíonann soitheach beostoic na ceanglais maidir le deimhniú um fhormheas a dheonú, ba cheart don iarratasóir an t-iarratas ar fhormheas a chur faoi bhráid na n-údarás inniúil 20 lá ar a laghad roimh dháta na cigireachta ar an soitheach beostoic.

(10)

Ar bhonn na taithí atá acu ar ainmhithe a iompar ar shoithí beostoic, d’fhorbair saineolaithe na mBallstát, lena n-áirítear pointí teagmhála náisiúnta um ainmhithe a chosaint agus iad á n-iompar, doiciméad líonra in 2014 (4), chun treoraíocht a thabhairt maidir le rialuithe oifigiúla ar leas ainmhithe le linn a n-onnmhairiú ar shoithí beostoic, mar a cheanglaítear le Rialachán (CE) Uimh. 1/2005 (“an doiciméad líonra”). Tugadh na treoirlínte sa doiciméad líonra cothrom le dáta i mí Eanáir 2020 i bhfianaise na taithí a fuarthas agus an doiciméad líonra á chur i bhfeidhm agus iniúchtaí an Choimisiúin.

(11)

Is tréidlianna oifigiúla den chuid is mó iad na cigirí ó na húdaráis inniúla a dhéanann na cigireachtaí ar shoithí beostoic. Ní leor inniúlacht tréidliachta amháin chun seiceáil a dhéanamh ar fheidhmiú chórais mheicniúla agus bhainistíochta na soithí beostoic a bhféadfadh tionchar a bheith acu ar leas na n-ainmhithe atá á n-iompar. Mar a mholtar sa doiciméad líonra, na foirne a dhéanann cigireachtaí chun deimhniú um fhormheas a dheonú, dá bhforáiltear in Airteagal 19 de Rialachán (CE) Uimh. 1/2005, ba cheart do na foirne sin a bheith comhdhéanta de thréidlianna oifigiúla agus saineolaithe muirí ag a bhfuil an saineolas iomchuí ar na córais mheicniúla agus bhainistíochta sin agus taithí phraiticiúil ar oibriú soithí beostoic.

(12)

Ba cheart an formheas ar shoitheach beostoic dá bhforáiltear in Airteagal 19(1) de Rialachán (CE) Uimh. 1/2005 nó athnuachan an fhormheasa sin a bheith faoi réir torthaí cigireachta arna déanamh ag tréidlia oifigiúil ar bord ar an gcéad turas le coinsíneachtaí ainmhithe chun a sheiceáil nach bhfuil córais mheicniúla agus bhainistíochta an tsoithigh beostoic díobhálach do leas na n-ainmhithe atá ar bord le linn an turais.

(13)

Chun a áirithiú gur féidir ainmhithe a iompraítear ó Bhallstáit eile nó ar thurais fhada de bhóthar óna n-áit imeachta go dtí pointí imeachta ag calafoirt a dhíluchtú go sábháilte agus iad a bheathú, uisce a thabhairt dóibh agus scíth a thabhairt dóibh, ba cheart post rialaithe amháin ar a laghad dá dtagraítear in Airteagal 1(1) de Rialachán (CE) Uimh. 1255/97 ón gComhairle (5) a bheith ar fáil ag na pointí imeachta ag calafoirt, nó laistigh d’achar dhá uair an chloig de bhóthar ón bpointe imeachta lena mbaineann.

(14)

Chun gur féidir leis na Ballstáit an fhoireann agus na hacmhainní a leithdháileadh maidir leis na cúraimí agus na hoibleagáidí nua a leagtar síos sa Rialachán seo, chun oiriúnú rianúil do na rialacha nua a áirithiú, agus chun a áirithiú go mbeidh am leordhóthanach ag na Ballstáit poist rialaithe a thógáil ag pointí imeachta, más gá, ní bheidh feidhm ag Airteagal 10 den Rialachán seo maidir le tréidlia a bheith ar bord, ná ag Airteagal 11 den Rialachán seo maidir leis na poist rialaithe ag pointí imeachta ach ón 1 Eanáir 2024 ar aghaidh.

(15)

Na bearta dá bhforáiltear sa Rialachán seo, is bearta iad atá i gcomhréir leis an tuairim ón mBuanchoiste um Plandaí, Ainmhithe, Bia agus Beatha,