(1)

An 13 Samhain 2017, thug an Chomhairle údarú don Choimisiún agus d’Ardionadaí an Aontais do Ghnóthaí Eachtracha agus don Bheartas Slándála tús a chur le caibidlíocht leis an tSile maidir le comhaontú nuachóirithe leis an tSile chun teacht in ionad an Chomhaontaithe lena mbunaítear comhlachas idir an Comhphobal Eorpach agus a Bhallstáit, de pháirt, agus Poblacht na Sile, den pháirt eile (1) (‘an Comhaontú Comhlachais’).

(2)

An 9 Nollaig 2022, tugadh i gcrích an chaibidlíocht idir an tAontas agus an tSile go rathúil.

(3)

Leis an nuachóiriú ar an gComhaontú Comhlachais, déantar foráil maidir le dhá ionstraim dhlíthiúla chomhthreomhara. Is í an chéad ionstraim an Creat-Chomhaontú Ardleibhéil idir an tAontas Eorpach agus a Bhallstáit, de pháirt amháin, agus Poblacht na Sile, den pháirt eile (‘an Creat-Chomhaontú Ardleibhéil’), lena n-áirítear: an colún Polaitiúil agus Comhair, agus an colún Trádála agus Infheistíochta, lena n-áirítear forálacha cosanta infheistíochta. Is í an dara hionstraim an Comhaontú Eatramhach maidir le Trádáil idir an tAontas Eorpach agus Poblacht na Sile (‘an Comhaontú’), lena gcumhdaítear léirscaoileadh trádála agus infheistíochta. Scoirfidh an Comhaontú d’éifeacht a bheith aige agus a cuirfear an Creat-Chomhaontú Ardleibhéil ina ionad ar theacht i bhfeidhm don Chomhaontú sin.

(4)

Ba cheart an Comhaontú a shíniú thar ceann an Aontais, faoi réir a thabhairt i gcrích ar dháta níos déanaí agus ba cheart an Ráiteas Comhpháirteach maidir le Trádáil agus Forbairt Inbhuanaithe atá sa Chomhaontú Eatramhach maidir le Trádáil idir an tAontas Eorpach agus Poblacht na Sile (‘an Ráiteas Comhpháirteach’) atá i gceangal leis an gComhaontú a fhormheas thar ceann an Aontais,