(1)

Le Cinneadh Uimh. 1313/2013/AE ó Pharlaimint na hEorpa agus ón gComhairle (2), sainítear creat dlíthiúil rescEU. Is é is aidhm do rescEU cúnamh a sholáthar i gcásanna treascracha nach féidir freagairt éifeachtach a áirithiú leis na hacmhainneachtaí foriomlána atá ann cheana ar an leibhéal náisiúnta ná leo siúd a gheall na Ballstáit roimh ré don Díorma Eorpach um Chosaint Shibhialta.

(2)

Agus teochtaí ag ardú mar aon le tréimhsí fada triomaigh, tá an baol falscaithe san Aontas ag dul i méid agus tá na falscaithe ag tarlú níos minice agus iad níos déine. Tá infhaighteacht theoranta acmhainneachtaí freagartha speisialaithe, lena n-áirítear acmhainneachtaí amfaibiacha aerchomhraic na ndóiteán foraoise, fós ina hábhar mór imní agus is í príomhdhúshlán oibríochtúil an Aontais í agus é ag tabhairt aghaidh ar fhalscaithe comhuaineacha.

(3)

I bhfianaise na solúbthachta is gá a tugadh leis an idirthréimhse dá bhforáiltear le Cinneadh Uimh. 1313/2013/AE chun aistriú rianúil i dtreo chur chun feidhme iomlán rescEU a áirithiú, tá sé ríthábhachtach síneadh a chur leis an idirthréimhse sin go dtí an 31 Nollaig 2027 chun a áirithiú gur féidir leis an Aontas acmhainneachtaí aeir rescEU breise a dhaingniú faoi Shásra an Aontais um Chosaint Shibhialta fad atá flít buan aerchomhraic dóiteán foraoise na hEorpa á bhunú de réir a chéile.

(4)

Ós rud é nach féidir leis na Ballstáit cuspóir an Chinnidh seo, eadhon a áirithiú gur féidir leis an Aontas leanúint de thacaíocht a thabhairt do na Ballstáit chun falscaithe a chomhrac go dtí go mbeidh flít aerchomhraic dóiteán foraoise de chuid na hEorpa bunaithe, a ghnóthú go leordhóthanach agus, de bharr a fhairsinge agus a éifeachtaí, gur fearr is féidir é a ghnóthú ar leibhéal an Aontais, féadfaidh an tAontas bearta a ghlacadh, i gcomhréir le prionsabal na coimhdeachta a leagtar amach in Airteagal 5 den Chonradh ar an Aontas Eorpach. I gcomhréir le prionsabal na comhréireachta a leagtar amach san Airteagal sin, ní théann an Cinneadh seo thar a bhfuil riachtanach chun an cuspóir sin a ghnóthú.

(5)

Ba cheart, dá bhrí sin, Cinneadh Uimh 1313/2013/AE a leasú dá réir,