(1)

Le Cinneadh (AE) 2017/1324 ó Pharlaimint na hEorpa agus ón gComhairle (1), leagtar síos na téarmaí agus na coinníollacha maidir le rannpháirtíocht na mBallstát agus na dtríú tíortha (‘na Stáit Rannpháirteacha’) sa Chomhpháirtíocht maidir le Taighde agus Nuálaíocht i Limistéar na Meánmhara (PRIMA), go háirithe a n-oibleagáidí airgeadais agus a rannpháirtíocht i struchtúir rialaithe PRIMA.

(2)

Le Rialachán (AE) Uimh. 1291/2013 ó Pharlaimint na hEorpa agus ón gComhairle (2) bunaíodh an Clár Réime um Thaighde agus um Nuálaíocht (2014-2020) (‘Fís 2020’). Cistítear ranníocaíocht airgeadais an Aontais le PRIMA ó na leithreasuithe i mbuiséad ginearálta an Aontais a leithdháiltear ar na codanna ábhartha den chlár sonrach lena gcuirtear Fís 2020 chun feidhme a bunaíodh le Cinneadh 2013/743/AE ón gComhairle (3).

(3)

Chomhaontaigh 19 dtír tabhairt faoi PRIMA go comhpháirteach trí ranníocaíochtaí airgeadais a ghealladh, eadhon an Chróit, an Chipir, an Fhrainc, an Ghearmáin, an Ghréig, an Iodáil, Lucsamburg, Málta, an Phortaingéil, an tSlóivéin agus an Spáinn; tríú tíortha atá comhlachaithe le Fís 2020, eadhon Iosrael, an Túinéis agus an Tuirc; agus tríú tíortha nach bhfuil comhlachaithe le Fís 2020, eadhon an Ailgéir, an Éigipt, an Iordáin, an Liobáin agus Maracó.

(4)

Faoi Chinneadh (AE) 2017/1324, tá na cearta agus na hoibleagáidí céanna le bheith ag gach Stát Rannpháirteach. Faoi Airteagal 1(2) de Chinneadh (AE) 2017/1324, tá an Ailgéir, an Éigipt, an Iordáin, an Liobáin agus Maracó le teacht chun bheith ina Stáit Rannpháirteacha faoi réir comhaontuithe idirnáisiúnta le haghaidh comhar eolaíoch agus teicneolaíoch a thabhairt i gcrích leis an Aontas ina leagfar amach na téarmaí agus na coinníollacha dá rannpháirtíocht in PRIMA.

(5)

Na Comhaontuithe le haghaidh comhar eolaíochta agus teicneolaíochta idir an tAontas agus an Ailgéir (4), an Éigipt (5), an Iordáin (6), an Liobáin (7) agus Maracó (8), faoi seach, ina leagtar amach na téarmaí agus na coinníollacha dá rannpháirtíocht in PRIMA (‘na Comhaontuithe CET’), fanfaidh siad i bhfeidhm fad a bheidh Cinneadh (AE) 2017/1324 i bhfeidhm.

(6)

De bhun Airteagal 2 de na Comhaontuithe CET síníodh socruithe cur chun feidhme maidir le cúnamh frithpháirteach (‘na comhaontuithe cur chun feidhme’) idir an tAontas agus údaráis na hAilgéire, na hÉigipte, na hIordáine, na Liobáine agus Mharacó faoi seach,. Baineann na socruithe cur chun feidhme, go háirithe, le cur i bhfeidhm Airteagal 10(2) agus Airteagal 11(3) agus (4) de Chinneadh (AE) 2017/1324 maidir leis na gníomhaíochtaí indíreacha arna gcistiú ag an Aontas dá dtagraítear in Airteagal 6(1)(a) de Chinneadh (AE) 2017/1324.

(7)

Thíolaic an Coimisiún togra le haghaidh Cinneadh ó Pharlaimint na hEorpa agus ón gComhairle, lena leasaítear Cinneadh (AE) 2017/1324 a mhéid a bhaineann le leanúint de rannpháirtíocht an Aontais in PRIMA faoin gclár Fís Eorpach, a bhfuil sé d’aidhm aige síneadh a chur le ranníocaíocht airgeadais an Aontais le PRIMA, le haghaidh na tréimhse 2025-2027, ó leithreasuithe i mbuiséad ginearálta an Aontais a leithdháiltear ar na codanna ábhartha den Chlár Sonrach lena gcuirtear Fís Eorpach chun feidhme, mar a bhunaíodh le Cinneadh (AE) 2021/764 ón gComhairle (9).

(8)

Chuir an Ailgéir, an Éigipt, an Iordáin, an Liobáin agus Maracó in iúl gur spéis leo leanúint de bheith rannpháirteach in PRIMA maidir le Fís Eorpach. Chun a áirithiú go leanfar dá rannpháirtíocht ar comhchéim leis na Stáit Rannpháirteacha uile, tá an Ailgéir, an Éigipt, an Iordáin, an Liobáin agus an Maracó, nach bhfuil comhlachaithe le Fís Eorpach, le glacadh go foirmiúil leis na téarmaí agus na coinníollacha nua a leagtar amach le Cinneadh (AE) 2017/1324, trí chomhaontuithe trí mhalartú litreacha a thabhairt i gcrích leis an Aontas, lena leasaítear agus lena bhforlíontar na Comhaontuithe CET, lena n-áirítear na socruithe cur chun feidhme a síníodh de bhun Airteagal 2 de na Comhaontuithe CET.