(a)

Dearadh Samplála:

Agus a bplean samplála á dhearadh acu ar leibhéal an tseamlais le haghaidh ábhar ón gcaochán, cuirfidh na Ballstáit sonraíochtaí teicniúla an Údaráis Eorpaigh um Shábháilteacht Bia maidir le sampláil randamaithe san áireamh chun faireachán comhchuibhithe a dhéanamh ar fhrithsheasmhacht fhrithmhiocróbach i mbaictéir zónóiseacha agus chomhthíosacha (1).

Agus a bplean samplála á dhearadh acu ar leibhéal an tseamlais le haghaidh samplaí sróine ó mhuca lena ramhrú, cuirfidh na Ballstáit san áireamh sonraíochtaí teicniúla an Údaráis Eorpaigh um Shábháilteacht Bia maidir le suirbhé bunlíne ar leitheadúlacht Staphylococcus aureus fhrithsheasmhaigh in aghaidh meiticilline (MRSA) i muca (2).

Áiritheoidh na Ballstáit go ndéanfar sampláil shrathaithe chomhréireach ar shamplaí i seamlais ina bpróiseáiltear ar a laghad 60 % den daonra ainmhithe intíre sonrach sna Ballstáit lena ngabhann dáileadh cothrom le linn thréimhse faireacháin na samplaí a thógfar, agus, a mhéid is féidir, randamú na laethanta samplála gach mí. Tógfar na samplaí ó ainmhithe sláintiúla a shamplálfar ó aonaid eipidéimeolaíocha a roghnófar go randamach. Is í an ealta a bheidh san aonad eipidéimeolaíoch le haghaidh sicíní grísce agus turcaithe lena ramhrú. Is í baisc an mharaithe a bheidh san aonad eipidéimeolaíoch le haghaidh muca lena ramhrú agus bó-ainmhithe faoi bhun aon bhliain d’aois.

Ní thógfar ach sampla amháin ón gcaochán ón aonad eipidéimeolaíoch céanna in aghaidh na bliana. Tógfar gach sampla ón gcaochán ó chonablach amháin a roghnófar go randamach ón aonad eipidéimeolaíoch. Mar sin féin, i gcás sicíní grísce, tiocfaidh gach sampla ón gcaochán ó dheich gconablach a roghnófar go randamach ón aonad eipidéimeolaíoch.

Tógfar fiche sampla sróine in aghaidh na bliana ó fhiche muc difriúil a roghnófar go randamach ón aonad eipidéimeolaíoch céanna. Comhthiomsaítear na samplaí sin i gceithre ghrúpa ilchodacha de chúig shampla. Má tá níos lú ná fiche muc san aonad eipidéimeolaíoch, samplálfar muca uile an aonaid eipidéimeolaíoch sin, agus comhthiomsófar na samplaí a thagann as sin chomh cothrom agus is féidir chun na ceithre ghrúpa ilchodacha de shamplaí a chruthú. Tógfar na samplaí tar éis stiúdadh na muc ach roimh scalladh na gconablach.

Beidh an líon samplaí a bhailítear in aghaidh an tseamlais comhréireach le tréchur gach seamlais a chumhdaítear leis an bplean samplála.

(b)

Méid samplála:

Chun tástáil ar shoghabhálacht frithmhiocróbán a dhéanamh ar an líon íosta aonraíoch baictéarach dá dtagraítear i bpointe 4.1, tógfaidh na Ballstáit líon leordhóthanach samplaí dá dtagraítear i bpointe 1(a)(ii) agus (iii), pointe 1(b) agus pointe 1(c)(i) go (iv) gach bliain trí leitheadúlacht mheasta na speiceas baictéarach a ndéantar faireachán orthu sa daonra ainmhíoch faoi bhreathnú a chur san áireamh.

De mhaolú ar an gcéad mhír den phointe seo, i gcás inarb eol go bhfuil leitheadúlacht an speicis bhaictéaraigh a ndéantar faireachán air níos lú nó cothrom le 30 % sa daonra ainmhithe faoi bhreathnú nó i gcás nach eol an leitheadúlacht sin sa chéad bhliain den fhaireachán nó nuair nach bhfuil an líon aonad eipidéimeolaíoch atá ar fáil le haghaidh samplála leordhóthanach chun athshampláil na n-aonad céanna a chosc, féadfaidh na Ballstáit a chinneadh gan ach 300 sampla a thógáil gach bliain. Is féidir an uimhir bhliantúil sin a laghdú a thuilleadh go dtí 150 le haghaidh gach teaglama sonraí d’aonraígh bhaictéaracha/daonraí ainmhithe i gcás ina dtáirgeann na Ballstáit níos lú ná 100 000 tona d’fheoil sicíní grísce, níos lú ná 100 000 tona d’fheoil turcaí, níos lú ná 100 000 tona de mhuiceoil nó níos lú ná 50 000 tona de mhairteoil ar bhonn náisiúnta in aghaidh na bliana. Na Ballstáit atá ag baint úsáid as an bhféidearthacht teorainn a chur leis an líon bliantúil samplaí, bunóidh siad a gcinneadh ar fhianaise dhoiciméadaithe, amhail torthaí suirbhéanna, agus cuirfidh siad an fhianaise sin faoi bhráid an Choimisiúin sula gcuirfidh siad an tsampláil laghdaithe chun feidhme den chéad uair.

Tógfaidh na Ballstáit ar a laghad 300 sampla in aghaidh na bliana ó gach daonra ainmhithe dá dtagraítear i bpointí 1(d)(i) go dtí (iv). De mhaolú ar an gceanglas sin, i gcás ina dtáirgeann na Ballstáit níos lú ná 100 000 tona d’fheoil sicíní grísce, níos lú ná 100 000 tona d’fheoil turcaí, níos lú ná 100 000 tona de mhuiceoil nó níos lú ná 50 000 tona de mhairteoil ar bhonn náisiúnta in aghaidh na bliana, féadfaidh siad a chinneadh íosmhéid 150 sampla a thógáil in ionad 300 sampla i gcás gach daonra ainmhithe shonraigh faoi bhreathnú.

Samplálfaidh na Ballstáit a ndóthain aonaid eipidéimeolaíocha gach bliain ón daonra ainmhithe dá dtagraítear i bpointe 1(f) chun meastachán cruinn a dhéanamh ar leitheadúlacht MRSA i ndaonra muc lena ramhrú an Bhallstáit. Chuige sin, úsáidfidh siad na foirmlí ríomha le haghaidh líon baisceanna an mharaithe atá le sampláil dá dtagraítear i sonraíochtaí teicniúla an Údaráis Eorpaigh um Shábháilteacht Bia maidir le suirbhé bonnlíne ar leitheadúlacht Staphylococcus aureus frithsheasmhaigh in aghaidh meiticilline (MRSA) i muca (3).’;