(1)

Foráiltear le hAirteagal 3(2) d’Ionstraim Aontachais 2003, maidir leis na forálacha de acquis Schengen nach dtagraítear dóibh in Airteagal 3(1) den Ionstraim sin, nach bhfuil feidhm le bheith ag na forálacha sin sa Chipir ach de bhun cinneadh ón gComhairle chuige sin, tar éis fíorú, i gcomhréir leis na nósanna imeachta meastóireachta Schengen is infheidhme, go bhfuil na coinníollacha riachtanacha chun gach cuid den acquis ábhartha a chur i bhfeidhm comhlíonta sa Chipir.

(2)

Leagtar amach na nósanna imeachta meastóireachta Schengen is infheidhme i Rialachán (AE) 2022/922 ón gComhairle (2), a cuireadh in ionad Rialachán (AE) Uimh. 1053/2013 ón gComhairle (3). Tá imthosca speisialta na Cipire, mar a aithnítear i bPrótacal Uimh. 10 d’Ionstraim Aontachais 2003 iad, le cur san áireamh i meastóireacht a dhéantar i gcomhréir leis na nósanna imeachta sin, áfach. Sa dearbhú faoina hullmhacht, d’athdhearbhaigh an Chipir go bhfuil sí tiomanta, a luaithe is a thabharfar meastóireacht den sórt sin chun críche, chun dul faoi meastóireachtaí rialta Schengen uirthi i ndáil leis na gnéithe de acquis Schengen a chuir an Chomhairle i bhfeidhm.

(3)

I mí na Samhna 2019, rinneadh meastóireacht Schengen sa Chipir maidir le cosaint sonraí, i gcomhréir leis na nósanna imeachta meastóireachta Schengen is infheidhme an tráth sin, a leagtar amach i Rialachán (AE) Uimh. 1053/2013. I dtuarascáil mheastóireachta a glacadh trí bhíthin Chinneadh Cur Chun Feidhme C(2020)8150 ón gCoimisiún i gcomhréir le hAirteagal 14(5) de Rialachán (AE) Uimh. 1053/2013, dearbhaíodh gur comhlíonadh sa Chipir na coinníollacha ba ghá chun acquis Schengen a chur i bhfeidhm maidir le cosaint sonraí.

(4)

I gcomhréir le hAirteagal 1(1) de Chinneadh Cur Chun Feidhme (AE) 2015/450 ón gCoimisiún (4), fíoraíodh, ó thaobh na teicneolaíochta de, go bhfuil córas náisiúnta na Cipire réidh lena chomhtháthú le Córas Faisnéise Schengen (CFS).

(5)

Toisc go bhfuil na socruithe teicniúla agus dlíthiúla is gá déanta ag an gCipir chun sonraí CFS a phróiseáil agus faisnéis bhreise a mhalartú, is féidir leis an gComhairle anois an dáta a shocrú óna mbeidh feidhm ag acquis Schengen a bhaineann le CFS sa Chipir.

(6)

Ba cheart go gceadófaí leis an gCinneadh seo sonraí CFS a aistriú go dtí an Chipir. Ba cheart go gcuirfeadh úsáid nithiúil na sonraí sin ar chumas an Choimisiúin a fhíorú go bhfuil na forálacha sin de chuid acquis Schengen a bhaineann le CFS á gcur i bhfeidhm i gceart sa Chipir. A luaithe a fhíoraítear go bhfuil na coinníollacha is gá chun gach cuid de acquis Schengen a chur i bhfeidhm comhlíonta sa Chipir, ba cheart don Chomhairle cinneadh a dhéanamh maidir le deireadh a chur le seiceálacha ag teorainneacha inmheánacha leis an gCipir.

(7)

Ba cheart don Chomhairle cinneadh ar leith a ghlacadh lena socraítear dáta chun deireadh a chur le seiceálacha ag teorainneacha inmheánacha leis an gCipir. Ba cheart srianta áirithe a fhorchur ar úsáid CFS sa Chipir go dtí an dáta sin.

(8)

Maidir leis an Íoslainn agus leis an Iorua, is é atá sa Chinneadh seo forbairt ar fhorálacha acquis Schengen de réir bhrí an Chomhaontaithe arna thabhairt i gcrích ag Comhairle an Aontais Eorpaigh agus Poblacht na hÍoslainne agus Ríocht na hIorua maidir le comhlachas an dá thír sin le acquis Schengen a chur chun feidhme, a chur i bhfeidhm agus a fhorbairt (5), ar forálacha iad a thagann faoi réim an réimse dá dtagraítear in Airteagal 1, pointe G, de Chinneadh 1999/437/CE ón gComhairle (6).

(9)

Maidir leis an Eilvéis, is é atá sa Chinneadh seo forbairt ar fhorálacha acquis Schengen de réir bhrí an Chomhaontaithe arna thabhairt i gcrích idir an tAontas Eorpach, an Comhphobal Eorpach agus Cónaidhm na hEilvéise maidir le comhlachas Chónaidhm na hEilvéise le acquis Schengen a chur chun feidhme, a chur i bhfeidhm agus a fhorbairt (7), ar forálacha iad a thagann faoi réim an réimse dá dtagraítear in Airteagal 1, pointe G, de Chinneadh 1999/437/CE, arna léamh i gcomhar le hAirteagal 3 de Chinneadh 2008/146/CE ón gComhairle (8) agus Airteagal 3 de Chinneadh 2008/149/CGB ón gComhairle (9).

(10)

Maidir le Lichtinstéin, is é atá sa Chinneadh seo forbairt ar fhorálacha acquis Schengen de réir bhrí an Phrótacail idir an tAontas Eorpach, an Comhphobal Eorpach, Cónaidhm na hEilvéise agus Prionsacht Lichtinstéin i ndáil le haontachas Phrionsacht Lichtinstéin leis an gComhaontú idir an tAontas Eorpach, an Comhphobal Eorpach agus Cónaidhm na hEilvéise maidir le comhlachas Chónaidhm na hEilvéise le acquis Schengen a chur chun feidhme, a chur i bhfeidhm agus a fhorbairt (10), ar forálacha iad a thagann faoi réim an réimse dá dtagraítear in Airteagal 1, pointe G, de Chinneadh 1999/437/CE ón gComhairle arna léamh i gcomhar le hAirteagal 3 de Chinneadh 2011/349/AE ón gComhairle (11) agus Airteagal 3 de Chinneadh 2011/350/AE ón gComhairle (12),