(1)

Le Rialachán (AE) 2018/842, bunaítear spriocanna ar leibhéal an Aontais agus ar an leibhéal náisiúnta chun na hastaíochtaí gás ceaptha teasa a laghdú faoi 2030 agus foráiltear maidir le cúlchiste sábháilteachta a bhunú ina mbeidh cainníocht dar luach suas le 105 mhilliún tona de choibhéis CO2, faoi réir sprioc fhoriomlán laghdaithe astaíochtaí an Aontais a bhaint amach. Beidh an cúlchiste sábháilteachta ar fáil, in imthosca áirithe, do na Ballstáit sin a raibh a nOlltáirgeacht Intíre (OTI) per capita le haghaidh 2013 faoi bhun mheán an Aontais agus a bhfuil a n-astaíochtaí gás ceaptha teasa carnacha ó 2013 go 2020 sna hearnálacha a chumhdaítear leis an Rialachán sin faoi bhun a leithdháiltí carnacha bliantúla astaíochtaí le haghaidh na mblianta céanna. Sa chéad bhabhta dáileacháin den Chúlchiste Sábháilteachta, ní fhéadfaidh gach Ballstát cáilitheach ach an méid leithdháiltí is coibhéis le 20 % den mhéid a chuaigh sé thar cuimse sa tréimhse ó 2013-2020 a fháil.

(2)

De bhun Rialachán (AE) 2018/842, tar éis an athbhreithnithe dá dtagraítear in Airteagal 19 de Rialachán (AE) Uimh. 525/2013 ó Pharlaimint na hEorpa agus ón gComhairle (2), tá an Coimisiún leis na méideanna dar luach 20 % den mhéid a chuathas thar cuimse foriomlán sa tréimhse ó 2013 go 2020 a fhoilsiú i gcás gach Ballstát a chomhlíonann an dá choinníoll a leagtar amach in Airteagal 11(2), pointí (a) agus (b), den Rialachán sin.

(3)

Tá an t-athbhreithniú, a cheanglaítear le hAirteagal 19 de Rialachán (AE) Uimh. 525/2013 curtha i gcrích ag an gCoimisiún, agus tá fardail astaíochtaí gás ceaptha teasa na mBallstát le haghaidh 2020 leagtha amach aige i gCinneadh Cur Chun Feidhme (AE) 2022/1953 ón gCoimisiún (3).

(4)

De réir sonraí a d’fhoilsigh Eurostat i mí Aibreáin 2016 (4), bhí OTI faoi bhun mheán an Aontais ag an mBulgáir, an tSeicia, an Eastóin, an Ghréig, an Spáinn, an Chróit, an Iodáil, an Chipir, an Laitvia, an Liotuáin, an Ungáir, Málta, an Pholainn, an Phortaingéil, an Rómáin, an tSlóivéin agus an tSlóvaic in 2013.

(5)

Tá luachanna na n-astaíochtaí gás ceaptha teasa agus leithdháiltí astaíochtaí gás ceaptha teasa na mBallstát le haghaidh gach bliain den tréimhse ó 2013 go 2020 le fáil i loga beartaíochta an Aontais Eorpaigh, ar loga é a bunaíodh de bhun Airteagal 20 de Threoir 2003/87/CE ó Pharlaimint na hEorpa agus ón gComhairle lena mbunaítear scéim um liúntais astaíochtaí gás ceaptha teasa a thrádáil laistigh den Aontas (5). Cé is moite de Mhálta, bhí astaíochtaí gás ceaptha teasa carnacha gach ceann de na Ballstáit a luaitear thuas le haghaidh na mblianta ó 2013 go 2020, sna hearnálacha a chumhdaítear le Rialachán (AE) 2018/842, faoi bhun leithdháiltí carnacha bliantúla astaíochtaí an Bhallstáit le haghaidh na mblianta sa tréimhse chéanna.

(6)

Ós rud é go gcomhlíonann an Bhulgáir, an tSeicia, an Eastóin, an Ghréig, an Spáinn, an Chróit, an Iodáil, an Chipir, an Laitvia, an Liotuáin, an Ungáir, an Pholainn, an Phortaingéil, an Rómáin, an tSlóivéin agus an tSlóvaic an dá choinníoll a leagtar amach in Airteagal 11(2), pointí (a) agus (b), de Rialachán (AE) 2018/842, ba cheart na méideanna dar luach 20 % den mhéid a chuathas thar cuimse foriomlán sa tréimhse sin a fhoilsiú i gcás gach ceann de na Ballstáit sin