(1)

An 24 Aibreán 2016, chuir DAKEM iarratas faoi bhráid na Gníomhaireachta Eorpaí Ceimiceán (“an Ghníomhaireacht”) i gcomhréir le hAirteagal 43(1) de Rialachán (AE) Uimh. 528/2012 le haghaidh údarú le haghaidh táirge bithicídeach aonair ar a dtugtar “Insecticide Textile Contact” de chineál táirge 18, mar a thuairiscítear in Iarscríbhinn V a ghabhann leis an Rialachán sin, agus thug sé deimhniú i scríbhinn gur chomhaontaigh údarás inniúil na Beilge meastóireacht a dhéanamh ar an iarratas. Rinneadh taifead den iarratas faoi chás-uimhir BC-JR023293-31 sa Chlár do Tháirgí Bithicídeacha.

(2)

Is í sármheitrin substaint ghníomhach “Insecticide Textile Contact”, ar substaint í a airítear sa liosta Aontais de shubstaintí gníomhacha formheasta dá dtagraítear in Airteagal 9(2) de Rialachán (AE) Uimh. 528/2012 i gcás chineál táirgí 18.

(3)

An 5 Nollaig 2019, i gcomhréir le hAirteagal 44(1) de Rialachán (AE) Uimh. 528/2012, chuir an t-údarás inniúil meastóireachta tuarascáil mheasúnaithe agus conclúidí a mheastóireachta faoi bhráid na Gníomhaireachta. Sular cuireadh faoi bhráid na Gníomhaireachta é, an 7 Deireadh Fómhair 2019, tugadh an deis do DAKEM barúlacha i scríbhinn a chur ar fáil maidir leis an tuarascáil mheasúnaithe agus na conclúidí, i gcomhréir le hAirteagal 44(1), an dara fomhír, de Rialachán (AE) Uimh. 528/2012. Thug an t-údarás inniúil meastóireachta aird chuí ar na barúlacha a fuarthas ó DAKEM agus a mheastóireacht á tabhairt chun críche aige. Le linn phróiseas foirmithe tuairimíochta na Gníomhaireachta maidir leis an tuarascáil mheasúnaithe sin, thug an t-údarás inniúil meastóireachta an tuarascáil sin cothrom le dáta agus, an 25 Bealtaine 2020, tugadh an deis do DAKEM barúlacha a thabhairt maidir leis an tuarascáil mheasúnaithe nuashonraithe agus an dréacht-tuairim ón nGníomhaireacht sular ghlac Coiste um Tháirgí Bithicídeacha na Gníomhaireachta an tuairim chríochnaitheach an 17 Meitheamh 2020.

(4)

An 2 Iúil 2020, chuir an Ghníomhaireacht a tuairim (2) faoi bhráid an Choimisiúin maidir leis an iarratas ar údarú ón Aontas “Insecticide Textile Contact” i gcomhréir le hAirteagal 44(3) de Rialachán (AE) Uimh. 528/2012. Is é conclúid na Gníomhaireachta sa tuairim sin nach gcomhlíonann an táirge bithicídeach “Insecticide Textile Contact” na coinníollacha a leagtar síos in Airteagal 19(1) de Rialachán (AE) Uimh. 528/2012.

(5)

De réir na tuairime ón nGníomhaireacht, meastar go n-eascraíonn rioscaí doghlactha i gcás úsáideoirí neamhghairmiúla as úsáid bheartaithe an táirge bhithicídigh “Insecticide Textile Contact”, is é sin le rá, i gcás daoine fásta a leathann an táirge agus i gcás an phobail i gcoitinne atá neamhchosanta ar na hearraí cóireáilte, agus rioscaí doghlactha i gcás an chomhshaoil, is e sin le rá, i gcás uisce dromchla agus dríodar, agus, dá bhrí sin, ní chomhlíonann an táirge na coinníollacha a leagtar síos in Airteagal 19(1) de Rialachán (AE) Uimh. 528/2012.

(6)

Aontaíonn an Coimisiún le tuairim na Gníomhaireachta agus measann sé nach gcomhlíonann “Insecticide Textile Contact” na coinníollacha a leagtar síos in Airteagal 19(1)(b), pointí (iii) agus (iv), de Rialachán (AE) Uimh. 528/2012. Dá bhrí sin, is iomchuí gan údarú Aontais a dheonú le haghaidh “Insecticide Textile Contact”.

(7)

Tá na bearta dá bhforáiltear sa Chinneadh seo i gcomhréir le tuairim an Bhuanchoiste um Tháirgí Bithicídeacha,