(1)

De bhun Airteagal 10 de Rialachán Cur Chun Feidhme (AE) 2019/317, tá na Ballstáit le pleananna feidhmíochta a tharraingt suas, ar an leibhéal náisiúnta nó ar leibhéal na mbloc feidhme aerspáis, agus ní mór spriocanna feidhmíochta ceangailteacha a bheith iontu i leith gach tréimhse tagartha den scéim feidhmíochta le haghaidh seirbhísí aerloingseoireachta agus feidhmeanna líonra aerloingseoireachta. Tá na spriocanna feidhmíochta sin le bheith comhsheasmhach leis na spriocanna uile-Aontais a ghlac an Coimisiún i leith na tréimhse tagartha lena mbaineann.

(2)

Leagadh síos spriocanna feidhmíochta uile-Aontais i leith an tríú tréimhse thagartha (“TT3”) i dtosach i gCinneadh Cur Chun Feidhme (AE) 2019/903 ón gCoimisiún (3). Maidir leis na spriocanna feidhmíochta uile-Aontais sin agus na dréachtphleananna feidhmíochta TT3 a chuir na Ballstáit isteach ina dhiaidh sin i mí Dheireadh Fómhair 2019, ós rud é go ndearnadh iad a tharraingt suas sular tharla ráig phaindéim COVID-19 i mí an Mhárta 2020, níor cuireadh san áireamh iontu an laghdú suntasach a tháinig ar an aerthrácht mar gheall ar na bearta a rinne na Ballstáit agus tríú tíortha chun an phaindéim a shrianadh.

(3)

Mar fhreagairt ar thionchar phaindéim COVID-19 ar sholáthar na seirbhísí aerloingseoireachta, leagadh amach bearta eisceachtúla i leith an tríú tréimhse thagartha, de mhaolú ar Rialachán (AE) 2019/317, i Rialachán Cur Chun Feidhme (AE) 2020/1627 ón gCoimisiún (4). An 2 Meitheamh 2021, ghlac an Coimisiún Cinneadh Cur Chun Feidhme (AE) 2021/891 (5) ón gCoimisiún lena leagtar síos spriocanna feidhmíochta ar fud an Aontais i leith TT3. Ar an mbonn sin, i mí Dheireadh Fómhair 2021 chuir na Ballstáit dréachtphleananna feidhmíochta faoi bhráid an Choimisiúin agus spriocanna áitiúla feidhmíochta athbhreithnithe iontu i leith TT3.

(4)

An 13 Aibreán 2022 ghlac an Coimisiún Cinneadh Cur Chun Feidhme (AE) 2022/728 ón gCoimisiún (6) a bhí dírithe chuig an mBeilg, an Ghearmáin, an Ghréig, an Fhrainc, an Chipir, an Laitvia, Lucsamburg, Málta, an Ísiltír, an Rómáin, agus an tSualainn. Leagadh amach sa Chinneadh sin, maidir leis an dréachtphlean feidhmíochta a bhunaigh Poblacht Chónaidhme na Gearmáine (“an Ghearmáin”), i gcomhar leis an mBeilg, leis an bhFrainc, le Lucsamburg agus leis an Ísiltír (“dréachtphlean feidhmíochta FABEC”), go raibh na spriocanna feidhmíochta costéifeachtúlachta faoi bhealach i leith limistéar muirearaithe na Beilge agus Lucsamburg ar neamhréir leis na spriocanna feidhmíochta uile-Aontais, agus eisíodh moltaí ann maidir le hathbhreithniú a dhéanamh ar na spriocanna sin. Ní raibh aon toradh i gCinneadh Cur Chun Feidhme (AE) 2022/728 maidir leis na spriocanna feidhmíochta is infheidhme i leith seirbhísí aerloingseoireachta a sholáthraítear in aerspás na Gearmáine.

(5)

Mar fhreagairt ar chogadh foghach na Rúise i gcoinne na hÚcráine, a thosaigh an 24 Feabhra 2022, tá bearta sriantacha forchurtha ag an Aontas lena gcuirtear toirmeasc ar aeriompróirí na Rúise, ar aon aerárthach atá cláraithe sa Rúis agus ar aon aerárthach nach bhfuil cláraithe sa Rúis ach atá faoi úinéireacht nó atá cairtfhostaithe, nó faoi rialú ar shlí eile, ag aon duine nádúrtha nó dlítheanach Rúiseach nó ag aon eintiteas nó comhlacht Rúiseach tuirlingt nó éirí de thalamh i gcríoch an Aontais nó eitilt thairsti. Mar thoradh ar na bearta sriantacha sin agus ar na frithbhearta a ghlac an Rúis, tháinig athruithe ar an aerthrácht in aerspás na hEorpa. Rinne an laghdú mór ar líon na dtraseitiltí san aerspás atá faoi chúram Ballstát áirithe difear an-mhór do na Ballstáit sin. Mar sin féin, ar an leibhéal uile-Aontais, ní fhacthas ach tionchar teoranta ó na bearta sin ar líon na n-eitiltí, rud atá i gcodarsnacht leis an laghdú géar a tháinig ar an aerthrácht ar fud na hEorpa mar gheall ar ráig phaindéim COVID-19.

(6)

An 13 Iúil 2022, chuir an Ghearmáin, i gcomhar leis an mBeilg, leis an bhFrainc, le Lucsamburg, agus leis an Ísiltír, dréachtphlean feidhmíochta FABEC athbhreithnithe i leith TT3 faoi bhráid an Choimisiúin.

(7)

An 24 Deireadh Fómhair 2022 chinn an Coimisiún gurbh ann fós d’ábhar amhrais maidir leis na spriocanna feidhmíochta costéifeachtúlachta athbhreithnithe a bhí beartaithe le haghaidh limistéar muirearaithe faoi bhealach na Beilge agus Lucsamburg, a mhéid a bhaineann lena gcomhsheasmhacht leis na spriocanna feidhmíochta uile-Aontais. Dá bhrí sin, chuir an Coimisiún tús leis an mionscrúdú i gcomhréir le hAirteagal 15(3) de Rialachán Cur Chun Feidhme (AE) 2019/317 i leith na spriocanna feidhmíochta sin a leagadh amach sa dhréachtphlean feidhmíochta FABEC athbhreithnithe a cuireadh faoina bhráid an 13 Iúil 2022. Thug an Coimisiún fógra faoin méid sin don Bheilg, don Ghearmáin, don Fhrainc, do Lucsamburg agus don Ísiltír le Cinneadh (AE) 2022/2255 uaidh (7).

(8)

An 3 Samhain 2022 chuir an Ghearmáin an Coimisiún ar an eolas gur tharraing sí siar ón dréachtphlean feidhmíochta FABEC athbhreithnithe, agus chuir dréachtphlean feidhmíochta athbhreithnithe i leith an tríú tréimhse thagartha, arna bhunú ar an leibhéal náisiúnta (an “dréachtphlean feidhmíochta náisiúnta athbhreithnithe”), faoi bhráid an Choimisiúin. Sa dréachtphlean feidhmíochta náisiúnta athbhreithnithe coinnítear na spriocanna feidhmíochta le haghaidh seirbhísí aerloingseoireachta a sholáthraítear in aerspás na Gearmáine ar an leibhéal a socraíodh sa dréachtphlean feidhmíochta FABEC athbhreithnithe a cuireadh isteach an 13 Iúil 2022. Is amhlaidh nárbh ann d’aon tairbhe feidhmíochta ná sineirge bhreise le haghaidh na Gearmáine de bhua an dréachtphlean feidhmíochta FABEC athbhreithnithe. Sa dréachtphlean feidhmíochta náisiúnta athbhreithnithe ní liostaítear aon tionchar diúltach de thoradh deireadh a chur leis na gníomhaíochtaí pleanála feidhmíochta agus socraithe spriocanna ar leibhéal FABEC.

(9)

An comhlacht athbhreithnithe feidhmíochta, a thugann cúnamh don Choimisiún maidir le cur chun feidhme na scéime feidhmíochta de bhun Airteagal 11(2) de Rialachán (CE) Uimh. 549/2004, chuir sé tuarascáil faoi bhráid an Choimisiúin ina leagtar amach a mheasúnú ar an dréachtphlean feidhmíochta náisiúnta athbhreithnithe.

(10)

I gcomhréir le hAirteagal 15(1) de Rialachán Cur Chun Feidhme (AE) 2019/317, rinne an Coimisiún measúnú, agus na himthosca áitiúla á gcur san áireamh aige, ar chomhsheasmhacht na spriocanna áitiúla feidhmíochta atá sa dréachtphlean feidhmíochta náisiúnta athbhreithnithe ar bhonn na gcritéar measúnaithe a leagtar síos i bpointe 1 d’Iarscríbhinn IV a ghabhann leis an Rialachán sin. I ndáil le gach príomhréimse feidhmíochta agus leis na spriocanna feidhmíochta gaolmhara, rinne an Coimisiún an measúnú a chomhlánú trí athbhreithniú a dhéanamh ar na heilimintí a leagtar amach i bpointe 2 d’Iarscríbhinn IV a ghabhann le Rialachán Cur Chun Feidhme (AE) 2019/317.

(11)

I réamhaisnéis tráchta bhonnlíne Sheirbhís Staidrimh agus Réamhaisnéise Eurocontrol (“STATFOR”) a foilsíodh i mí an Mheithimh 2022 cuirtear san áireamh an t-athrú ar na himthosca i ndáil leis an aerthrácht san aerspás Eorpach de dheasca chogadh foghach na Rúise i gcoinne na hÚcráine. Ar bhonn na réamhaisnéise sin, tugann an Coimisiún dá aire go meastar nach rachaidh mórathruithe ar shreabha aerthráchta i bhfeidhm ar an nGearmáin i gcaitheamh TT3 mar thoradh ar chogadh foghach na Rúise i gcoinne na hÚcráine. Dá bhrí sin, an t-athrú sin ar na himthosca, níl tionchar díreach aige ar na spriocanna feidhmíochta atá sa dréachtphlean feidhmíochta náisiúnta athbhreithnithe ná ar mheasúnú an Choimisiúin ar na spriocanna sin i leith a gcomhsheasmhachta leis na spriocanna feidhmíochta uile-Aontais.

(12)

Aontaíonn an Ghearmáin go heisceachtúil lena cearta de bhun Airteagal 342 den Chonradh ar Fheidhmiú an Aontais Eorpaigh, i gcomhar le hAirteagal 3 de Rialachán 1/1958 (8), a tharscaoileadh agus go nglacfar an Cinneadh seo, agus go dtabharfar fógra faoi, as Béarla.

(13)

Maidir le príomhréimse feidhmíochta na sábháilteachta, rinne an Coimisiún measúnú ar chomhsheasmhacht na spriocanna atá sa dréachtphlean feidhmíochta náisiúnta athbhreithnithe arna chur faoina bhráid ag an nGearmáin maidir lena héifeachtaí a dhéanann soláthraithe na seirbhísí aerloingseoireachta bainistíocht ar an tsábháilteacht, i gcomhréir le pointe 1.1 d’Iarscríbhinn IV a ghabhann le Rialachán Cur Chun Feidhme (AE) 2019/317.

(14)

Is iad seo a leanas na spriocanna áitiúla feidhmíochta sábháilteachta a mholann an Ghearmáin i leith éifeachtacht na bainistíochta sábháilteachta, arna miondealú de réir na gcuspóirí bainistíochta sábháilteachta agus arna sloinneadh mar leibhéal cur chun feidhme:

(15)

Na spriocanna feidhmíochta sábháilteachta a mholann an Ghearmáin i leith an tsoláthraí seirbhísí aerloingseoireachta, mar atá, Deutsche Flugsicherung (“DFS”), tá siad comhsheasmhach leis na spriocanna feidhmíochta uile-Aontais.

(16)

Tugann an Coimisiún dá aire go leagtar amach, sa dréachtphlean feidhmíochta náisiúnta athbhreithnithe, bearta le haghaidh DFS chun na spriocanna áitiúla sábháilteachta a bhaint amach, amhail suirbhéanna agus feachtais thráthrialta maidir le cultúr na sábháilteachta, nuashonruithe tráthrialta ar phlean sábháilteachta an tsoláthraí seirbhísí aerloingseoireachta, agus próiseas tiomnaithe um bainistiú athruithe.

(17)

Dá bhrí sin, i bhfianaise aithrisí 14, 15 agus 16, agus ós rud é go bhfuil na spriocanna feidhmíochta sábháilteachta a leagtar amach i gCinneadh Cur Chun Feidhme (AE) 2021/891 le baint amach faoi bhliain deiridh an tríú tréimhse thagartha, eadhon 2024, ba cheart a mheas go bhfuil na spriocanna i leith phríomhréimse feidhmíochta na sábháilteachta atá sa dréachtphlean feidhmíochta náisiúnta athbhreithnithe comhsheasmhach leis na spriocanna feidhmíochta uile-Aontais.

(18)

Maidir le príomhréimse feidhmíochta an chomhshaoil, rinneadh measúnú ar chomhsheasmhacht na spriocanna a chuir an Ghearmáin isteach maidir le meánéifeachtúlacht chothrománach eitilte faoi bhealach an ruthaig eitilte iarbhír, i gcomhréir le pointe 1.2 d’Iarscríbhinn IV a ghabhann le Rialachán Cur Chun Feidhme (AE) 2019/317. Dá réir sin, cuireadh na spriocanna a moladh sa dréachtphlean feidhmíochta náisiúnta athbhreithnithe i gcomparáid leis na luachanna tagartha ábhartha le haghaidh éifeachtúlacht chothrománach na heitilte faoi bhealach a leagtar amach i bplean feabhsúcháin líonra aerbhealaí na hEorpa a bhí ar fáil an 2 Meitheamh 2021, an dáta a glacadh na spriocanna feidhmíochta athbhreithnithe uile-Aontais i leith TT3.

(19)

I gcás na bliana 2020, ní dhearnadh athbhreithniú le Cinneadh Cur Chun Feidhme (AE) 2021/891 ar an sprioc feidhmíochta uile-Aontais i leith TT3 i bpríomhréimse feidhmíochta an chomhshaoil, sprioc a leagadh amach i dtosach i gCinneadh Cur Chun Feidhme (AE) 2019/903 roimh ráig phaindéim COVID-19, toisc go raibh an tréimhse le haghaidh chur i bhfeidhm na sprice sin imithe in éag agus, dá bhrí sin, go raibh an sprioc curtha chun feidhme go críochnaitheach cheana, rud a d’fhág nárbh fhéidir coigeartuithe cúlghabhálacha a dhéanamh. Ar an mbealach céanna, ní féidir modhnú cúlghabhálach a dhéanamh sna dréachtphleananna feidhmíochta athbhreithnithe ar na spriocanna áitiúla feidhmíochta comhshaoil le haghaidh 2021 a shocraigh na Ballstáit sna dréachtphleananna feidhmíochta a cuireadh isteach i mí Dheireadh Fómhair 2021. Dá bhrí sin, an measúnú ar chomhsheasmhacht na spriocanna áitiúla feidhmíochta comhshaoil leis na spriocanna feidhmíochta uile-Aontais comhfhreagracha, ba cheart é a dhéanamh i leith 2022, 2023 agus 2024.

(20)

Is iad seo a leanas na spriocanna feidhmíochta i bpríomhréimse feidhmíochta an chomhshaoil a mholann an Ghearmáin, mar aon leis na luachanna tagartha náisiúnta comhfhreagracha i leith TT3 ó phlean feabhsúcháin líonra aerbhealaí na hEorpa, arna sloinneadh mar mheánéifeachtúlacht chothrománach eitilte faoi bhealach an ruthaig eitilte iarbhír:

(21)

Tugann an Coimisiún faoi deara gur comhionann na spriocanna comhshaoil a mholann an Ghearmáin leis na luachanna tagartha náisiúnta comhfhreagracha i gcás gach ceann de na blianta 2022, 2023 agus 2024.

(22)

Tugann an Coimisiún dá aire go bhfuil bearta éagsúla curtha i láthair ag an nGearmáin ina dréachtphlean feidhmíochta náisiúnta athbhreithnithe chun na spriocanna áitiúla comhshaoil a bhaint amach, lena n-áirítear oibríochtaí saorbhealaigh trasteorann le sé thír chomharsanacha agus srianta ar bhealaí a chealú mar aon le caidhpeanna ar na leibhéil eitilte. Iarrann an Coimisiún ar an nGearmáin, ina theannta sin, na bearta ar fad a moladh i bplean feabhsúcháin líonra aerbhealaí na hEorpa a chur chun feidhme chun na ruthaig faoi bhealach a fheabhsú.

(23)

Dá bhrí sin, i bhfianaise aithrisí 20, 21 agus 22, ba cheart a mheas go bhfuil na spriocanna i leith phríomhréimse feidhmíochta an chomhshaoil atá sa dréachtphlean feidhmíochta náisiúnta athbhreithnithe comhsheasmhach leis na spriocanna feidhmíochta uile-Aontais.

(24)

Maidir le príomhréimse feidhmíochta na hacmhainneachta, rinneadh measúnú ar chomhsheasmhacht na spriocanna a chuir an Ghearmáin isteach maidir leis an meánmhoill i mbainistíocht na sreibhe aerthráchta (“ATFM”) faoi bhealach in aghaidh na heitilte, i gcomhréir le pointe 1.3 d’Iarscríbhinn IV a ghabhann le Rialachán Cur Chun Feidhme (AE) 2019/317. Dá réir sin, cuireadh na spriocanna atá sa dréachtphlean feidhmíochta athbhreithnithe i gcomparáid leis na luachanna tagartha ábhartha a leagtar amach sa Phlean Oibríochtaí Líonra a bhí ar fáil an 2 Meitheamh 2021, an dáta a glacadh na spriocanna feidhmíochta athbhreithnithe uile-Aontais i leith TT3.

(25)

I gcás na bliana 2020, ní dhearnadh athbhreithniú le Cinneadh Cur Chun Feidhme (AE) 2021/891 ar an sprioc feidhmíochta uile-Aontais i leith TT3 i bpríomhréimse feidhmíochta na hacmhainneachta, sprioc a leagadh amach i dtosach i gCinneadh Cur Chun Feidhme (AE) 2019/903 roimh ráig phaindéim COVID-19, toisc go raibh an tréimhse le haghaidh chur i bhfeidhm na sprice sin imithe in éag agus, dá bhrí sin, go raibh an sprioc curtha chun feidhme go críochnaitheach cheana, rud a d’fhág nárbh fhéidir coigeartuithe cúlghabhálacha a dhéanamh. Ar an mbealach céanna, ní féidir modhnú cúlghabhálach a dhéanamh sna dréachtphleananna feidhmíochta athbhreithnithe ar na spriocanna áitiúla feidhmíochta acmhainneachta le haghaidh 2021 a shocraigh na Ballstáit sna dréachtphleananna feidhmíochta a cuireadh isteach i mí Dheireadh Fómhair 2021. Dá bhrí sin, an measúnú ar chomhsheasmhacht na spriocanna áitiúla feidhmíochta acmhainneachta leis na spriocanna feidhmíochta uile-Aontais comhfhreagracha, ba cheart é a dhéanamh i leith 2022, 2023 agus 2024.

(26)

Is iad seo a leanas na dréachtspriocanna acmhainneachta eitiltí faoi bhealach a mholann an Ghearmáin i leith TT3, arna sloinneadh i nóiméid moille ATFM in aghaidh na heitilte, mar aon leis na luachanna tagartha comhfhreagracha ón bPlean Oibríochtaí Líonra:

(27)

Tugann an Coimisiún faoi deara gur comhionann na spriocanna acmhainneachta a mholann an Ghearmáin leis na luachanna tagartha náisiúnta comhfhreagracha i gcás gach ceann de na blianta 2022, 2023 agus 2024.

(28)

Tugann an Coimisiún dá aire go bhfuil bearta curtha i láthair ag an nGearmáin sa dréachtphlean feidhmíochta náisiúnta athbhreithnithe chun na spriocanna áitiúla acmhainneachta faoi bhealach a bhaint amach. Áirítear ar na bearta sin uasghrádú teicniúil ar an gcóras bainistíochta aerthráchta, athstruchtúrú an aerspáis, comhordú sibhialta-míleata feabhsaithe, méadú ar líon na rialtóirí aerthráchta de réir coibhéis lánaimseartha, uainchláir níos solúbtha le haghaidh rialú an aerthráchta, agus tionscnaimh thrasteorann chun feabhas a chur ar an idir-inoibritheacht agus ar éifeachtúlachtaí oibríochtúla.

(29)

Dá bhrí sin, i bhfianaise aithrisí 26, 27 agus 28, ba cheart a mheas go bhfuil na spriocanna i leith phríomhréimse feidhmíochta na hacmhainneachta atá sa dréachtphlean feidhmíochta náisiúnta athbhreithnithe comhsheasmhach leis na spriocanna feidhmíochta uile-Aontais.

(30)

Maidir leis na haerfoirt a thagann faoi raon feidhme Rialachán Cur Chun Feidhme (AE) 2019/317 mar a leagtar amach in Airteagal 1(3) agus (4) den Rialachán sin, chomhlánaigh an Coimisiún a mheasúnú ar na spriocanna acmhainneachta i leith eitiltí faoi bhealach trí athbhreithniú a dhéanamh ar na spriocanna acmhainneachta le haghaidh seirbhísí aerloingseoireachta críochfoirt i gcomhréir le pointe 2.1(b) d’Iarscríbhinn IV a ghabhann le Rialachán Cur Chun Feidhme (AE) 2019/317. Fuarthas amach nach raibh aon údar imní sna spriocanna sin maidir leis an nGearmáin.

(31)

Rinne an Coimisiún measúnú ar chomhsheasmhacht na spriocanna costéifeachtúlachta a mholtar sa dréachtphlean feidhmíochta náisiúnta athbhreithnithe i gcomhréir le pointí 1.4(a), (b) agus (c) d’Iarscríbhinn IV a ghabhann le Rialachán Cur Chun Feidhme (AE) 2019/317.

(32)

Is iad seo a leanas na spriocanna costéifeachtúlachta faoi bhealach a mholann an Ghearmáin i leith TT3:

(33)

Maidir le pointe 1.4(a) d’Iarscríbhinn IV a ghabhann le Rialachán Cur Chun Feidhme (AE) 2019/317, tugann an Coimisiún faoi deara gur fearr treocht an chostais aonaid arna shuí (“CAAS”) ar leibhéal an limistéir muirearaithe, mar atá, -2,4 % le linn TT3, ná an treocht ar fud an Aontais, mar atá, +1,0 % le linn na tréimhse céanna.

(34)

Maidir le pointe 1.4(b) d’Iarscríbhinn IV a ghabhann le Rialachán Cur Chun Feidhme (AE) 2019/317, tugann an Coimisiún faoi deara gur fearr treocht fhadtéarmach an CAAS faoi bhealach ar leibhéal an limistéir muirearaithe le linn an dara tréimhse thagartha (“TT2”) agus TT3, mar atá, -3,8 %, ná an treocht fhadtéarmach uile-Aontais le linn na tréimhse céanna, mar atá, -1,3 %.

(35)

Maidir le pointe 1.4(c) d’Iarscríbhinn IV a ghabhann le Rialachán Cur Chun Feidhme (AE) 2019/317, tugann an Coimisiún faoi deara go bhfuil luach bonnlíne CAAS na Gearmáine, arna shloinneadh i bpraghsanna 2017 (“EUR2017”), mar atá, EUR 66,01, 13,2 % níos airde ná meánluach bonnlíne an ghrúpa comparáide ábhartha, mar atá, EUR 58,33 in EUR2017.

(36)

Is léir gur fearr i bhfad feidhmíocht na Gearmáine ná an treocht CAAS uile-Aontais i leith TT3 agus an treocht fhadtéarmach CAAS uile-Aontais araon. Thairis sin, tá CAAS na Gearmáine i leith 2024 níos ísle ná luachanna bonnlíne 2014 agus 2019, rud a léiríonn go bhfuil gnóthachain chostéifeachtúlachta éifeachtacha á mbaint amach sa mheántéarma agus san fhadtéarma. Dá bhrí sin, measann an Coimisiún, maidir leis an nGearmáin, nach bac é an difríocht dá dtagraítear in aithris (35) idir an luach bonnlíne agus meán an ghrúpa comparáide ar chomhsheasmhacht na spriocanna feidhmíochta costéifeachtúlachta leis na spriocanna feidhmíochta uile-Aontais i leith na costéifeachtúlachta.

(37)

Dá bhrí sin, i bhfianaise aithrisí 31 go 36, ba cheart a mheas go bhfuil na spriocanna i leith phríomhréimse feidhmíochta na costéifeachtúlachta atá sa dréachtphlean feidhmíochta náisiúnta athbhreithnithe comhsheasmhach leis na spriocanna feidhmíochta uile-Aontais.

(38)

Maidir leis na haerfoirt a thagann faoi raon feidhme Rialachán Cur Chun Feidhme (AE) 2019/317 mar a leagtar amach in Airteagal 1(3) agus (4) den Rialachán sin, chomhlánaigh an Coimisiún a mheasúnú ar na spriocanna costéifeachtúlachta i leith eitiltí faoi bhealach trí athbhreithniú a dhéanamh ar na spriocanna costéifeachtúlachta le haghaidh seirbhísí aerloingseoireachta críochfoirt i gcomhréir le pointe 2.1(c) d’Iarscríbhinn IV a ghabhann le Rialachán Cur Chun Feidhme (AE) 2019/317. Fuarthas amach nach raibh aon údar imní sna spriocanna sin maidir leis an nGearmáin.

(39)

I gcomhréir le pointe 2.1(f) d’Iarscríbhinn IV a ghabhann le Rialachán Cur Chun Feidhme (AE) 2019/317, chomhlánaigh an Coimisiún a mheasúnú ar na spriocanna acmhainneachta le hathbhreithniú ar na scéimeanna dreasachtaí dá dtagraítear in Airteagal 11 de Rialachán Cur Chun Feidhme (AE) 2019/317. I ndáil leis sin, scrúdaigh an Coimisiún an gcomhlíonann na scéimeanna dreasachta atá beartaithe na ceanglais shubstainteacha a leagtar amach in Airteagal 11(1) agus (3) de Rialachán Cur Chun Feidhme (AE) 2019/317.

(40)

Chinn an Coimisiún, i gCinneadh Cur Chun Feidhme (AE) 2022/728, go bhfuil an Ghearmáin le hathbhreithniú a dhéanamh ar a scéim dreasachtaí i gcomhair bhaint amach na spriocanna acmhainneachta faoi bhealach ionas go socrófar an t-uas-mhíbhuntáiste airgeadais a eascraíonn as an scéim dreasachtaí sin ar leibhéal ar a mbeadh tionchar ábhartha aige ar an ioncam atá i mbaol. Tugann an Coimisiún dá aire nach ndearna an Ghearmáin aon athrú ar a scéimeanna dreasachtaí le hais an dréachtphlean feidhmíochta FABEC a cuireadh isteach in 2021 agus an dréachtphlean feidhmíochta FABEC athbhreithnithe a cuireadh isteach an 13 Iúil 2022.

(41)

Dá bhrí sin, i bhfianaise aithris 40, cinneann an Coimisiún go bhfuil údar imní fós sa scéim dreasachtaí i leith na hacmhainneachta faoi bhealach a leagtar amach sa dréachtphlean feidhmíochta náisiúnta athbhreithnithe. Athdhearbhaíonn an Coimisiún a thuairim, dá bhrí sin, gur cheart don Ghearmáin, i dtaca le glacadh a phlean feidhmíochta chríochnaithigh i gcomhréir le hAirteagal 16, pointe (a) de Rialachán Cur Chun Feidhme (AE) 2019/317, athbhreithniú a dhéanamh ar a scéim dreasachtaí chun na spriocanna acmhainneachta faoi bhealach a bhaint amach sa chaoi go socrófar an t-uas-mhíbhuntáiste de bhun na scéime dreasachtaí sin ar leibhéal ar a mbeidh tionchar ábhartha aige ar an ioncam atá i mbaol, mar a cheanglaítear go sonrach le hAirteagal 11(3), pointe (a) de Rialachán Cur Chun Feidhme (AE) 2019/317, agus is é tuairim an Choimisiúin é gur cheart go socrófaí, mar thoradh air sin, an t-uas-mhíbhuntáiste airgeadais ar leibhéal ar chomhionann le 1 % de na costais arna suí nó arbh airde ná sin.

(42)

Ar bhonn a luaitear thuas, is é cinneadh an Choimisiúin é go bhfuil na spriocanna feidhmíochta atá sa dréachtphlean feidhmíochta a chuir an Ghearmáin isteach comhsheasmhach leis na spriocanna feidhmíochta uile-Aontais,