(1)

Cuirtear toirmeasc le Treoir 2014/40/AE ó Pharlaimint na hEorpa (2) agus ón gComhairle ar tháirgí tobac áirithe a chur ar an margadh (toitíní, tobac rollta agus táirgí tobac téite) a bhfuil sainbhlasanna orthu.

(2)

Leagtar síos le Rialachán Cur Chun Feidhme (AE) 2016/779 ón gCoimisiún (3) rialacha aonfhoirmeacha maidir leis na nósanna imeachta chun a chinneadh an bhfuil sainbhlas ar tháirge tobac.

(3)

I gcomhréir le Cinneadh Cur Chun Feidhme (AE) 2016/786, tá an painéal comhairleach neamhspleách (‘an painéal’) leis an modheolaíocht a shonrú chun measúnú teicniúil a dhéanamh ar tháirgí tobac a chuirfidh Ballstát nó an Coimisiún faoina bhráid chun tuairim a fháil i dtaobh an bhfuil sainbhlas orthu nó nach bhfuil (‘táirgí tástála’), agus, de réir mar is iomchuí, tabharfaidh sé cothrom le dáta í.

(4)

Le Cinneadh 2021/C 89 I/01 ón gCoimisiún (4) an 11 Márta 2021, d’fhormheas an Coimisiún modheolaíocht chun measúnú teicniúil a dhéanamh ar tháirgí tástála a chabhraíonn le táirgí tobac a bhfuil sainbhlas orthu a aithint, rud is infheidhme maidir le toitíní agus tobac rollta.

(5)

Tar éis ghlacadh Threoir Tharmligthe 2022/2100 (5) ón gCoimisiún lenar leasaíodh Airteagal 7(12) de Threoir 2014/40/AE chun na díolúintí a tharraingt siar ó na toirmisc ar tháirgí tobac a bhfuil sainbhlas orthu nó a bhfuil blastáin iontu in aon cheann dá gcomhchodanna a chur ar an margadh, amhail scagairí, páipéir, pacáistí, capsúil nó aon ghnéithe teicniúla lena gceadaítear modhnú a dhéanamh ar bholadh nó blas na dtáirgí tobac lena mbaineann nó ar a ndéine deataigh, i gcás táirgí tobac téite, nuashonraigh an painéal an mhodheolaíocht dá dtagraítear san Iarscríbhinn a ghabhann le Cinneadh 2021/C 89 I/01 ón gCoimisiún, lenar leathnaíodh a raon feidhme chuig táirgí tobac téite.

(6)

Dá bhrí sin, an 31 Lúnasa 2023 ghlac an painéal, tar éis nós imeachta i scríbhinn, dréacht-mhodheolaíocht nuashonraithe chun measúnú teicniúil a dhéanamh ar tháirgí tástála chun a chinneadh an bhfuil sainbhlas ar tháirgí tobac, dar teideal ‘Modheolaíocht chun tacú leis an gcinneadh an bhfuil sainbhlas ar tháirge tobac. Feidhm maidir le toitíní, tobac rollta agus táirgí tobac téite.’

(7)

I gcomhréir le hAirteagal 9(2) de Chinneadh Cur Chun Feidhme (AE) 2016/786, tá an mhodheolaíocht chun measúnú teicniúil a dhéanamh ar tháirgí tástála d’fhonn a chinneadh an bhfuil sainbhlas ar na táirgí tobac agus aon nuashonrú ina dhiaidh le cur faoi bhráid an Ard-Stiúrthóra lena formheas agus ní bheidh sí infheidhme go dtí go mbeidh an formheas sin tugtha.

(8)

A luaithe a fhormheasfar an mhodheolaíocht nuashonraithe, ba cheart Cinneadh 2021/C 89 I/01 ón gCoimisiún a aisghairm agus a ionadú dá réir sin,