(1)

Is iad Parlaimint na hEorpa agus an Chomhairle a cheapfaidh an Príomh-Ionchúisitheoir Eorpach as measc iarrthóirí arna roghnú ag an bpainéal roghnúcháin dá bhforáiltear in Airteagal 14(3) de Rialachán (AE) 2017/1939 (“an painéal roghnúcháin”). Is í an Chomhairle a cheapfaidh na hIonchúisitheoirí Eorpacha as measc triúr iarrthóirí cáilithe arna n-ainmniú ag gach Ballstát tar éis don Chomhairle tuairim réasúnaithe a fháil ón bpainéal roghnúcháin.

(2)

De bhun Airteagal 3 de Chinneadh Cur Chun Feidhme (AE) 2019/598 ón gComhairle (2), mairfidh téarma oifige na nIonchúisitheoirí Eorpacha ó ocht mBallstát, arna chinneadh trí chrannchur, 3 bliana agus ní fhéadfar é a athnuachan. Rachaidh téarma oifige na nIonchúisitheoirí Eorpacha sin in éag i mí Iúil 2023.

(3)

De bhun Airteagal 1 de Chinneadh (AE) 2018/1275 ón gComhairle (3), chuaigh sainordú chomhaltaí reatha an phainéil roghnúcháin in éag an 9 Deireadh Fómhair 2022,. Dá bhrí sin, ba cheart comhaltaí nua a cheapadh.

(4)

De bhun Airteagal 14(3) de Rialachán (AE) 2017/1939, is 12 dhuine a bheidh ar an bpainéal roghnúcháin, daoine a roghnófar as measc iarchomhaltaí na Cúirte Breithiúnais agus na Cúirte Iniúchóirí, iarchomhaltaí náisiúnta Eurojust, comhaltaí na gcúirteanna uachtaracha náisiúnta, ionchúisitheoirí ardleibhéil agus dlíodóirí a bhfuil inniúlacht aitheanta acu.

(5)

Duine amháin de chomhaltaí an phainéil roghnúcháin, ní mór é a bheith molta ag Parlaimint na hEorpa. An 7 Meitheamh 2022, d’ainmnigh Parlaimint na hEorpa Margreet FRÖBERG mar chomhalta an phainéil roghnúcháin atá le moladh aici.

(6)

Chuir an Coimisiún san áireamh, maidir le comhaltas an phainéil roghnúcháin, an gá atá le cothromaíocht gheografach, cothromaíocht inscne agus ionadaíocht chuí ar chórais dlí na mBallstát atá rannpháirteach sa chomhar feabhsaithe maidir le OIPE a bhunú.

(7)

I measc an 11 duine a mhol an Coimisiún, tá iarchomhalta amháin den Chúirt Bhreithiúnais, iarchomhalta amháin den Chúirt Iniúchóirí, iarchomhalta náisiúnta amháin de Eurojust, seisear ionchúisitheoirí ardleibhéil agus beirt chomhaltaí ó chúirteanna uachtaracha náisiúnta, agus tá seisear fear agus cúigear ban ina measc.

(8)

Ba cheart, dá bhrí sin, comhaltaí an phainéil roghnúcháin a cheapadh,

Jean-François BOHNERT

Vítor Manuel DA SILVA CALDEIRA

Peter FRANK

Margreet FRÖBERG

Ulrike HABERL-SCHWARZ

María Ángeles GARRIDO LORENZO

Saale LAOS

Ján MAZÁK

Marin MRČELA

Lorenzo SALAZAR

Martine SOLOVIEFF

Tuire TAMMINIEMI.