(1)

Le Rialachán (CE) Uimh. 1881/2006 ón gCoimisiún (2) socraítear uasleibhéil le haghaidh éilleáin áirithe, lena n-áirítear dé-ocsainí agus défheinilí polaclóirínithe (PCBanna) de chineál dé-ocsaine, in earraí bia.

(2)

In 2018 ghlac an tÚdarás Eorpach um Shábháilteacht Bia (“an tÚdarás”) tuairim eolaíoch maidir leis na rioscaí a d’fhéadfadh a bheith i gceist do shláinte ainmhithe agus do shláinte an phobail de bharr láithreacht dé-ocsainí agus PCBanna de chineál dé-ocsaine i mbeatha agus i mbia (3). Bhunaigh an tÚdarás iontógáil sheachtainiúil infhulaingthe de 2 pg TEQ (coibhéis thocsaineach)/kg de mheáchan coirp in aghaidh na seachtaine le haghaidh shuim na ndé-ocsainí agus na PCBanna de chineál dé-ocsaine. Tugtar le fios le meastacháin maidir le nochtadh cothúcháin ainsealach an duine do dhé-ocsainí agus PCBanna de chineál dé-ocsaine, meastacháin atá bunaithe ar na sonraí tarluithe atá ar fáil, go bhfuil daoine i ngach aoisghrúpa ag déanamh sárú nach beag ar an iontógáil sheachtainiúil infhulaingthe.

(3)

Ina thuairim eolaíoch, mhol an tÚdarás go ndéanfaí athmheastóireacht ar TEFanna (Fachtóirí Tocsaineachta Coibhéisí) EDS2005 atá i bhfeidhm faoi láthair chun sonraí nua in vivo agus in vitro a chur san áireamh, go háirithe, a mhéid a bhaineann le PCB-126.

(4)

Faoi láthair, tá an Eagraíocht Dhomhanda Sláinte (EDS) ag déanamh athbhreithniú ar luachanna TEF EDS2005, agus tá coinne leis go dtabharfar an t-athbhreithniú sin chun críche in 2023.

(5)

Go dtí go dtabharfar an t-athbhreithniú sin chun críche agus chun foráil a dhéanamh maidir le hardleibhéal cosanta do shláinte an duine idir an dá linn, is iomchuí uasleibhéil a leagan síos i gcás dé-ocsainí agus shuim na ndé-ocsainí agus na PCBanna de chineál dé-ocsaine le haghaidh earraí bia nach gcumhdaítear go fóill le reachtaíocht an Aontais agus a bhfuil sonraí tarluithe curtha ar fáil ina leith le déanaí i mbunachar sonraí an Údaráis, amhail feoil agus táirgí feola ó ainmhithe den chineál gabhair, ó chapaill, ó choiníní, ó thoirc, ó éanlaith géim agus fiafheoil agus an t-ae ó ainmhithe den chineál gabhair, ó chapaill agus ó éanlaith géim, agus an t-uasleibhéal atá ann cheana le haghaidh uibheacha ó chearca a leathnú chun uibheacha na héanlaithe clóis uile a chumhdach seachas uibheacha gé.

(6)

Thairis sin, ós rud é nach n-itear feoil matáin ó ghéagáin portán agus crústach portáin amháin ach go n-itear feoil matáin ó bholg na gcrústach sin freisin, ón bportán miotógach go háirithe, is iomchuí go mbeidh feidhm ag na huasleibhéil maidir le feoil matáin ó bholg na gcrústach sin freisin.

(7)

Anuas air sin, agus na sonraí tarluithe atá ar fáil agus an tábhacht a bhaineann le hardleibhéal cosanta do shláinte an duine a áirithiú, go háirithe maidir le grúpaí leochaileacha den daonra, is iomchuí na huasleibhéil a laghdú cheana féin i gcás dé-ocsainí agus shuim na ndé-ocsainí agus na PCBanna de chineál dé-ocsaine i mbainne agus i dtáirgí déiríochta.

(8)

Dá bhrí sin, ba cheart Rialachán (CE) Uimh. 1881/2006 a leasú dá réir sin.

(9)

Ba cheart foráil a dhéanamh maidir le tréimhse réasúnta chun go bhféadfaidh oibreoirí gnó bia iad féin a oiriúnú do na huasleibhéil a leagtar amach sa Rialachán seo.

(10)

Agus seilfré fhada earraí bia áirithe a chumhdaítear leis an Rialachán seo á cur san áireamh, ba cheart a cheadú d’earraí bia a cuireadh ar an margadh go dleathach roimh dháta chur i bhfeidhm an Rialacháin seo fanacht ar an margadh.

(11)

Tá na bearta dá bhforáiltear sa Rialachán seo i gcomhréir le tuairim an Bhuanchoiste um Plandaí, Ainmhithe, Bia agus Beatha,