(1)

Foráiltear le hAirteagal 13(12) de Rialachán (AE) Uimh. 596/2014 go bhféadfaidh eisitheoirí a ligtear ionstraimí airgeadais dá gcuid isteach chun a dtrádála ar mhargadh fáis FBM, go bhféadfaidh siad conradh leachtachta a dhéanamh dá scaireanna i gcás ina gcomhlíonfaidh na conarthaí sin, inter alia, na coinníollacha maidir le cleachtais mhargaidh a bhfuil glacadh leo a leagtar síos in Airteagal 13(2) den Rialachán sin. Áirithítear leis na coinníollacha sin go mbunófar an méid seo a leanas leis na conarthaí leachtachta – ardleibhéal coimircí d’oibriú fhórsaí an mhargaidh, an t-idirghníomhú cuí idir fórsaí an tsoláthair agus an éilimh, tionchar dearfach ar leachtacht agus éifeachtúlacht an mhargaidh agus ceanglaítear leis freisin nach gcruthófar rioscaí do shláine na margaí gaolmhara. An teimpléad conarthach le haghaidh conarthaí leachtachta dá bhforáiltear iontu sin agus arb aidhm dó a áirithiú go gcomhlíonfar na coinníollacha sin, leagtar síos leis an teimpléad sin na heilimintí íosta ba cheart a bheith i gconradh leachtachta, ar a n-áirítear na heilimintí sin a mhéid a bhaineann leis an trédhearcacht don mhargadh agus le feidhmiú na bhforálacha maidir le leachtacht. Tá an tsaoirse ag na páirtithe clásail bhreise a chur isteach chun sainiúlachtaí an cháis aonair a chur san áireamh, i gcomhréir lena saoirse chonarthach.

(2)

Acmhainní eisitheora a ligtear a ionstraimí airgeadais dá chuid isteach chun a dtrádála ar mhargadh fáis FBM agus a ndéantar iad a leithdháileadh chun conradh leachtachta a chur i gcrích i dtaobh scaireanna an eisitheora sin, ba cheart na hacmhainní sin a bheith inaitheanta láithreach. Dá bhrí sin, ba cheart foráil a bheith ann sa chonradh leachtachta maidir le cuntas leachtachta tiomnaithe a oscailt. Tá gá le cuntas leachtachta tiomnaithe den sórt sin chun faireachán a dhéanamh ar fheidhmíocht an chonartha leachtachta agus chun a áirithiú, i dtaca leis an trádáil a dhéanfar chun críocha an chonartha leachtachta, go mbeidh an trádáil sin scartha ó ghníomhaíochtaí trádála eile a dhéanfaidh an soláthraí leachtachta, agus ar an gcaoi sin go n-íoslaghdófar na rioscaí a bhaineann le coinbhleachtaí leasa. Ba cheart méid acmhainní idir airgead agus scaireanna, ar cheart iad a shonrú sa chonradh leachtachta, a bhronnadh ar an gcuntas leachtachta sin. Níor cheart acmhainní den sórt sin a úsáid ach amháin chun an conradh leachtachta a chomhlíonadh.

(3)

Na hacmhainní a leithdháiltear ar an gconradh leachtachta (“teorainneacha acmhainní”), ba cheart iad a bheith i gcomhréir leis na cuspóirí a leagtar síos in Airteagal 13(2) de Rialachán (AE) Uimh. 596/2014. Ar an gcúis chéanna, ba cheart an trádáil a dhéanfaidh an soláthraí leachtachta a bheith faoi réir teorainneacha praghais agus méide, a íoslaghdódh, in éineacht le teorainneacha acmhainní, an riosca go dtiocfadh athruithe saorga ar an scairphraghas mar gheall ar an soláthar leachtachta agus go gcuirfeadh sé, ag an am céanna, an trádáil rialta i scaireanna neamhleachtacha chun cinn.

(4)

Faoi chleachtais margaidh a raibh glacadh leo roimhe seo maidir le conarthaí leachtachta, tá anailís déanta ag na húdaráis inniúla ar mheánláimhdeachas na trádála sna scaireanna a liostaítear ar mhargaí fáis FBM. Léiríodh san anailís sin gur cheart teorainneacha acmhainní a bheith ag brath ar phróifíl leachtachta na scaireanna lena mbaineann (scaireanna leachtacha vs scaireanna neamhleachtacha) agus gur cheart, i dtaca leis na teorainneacha acmhainní, an ghníomhaíocht trádála a tharlaíonn ar an margadh lena mbaineann a chur san áireamh. Bunaithe ar an anailís sin, is iomchuí foráil a dhéanamh, sa chonradh leachtachta, maidir le teorainneacha acmhainní a shocraítear mar chéatadán den mheánláimhdeachas laethúil i gcás na scaire lena mbaineann, agus an céatadán sin calabraithe ar bhonn phróifíl leachtachta na scaire agus é caidhpeáilte chun aon tionchar diúltach a bheadh ag an gconradh leachtachta ar shláine an mhargaidh agus ar fheidhmiú ordúil an mhargaidh a sheachaint. Chun foráil a dhéanamh maidir le soláthar éifeachtach leachtachta i gcás ina bhfuil an meánláimhdeachas laethúil íseal, ba cheart feidhm a bheith ag tairseach aonair le haghaidh acmhainní an chonartha leachtachta.

(5)

Ba cheart a áirithiú le teorainneacha praghais nach dtiocfaidh athruithe saorga ar na scairphraghsanna mar gheall ar ghníomhaíocht trádála a dhéanann an soláthraí leachtachta faoi chuimsiú an chonartha leachtachta nuair is ann do leas trádála neamhspleách.

(6)

Ba cheart a áirithiú le teorainneacha méide nach sáróidh trádálacha an tsoláthraí leachtachta céatadán uasta den mheánláimhdeachas laethúil i gcás scaireanna neamhleachtacha agus leachtacha. Is iomchuí ríomh an mheánláimhdeachais laethúil sin a bhunú ar na 20 lá trádála roimh an lá trádála. An ríomh sin, is léiriú iomchuí é ar an trádáil sa scair lena mbaineann, toisc gur léargas meántéarmach é, agus go gcuimsíonn sé éifeacht na mbuaiceanna trádála in aon seisiún amháin trádála nó i gcúpla seisiún trádála.

(7)

Chun na rioscaí a bhaineann le drochúsáid mhargaidh a laghdú, i ngnáthchúinsí margaidh, ba cheart a fhoráil sa chonradh leachtachta gur cheart don soláthraí leachtachta orduithe trádála a iontráil ar dhá thaobh an leabhair orduithe, ach amháin i gcásanna eisceachtúla ina gcuirfí bac ar ghnáthfheidhmiú an mhargaidh. Ar an gcúis chéanna, orduithe atá mór ó thaobh scála de agus idirbhearta caibidlithe, ba cheart iad a bheith laistigh de raon feidhme an chonartha leachtachta, ar choinníoll go gcomhlíontar coinníollacha áirithe a bhaineann le forghníomhú orduithe den sórt sin agus nach dtarlaíonn na trádálacha sin ach i gcásanna eisceachtúla. D’fhéadfadh cásanna eisceachtúla den sórt sin tarlú, ag pointe ama sonrach, tráth nach féidir leis an soláthraí leachtachta leachtacht a sholáthar faoin gconradh mar gheall ar choibhneas na n-acmhainní airgid i gcoinne na n-acmhainní ar scaireanna iad atá ar fáil don soláthraí leachtachta.

(8)

Ba cheart a chur de cheanglas sa chonradh leachtacht go gcomhlíonfaidh an soláthraí leachtachta a chonradh leachtachta ar mhodh a bheidh neamhspleách ar eisitheoir na scaire lena mbaineann agus ar chinntí trádála deasc trádála, grúpaí trádála nó aonad trádála eile laistigh den soláthraí leachtachta a théann i mbun gníomhaíochtaí trádála i dtaobh na scaire sin nó i dtaobh ionstraimí airgeadais a mbraitheann a bpraghas nó a luach ar phraghas nó ar luach na scaire lena mbaineann nó a bhfuil tionchar aige ar phraghas nó ar luach na scaire lena mbaineann. An soláthraí leachtachta a bheith neamhspleách ar an gcaoi sin, is rud riachtanach é chun rioscaí do shláine an mhargaidh a sheachaint.

(9)

Chun aon rioscaí do shláine agus d’fheidhmiú ordúil an mhargaidh fáis FBM lena mbaineann a sheachaint, ba cheart luach saothair athraitheach an tsoláthraí leachtachta a theorannú. Ina theannta sin, chun cothrom na Féinne a áirithiú, ba cheart feidhm a bheith ag na teorainneacha sin ar bhealach comhsheasmhach maidir le gach conradh leachtachta a dhéanann eisitheoirí a ligtear ionstraimí airgeadais dá gcuid isteach chun a dtrádála ar mhargadh fáis FBM. Ba cheart na huasteorainneacha don chuid athraitheach den luach saothair, áfach, a shocrú ag céatadán réasúnta den luach saothair iomlán chun foráil a dhéanamh maidir le dreasacht don soláthraí leachtachta an conradh a chomhlíonadh mar is ceart, gan bheith chomh substaintiúil sin agus go dtabharfadh sí dreasú d’iompraíochtaí a d’fhéadfadh a bheith ina riosca do shláine agus d’fheidhmiú ordúil an mhargaidh lena mbaineann.

(10)

Áirithítear sláine an mhargaidh agus cosaint infheisteoirí le trédhearcacht i ndáil leis na conarthaí leachtachta. Le gur féidir le rannpháirtithe eile sa mhargadh cinneadh eolasach a dhéanamh faoi na scaireanna atá faoi réir an chonartha leachtachta, ba cheart foráil a dhéanamh sa chonradh leachtachta maidir le hoibleagáidí trédhearcachta lena gcumhdaítear na céimeanna éagsúla den soláthar leachtachta, eadhon roimh theacht i bhfeidhm an chonartha leachtachta, lena linn agus tar éis a fhoirceannta. I ndáil leis sin, is gá páirtí amháin a shainaithint, páirtí a bheidh i gceannas ar na hoibleagáidí trédhearcachta. Le go mbeadh sé níos fusa don phobal faisnéis a bhailiú i dtaobh na scaireanna lena mbaineann, ba cheart gurbh é an páirtí sin an t-eisitheoir agus ba cheart dó an fhaisnéis ábhartha a fhoilsiú ar a shuíomh gréasáin.

(11)

Tá an Rialachán seo bunaithe ar na dréachtchaighdeáin theicniúla rialála arna gcur faoi bhráid an Choimisiúin ag an Údarás Eorpach um Urrúis agus Margaí.

(12)

Rinne an tÚdarás Eorpach um Urrúis agus Margaí comhairliúcháin phoiblí oscailte maidir leis na dréachtchaighdeáin theicniúla rialála ar a bhfuil an Rialachán seo bunaithe, rinne sé anailís ar na costais agus ar na tairbhí a d’fhéadfadh a bheith ag baint leo agus d’iarr sé comhairle ón nGrúpa Geallsealbhóirí um Urrúis agus Margaí arna bhunú i gcomhréir le hAirteagal 37 de Rialachán (AE) Uimh. 1095/2010 ó Pharlaimint na hEorpa agus ón gComhairle (2),