(1)

Le Rialachán (AE) 2016/429 leagtar síos rialacha maidir le galair ainmhithe atá in-tarchurtha go hainmhithe nó go daoine, lena n-áirítear rialacha maidir le clárú bhunaíochtaí ina gcoimeádtar ainmhithe talún agus ina mbailítear, ina dtáirgtear, ina bpróiseáiltear nó ina stóráiltear táirgí geirmeacha agus formheas ón údarás inniúil maidir leis na bunaíochtaí sin.

(2)

Le Rialachán Tarmligthe (AE) 2019/2035 ón gCoimisiún (2) forlíontar Rialachán (AE) 2016/429 trí rialacha mionsonraithe a leagan síos maidir leis na cláir atá le coimeád ag údarás inniúil na mbunaíochtaí cláraithe agus formheasta, bunaíochtaí ina gcoimeádtar ainmhithe talún agus ina mbailítear, ina dtáirgtear, ina bpróiseáiltear nó ina stóráiltear táirgí geirmeacha atá cláraithe leis nó atá formheasta aige.

(3)

Go háirithe, foráiltear le hAirteagal 18, pointe (d), de Rialachán Tarmligthe (AE) 2019/2035 go n-áireoidh an t-údarás inniúil ina chlár de bhunaíochtaí ainmhithe talún ar coimeád agus de ghorlanna atá cláraithe leis, seoladh agus comhordanáidí geografacha (domhanleithead agus domhanfhad) shuíomh na bunaíochta. Thairis sin, foráiltear le hAirteagal 18, pointe (h), de Rialachán Tarmligthe (AE) 2019/2035 go n-áireoidh an t-údarás inniúil sa chlár sin faisnéis faoin tréimhse ar lena linn a choimeádtar ainmhithe nó uibheacha goir sa bhunaíocht mura bhfuil sí á háitiú go leanúnach, lena n-áirítear áitíocht shéasúrach nó áitíocht le linn imeachtaí ar leith. Foráiltear le hAirteagal 84(1), pointe (b), de Rialachán (AE) 2016/429 maidir le hoibreoirí bunaíochtaí ina gcoimeádtar ainmhithe talún nó ina mbailítear, ina dtáirgtear, ina bpróiseáiltear nó ina stóráiltear táirgí geirmeacha go gcuirfidh siad faisnéis áirithe ar fáil don údarás inniúil chun go mbeidh a mbunaíochtaí cláraithe, ach ní áireofar san fhaisnéis sin an fhaisnéis mhionsonraithe uile a cheanglaítear faoi Airteagal 18, pointí (d) agus (h), de Rialachán Tarmligthe (AE) 2019/2035. Is iomchuí, dá bhrí sin, ceanglas a leagan síos ar oibreoirí bunaíochtaí le haghaidh ainmhithe talún ar coimeád agus oibreoirí gorlann an fhaisnéis mhionsonraithe sin a chur ar fáil don údarás inniúil chun críche clárúcháin.

(4)

Ar an gcaoi chéanna, foráiltear le hAirteagal 21, pointí (d) agus (h), de Rialachán Tarmligthe (AE) 2019/2035 go n-áireoidh an t-údarás inniúil ina chlár de bhunaíochtaí atá formheasta aige an fhaisnéis mhionsonraithe chéanna a cheanglaítear le hAirteagal 18, pointí (d) agus (h), den Rialachán Tarmligthe sin. Le hAirteagal 96(1) de Rialachán (AE) 2016/429 ceanglaítear ar oibreoirí faisnéis áirithe a chur ar fáil don údarás inniúil chun críocha a n-iarratas ar fhormheas maidir lena mbunaíocht, ach ní áireofar san fhaisnéis sin an fhaisnéis mhionsonraithe uile a cheanglaítear faoi Airteagal 21, pointí (d) agus (h), de Rialachán Tarmligthe (AE) 2019/2035. Is iomchuí, dá bhrí sin, ceanglas a leagan síos ar oibreoirí bunaíochtaí le haghaidh ainmhithe talún ar coimeád agus oibreoirí gorlann an fhaisnéis mhionsonraithe sin a chur ar fáil don údarás inniúil chun críche formheasta.

(5)

Ina theannta sin, foráiltear le hAirteagal 85 de Rialachán (AE) 2016/429 go bhféadfaidh na Ballstáit, de mhaolú ar Airteagal 84(1) den Rialachán sin, catagóirí áirithe bunaíochtaí a mbaineann riosca neamhshuntasach leo do shláinte ainmhithe nó do shláinte phoiblí a dhíolmhú ón gceanglas clárúcháin. Ní fhéadfar díolúintí den sórt sin a dheonú ach amháin má tá na catagóirí bunaíochtaí sin de chineál a thagann faoi na rialacha a leagtar síos i ngníomh cur chun feidhme arna ghlacadh i gcomhréir le hAirteagal 86(2) den Rialachán sin. Dá bhrí sin, ba cheart rialacha a leagan síos maidir leis na cineálacha bunaíochtaí a mbaineann riosca neamhshuntasach leo a d’fhéadfadh na Ballstáit a dhíolmhú ón gceanglas maidir le clárú i gcomhréir le hAirteagal 85.

(6)

Maidir le bunaíochtaí áirithe, go háirithe iad sin ina gcoimeádtar crúbaigh, ní féidir a mheas go mbaineann riosca neamhshuntasach leo, dá dtagraítear in Airteagal 85 de Rialachán (AE) 2016/429, de bharr roinnt galar liostaithe a d’fhéadfadh crúbaigh a tharchur, galair a d’fhéadfadh difear a dhéanamh do stádas sláinte ainmhithe bunaíochtaí nó criosanna i ndáil leis sin. Ar an gcaoi chéanna, maidir le madraí, cait agus firéid a choimeádtar i mbunaíocht chun críocha pórúcháin, ní féidir a mheas go bhfuil riosca neamhshuntasach ag baint leo, go háirithe ó thaobh shláinte an duine de.

(7)

Is toisc riosca tábhachtach do shláinte ainmhithe agus do shláinte an duine é gluaiseacht ainmhithe, táirgí geirmeacha agus táirgí de bhunadh ainmhíoch. Dá bhrí sin, níor cheart a mheas go bhfuil riosca neamhshuntasach ag baint le bunaíochtaí ina ndéanfar gluaiseachtaí, go háirithe gluaiseachtaí isteach i mBallstáit eile nó amach astu nó chuig tríú tíortha nó amach astu. Mar sin féin, i gcás bunaíochtaí ina gcoimeádtar ainmhithe, táirgí geirmeacha nó táirgí de bhunadh ainmhíoch le leanúnachas ar leith agus nach é an príomhchuspóir atá ann gluaiseachtaí na hainmhithe sin, na táirgí geirmeacha sin nó na táirgí de bhunadh ainmhíoch sin isteach sa bhunaíocht nó amach aisti, is féidir a mheas go bhfuil riosca neamhshuntasach ag baint leis na bunaíochtaí sin, fiú dá ndéanfaí gluaiseachtaí den sórt sin ó am go ham.

(8)

Is minic a choimeádann oibreoirí ainmhithe talún de roinnt speiceas éagsúla sa bhunaíocht chéanna. I gcás ina ndéanann Ballstát catagóirí áirithe bunaíochtaí a mbaineann riosca neamhshuntasach leo a dhíolmhú ón gceanglas clárúcháin, dá bhforáiltear in Airteagal 85 de Rialachán (AE) 2016/429, ní bheadh sé comhréireach leis an riosca a bhaineann leo ceangal a chur ar oibreoirí an fhaisnéis dá dtagraítear in Airteagal 84(1), pointe (b)(iii), a chur ar fáil maidir le hainmhithe talún ar coimeád a bhféadfaí an bhunaíocht a dhíolmhú ón gceanglas clárúcháin ina leith i gcomhréir le hAirteagal 3 den Rialachán seo amhail is nach raibh aon ainmhí eile á choimeád sa bhunaíocht sin ach amháin na hainmhithe sin.

(9)

Na bearta dá bhforáiltear sa Rialachán seo, is bearta iad atá i gcomhréir leis an tuairim ón mBuanchoiste um Plandaí, Ainmhithe, Bia agus Beatha,