(1)

Le Rialachán (CE) Uimh. 1831/2003 foráiltear d’údarú breiseán lena n-úsáid i gcothú ainmhithe agus don fhoras agus do na nósanna imeachta chun an t-údarú sin a dheonú.

(2)

I gcomhréir le hAirteagal 7(1) de Rialachán (CE) Uimh. 1831/2003, cuireadh isteach iarratas maidir le húdarú Dearg Alúra AC. Bhí na sonraí agus na doiciméid a cheanglaítear faoi Airteagal 7(3) de Rialachán (CE) Uimh. 1831/2003 ag gabháil leis an iarratas sin.

(3)

Baineann an t-iarratas le Dearg Alúra AC a údarú mar bhreiseán beathaithe le haghaidh mamaigh bheaga nach bia-ainmhithe iad agus le haghaidh éin ornáideacha, breiseán atá le haicmiú sa chatagóir “breiseáin chéadfacha” agus san fheidhmghrúpa “datháin”.

(4)

I dtuairim an 11 Samhain 2021 ón tÚdarás Eorpach um Shábháilteacht Bia (“an tÚdarás”) (2) is é an chonclúid ar ar thángthas nach bhfuil éifeachtaí díobhálacha ag Dearg Alúra AC ar shláinte ainmhithe, ar shábháilteacht tomhaltóirí ná ar an gcomhshaol, faoi na coinníollacha úsáide atá beartaithe. Níorbh fhéidir leis an Údarás teacht ar chonclúid maidir le héifeachtúlacht Dearg Alúra AC agus é á úsáid i mbeatha le haghaidh mamaigh bheaga nach bia-ainmhithe iad agus le haghaidh éin ornáideacha, i bhfianaise an raon leathan ábhar beatha a úsáidtear i mbeatha iomlán agus i mbeatha comhlántach le haghaidh mamaigh bheaga nach bia-ainmhithe iad agus le haghaidh éin ornáideacha, agus an éiginnteacht maidir leis an tiúchan de Dhearg Alúra AC a mbeadh toradh sofheicthe air. Mar sin féin, dhearbhaigh an tÚdarás freisin maidir leis an mbreiseán sin, ar breiseán é a údaraítear i mbia, go bhféadfaí nach mbeadh gá le léiriú breise éifeachtúlachta i gcás inarb ionann an fheidhm atá aige i mbeatha agus atá aige i mbia. D’fhíoraigh an tÚdarás freisin an tuarascáil ar na modhanna a úsáidtear chun anailís a dhéanamh ar an mbreiseán beathaithe agus é i mbeatha, tuarascáil arna cur isteach ag an tSaotharlann Tagartha a bunaíodh le Rialachán (CE) Uimh. 1831/2003.

(5)

Thairis sin, údaraítear Dearg Alúra AC cheana féin i mbeatha le haghaidh cat agus madraí le Rialachán Cur Chun Feidhme (AE) 2020/197 ón gCoimisiún (3) agus tháinig an tÚdarás ar an gconclúid, sa tuairim uaidh an 24 Aibreán 2012 (4), go bhfuil Dearg Alúra AC éifeachtach maidir le dath a chur ar bheatha thipiciúil le haghaidh madraí ag íosdáileog 50 mg/kg, dáileog atá cosúil leis na híosleibhéil a mholann an tÚdarás i leith na húsáide sin i mamaigh bheaga nach bia-ainmhithe iad agus in éin ornáideacha.

(6)

I bhfianaise an mhéid thuas, measann an Coimisiún dá bhrí sin go bhfuil fianaise leordhóthanach ann maidir le héifeachtúlacht na substainte sin.

(7)

Léirítear leis an measúnú ar Dhearg Alúra AC go gcomhlíontar na coinníollacha maidir le húdarú dá bhforáiltear in Airteagal 5 de Rialachán (CE) Uimh. 1831/2003. Dá réir sin, ba cheart úsáid na substainte sin a údarú mar a shonraítear san Iarscríbhinn a ghabhann leis an Rialachán seo.

(8)

Tá na bearta dá bhforáiltear sa Rialachán seo i gcomhréir leis an tuairim ón mBuanchoiste um Plandaí, Ainmhithe, Bia agus Beatha,