(1)

Tá feirmeoirí agus gnólachtaí tuaithe san Aontas buailte go trom le hiarmhairtí ionradh na Rúise ar an Úcráin ar bhealach nach bhfacthas a leithéid riamh roimhe. Mar thoradh ar mhéadú na bpraghsanna ionchuir, go háirithe i gcás fuinnimh, leasacháin agus beatha ainmhithe, cruthaíodh míshocracht eacnamaíoch in earnáil talmhaíochta an Aontais agus i bpobail tuaithe an Aontais agus d’eascair fadhbanna leachtachta as d’fheirmeoirí agus do ghnólachtaí beaga tuaithe a dhéanann próiseáil, margaíocht nó forbairt ar tháirgí talmhaíochta. Mar gheall air sin, cruthaíodh staid eisceachtúil nach mór aghaidh a thabhairt uirthi le beart nua eisceachtúil.

(2)

Chun freagairt a thabhairt ar thionchar ionradh na Rúise ar an Úcráin ar earnálacha talmhaíochta agus bia an Aontais, ba cheart foráil a dhéanamh sa Rialachán seo maidir le beart nua eisceachtúil sealadach lena dtabharfar aghaidh ar na fadhbanna leachtachta lena gcuirtear leanúnachas gníomhaíochtaí feirmeoireachta agus gnólachtaí beaga i mbaol, gnólachtaí a dhéanann próiseáil, margaíocht nó forbairt ar tháirgí talmhaíochta.

(3)

Maidir leis an tacaíocht faoin mbeart dá bhforáiltear sa Rialachán seo, arb é is aidhm di iomaíochas na ngnólachtaí agraibhia agus inmharthanacht feirmeacha san Aontas a chosaint, ba cheart na hacmhainní atá ar fáil a dhíriú ar na tairbhithe is mó atá buailte ag na hiarmhairtí mar gheall ar ionradh na Rúise ar an Úcráin agus ba cheart iad a dheonú ar bhonn critéir oibiachtúla agus neamh-idirdhealaitheacha. I gcás na bhfeirmeoirí, ba cheart é a bheith indéanta critéir den sórt sin a chur san áireamh, tá earnálacha táirgeachta, cineálacha feirmeoireachta nó struchtúr feirme agus, i gcás fiontair bheaga agus mheánmhéide (FBManna), earnálacha, cineálacha gníomhaíochta, cineálacha réigiún nó srianta sonracha eile.

(4)

Leis an ngéarchéim thromchúiseach reatha in earnáil talmhaíochta an Aontais, deimhnítear gur gá dlús a chur leis an aistriú i dtreo na hinbhuanaitheachta le gur fearr a bheifear in ann ullmhú do ghéarchéimeanna a bheidh ann amach anseo. Níor cheart, dá bhrí sin, laghdú a bheith ar sciar foriomlán ranníocaíocht an Chiste Eorpach Talmhaíochta um Fhorbairt Tuaithe (CETFT) arna fhorchoimeád do na bearta dá dtagraítear in Airteagal 59(6) de Rialachán (AE) Uimh. 1305/2013 ó Pharlaimint na hEorpa agus ón gComhairle (3) mar thoradh ar an tacaíocht faoin mbeart dá bhforáiltear sa Rialachán seo.

(5)

De dheasca na práinne agus toisc go bhfuil gné eisceachtúil agus sealadach ag an mbeart dá bhforáiltear sa Rialachán seo, ba cheart íocaíocht aonuaire agus dáta deiridh le haghaidh chur i bhfeidhm an bhirt a shocrú. Ba cheart an prionsabal a chomhlíonadh freisin, go bhfuil íocaíochtaí ón gCoimisiún le déanamh i gcomhréir le leithreasuithe buiséadacha agus faoi réir cistithe atá ar fáil.

(6)

Chun tacaíocht níos airde a thabhairt do na feirmeoirí agus do FBManna is mó atá buailte, is iomchuí a cheadú do Bhallstáit coigeartú a dhéanamh ar leibhéal na gcnapshuimeanna le haghaidh catagóirí áirithe de thairbhithe incháilithe bunaithe ar chritéir oibiachtúla neamh-idirdhealaitheacha, mar shampla trí réimsí áirithe nó catagóirí leathana a shocrú.

(7)

Chun a áirithiú go ndéanfar an beart dá bhforáiltear sa Rialachán seo a mhaoiniú go leordhóthanach gan cuspóirí eile na gclár forbartha tuaithe a chur i mbaol, ba cheart ranníocaíocht an Aontais leis an mbeart sin a shocrú.

(8)

Ba cheart, dá bhrí sin, Rialachán (AE) Uimh. 1305/2013 a leasú dá réir.

(9)

I bhfianaise ionradh na Rúise ar an Úcráin agus na práinne atá ann maidir le haghaidh a thabhairt ar an tionchar atá ag an ionradh sin ar earnálacha talmhaíochta agus bia an Aontais, meastar gurb iomchuí leas a bhaint as an eisceacht ar an tréimhse 8 seachtaine dá bhforáiltear in Airteagal 4 de Phrótacal Uimh. 1 maidir le ról na bparlaimintí náisiúnta san Aontas Eorpach, atá i gceangal leis an gConradh ar an Aontas Eorpach (CAE), leis an gConradh ar Fheidhmiú an Aontais Eorpaigh agus leis an gConradh ag bunú an Chomhphobail Eorpaigh do Fhuinneamh Adamhach.

(10)

Ós rud é nach féidir leis na Ballstáit cuspóirí an Rialacháin seo, eadhon aghaidh a thabhairt ar an staid eisceachtúil atá cruthaithe in earnálacha talmhaíochta agus bia an Aontais mar gheall ar thionchar ionradh na Rúise ar an Úcráin, a ghnóthú go leordhóthanach agus, de bharr fairsinge agus éifeachtaí na gníomhaíochta, gur fearr is féidir iad a ghnóthú ar leibhéal an Aontais, féadfaidh an tAontas bearta a ghlacadh, i gcomhréir le prionsabal na coimhdeachta a leagtar amach in Airteagal 5 CAE. I gcomhréir le prionsabal na comhréireachta a leagtar amach san Airteagal sin, ní théann an Rialachán seo thar a bhfuil riachtanach chun na cuspóirí sin a ghnóthú.

(11)

I bhfianaise na práinne atá leis an staid a bhaineann le tionchar ionradh na Rúise ar an Úcráin ar earnálacha talmhaíochta agus bia an Aontais, ba cheart an Rialachán seo a theacht i bhfeidhm lá a fhoilsithe in Iris Oifigiúil an Aontais Eorpaigh,