(1)

De bhun Rialachán (CE) Uimh. 1924/2006, tá toirmeasc ar mhaímh shláinte a dhéantar maidir le bianna ach amháin má tá siad údaraithe ag an gCoimisiún i gcomhréir leis an Rialachán sin agus go n-áirítear iad i liosta de mhaímh atá ceadaithe.

(2)

Foráiltear le Rialachán (CE) Uimh. 1924/2006 freisin go bhféadfaidh oibreoirí gnólachtaí bia iarratais ar údaruithe i leith maímh maidir le sláinte a chur faoi bhráid údarás inniúil náisiúnta Ballstáit. Cuirfidh an t-údarás inniúil náisiúnta iarratais bhailí ar aghaidh chuig an Údarás Eorpach um Shábháilteacht Bia (“an tÚdarás”).

(3)

Tar éis don Údarás iarratas a fháil, cuirfidh sé na Ballstáit eile agus an Coimisiún ar an eolas gan mhoill, agus tabharfaidh sé tuairim ar an maíomh maidir le sláinte lena mbaineann.

(4)

Déanfaidh an Coimisiún cinneadh i dtaca le húdarú a thabhairt don mhaíomh sláinte agus an tuairim ón Údarás á cur san áireamh aige.

(5)

Tar éis iarratas a fháil ó H.J. Heinz Supply Chain Europe BV, iarratas a cuireadh isteach de bhun Airteagal 14(1), pointe (b) de Rialachán (CE) Uimh. 1924/2006, ceanglaíodh ar an Údarás tuairim a thabhairt maidir le maíomh sláinte a bhaineann le Nutrimune agus le cosaint imdhíonach i gcoinne pataiginí sa chonair gastraistéigeach agus sa chonair riospráide uachtarach (Ceist Uimh. EFSA-Q-2018-00727). Is mar seo a leanas a bhí an fhoclaíocht sa mhaíomh a mhol an t-iarratasóir: “Tacaíonn Nutrimune leis an gcóras imdhíonachta i gcoinne pataiginí i gconair riospráide uachtarach agus conair gastraistéigeacha leanaí óga”.

(6)

An 15 Aibreán 2019, fuair an Coimisiún agus na Ballstáit an tuairim eolaíoch ón Údarás (2) inar thángthas ar an gconclúid, ar bhonn na sonraí a cuireadh i láthair, nach leor an fhianaise eolaíoch chun ceangal cúise agus éifeachta a bhunú idir caitheamh Nutrimune, bainne bó bearrtha paistéartha a coipeadh le Lactobacillus paracasei CBA L74), agus an chosaint imdhíonach i gcoinne pataiginí sa chonair gastraistéigeach agus sa chonair riospráide uachtarach de leanaí óga. Dá réir sin, ós rud é nach gcomhlíonann an maíomh ceanglais Rialachán (CE) Uimh. 1924/2006, níor cheart é a údarú.

(7)

Tá na bearta dá bhforáiltear sa Rialachán seo i gcomhréir leis an tuairim ón mBuanchoiste um Plandaí, Ainmhithe, Bia agus Beatha,