(1)

De bhun Airteagal 8 de Rialachán (AE) 2015/2283, bhí an Coimisiún le liosta an Aontais de bhianna núíosacha a údaraíodh nó ar tugadh fógra ina leith faoi Rialachán (CE) Uimh. 258/97 ó Pharlaimint na hEorpa agus ón gComhairle (2) a bhunú faoin 1 Eanáir 2018.

(2)

Bunaíodh liosta an Aontais de bhianna núíosacha a údaraíodh nó ar tugadh fógra ina leith faoi Rialachán (CE) Uimh. 258/97 le Rialachán Cur Chun Feidhme (AE) 2017/2470 ón gCoimisiún (3).

(3)

Tá earráidí sainaitheanta ag an gCoimisiún san Iarscríbhinn a ghabhann le Rialachán Cur Chun Feidhme (AE) 2017/2470. Tá gá le ceartuithe chun soiléireacht agus deimhneacht dhlíthiúil a thabhairt d’oibreoirí gnó bia agus d’údaráis inniúla na mBallstát, agus ar an gcaoi sin áiritheofar go gcuirfear chun feidhme go cuí agus go n-úsáidfear go cuí liosta an Aontais de bhianna núíosacha.

(4)

D’údaraigh údarás inniúil Phoblacht na Seice an bia núíosach “Cistus incanus L. Pandalis (luibh)” faoi choinníollacha úsáide áirithe de bhun Airteagal 5 de Rialachán (CE) Uimh. 258/97. Fágadh ar lár go hearráideach i sonraíochtaí an bhia núíosaigh seo gurb é atá sa bhia núíosach na codanna sofheicthe triomaithe agus gearrtha (péacáin óga le codanna adhmadacha) de Cistus incanus L. Pandalis. Ina theannta sin, faisnéis mhionsonraithe ar chomhdhéanamh maidir leis an mbia núíosach a chuir an t-iarratasóir isteach mar fhaisnéis chomhlántach, faisnéis nár cuireadh san áireamh sa tuairim a thug údarás inniúil Phoblacht na Seice agus nach bhfuil ag teastáil le haghaidh an mheasúnaithe ar shábháilteacht nó le haghaidh shaintréithriú an táirge, cuireadh leis na sonraíochtaí go hearráideach í. Ba cheart mar sin an fhaisnéis sin a bhaint. Dá bhrí sin, ba cheart na sonraíochtaí a bhaineann le “Cistus incanus L. Pandalis (luibh)” i dTábla 2 den Iarscríbhinn a ghabhann le Rialachán Cur Chun Feidhme (AE) 2017/2470 a cheartú.

(5)

Le Rialachán Cur Chun Feidhme (AE) 2021/1318 ón gCoimisiún (4), ceartaítear liosta an Aontais de bhianna núíosacha atá údaraithe chun an bia núíosach “L-Meitiolfóláit Chailciam” a chur san áireamh, bia a fágadh ar lár go hearráideach i liosta an Aontais nuair a bunaíodh an liosta tosaigh, cé gur údaraigh údarás inniúil na hÉireann é faoi choinníollacha áirithe in Eanáir 2008 i gcomhréir le Rialachán (CE) Uimh. 258/97. Na coinníollacha úsáide a bhaineann le “L-Meitiolfóláit Chailciam” a úsáid i bhforbhianna mar a shainmhínítear i dTreoir 2002/46/CE ó Pharlaimint na hEorpa agus ón gComhairle (5), a cuireadh san áireamh i liosta an Aontais, níor cuireadh naíonáin agus leanaí óga san áireamh i ngrúpaí na n-úsáideoirí a ndírítear orthu sna coinníollacha sin, cé gur údaraíodh an úsáid sin leis an údarú bunaidh. Mar sin, is gá an iontráil le haghaidh “L-Meitiolfóláit Chailciam” i dTábla 1 den Iarscríbhinn a ghabhann le Rialachán Cur Chun Feidhme (AE) 2017/2470 a cheartú.

(6)

Na teorainneacha sonraíochta le haghaidh mearcair (≤ 1,0 mg/kg) agus platanaim (≤ 2 mg/kg) a bhaineann le “L-Meitiolfóláit Chailciam” agus a leagtar síos i Rialachán Cur Chun Feidhme (AE) 2021/1318, tagraíonn siad do na teorainneacha i sonraíochtaí an bhia núíosaigh sin atá údaraithe mar fhoinse fóláite i mbainne foirmle do naíonáin, i mbainne foirmle leantach do naíonáin, i mbia gránachbhunaithe próiseáilte agus i mbia do naíonáin le Rialachán Tarmligthe (AE) 2021/571 ón gCoimisiún (6). Na teorainneacha sonraíochta de ≤ 1,5 mg/kg le haghaidh mearcair agus ≤ 10 mg/kg le haghaidh platanaim, áfach, d’údaraigh údarás inniúil na hÉireann iad ar dtús in 2008 freisin, bunaithe ar thuairim fhabhrach maidir le sábháilteacht an bhia núíosaigh ón Údarás Eorpach um Shábháilteacht (7). Dá bhrí sin, is gá Tábla 2 den Iarscríbhinn a ghabhann le Rialachán Cur Chun Feidhme (AE) 2017/2470 a cheartú dá réir.

(7)

Ba cheart Rialachán Cur Chun Feidhme (AE) 2017/2470 ina bhfuil liosta an Aontais de bhianna núíosacha a cheartú dá réir,