(1)

Ríomhtar an sreabhadh trádála laethúil (DTF) bunaithe ar mhéid na n-idirbheart. Leis na himthosca as a n-eascraíonn méideanna níos airde trádála, d’fhéadfadh sé go gcuirfí iallach ar ghnólachtaí infheistíochta atá ag déileáil ar a gcuntas féin, lena n-áirítear cruthaitheoirí margaidh, a ngníomhaíochtaí trádála a laghdú. D’fhéadfadh riosca maidir le leachtacht mhargaidh laghdaithe a bheith mar thoradh air sin, rud a d’fhéadfadh a bheith díobhálach don chobhsaíocht airgeadais. Dá bhrí sin, mar thoradh ar na himthosca sin, ba cheart comhéifeachtaí K-DTF a choigeartú ar bhealach nach ndéantar gníomhaíochtaí trádála a dhídhreasú. I gcás ina mbeidh méid níos ísle trádála ann mar thoradh ar imthosca, ní bheidh feidhm ag na breithnithe sin agus dá bhrí sin, níor cheart na coigeartuithe ar chomhéifeachtaí a bheith bunaithe ach ar na méideanna trádála a tharlaíonn le linn tréimhsí ina bhfuil ardleibhéal luaineachta.

(2)

I gcás ina bhfuil ceanglais K-DTF i ndálaí anáis sa mhargadh róshriantach agus díobhálach don chobhsaíocht airgeadais, ba cheart an chomhéifeacht dá dtagraítear in Airteagal 15(2) de Rialachán (AE) 2019/2033 a choigeartú chun a bheith níos lú ná an ceann dá bhforáiltear i dTábla 1 den Airteagal sin, d’fhonn a sheachaint go mbeadh K-DTF ina dhídhreasacht le haghaidh trádála.

(3)

Ós rud é go ndéantar tagairt in Airteagal 15(5), pointe (c), de Rialachán (AE) 2019/2033 do dhálaí anáis sa mhargadh dá dtagraítear i Rialachán Tarmligthe (AE) 2017/578 ón gCoimisiún (2), ba cheart am tosaithe agus críochnaithe na dtréimhsí ina bhfuil dálaí anáis sa mhargadh a bheith i gcomhréir le hAirteagal 6(2) de Rialachán Tarmligthe (AE) 2017/578 maidir le dálaí anáis sa mhargadh arna sainaithint ag ionad trádála.

(4)

Chun K-DTF coigeartaithe a ríomh, ba cheart a chumhdach leis na dálaí anáis sa mhargadh cásanna ina mbeidh tionchar suntasach ag athruithe gearrthéarmacha ar an méid trádála agus ar an bpraghas maidir le K-DTF a ríomh. Toisc go bhféadfadh sé go mairfeadh dálaí anáis sa mhargadh go ceann tréimhse neamhchinntithe ama, lena n-áirítear tréimhsí chomh gearr le cúpla nóiméad, ba cheart na comhéifeachtaí oiriúnaithe a bheith in ann luach an tsreafa trádála laethúil a tharlaíonn le linn tréimhsí d’aon fhad éagsúil a léiriú.

(5)

Tá an Rialachán seo bunaithe ar na dréachtchaighdeáin theicniúla rialála arna gcur faoi bhráid an Choimisiúin ag an Údarás Baincéireachta Eorpach tar éis dó dul i gcomhairle leis an Údarás Eorpach um Urrúis agus Margaí.

(6)

Rinne an tÚdarás Baincéireachta Eorpach comhairliúcháin phoiblí oscailte a reáchtáil maidir leis na dréachtchaighdeáin theicniúla rialála ar a bhfuil an Rialachán seo bunaithe, rinne sé anailís ar na costais agus ar na tairbhí a d’fhéadfadh a bheith ag baint leo agus d’iarr sé comhairle ar an nGrúpa Geallsealbhóirí Baincéireachta arna bhunú i gcomhréir le hAirteagal 37 de Rialachán (AE) Uimh. 1093/2010 ó Pharlaimint na hEorpa agus ón gComhairle (3),