(1)

An Comhaontú Trádála agus Comhair idir an tAontas Eorpach agus an Comhphobal Eorpach do Fhuinneamh Adamhach, de pháirt, agus Ríocht Aontaithe na Breataine Móire agus Thuaisceart Éireann, den pháirt eile (1) (‘an Comhaontú Trádála agus Comhair’), tugadh i gcrích é le Cinneadh (AE) 2021/689 (2) ón gComhairle agus tháinig sé i bhfeidhm an 1 Bealtaine 2021.

(2)

De bhun Airteagal 752(1) den Chomhaontú Trádála agus Comhair, tá an Chomhairle Comhpháirtíochta, arna bunú le hAirteagal 7(1) den Chomhaontú sin, le liosta de dhaoine aonair atá toilteanach agus inniúil ar bheith ina gcomhaltaí de bhinse eadrána a bhunú. Tá trí fholiosta le bheith sa liosta: foliosta amháin de dhaoine aonair a bhunófar ar bhonn tograí ón Aontas; foliosta amháin de dhaoine aonair a bhunófar ar bhonn tograí ó Ríocht Aontaithe na Breataine Móire agus Thuaisceart Éireann (‘an Ríocht Aontaithe’); agus foliosta amháin de dhaoine aonair nach náisiúnaigh de cheachtar den dá Pháirtí iad a fhónfaidh mar chathaoirleach don bhinse eadrána.

(3)

Tá cúigear ar a laghad le háireamh ar gach foliosta.

(4)

De bhun Airteagal 741(2) den Chomhaontú Trádála agus Comhair, tá na headránaí uile le bheith ina ndaoine nach bhfuil a neamhspleáchas inchurtha in amhras, agus a bhfuil na cáilíochtaí is gá acu chun iad a cheapadh do na hoifigí breithiúnacha is airde ina dtír féin nó atá ina ndlí-eolaithe a bhfuil inniúlacht aitheanta acu. Tá saineolas le bheith léirithe acu sa dlí agus i dtrádáil idirnáisiúnta, lena n-áirítear saineolas faoi ábhair shonracha a chumhdaítear faoi Theidil I go VII, Caibidil 4 de Theideal VIII, Teidil IX go XII de Cheannteideal a hAon de Chuid a Dó nó Ceannteideal a Sé de Chuid a Dó den Chomhaontú Trádála agus Comhair, nó saineolas sa dlí agus in aon ábhar eile a chumhdaítear leis an gComhaontú sin nó le haon chomhaontú ar forlíonadh air é agus, i gcás cathaoirligh, taithí a bheith acu ar nósanna imeachta um réiteach díospóide.

(5)

I gcomhréir le hAirteagal 752(3) den Chomhaontú Trádála agus Comhair, níl daoine atá ina gcomhaltaí, ina n-oifigigh nó ina seirbhísigh eile d’institiúidí an Aontais, de rialtas Ballstáit ná de rialtas na Ríochta Aontaithe le bheith ar an liosta sin.

(6)

Ar bhonn na dtograí ón Aontas agus ón Ríocht Aontaithe, tá an Comhairle Comhpháirtíochta le foliosta d’ochtar maidir le seasamh chathaoirleach an bhinse eadrána a chomhaontú, agus dhá fholiosta de sheisear maidir le seasamh chomhaltaí an bhinse eadrána a chomhaontú.

(7)

Tá bunú an tseasaimh atá le glacadh thar ceann an Chomhphobail Eorpaigh do Fhuinneamh Adamhach sa Chomhairle Comhpháirtíochta a mhéid a bhaineann le hábhair a thagann faoi inniúlacht an Chomhphobail Eorpaigh do Fhuinneamh Adamhach faoi réir nós imeachta ar leithligh.

(8)

Is iomchuí an seasamh atá le glacadh thar ceann an Aontais sa Chomhairle Comhpháirtíochta a bhunú,