(1)

Le Cinneadh 96/228/CE (1) d’fhormheas an Coimisiún an scéim cabhrach náisiúnta fhadtéarmach don talmhaíocht i réigiún an Tuaiscirt den tSualainn (“an scéim cabhrach Nordach”) mar a thug an tSualainn fógra ina leith de bhun Airteagal 143 den Ionstraim Aontachais d’fhonn údarú a fháil faoi Airteagal 142 den Ionstraim Aontachais. Cuireadh Cinneadh C(2010) 6050 ón gCoimisiún (2) in ionad Chinneadh 96/228/CE. Cuireadh Cinneadh (AE) 2018/479 ón gCoimisiún (3) in ionad an Chinnidh sin.

(2)

Toisc go rachaidh údarú na Sualainne chun an scéim cabhrach Nordach a chur chun feidhme mar a leagtar amach i gCinneadh (AE) 2018/479 in éag an 31 Nollaig 2022, ní mór cinneadh nua a ghlacadh.

(3)

Le litir dar dáta an 1 Iúil 2022, thug an tSualainn fógra don Choimisiún faoina togra chun fadú a chur leis an scéim cabhrach Nordach. Mhol an tSualainn go leasódh an Coimisiún Cinneadh (AE) 2018/479 chun leanúint den scéim le tréimhse bhailíochta bliana níos faide, an luach tagartha bliantúil iomlán a mhéadú, rud a chiallaíonn go ndéanfaí coigeartú éigin ar na leibhéil tacaíochta, agus athrú ar an dáta faoinar cheart don tSualainn tograí a dhéanamh chun an scéim a leasú agus a fhadú.

(4)

An cabhair náisiúnta fhadtéarmach dá dtagraítear in Airteagal 142 den Ionstraim Aontachais, tá sé ceaptha a áirithiú go gcoimeádfar an ghníomhaíocht talmhaíochta sna réigiúin thuaisceartacha arna cinneadh ag an gCoimisiún.

(5)

Agus na tosca dá dtagraítear in Airteagal 142(1) agus (2) den Ionstraim Aontachais á gcur san áireamh, is iomchuí na haonaid riaracháin, arna ngrúpáil de réir fo-réigiúin, atá suite lastuaidh den líne 62 chéim chomhthreomhar nó gar di agus a ndéanann dálaí aeráide inchomparáide difear dóibh, a fhágann go bhfuil deacrachtaí ar leith ag baint leis an ngníomhaíocht talmhaíochta. Sna fo-réigiúin sin ina bhfuil an dlús daonra níos ísle ná nó cothrom le 10 áitritheoir ina aghaidh an chiliméadair chearnaigh, meastar an limistéar talmhaíochta arna úsáid (LTÚ) a bheith cothrom le 10 % nó níos lú de dhromchla fhoriomlán an bhardais agus an cion den LTÚ atá tiomnaithe do bharra curaíochta atá ceaptha lena gcaitheamh ag an duine níos lú ná nó cothrom le 20 %. Ba cheart fo-réigiúin atá timpeallaithe ag limistéir eile a chur san áireamh, fiú mura sásaíonn siad na ceanglais chéanna.

(6)

Chun riaradh na scéime a éascú agus chun í a chomhordú le tacaíocht faoi Rialachán (AE) 2021/2115 ó Pharlaimint na hEorpa agus ón gComhairle agus (4), is iomchuí na haonaid bhardasacha chéanna a áireamh leo sin a fhaigheann cabhair faoin gCinneadh seo agus na haonaid atá sa limistéar arna dteorannú faoi Airteagal 32(2), an dara fomhír, de Rialachán (AE) Uimh. 1305/2013 ó Pharlaimint na hEorpa agus ón gComhairle (5) agus Airteagal 71(2) de Rialachán (AE) 2021/2115 sa Phlean Straitéiseach CBT le haghaidh chur chun feidhme an chomhbheartais talmhaíochta sa tSualainn 2023-2027.

(7)

An tréimhse thagartha ar cheart forbairt na táirgeachta talmhaíochta agus leibhéal na tacaíochta foriomláine a mheas i ndáil léis, lena n-úsáidtear an staidreamh náisiúnta atá ar fáil mar bhonn agus d’fhonn cur i bhfeidhm aonfhoirmeach a áirithiú i ndáil leis na hearnálacha uile den táirgeadh, is í an bhliain 1993 is ceart a bheith ann.

(8)

I gcomhréir le hAirteagal 142 den Ionstraim Aontachais, ba cheart don mhéid iomlán cabhrach arna deonú a bheith leordhóthanach chun gníomhaíocht talmhaíochta a choinneáil ar bun i réigiúin thuaisceartacha na Sualainne ach ní fhéadfaidh tacaíocht fhoriomlán atá níos airde ná an leibhéal tacaíocht le linn tréimhse tagartha réamhaontachais atá le cinneadh a bheith i gceist léi. Chun tacaíocht a dheonú faoi Airteagal 142 den Ionstraim Aontachais ag leibhéal leordhóthanach i bhfianaise na gcostas táirgeachta atá ann faoi láthair agus gan an leibhéal tacaíochta le linn na tréimhse tacaíochta réamh-aontachais a shárú, is iomchuí an fhorbairt sa innéacs praghsanna do thomhaltóirí idir 1993 agus 2022 sa tSualainn a chur san áireamh agus an t-uasleibhéal cabhrach is incheadaithe faoin Airteagal sin á chinneadh.

(9)

Dá réir sin, ar bhonn na sonraí ó 1993 go dtí deireadh mhí Aibreáin 2022, ba cheart an t-uasmhéid bliantúil cabhrach a shocrú ag SEK 473,75 milliún, arna ríomh mar mheán thar thréimhse 6 bliana ón 1 Eanáir 2023 go dtí an 31 Nollaig 2028.

(10)

Chun an scéim cabhrach Nordach a shimpliú agus chun ligean don tSualainn a bheith solúbtha maidir leis an gcabhair a dhíriú ar earnálacha éagsúla den táirgeadh, ba cheart méid uasta bliantúil cabhrach amháin a leagan síos don tacaíocht iomlán, a chuimsíonn tacaíocht uasta ar leithligh le haghaidh táirgeadh agus iompar bainne bó d’fhonn dáileadh cothromaithe tacaíochta a áirithiú.

(11)

Ba cheart an chabhair a dheonú go bliantúil ar bhonn tosca táirgeachta (aonaid beostoic agus heicteáir), ach amháin i gcás bó bainne inar cheart é a dheonú ar bhonn aonaid táirgeachta (cileagraim) laistigh de na teorainneacha iomlána a leagtar síos leis an gCinneadh seo.

(12)

D’fhonn freagairt phras a thabhairt ar luaineacht i bpraghsanna aschuir talmhaíochta agus chun gníomhaíochta talmhaíochta a choinneáil ar bun i réigiúin thuaisceartacha na Sualainne, is iomchuí ligean don tSualainn méid na cabhrach a bhunú, le haghaidh gach bliana féilire, in aghaidh na hearnála le haghaidh catagóir chabhrach agus in aghaidh an aonaid táirgeachta.

(13)

Ba cheart don tSualainn idirdhealú a dhéanamh idir an chabhair ina réigiúin thuaisceartacha agus méideanna bliantúla cabhrach a shocrú de réir déine an bhaic nádúrtha agus de réir chritéir oibiachtúla agus thrédhearcacha eile a bhfuil baint acu leis an gcuspóir a leagtar amach in Airteagal 142(3), an tríú fomhír den Ionstraim Aontachais, is é sin an táirgeadh agus an phróiseáil phríomhúil traidisiúnta a choinneáil ar bun, feabhas a chur ar na struchtúir do tháirgeadh, margú agus próiseáil na dtáirgí talmhaíochta, dáileadh na dtáirgí sin a éascú agus a áirithiú go ndéanfar an comhshaol agus an timpeallacht tuaithe a chaomhnú.

(14)

Ba cheart an chabhair a íoc go bliantúil bunaithe ar líon iarbhír na dtosca táirgeachta incháilithe. Ba cheart ligean don tSualainn áfach an cabhair le haghaidh bainne bó, béaróga agus muca lena marú chomh maith le hiompar bó bainne a íoc i dtráthchodanna bliantúla. Beidh an chabhair do bhainne bó bunaithe ar an táirgeadh iarbhír chun leanúnachas an táirgthe a áirithiú.

(15)

Ba cheart róchúiteamh do na táirgeoirí a sheachaint trí íocaíochtaí neamhdhlite a aisghabháil go pras agus roimh an 1 Meitheamh den bhliain dár gcionn ar a dhéanaí.

(16)

Mar a fhoráiltear in Airteagal 142(2) den Ionstraim Aontachais, níor cheart go dtiocfadh méadú ar an táirgeacht fhoriomlán thar an leibhéal táirgeachta traidisiúnta sa limistéar atá cumhdaithe faoin scéim cabhrach Nordach mar thoradh ar an gcabhair a dheonaítear faoin gCinneadh seo.

(17)

Dá bhrí sin, is gá líon uasta bliantúil na dtosca táirgeachta incháilithe do gach catagóir cabhrach, agus uasmhéid bliantúil incháilithe táirgeachta do bhainne bó, a bhunú, ar leibhéal atá cothrom leis an leibhéal sna tréimhsí tagartha nó níos ísle ná sin.

(18)

I gcás inar mó líon na dtosca táirgthe i gcatagóir, nó méid an táirgthe do bhainne bó, ná an t-uasleibhéal i mbliain ar leith, ba cheart líon na dtosca táirgeachta incháilithe nó méid an bhainne bó a laghdú, chun meánmhéideanna 5 bliana a urramú, faoi líon comhfhreagrach de thosca táirgeachta sna blianta féilire tar éis na bliana inar sáraíodh an t-uasmhéid, ach amháin i gcás cabhair iompair do bhainne bó, do bhéaróga agus do mhuca lena marú agus do bhainne bó ar féidir an méid incháilithe a laghdú faoi mhéid a fhreagraíonn don mhéid breise sa mhí dheireanach den bhliain inar sáraíodh an t-uasmhéid.

(19)

Ós rud é gur cheart, leis an bhfógra faoi thograí chuig an gCoimisiún maidir le fadú agus leasú a dhéanamh ar an gcabhair a údaraítear faoin gCinneadh seo, go mbeifí in ann measúnú ar an scéim a ullmhú go tráthúil, is gá an fógra sin a cheadú sa bhliain chéanna leis an tuarascáil 5 bliana agus síneadh a chur le tréimhse bhailíochta údarú na scéime cabhrach Nordaí ó chúig bliana go sé bliana.

(20)

I gcomhréir le hAirteagal 143(2) den Ionstraim Aontachais, cuirfidh an tSualainn faisnéis ar fáil don Choimisiún maidir le cur chun feidhme agus éifeachtaí na cabhrach. Chun measúnú níos fearr a dhéanamh ar éifeachtaí fadtéarmacha na cabhrach agus d’fhonn leibhéil na cabhrach a shocrú mar mheáin ilbhlianta, is iomchuí tuairisciú a dhéanamh ar éifeachtaí socheacnamaíocha na cabhrach gach 5 bliana agus tuarascálacha bliantúla a sholáthar ina mbeidh an fhaisnéis airgeadais agus an fhaisnéis cur chun feidhme eile is gá chun a áirithiú go gcomhlíonfar na coinníollacha a leagtar síos sa Chinneadh seo.

(21)

Is iomchuí na rialacha a shonrú a bheidh infheidhme maidir le leasuithe ar an scéim arna tabhairt isteach ag an gCoimisiún nó arna moladh ag an tSualainn chun ionchais dhlisteanacha thairbhithe na cabhrach a chosaint agus chun leanúnachas na scéime a áirithiú ionas gur féidir cuspóirí Airteagal 142 den Ionstraim Aontachais a shaothrú go héifeachtúil.

(22)

Ba cheart don tSualainn a áirithiú go ndéanfar bearta rialaithe iomchuí i leith tairbhithe cabhrach. Chun éifeachtacht na mbeart sin agus trédhearcacht i gcur chun feidhme na scéime cabhrach Nordaí a áirithiú, ba cheart na bearta rialaithe sin a ailíniú a mhéid is féidir leis na bearta a dhéantar faoin gcomhbheartas talmhaíochta.

(23)

Chun an aidhm maidir leis an táirgeadh a choinneáil ar bun, mar a luaitear in Airteagal 142 den Ionstraim Aontachais, agus chun riar na tacaíochta a éascú, ba cheart feidhm a bheith ag an gCinneadh seo ón 1 Eanáir 2023.

(24)

Ar mhaithe le soiléireacht, ba cheart Cinneadh (AE) 2018/479 a aisghairm. Is iomchuí bearta idirthréimhseacha a sholáthar maidir le tuairisciú ar an tacaíocht de bhun Airteagal 142 den Ionstraim Aontachais arna íoc sa tréimhse 2018-2022 faoi Chinneadh (AE) 2018/479 ón gCoimisiún,